„Du muiti fu du den sani di e tyari vrede kon”

TE WAN stonpasi nyun, dan a kan gersi leki a no man broko makriki. Ma baka wan pisi ten, a kan bigin priti, noso a kan kisi olo. A de fanowdu fu meki a pasi baka, so taki sma no e kisi mankeri èn so taki a pasi kan tan bun.

Na so a de tu taki ten na ten, wi kan abi wan kesekese nanga trawan, noso wi kan kisi trobi srefi nanga den. Na apostel Paulus ben sori taki den Kresten na ini Rome no ben e agri nanga makandra fu son tori. A ben gi den Kresten dati a rai disi: „Meki wi du muiti fu du den sani di e tyari vrede kon èn fu du den sani di e gi trawan deki-ati” (Rom. 14:13, 19). Fu san ede a de prenspari taki wi e „du muiti fu du den sani di e tyari vrede kon”? Fa wi kan handri nanga deki-ati èn na a yoisti fasi fu tyari vrede kon?

Fu san ede wi musu du muiti fu suku vrede?

Efu wan pasi priti èn sma no e meki en wantewante, dan den priti dati kan tron bigi olo di kan meki sma kisi mankeri. Na so a de tu taki te wi no e lusu kesekese di wi abi nanga trawan, dan dati kan tyari moro bigi problema kon. Na apostel Yohanes ben skrifi: „Efu wan sma e taki: „Mi lobi Gado”, ma toku a e teige en brada, dan a sma dati na wan leiman. Bika a sma di no lobi en brada di a man si, no man lobi Gado di a no man si” (1 Yoh. 4:20). Te wan Kresten no e lusu wan kesekese di a abi nanga en brada, dan te fu kaba a kan bigin teige a brada disi.

Yesus Krestes ben sori taki Yehovah no sa feni na anbegi fu wi bun te wi no e meki vrede nanga trawan. Yesus ben gi den disipel fu en a rai disi: „Fu dati ede, te yu e tyari yu ofrandi go na a altari èn drape yu e memre taki yu brada abi wan sani teige yu, dan libi yu ofrandi drape na fesi na altari, èn gowe go meki vrede nanga yu brada fosi, èn te yu drai kon baka, dan yu kan gi na ofrandi fu yu” (Mat. 5:23, 24). Iya, wan prenspari reide fu san ede wi musu meki vrede nanga trawan, na fu di wi wani plisi Yehovah Gado. *

Wan problema di ben de na ini a gemeente fu Filipi e sori san na wan tra reide fu san ede wi musu suku vrede. Tu Kresten sisa di nen Eodia nanga Sentike, ben abi wan kesekese, ma Bijbel no e taki fu san ede. Soleki fa a sori, dan a problema disi ben kan pori a vrede fu a heri  gemeente (Fil. 4:2, 3). Te wi no e lusu den kesekese di wi abi nanga trawan, dan heri esi tra sma kan kon sabi fu a tori. Efu wi wani taki den brada nanga sisa na ini a gemeente e tan lobi makandra èn taki den e tan na ini wánfasi, dan wi musu meki vrede nanga wi Kresten brada noso sisa.

Yesus ben taki: „Koloku fu den sma di e suku vrede” (Mat. 5:9). Te wi e suku vrede, dan wi sa de koloku. Boiti dati, te wi e libi na ini vrede nanga trawan, dan dati bun gi a gosontu fu wi, fu di „wan korostu ati na a libi fu den pisi fu a skin” (Odo 14:30). Ma te wi e hori sma na ati, dan wi kan kon siki makriki.

Furu Kresten e agri taki a de prenspari fu meki vrede nanga trawan. Ma kande yu e aksi yusrefi fa yu kan lusu wan kesekese di yu abi nanga wan trawan. Meki wi luku wan tu Bijbel rai di kan yepi wi.

Taki na wan switi fasi

Nofo tron, te pikinpikin priti de na ini wan stonpasi, dan wi kan tapu den priti dati. Wi kan gi wan brada noso wan sisa pardon te a meki wan pikin fowtu? Te wi e du dati, dan wi sa man lusu furu kesekese, fu di na apostel Petrus ben taki dati „lobi e tapu bun furu sondu”.—1 Petr. 4:8.

Ma son leisi wi ben kan feni taki a fowtu di wan sma meki, bigi so te, taki wi no man tapu ai gi a sani dati. Luku san ben pasa nanga den Israelsma, syatu baka di den teki a Pramisi Kondre abra. Fosi „a lo fu Ruben, a lo fu Gad, nanga na afu lo fu Manase” go na abrasei fu Yordan-liba, den seti „wan bun bigi altari”. Den tra lo fu Israel ben feni taki den tu nanga afu lo disi ben meki na altari fu anbegi falsi gado, èn den no ben man tapu ai gi a sani dati. Den sreka sani fu go feti nanga den lo di ben meki na altari.—Yos. 22:9-12.

Kande son Israelsma ben feni taki nofo buweisi ben de kaba taki den lo di ben meki na altari ben du wan seryusu sondu. Dati meki den Israelsma disi bosroiti fu go feti nanga den tra lo, sondro taki den lo disi ben e fruwakti dati. Na so fasi, furu fu den eigi sma no ben o lasi den libi. Ma na presi taki den lo na a westsei fu Yordan-liba hasti densrefi fu go feti, den seni wan tu man fu go taki nanga den lo di ben meki na altari. Den aksi den: „Fu san ede unu no gi yesi na a Gado fu Israel èn fu san ede unu drai baka gi Yehovah now? Fu san ede unu bow wan altari gi unsrefi fu sori taki unu e opo unsrefi teige Yehovah?” Fu taki en leti, den lo di ben bow na altari, no ben sondu teige Yehovah. Ma fa den ben o handri te den tra lo ben o taigi den taki den ben sondu teige Yehovah? Den ben o bigin rigeri nanga den? Noso den ben o weigri fu taki nanga den? Den lo disi di ben meki na altari, taki na wan switi fasi nanga den tra lo. Boiti dati, den sori den krin taki den ben meki na altari fu di den ben wani dini Yehovah. A fasi fa den handri, meki taki a matifasi di den ben abi nanga Gado no pori, èn nowan sma lasi en libi. Fu di den taki na wan switi fasi, meki den ben man lusu a problema, èn den tan na ini vrede.—Yos. 22:13-34.

 Fosi den tra Israelsma bigin feti nanga a lo fu Ruben, a lo fu Gad, nanga na afu lo fu Manase, den go taki nanga den fu a problema. Èn dati ben de wan koni sani fu du. Gado Wortu e taki: „No hasti yusrefi fu atibron na ini yu yeye, bika atibron de na ini na ati fu den wan sondro frustan” (Preik. 7:9). Soleki fa Bijbel e sori, dan wi musu taki na wan switi fasi, èn wi musu taki krin nanga sma efu wi wani lusu wan kesekese di wi abi nanga den. Kande wi feni taki wan sma du wan hati sani nanga wi. Wi kan fruwakti trutru taki Yehovah o blesi wi efu wi e hori a sma na ati, èn efu wi no e go taki fu a problema nanga en?

Ma fa a de efu wan Kresten brada noso sisa kon na wi fu di a feni taki wi hati den firi fu en? Kande a e krutu wi srefi fu wan sani di wi no du. Bijbel e taki: „Wan safri piki e kowru bigi atibron” (Odo 15:1). Fu di den tu nanga afu lo ben tyari kon na krin na wan switi fasi fu san ede den ben bow na altari, meki den ben man kowru na ati fu den brada fu den di ben e atibron srefisrefi. Efu wi e go taki nanga wan brada noso sisa fu wan problema di wi abi nanga en, noso efu na en e kon taki nanga wi, dan a ben o bun fu aksi wisrefi: ’San mi o taki fu meki a vrede tan? Fa mi o taki? Èn fa mi o tyari misrefi?’

Luku bun san yu e taki

Yehovah e frustan taki wi feni en prenspari fu taki fu den sani di e gi wi broko-ede. Ma efu wi no e lusu wan kesekese, dan wi kan kisi a firi fu fruteri tra sma a tori. Te wi e hori sma na ati, dan makriki wi kan bigin taki takru fu a sma. Odo 11:11 e sori sortu takru bakapisi a abi te sma no e luku bun san den e taki. Drape skrifi: ’A mofo fu den ogrisma e broko wan foto puru’. Na so a de tu taki te wi e taki takru fu wan Kresten brada noso sisa, dan wi kan pori a vrede fu a gemeente.

Ma te wi e suku vrede, dan dati no wani taki dati wi no mag taki noti fu wi brada nanga sisa. Na apostel Paulus ben gi den Kresten brada nanga sisa fu en a rai disi: „No taki takru sani nanga un mofo”. Ma a ben taki tu: „Taki sani di bun, so taki unu kan gi sma deki-ati te a de fanowdu; na so fasi den sma di e arki, kan yere sani di bun gi den. . . . Tron sma di e du bun gi makandra, èn sori sari-ati na wan lobi fasi; un musu gi makandra pardon” (Ef. 4:29-32). Kon meki wi taki dati wan brada noso wan sisa kon taki nanga yu fu di a feni taki wan sani di yu taki noso du, hati den firi fu en. Efu a sma dati abi a gwenti fu taki bun fu yu, dan a o moro makriki gi yu fu aksi en pardon èn fu meki en bun baka nanga en, a no so? Sobun, te wi abi a gwenti fu taki bun fu wi Kresten brada nanga sisa, dan a sa moro makriki gi wi fu meki vrede nanga den, te wi nanga den abi wan kesekese.—Luk. 6:31.

Dini Gado „leki wán man”

Fu di wi na sondu libisma, meki nofo tron, wi no wani abi demakandra moro nanga den wan di du wan hati sani nanga wi. Ma dati a no wan bun sani fu du (Odo 18:1). Leki wan pipel di de na ini wánfasi èn di e kari a nen fu Yehovah, wi abi a fasti bosroiti fu „dini en leki wán man”.—Sef. 3:9.

Te trawan e taki noso e du sani di no fiti, dan noiti dati musu meki wi lasi a faya di wi abi gi a tru anbegi. Luku a tori disi. A dei ben o doro taki Yesus ben o dede leki wan ofrandi gi libisma. Te dati ben o pasa, dan sma no ben o abi fu tyari ofrandi moro na ini a tempel. Wan tu dei bifo Yesus dede, èn syatu baka di a ben krutu den leriman fu Wet na wan krakti fasi, dan a si fa wan pôti uma ben e poti moni na ini a monikisi fu a tempel. Na uma disi ’ben poti ala san a ben abi fu sorgu ensrefi’. Yesus ben tapu na uma disi fu no poti moni? Nôno, na presi fu dati, a prèise na uma fu di a ben e horibaka gi a gemeente fu Yehovah na a ten dati (Luk. 21:1-4). Awinsi trawan no ben e tyari densrefi na wan reti fasi, toku dati no ben wani taki dati na uma disi no ben abi fu horibaka moro gi na anbegi fu Yehovah.

Fa wi sa handri efu wi feni taki wan Kresten brada noso sisa du wan sani di no fiti, noso efu wi feni srefi taki a no handri na wan reti fasi? Wi sa meki a sani dati tapu wi fu dini Yehovah nanga wi heri-ati? Noso wi sa sori deki-ati èn lusu iniwan kesekese di wi abi nanga trawan, so taki a vrede kan tan na ini a gemeente fu Gado?

Bijbel e gi wi a rai disi: „Efu a kan, efu a e didon na unu, dan libi na ini vrede nanga ala sma” (Rom. 12:18). Meki wi abi a fasti bosroiti fu du dati èn fu tan waka na tapu a pasi fu libi.

[Futuwortu]

[Prenki na tapu bladzijde 17]

Eodia nanga Sentike ben musu suku fu meki vrede

[Prenki na tapu bladzijde 18]

Te wi e suku fu meki vrede, dan san wi musu taki, fa wi musu taki, èn fa wi musu tyari wisrefi?