Yehovah en ’brenki ai’ e ondrosuku ala sma
Yehovah en ’brenki ai’ e ondrosuku ala sma
’Yehovah en brenki ai e ondrosuku den manpikin fu libisma.’—PS. 11:4.
1. Sortu sma yu lobi?
FA YU feni en te sma e broko den ede trutru nanga yu? Te yu e aksi den fa den e denki fu wan tori, dan den e taigi yu krin fa den e denki. Te yu abi yepi fanowdu, dan den de klariklari fu yepi yu. Te yu e suku rai na den, dan den e gi yu dati na wan lobi-ati fasi (Ps. 141:5; Gal. 6:1). Yu no lobi den sortu sma dati? We, Yehovah nanga en Manpikin e broko den ede tu nanga yu. Fu taki en leti, nowan tra sma e broko en ede nanga yu, leki fa Yehovah nanga en Manpikin e du dati. Den no e du dati fu di den e suku wini gi densrefi, ma den wani yepi yu fu „grabu a trutru libi hori bun steifi”.—1 Tim. 6:19; Openb. 3:19.
2. Fa Yehovah e sori taki a e broko en ede nanga den futuboi fu en?
2 A psalm skrifiman David ben sori taki Yehovah trutru e broko en ede nanga wi. A ben taki: „[Yehovah] en eigi ai e luku, en eigi ai di e brenki e ondrosuku den manpikin fu libisma” (Ps. 11:4). Iya, Gado no e luku wi nomo, ma a e ondrosuku wi. David ben skrifi tu: „Yu ondrosuku mi ati, yu ondrosuku na neti . . . yu sa kon si taki mi no abi bedrigifasi” (Ps. 17:3). A de krin taki David ben sabi heri bun taki Yehovah trutru ben e broko en ede nanga en. A ben sabi taki, te a ben o tan prakseri sani di no fiti, noso te a ben o kon abi bedrigifasi, dan a sani dati ben o hati den firi fu Yehovah. Te fu kaba Yehovah no ben o feni en bun moro. Yu e si Yehovah leki wan trutru sma, neleki fa David ben du dati?
Yehovah e si na ati
3. Fa Yehovah sori taki a no e tan poti prakseri na den pikinpikin fowtu di wi e meki?
3 Yehovah e luku spesrutu suma wi de trutru na ini wi ati (Ps. 19:14; 26:2). Fu di a lobi wi, meki a no e tan poti prakseri na den pikinpikin fowtu di wi e meki. Fu eksempre, di Sara, a wefi fu Abraham, no ben taigi na engel san tru, dan na engel ben man si taki a ben frede èn taki a ben e syen. Dati meki na engel taigi en nomo taki a sani di a taki, no tru (Gen. 18:12-15). Di a famiri-edeman Yob ben fruklari „en eigi sili regtfardiki, na presi taki a ben fruklari Gado regtfardiki”, dan dati no tapu Yehovah fu blesi en. Yehovah ben sabi taki Yob ben kisi hebi tesi fu Satan (Yob 32:2; 42:12). Èn di na uma fu Sarfat ben krutu a profeiti Elia, dan Yehovah no atibron nanga na uma disi. Gado ben sabi taki a ben e sari srefisrefi fu di en wan-enkri pikin ben kon dede.—1 Kow. 17:8-24.
4, 5. Fa Yehovah sori switifasi gi Abimeilek?
4 Fu di Yehovah e ondrosuku na ati, meki a sori switifasi srefi gi sma di no ben e dini en. Luku fa a ben handri nanga Abimeilek di ben de kownu fu Gerar, wan foto fu den Filisteasma. Abimeilek ben teki Sara fu tron en wefi, aladi a no ben sabi taki Sara ben trow nanga Abraham. Ma fosi Abimeilek didon nanga Sara, dan Yehovah taigi en a sani disi na ini wan dren: „Mi sabi taki yu du a sani disi nanga wan krin ati. Sobun, na mi meki taki yu no sondu teige mi. Na fu dati ede meki mi no gi yu na okasi fu fasi en. Ma now yu musu gi a man en wefi baka, bika a man na wan profeiti. Dan a o begi gi yu. Na so fasi yu kan tan libi.”—Gen. 20:1-7.
5 A no de fu taki dati Yehovah ben kan strafu Abimeilek di ben e anbegi falsi gado. Ma Gado ben si taki a man disi no ben handri na wan bedrigi fasi. Yehovah hori a sani disi na prakseri èn a sori switifasi gi a kownu. Yehovah sori en fa a ben kan kisi pardon so taki a ben kan „tan libi”. A no so wan Gado yu wani anbegi?
6. Na sortu fasi Yesus ben de leki en Tata?
6 Yesus ben de soifri leki en Tata. A ben e poti prakseri na den bun fasi fu den disipel fu en, èn a ben de klariklari fu gi den pardon gi den fowtu fu den (Mark. 10:35-45; 14:66-72; Luk. 22:31, 32; Yoh. 15:15). Den wortu di Yesus taki na Yohanes 3:17, e sori soifri fa Yesus ben de. Drape skrifi: „Gado no seni en Manpikin kon na grontapu fu krutu grontapu, ma fu meki grontapu kisi frulusu nanga yepi fu en.” Iya, Yehovah nanga Yesus abi bigi lobi gi wi, èn a lobi dati no e kenki. A sani disi tru, fu di den wani trutru taki wi kisi têgo libi (Yob 14:15). Fu di Yehovah lobi wi na a fasi dati, meki wi kan frustan fu san ede a e ondrosuku wi. Wi e kon frustan tu fa a e si wi, èn fu san ede a e gi wi trangaleri te a e si taki wi no e handri na wan yoisti fasi.—Leisi 1 Yohanes 4:8, 19.
Yehovah e ondrosuku wi na wan lobi-ati fasi
7. Fu san ede Yehovah e ondrosuku wi?
7 A no ben o fiti srefisrefi fu si Yehovah leki wan skowtu na hemel di e tan luku wi, soso fu kisi wi te wi e meki wan fowtu! Satan na a sma di e krutu wi (Openb. 12:10). A e taki srefi dati wi e suku wi eigi bun, aladi dati no de so! (Yob 1:9-11; 2:4, 5) A psalm skrifiman ben taki disi fu Gado: „Efu na fowtu yu ben musu luku, o Yah, o Yehovah, dan suma ben kan tan tanapu?” (Ps. 130:3) A no de fu taki dati nowan sma ben o man tan tanapu (Preik. 7:20). Na presi fu dati, Yehovah de leki wan lobi-ati papa di e luku den pikin fu en, fu di a no wani taki ogri miti den. Nofo tron, a e sori wi sortu swakifasi wi abi so taki wi kan wai pasi gi ogri.—Ps. 103:10-14; Mat. 26:41.
8. Fa Yehovah e gi den futuboi fu en rai nanga trangaleri?
8 Gado e gi wi rai nanga trangaleri nanga yepi fu Bijbel èn nanga yepi fu „a getrow èn koni srafu”. A sani disi e sori taki A lobi wi trutru (Mat. 24:45; Hebr. 12:5, 6). Yehovah e gebroiki a Kresten gemeente tu fu yepi wi, èn a gi „libisma leki presenti” fu tiri wi (Ef. 4:8). Boiti dati, Yehovah e luku wi fu si efu wi e teki a leri di a e gi leki wan papa, èn a e suku fu yepi wi moro fara. Psalm 32:8 e taki: „Mi sa meki yu kisi a koni fu man si sani krin èn mi sa leri yu a pasi di yu musu waka. Mi sa gi yu rai nanga mi ai na yu tapu.” Dati meki a prenspari srefisrefi taki wi e arki Yehovah ala ten! Wi musu tan saka wisrefi na en ondro, èn wi musu si en leki wi lobi-ati Leriman nanga Tata.—Leisi Mateyus 18:4.
9. Nanga sortu fasi wi musu luku bun, èn fu san ede?
9 Ma te wi abi heimemre, te wi abi wan swaki bribi, noso te wi e meki „a bedrigifasi fu sondu” abi krakti na wi tapu, dan dati kan meki wi ati kon tranga. Meki a sani dati noiti no pasa nanga wi (Hebr. 3:13; Yak. 4:6). Nofo tron, wan sma e bigin kisi den fasi disi te a e tan poti prakseri na sani di no fiti, noso te a e kweki takru lostu. Te fu kaba, a sma disi kan weigri srefi fu teki rai di komoto fu Bijbel. San moro ogri, na taki en ati kan kon tranga so te, taki a e kon tron wan feanti fu Gado. A sani disi no bun srefisrefi! (Odo 1:22-31) Luku na eksempre fu Kain, a fosi pikin fu Adam nanga Eva.
Yehovah e si ala sani èn a e handri na wan reti fasi
10. Fu san ede Yehovah no ben feni na ofrandi fu Kain bun? San Kain du?
10 Di Kain nanga Abel ben tyari den ofrandi fu den gi Yehovah, dan A no ben luku a presenti nomo, ma a ben luku tu fu san ede den ben tyari den ofrandi dati. Dati meki di Gado si taki Abel ben tyari na ofrandi fu en nanga bribi, dan a sori en taki a feni na ofrandi dati bun. Ma a no ben feni a di fu Kain bun, fu di a ben si taki Kain no ben abi bribi (Gen. 4:4, 5; Hebr. 11:4). Na presi taki Kain ben teki leri fu a sani disi èn kenki den fasi fu en, a kisi bigi atibron nanga en brada.—Gen. 4:6.
11. Fa Kain sori taki a ben abi wan takru ati, èn san wi kan leri fu a tori disi?
11 Fu di Yehovah ben si taki Kain ben o du wan ogri, meki a taki nanga Kain fu di a ben e broko en ede nanga en. Yehovah sori en taki efu a ben o du bun, dan A ben o prisiri nanga en. A de wan sari sani taki Kain no gi yesi na a rai fu a Mekiman fu en, èn a kiri en brada. A grofu fasi fa Kain piki Gado ben sori moro krin fa en ati ben takru. Gado ben aksi en: „Pe yu brada Abel de?” Kain piki: „Mi no sabi. Na mi musu luku mi brada?” (Gen. 4:7-9) Na ati kan kori wi trutru. Iya, a kan meki taki wi e weigri fu teki a krin rai di wi e kisi fu Gado! (Yer. 17:9) Fu dati ede, meki wi teki leri fu den sortu tori disi, èn meki wi de gaw fu wai pasi gi takru denki nanga takru lostu. (Leisi Yakobus 1:14, 15.) Te wi e kisi Bijbel rai, dan meki wi sori warderi gi den rai dati èn meki wi si den leki wan buweisi taki Yehovah lobi wi.
Wi no man kibri sondu gi Yehovah
12. Fa Yehovah e handri te sma e du sondu?
12 Son leisi sma e denki taki te trawan no si taki den du sondu, dan den no sa kisi strafu (Ps. 19:12). Fu taki en leti, wi no man kibri nowan enkri sondu gi Gado. „Den ai fu a sma di wi musu gi frantwortu, e si ala sani krin èn nowan sani kibri gi en” (Hebr. 4:13). Yehovah na wan Krutuman di e ondrosuku den moro dipi firi fu wi, èn te wi e du ogri, dan a sa krutu wi na wan reti fasi. A de „wan Gado di abi sari-ati nanga switifasi. En ati no e bron esi, a abi bun-ati nanga waarheid pasa marki.” Ma te sma e „tan du sondu fu espresi”, noso te den abi bedrigifasi, dan a ’no sa puru a strafu fu den kwetikweti’ efu den no abi berow (Ex. 34:6, 7; Hebr. 10:26). Wi kan si dati te wi e luku fa Yehovah handri nanga Akan, Ananias, èn nanga Safira.
13. Fa a fowtu denki fu Akan meki taki a du wan ogri te fu kaba?
13 Akan ben trangayesi wan krin komando fu Gado. A ben teki wan tu fu den gudu fu a foto Yerikow èn a kibri den na ini a tenti fu en. Èn soleki fa a sori, dan en osofamiri ben sabi fu a tori. Di a sondu fu en kon na krin, dan Akan sori taki a ben sabi taki a du wan seryusu sondu. A ben taki: „Mi sondu teige Yehovah” (Yos. 7:20). Neleki Kain, Akan ben kon abi wan takru ati. Akan ben kon gridi, èn na a sani dati meki taki a handri na wan bedrigi fasi. Fu taki en leti, Akan ben fufuru sani fu Yehovah, fu di den gudu fu Yerikow ben de fu Yehovah. A sani disi tyari takru bakapisi kon gi en nanga en osofamiri.—Yos. 7:25.
14, 15. Fu san ede Gado no ben feni Ananias nanga Safira bun? San wi e leri fu a tori disi?
14 Ananias nanga en wefi Safira ben de memre fu a fosi Kresten gemeente na ini Yerusalem. Baka a Pinksterfesa fu a yari 33, den Kresten ben e tyari moni kon na wán. A moni disi ben de fu yepi den nyun bribiman di ben komoto fu farawe kondre èn di no ben gowe libi Yerusalem ete. Den Kresten srefi ben kan bosroiti omeni moni den ben o gi. Ananias seri wan gron fu en fu gi a moni dati na den brada, ma a no gi den brada ala a moni. Ma Ananias du neleki a ben gi den brada ala a moni, èn en wefi ben sabi fu a tori. A no de fu taki, dati den tu sma disi ben wani kisi spesrutu grani na ini a gemeente. Ma den ben handri na wan bedrigi fasi. Na wan wondru fasi, Yehovah meki na apostel Petrus kon sabi san den tu sma disi ben du. Dati meki Petrus aksi Ananias fu san ede a ben du a sondu dati. Wantewante Ananias fadon dede. Syatu baka dati, Safira dede tu.—Tori. 5:1-11.
15 Di Ananias nanga Safira du a sondu, dan a no lasi den ben lasi densrefi. Den ben teki a bosroiti fu fruteri den apostel wan lei, soso fu kori den. San moro ogri srefi, na taki den ’pruberi fu bedrigi a santa yeye nanga Gado’. A fasi fa Yehovah handri e sori krin taki a no sa gi pasi taki hoigriman e kori a gemeente. Fu tru, „a de wan tumusi takru sani fu fadon na ini na anu fu a libi Gado”!—Hebr. 10:31.
Tan abi wan krin ati ala ten
16. (a) Fa Satan e pruberi fu pori na ati fu a pipel fu Gado? (b) Na sortu fasi Didibri e pruberi fu pori na ati fu sma na ini a kontren fu yu?
16 Satan e du ala san a man fu pori wi ati, so taki Yehovah no sa feni wi bun moro (Openb. 12:12, 17). A sani disi de krin fu si te wi e luku taki furu sma na ini grontapu lobi hurudu nanga ogridu. Nanga yepi fu computer nanga tra sani sma man luku fisti sekstori makriki. Noiti wi musu meki Satan kori wi. Na presi fu dati, wi musu abi a srefi denki leki a di fu a psalm skrifiman David, di ben skrifi: „Mi sa handri nanga koni, èn mi sa du dati sondro fowtu. . . . Mi sa waka ini a soifri retifasi fu mi ati na ini mi oso.”—Ps. 101:2.
17. (a) Fu san ede Yehovah e tyari sondu di sma e du kibrikibri, kon na krin te fu kaba? (b) Sortu fasti bosroiti wi musu abi?
17 Te sma na ini a ten disi e du seryusu sondu èn te den e bedrigi trawan, dan Yehovah no e tyari dati kon na krin na wan wondru fasi soleki fa a ben e du dati fosi. Ma a e si ala sani èn na en eigi ten èn na wan fasi di ensrefi feni bun, a sa tyari sani di sma e du kibrikibri, kon na krin. Paulus ben taki: „Den sondu fu son sma de krin fu si èn wantewante den e kisi a strafu fu den, ma den sondu fu tra sma e kon na krin tu, ma bakaten fosi” (1 Tim. 5:24). A moro prenspari reide fu san ede Yehovah e tyari ogri kon na krin, na fu di a lobi wi. A lobi a gemeente èn a wani meki a gemeente tan krin. Boiti dati, a e sori sari-ati gi den wan di ben du sondu, ma di abi trutru berow now (Odo 28:13). Sobun, meki wi du ala san wi man fu tan dini Gado nanga wi heri ati èn meki wi wai pasi gi ala sani di kan pori wi ati.
Tan dini Gado nanga yu heri ati
18. Fa Kownu David ben wani taki en manpikin ben musu dini Gado?
18 Kownu David ben taigi en manpikin Salomo: „Sabi a Gado fu yu papa èn dini en nanga yu heri ati èn nanga wan prisiri sili; bika Yehovah e ondrosuku ala ati, èn a sabi ala sani di sma e prakseri fu go du” (1 Kron. 28:9). David no ben wani taki en manpikin ben musu bribi nomo na ini Gado. Ma a ben wani taki Salomo ben musu frustan krin fa Yehovah e broko en ede nanga den futuboi fu En. Yu de nanga tangi taki Yehovah e broko en ede trutru nanga wi?
19, 20. San yepi David fu kon krosibei na Gado, soleki fa Psalm 19:7-11 e sori? Fa wi kan teki na eksempre fu David?
19 Yehovah sabi taki sma di abi wan bun ati sa kon krosibei na en. A sabi tu taki te den e kon sabi den moi fasi fu en, dan dati sa naki den ati. Fu dati ede, Yehovah wani taki wi musu kon sabi en èn a wani tu taki wi musu kon sabi den tumusi moi fasi fu en. Fa wi kan du dati? Wi o kon sabi en moro bun, te wi e studeri a Wortu fu en, èn te wi e ondrofeni den blesi fu en na ini wi libi.—Odo 10:22; Yoh. 14:9.
20 Yu e leisi Bijbel ibri dei, èn yu e frustan taki a komoto fu Gado? Yu e begi Gado fu yepi yu fu du den sani di yu e leri? Yu e si o prenspari a de fu hori yusrefi na Bijbel gronprakseri? (Leisi Psalm 19:7-11.) Efu dati de so, dan a bribi di yu abi na ini Yehovah èn a lobi di yu abi gi en sa kon moro tranga. Èn Yehovah sa kon moro krosibei na yu. Na wan agersi fasi, a sa waka nanga yu aladi a e hori yu anu (Yes. 42:6; Yak. 4:8). Iya, Yehovah sa blesi yu èn a sa yepi yu fu tan krosibei na en, aladi yu e waka na tapu a smara pasi di e tyari sma go na libi. Na so a e sori taki a lobi yu trutru.—Ps. 91:1, 2; Mat. 7:13, 14.
San yu ben sa piki?
• Fu san ede Yehovah e ondrosuku wi?
• San meki taki son sma tron feanti fu Gado?
• Fa wi kan sori taki wi e si Yehovah leki wan trutru sma?
• Fa wi kan tan dini Gado nanga wi heri ati?
[Aksi fu a tori disi]
[Prenki na tapu bladzijde 4]
Fa Yehovah de leki wan papa di e luku wi fu di a no wani taki ogri miti wi?
[Prenki na tapu bladzijde 5]
San wi e leri fu na eksempre fu Ananias?
[Prenki na tapu bladzijde 6]
San sa yepi wi fu tan dini Yehovah nanga wi heri ati?