Yu fosi e sori lespeki gi trawan?
Yu fosi e sori lespeki gi trawan?
„Unu fosi musu bigin sori trawan lespeki.”—ROM. 12:10.
1. San sma na furu presi fu grontapu no e du moro?
NA INI son kontren fu grontapu, a de a gwenti taki yongu pikin e saka kindi sidon na gron na wan lespeki fasi te den de na mindri bigisma. Na so fasi a no sa gersi leki den langa moro den bigisma. Na ini den libimakandra disi sma feni tu taki wan pikin no e sori lespeki gi bigisma te a e drai en baka gi den. A tru taki difrenti fasi de fa sma fu tra kulturu e sori lespeki gi trawan, ma den fasi disi e meki wi prakseri a Wet di Gado ben gi Moses. Wan fu den komando fu a Wet disi ben taki: „Un musu abi lespeki gi den graniwan, èn un musu hori wan owru sma na prakseri” (Lef. 19:32). Ma a de wan sari sani taki na furu presi, sma no e sori lespeki moro gi trawan. Fu taki en leti, a sani disi de fu si na ala sei.
2. Gi suma wi musu sori lespeki, soleki fa Gado Wortu e taki?
2 Gado Wortu e sori taki a de tumusi prenspari fu sori lespeki gi trawan. Bijbel e taigi wi fu gi grani na Yehovah èn na Yesus (Yoh. 5:23). Wi e kisi a komando tu fu sori lespeki gi famiriman, gi wi Kresten brada nanga sisa, èn gi tra sma (Rom. 12:10; Ef. 6:1, 2; 1 Petr. 2:17). San na wan tu fasi fa wi kan gi grani na Yehovah? Fa wi e sori taki wi e lespeki wi Kresten brada nanga sisa trutru? Meki wi go luku den aksi disi èn sosrefi wan tu trawan di abi fu du nanga a tori disi.
Gi grani na Yehovah èn na a nen fu en
3. San na wan prenspari fasi fa wi e gi grani na Yehovah?
3 Wan prenspari fasi fa wi e gi grani na Yehovah, na te wi e sori lespeki gi a nen fu en. Fu taki en leti, wi na ’wan pipel di e tyari en nen’ (Tori. 15:14). A de wan bigi grani trutru fu tyari a nen fu na almakti Gado, Yehovah. A profeiti Mika ben taki: „Bika ibri pipel o tyari a nen fu en gado, èn den o du san a gado fu den wani. Ma fu ala ten wi o tyari a nen fu Yehovah wi Gado èn wi o du san a wani. Iya, fu têgo wi o du dati” (Mik. 4:5). Wi e „tyari a nen fu Yehovah” te wi e pruberi ibri dei fu libi na wan fasi di e gi glori na a nen dati. Te wi e libi na wan fasi di no e kruderi nanga a bun nyunsu di wi e preiki, dan wi sa „pori” a nen fu Gado, noso wi no sa sori lespeki gi a nen dati. Na dati Paulus ben wani taki den Kresten na ini Rome ben musu hori na prakseri.—Rom. 2:21-24.
4. Fa yu e si a grani di yu abi fu gi kotoigi fu Yehovah?
4 Wi e gi grani tu na Yehovah te wi e du a preikiwroko. Na ini owruten, Yehovah ben gi a pipel Israel a kari fu de en kotoigi. Ma den no ben du san a ben fruwakti fu den (Yes. 43:1-12). Nofo tron, den ben e opo densrefi teige Yehovah, èn den „ben e meki a Santawan fu Israel firi sari” (Ps. 78:40, 41). Te fu kaba, Yehovah no ben feni a pipel dati bun moro kwetikweti. Ma wi na ini a ten disi, de nanga bigi tangi gi a grani di wi abi fu gi kotoigi fu Yehovah èn fu meki sma kon sabi en nen. Wi e du den sani dati fu di wi lobi en, èn fu di wi abi a tranga winsi taki a nen fu en e kon santa. Fu di wi sabi den tru tori fu Yehovah èn den sani di a o du, meki wi wani fruteri trawan den sani dati, a no so? Wi e firi leki na apostel Paulus di ben taki: „Mi de fruplekti fu preiki. Fu tru, helu fu mi efu mi no preiki a bun nyunsu!”—1 Kor. 9:16.
5. Fu san ede wi musu frutrow tapu Yehovah fu man sori lespeki gi en?
5 A psalm skrifiman David ben taki: „Den sma di sabi yu nen sa frutrow na yu tapu, bika trutru yu no sa libi den wan di e suku yu, o Yehovah” (Ps. 9:10). Efu trutru wi sabi Yehovah èn efu wi e lespeki en, dan wi sa frutrow na en tapu neleki fa den futuboi fu en na ini owruten ben e du dati. Te wi e frutrow tapu Yehovah na a fasi dati, èn te wi abi a sortu bribi dati, dan dati na ete wan fasi fa wi e gi grani na en. Gado Wortu e sori taki wi musu frutrow tapu Yehovah fu man sori lespeki gi en. Di Israel fu owruten ben sori taki den no ben e frutrow na En tapu, dan Yehovah aksi Moses: „O langa den sma disi o tan wisiwasi mi? O langa den sma disi no o bribi mi? Luku omeni wondru mi du gi den” (Num. 14:11). Ma te wi abi a frutrow taki Yehovah sa kibri wi èn taki a sa yepi wi, srefi te tesi e miti wi, dan wi e sori taki wi e lespeki en.
6. Fu san ede wi e sori bigi lespeki gi Yehovah?
6 Yesus ben sori taki a lespeki di wan sma abi gi Yehovah, musu komoto fu en ati. Di a ben e taki nanga den wan di no ben e anbegi Yehovah nanga den heri ati, dan a gebroiki wortu di Yehovah ben taki wan leisi. Yesus ben taki: „A pipel disi e gi mi grani nanga den mofo, ma den ati no de nanga mi kwetikweti” (Mat. 15:8). Te wi lobi Yehovah nanga wi heri ati, dan wi sa sori trutru lespeki gi en (1 Yoh. 5:3). Èn wi e hori na prakseri tu taki Yehovah ben gi wi a pramisi disi: „Mi sa gi grani na den sma di e gi mi grani.”−1 Sam. 2:30.
Den wan di e teki fesi e sori lespeki gi trawan
7. (a) Fu san ede den brada di abi frantwortu musu sori lespeki gi den wan di de na den ondro? (b) Fa Paulus ben e sori lespeki gi den brada nanga sisa?
7 Na apostel Paulus ben gi den Kresten brada nanga sisa fu en a rai disi: „Unu fosi musu bigin sori trawan lespeki” (Rom. 12:10). Den brada di abi frantwortu na ini a gemeente musu de wan eksempre gi trawan, èn fu dati ede den musu sori lespeki gi den wan di de na den ondro. Iya, ’den fosi musu bigin’ sori lespeki gi trawan. Dati meki a bun te den brada di abi bigi frantwortu e teki na eksempre fu Paulus. (Leisi 1 Tesalonikasma 2:7, 8.) Den brada na ini den gemeente di Paulus ben go luku, ben sabi taki noiti Paulus ben o aksi den fu du sani di ensrefi no ben wani du. Paulus ben e sori lespeki gi den brada nanga sisa fu en, èn a sani dati meki taki den ben abi lespeki gi en. Di Paulus ben taki „mi e begi unu fu du leki mi”, dan wi kan de seiker taki furu brada nanga sisa ben de klariklari fu du dati, fu di Paulus ben de wan bun eksempre.—1 Kor. 4:16.
8. (a) San na wan prenspari fasi fa Yesus ben sori lespeki gi den disipel fu en? (b) Fa owruman na ini a ten disi kan teki na eksempre fu Yesus?
8 Wan tra fasi fa wan brada di abi frantwortu e sori lespeki gi den wan di de na en ondro, na te a e taigi den fu san ede a e aksi den fu du spesrutu sani, noso fu san ede a e gi den spesrutu rai. Te a brada e handri na a fasi disi, dan a e teki na eksempre fu Yesus. Fu eksempre, di Yesus ben taigi den disipel fu en fu begi Gado fu seni moro wrokoman fu go du a kotiwroko, dan a taigi den tu fu san ede den ben musu du dati. A ben taki: „A kotiwroko bigi, ma furu wrokoman no de. Fu dati ede, begi a Masra fu a kotiwroko meki a seni wrokoman fu go du a kotiwroko fu en” (Mat. 9:37, 38). Di a ben taigi den disipel fu en fu „tan na ai”, dan a taigi den tu fu san ede den ben musu du dati. A ben taki: „Bika unu no sabi sortu dei un Masra o kon” (Mat. 24:42). Nofo tron, Yesus no ben e taigi den disipel fu en nomo san den ben musu du, ma a ben e taigi den tu fu san ede den ben musu du den sani dati. Na so a ben e sori lespeki gi den. A no de fu taki dati Kresten opziener musu teki a moi eksempre disi di Yesus gi den!
Lespeki a gemeente fu Yehovah èn teki a leri di yu e kisi
9. Te wi e sori lespeki gi ala wi Kresten brada nanga sisa na heri grontapu, èn gi den wan di e teki fesi, dan san dati e sori? Fruklari disi.
9 Fu man gi grani na Yehovah, dan wi musu sori lespeki gi ala wi Kresten brada nanga sisa na heri grontapu, èn gi den wan di e teki fesi na ini a gemeente disi. Te wi e gi yesi na den rai di wi e kisi fu a srafu-grupu di e du san Gado e fruwakti fu en, dan wi e sori lespeki gi a seti fu Yehovah. Na ini a Kresten gemeente fu a fosi yarihondro, na apostel Yohanes ben feni en fanowdu fu piri-ai gi den wan di no ben abi lespeki gi den brada di ben e teki fesi. (Leisi 3 Yohanes 9-11.) Den sani di Yohanes taki e sori taki sma no ben abi lespeki gi den opziener, èn den no ben e teki den leri nanga den rai di den brada disi ben e gi den. Koloku taki furu Kresten no ben de so. Na a ten di den apostel ben de na libi, a ben de krin taki a heri grupu fu brada nanga sisa ben e sori bigi lespeki gi den wan di ben e teki fesi.—Fil. 2:12.
10, 11. Fruklari nanga yepi fu Bijbel fu san ede a fiti taki son brada abi spesrutu frantwortu na ini a Kresten gemeente.
10 Yesus ben taigi den disipel fu en: „Un alamala na brada.” Dati meki son sma feni taki nowan sma musu teki fesi na ini a Kresten gemeente (Mat. 23:8). Ma den Hebrew Buku fu Bijbel nanga den Griki Buku fu Bijbel abi furu eksempre na ini fu mansma di Gado ben poti fu teki fesi. Te wi e luku na eksempre fu den famiri-edeman, den krutuman, nanga den kownu fu den Hebrewsma fu owruten, dan wi e si krin taki Yehovah e gebroiki libisma fu tiri a pipel fu en. Te a pipel fu en no ben e sori lespeki gi den sma di ben e teki fesi, dan Yehovah ben e gi den trangaleri.—2 Kow. 1:2-17; 2:19, 23, 24.
11 Den Kresten fu a fosi yarihondro, ben sori lespeki tu gi den apostel di ben e teki fesi (Tori. 2:42). Fu eksempre, Paulus ben e gi rai na den Kresten brada fu en (1 Kor. 16:1; 1 Tes. 4:2). Ma toku a ben de klariklari tu fu saka ensrefi na ondro den wan di ben abi moro frantwortu leki en (Tori. 15:22; Gal. 2:9, 10). Iya, Paulus ben abi a yoisti denki fu den wan di ben e teki fesi na ini a Kresten gemeente.
12. San na den tu sani di wi kan leri fu den eksempre na ini Bijbel, te a abi fu du nanga a teki di sma e teki fesi?
12 A tori disi e leri wi tu sani. A fosi sani, na taki „a getrow èn koni srafu” e meki a Tiri Skin poti brada fu tyari spesrutu frantwortu. A sani disi e kruderi nanga Bijbel. Èn son brada e kisi a frantwortu fu tiri tra brada di e teki fesi (Mat. 24:45-47; 1 Petr. 5:1-3). A di fu tu sani di wi e leri, na taki wi alamala, sosrefi brada di e teki fesi, musu sori lespeki gi den wan di e tiri wi. We, san na wan tu fasi fa wi kan sori lespeki gi den wan di e teki fesi na ini den Kresten gemeente di de na heri grontapu?
Sori lespeki gi opziener di e go luku tra gemeente
13. Fa wi kan sori lespeki gi den sma di e teki fesi na ini a Kresten gemeente na ini a ten disi?
13 Paulus ben taki: ’Mi brada, wi e begi unu fu abi lespeki gi den sma di e wroko tranga na un mindri èn di e teki fesi na un mindri na ini a wroko fu Masra, èn di e frumane unu; un musu abi bigi lespeki gi den fu a wroko di den e du èn un musu du dati nanga lobi. Suku fu libi na ini vrede nanga makandra’ (1 Tes. 5:12, 13). A no de fu taki dati opziener di e go luku tra gemeente, na „sma di e wroko tranga”. Dati meki wi musu sori „bigi lespeki” gi den. Wán fasi fa wi kan du dati, na te wi de klariklari fu teki a rai di den e gi wi. Te so wan opziener e gi wi rai di e komoto fu a srafu-grupu, dan a „koni fu Gado” sa meki taki wi de „klariklari fu gi yesi” na en.—Yak. 3:17.
14. Fa a gemeente e sori taki den abi bigi lespeki gi opziener di e kon luku a gemeente? San sa de a bakapisi?
14 Ma fa a de te den brada disi e gi wi a rai fu du sani tra fasi leki fa wi gwenti? Fu di wi wani sori lespeki gi den brada disi, meki a de fanowdu son leisi taki wi e dwengi wisrefi fu no krutu nanga den. Wi no sa taki sani soleki: „Dyaso wi no gwenti du sani na a fasi dati.” Wi no sa taki tu: „Kande dati e yepi na ini tra gemeente, ma a no e yepi na ini a gemeente disi.” Na presi fu dati, wi e du muiti fu teki a rai fu den brada disi. Te wi e hori na prakseri taki a gemeente na fu Yehovah èn taki Yesus na Edeman fu a gemeente, dan dati sa yepi wi fu gi yesi na den rai fu den opziener disi. Te a gemeente de klariklari fu teki den rai di den e kisi fu wan opziener di e kon luku a gemeente, dan dati e sori taki den abi bigi lespeki gi den brada disi. Na apostel Paulus ben prèise den brada na ini Korente fu di den ben gi yesi na den rai di na owruman Titus ben gi den di a ben go luku den. Na so den ben sori taki den ben abi lespeki gi Titus (2 Kor. 7:13-16). Na ini a ten disi, wi kan abi a dyaranti tu taki te wi de klariklari fu gi yesi na den rai di wi e kisi fu den opziener di e kon luku a gemeente, dan wi sa du a preikiwroko nanga moro prisiri.—Leisi 2 Korentesma 13:11.
„Gi grani na ala sortu sma”
15. San na wan tu fasi fa wi kan sori lespeki gi den Kresten brada nanga sisa fu wi?
15 Paulus ben skrifi: „Yu no musu taki grofu nanga wan man di owru kaba. Ma frumane en neleki a de yu eigi papa; frumane den yongu man neleki den na yu eigi brada, den owru uma neleki den na yu eigi mama, den yongu uma neleki den na yu eigi sisa èn du dati nanga wan krin ati. Lespeki den uma di lasi den masra na ini dede, ma di no abi nowan sma fu sorgu gi den” (1 Tim. 5:1-3). Iya, Gado Wortu e gi wi a rai fu gi grani na ala sma na ini a Kresten gemeente. Ma fa a de te yu nanga wan Kresten brada noso sisa abi wan kesekese? A sani dati sa tapu yu fu sori lespeki gi a Kresten dati? Noso yu sa pruberi fu kon si den Kresten fasi fu a sma dati di de wan futuboi fu Gado? Spesrutu den wan di e teki fesi, musu tan abi wan yoisti denki fu den Kresten brada nanga sisa fu den. Noiti den musu ’prei basi gi den skapu’ (1 Petr. 5:3). Iya, na ini a Kresten gemeente pe den brada nanga sisa lobi makandra trutru, furu okasi de fu sori lespeki gi makandra.—Leisi Yohanes 13:34, 35.
16, 17. (a) Fu san ede a de prenspari taki wi abi lespeki gi den sma di wi e miti na ini a preikiwroko, èn sosrefi gi den wan di e gens wi? (b) Fa wi e „gi grani na ala sortu sma”?
16 A no de fu taki dati wi no e sori lespeki soso gi den Kresten brada nanga sisa fu wi. Luku san Paulus ben skrifi den Kresten na ini a ten fu en: „Solanga a ten bun ete gi dati, meki wi du bun gi ala sma” (Gal. 6:10). Ma a no de fu taki dati te wan sma na wi wrokope, noso wan pikin na skoro no e handri bun nanga wi, dan kande a no makriki ala ten fu gi yesi na a rai dati. Na den momenti dati, wi musu memre den wortu disi: „No meki yu ati kon bron nanga den ogrisma” (Ps. 37:1). Te wi e gi yesi na a rai dati, dan dati sa yepi wi fu sori lespeki srefi gi sma di e gens wi. Te wi de na ini a preikiwroko, dan wi musu abi a yoisti denki tu fu wisrefi. Dati sa yepi wi fu piki ala sma na „wan safri fasi èn nanga bigi lespeki” (1 Petr. 3:15). Srefi a fasi fa wi e moi wisrefi, èn den krosi di wi e weri kan sori efu wi abi lespeki gi den sma di wi e miti na ini a preikiwroko.
17 Iya, te a abi fu du nanga den Kresten brada nanga sisa fu wi, noso nanga tra sma, dan wi wani pruberi fu gi yesi na a rai disi: „Gi grani na ala sortu sma, lobi ala brada, abi frede gi Gado, gi a kownu grani.”—1 Petr. 2:17.
San yu ben sa piki?
Fa yu kan sori lespeki gi:
• Yehovah?
• Den gemeente owruman nanga den opziener di e go luku den gemeente?
• Ibri sma na ini a gemeente?
• Den sma di yu e miti na ini a preikiwroko?
[Aksi fu a tori disi]
[Prenki na tapu bladzijde 23]
Den Kresten fu a fosi yarihondro ben e sori lespeki gi a tiri di den ben e kisi fu a tiri skin
[Prenki na tapu bladzijde 24]
Owruman na ala kondre e sori lespeki gi opziener di e go luku den gemeente, èn di a Tiri Skin poti fu teki fesi