„Kakafutu gi Didibri” neleki fa Yesus du dati
„Kakafutu gi Didibri” neleki fa Yesus du dati
„Kakafutu gi Didibri, èn a sa lon gowe fu unu.”—YAK. 4:7.
1. Fa Yesus ben o kisi tesi na grontapu, èn fa a ben o pasa den tesi dati?
YESUS KRESTES ben sabi taki Didibri ben o tesi en. Yesus ben sabi dati, fu di Gado ben taigi a sneki noso na ogri yeye di ben opo ensrefi teige en a sani disi: „Mi o meki yu nanga na uma [na hemel organisâsi fu Yehovah] tron feanti, èn yu pikin nanga en pikin o de feanti. A pikin fu na uma [Yesus Krestes] o masi yu ede, èn yu o gi a pikin fu na uma mankeri na en bakafutu” (Gen. 3:14, 15; Openb. 12:9). A mankeri di Yesus ben o kisi na en bakafutu, wani taki dati sma ben o kiri en na grontapu. Ma a no ben o tan na ini a grebi fu ala ten, fu di Yehovah ben o gi en wan opobaka fu kisi glori na hemel. Ma a masi di Yesus ben o masi na ede fu a sneki, wani taki dati Didibri ben o kisi têgo pori.—Leisi Tori fu den Apostel 2:31, 32; Hebrewsma 2:14.
2. Fu san ede Yehovah ben abi a frutrow taki Yesus ben o man kakafutu gi Didibri?
2 Yehovah ben abi a frutrow taki Yesus ben o man du a wroko di a ben gi en, èn taki a ben o man kakafutu gi Didibri di a ben de na grontapu. Fu san ede Yehovah ben abi a frutrow dati? Fu di a ben meki Yesus na hemel milyunmilyun yari na fesi, a ben e luku en, èn a ben sabi taki a „tumusi bun wrokoman” èn sosrefi a ’fosiwan fu ala sani di A meki’ ben o tan gi yesi na en dorodoro (Odo 8:22-31; Kol. 1:15). Sobun, di Gado seni Yesus kon na grontapu èn a gi pasi taki Didibri tesi en te na dede, dan A ben abi a frutrow taki a wan-enkri gebore Manpikin fu En ben o man kakafutu gi Didibri.—Yoh. 3:16.
Yehovah e kibri den futuboi fu en
3. San Didibri e du nanga den futuboi fu Yehovah?
3 Yesus ben kari Didibri „a tiriman fu a grontapu disi”, èn a ben warskow den disipel fu en taki den ben o kisi frufolgu neleki en (Yoh. 12:31; 15:20). A grontapu disi di de na ondro a makti fu Satan Didibri, e teige tru Kresten fu di den e dini Yehovah, èn fu di den na preikiman fu regtfardikifasi (Mat. 24:9; 1 Yoh. 5:19). Didibri e tesi spesrutu den salfuwan di de ete na grontapu, èn di sa tiri makandra nanga Krestes na ini en hemel Kownukondre. Satan e tesi sosrefi den furu Kotoigi fu Yehovah di abi a howpu fu libi fu têgo na ini wan paradijs na grontapu. Gado Wortu e warskow wi: „A feanti fu unu, e waka lontu leki wan lew di e bari, fu di a e suku fu swari wan sma.”—1 Petr. 5:8.
4. San e sori taki a pipel fu Gado man kakafutu gi Didibri na ini a ten disi?
4 Fu di Yehovah Gado e horibaka gi na organisâsi fu en, meki wi man kakafutu gi Didibri. Luku den tori disi: Na ini den 100 yari di pasa, wan tu fu den moro ogri-ati tirimakti pruberi fu puru Yehovah Kotoigi na pasi. Ma a nomru fu Kotoigi e tan kren èn now pikinmoro 7.000.000 Kotoigi de na ini moro leki 100.000 gemeente na heri grontapu. Na den ogri-ati tirimakti di ben e frufolgu a pipel fu Yehovah, no de moro!
5. Fa den futuboi fu Yehovah ondrofeni a kontru fu a profeititori di skrifi na Yesaya 54:17?
5 Gado ben e kari a gemeente fu Israel fu owruten en „uma”, èn a ben pramisi en: „Nowan fetisani di den sa meki fu feti nanga yu sa abi bun bakapisi, èn iniwan tongo di sa opo teige yu na ini a krutu, yu sa krutu. Disi na a famirigudu fu den futuboi fu Yehovah, èn a regtfardikifasi fu den e kon fu mi” (Yes. 54:11, 17). Na ini den „lasti dei” disi, a pipel fu Yehovah na heri grontapu e ondrofeni a kontru fu a pramisi disi (2 Tim. 3:1-5, 13). Wi leki a pipel fu Gado e tan kakafutu gi Didibri. Dati meki, awinsi sortu fetisani a e gebroiki fu pruberi fu puru wi na pasi, a no sa abi bun bakapisi, fu di Yehovah e horibaka gi wi.—Ps. 118:6, 7.
6. San o pasa nanga a tirimakti fu Satan na ini a ten di e kon, soleki fa a profeititori fu Danièl e sori?
6 A kaba fu na ogri sistema disi sa kon heri esi. Èn te a ten dati doro, dan a tirimakti fu Satan sa kisi pori dorodoro. Disi na san Yehovah ben meki a profeiti Danièl skrifi na fesi: „Na ini den dei fu den kownu dati [den wan fu a ten disi], a Gado fu hemel sa opo wan kownukondre [na hemel] di noiti no sa kisi pori. Èn a kownukondre srefi no sa gi na nowan tra pipel. A sa broko ala den kownukondre disi [di de now] na pisipisi èn a sa tyari wan kaba kon na den, èn ensrefi sa tan te ten di no skotu” (Dan. 2:44). Te dati o pasa, dan a tirimakti fu Satan, èn sosrefi den tirimakti fu sondu libisma sa kon na wan kaba. Ibri pisi fu a sistema fu Satan sa kisi têgo pori, èn Gado Kownukondre sa tiri heri grontapu sondro taki a kisi gens.—Leisi 2 Petrus 3:7, 13.
7. Fa wi du sabi taki ibriwan fu den futuboi fu Yehovah, man kakafutu gi Didibri?
7 Wi kan de seiker taki Yehovah sa kibri na organisâsi fu en, èn taki a sa blesi en. (Leisi Psalm 125:1, 2.) Fa a de nanga wi? Bijbel e sori taki wi man kakafutu gi Didibri neleki fa Yesus ben du dati. Iya, a profeititori di Krestes ben meki na apostel Yohanes skrifi, e sori taki „wan bigi ipi sma” di abi a howpu fu libi na grontapu sa pasa a kaba fu a sistema disi libilibi, awansi Satan e gens den. Soleki fa Bijbel e sori, dan den e bari taki: „Tangi fu wi Gado di e sidon na tapu a kownusturu, èn tangi fu a Pikin Skapu [Yesus Krestes], meki wi kisi frulusu” (Openb. 7:9-14). Bijbel e taki dati den salfuwan e wini Satan, èn den „tra skapu” di e horibaka gi den, man kakafutu tu gi en (Yoh. 10:16; Openb. 12:10, 11). Ma fu man du dati, dan wi musu du tranga muiti èn wi musu begi Gado fayafaya fu „frulusu wi fu na ogriwan”.—Mat. 6:13.
A moro bun eksempre fu wan sma di kakafutu gi Didibri
8. San ben de a fosi tesi di Yesus Krestes kisi na ini a gran sabana? Fa a pasa a tesi dati?
8 Didibri ben wani meki Yesus trangayesi Yehovah. Dati meki a tesi Yesus na ini a gran sabana. Ma Yesus ben de wan heri bun eksempre gi wi, fu di a kakafutu gi Satan. Baka di a faste 40 dei nanga 40 neti, dan a ben musu de so taki angri ben e kiri en srefisrefi. Satan ben taki: „Efu yu na wan manpikin fu Gado, dan taigi den ston disi fu tron brede.” Ma Yesus no ben wani gebroiki a makti di a ben kisi fu Gado, gi en eigi bun. Na presi fu dati a ben taki: „Gado Buku taki: ’Sma no musu libi fu brede wawan, ma fu ibri wortu di Yehovah mofo taki.’”—Mat. 4:1-4; Deut. 8:3.
9. Fu san ede wi musu kakafutu gi Didibri te a e tesi wi fu meki wi plisi den lostu fu wi na wan fasi di no fiti?
9 Na ini a ten disi, Satan e tesi den futuboi fu Yehovah fu di a wani taki den e plisi den lostu fu den na wan fasi di no fiti. Fu dati ede, wi musu abi a fasti bosroiti fu basi sekslostu di no fiti èn di de wan aladei sani na ini a grontapu disi pe furu sma e tyari densrefi na wan fasi di no fiti. Gado Wortu e taki krin: „San! Unu no sabi taki onregtfardiki sma no sa kisi a kownukondre fu Gado? No kori unsrefi. Sma di e huru, sma di e anbegi kruktugado, sma di e du sutadu, mansma di e meki tra mansma gebroiki den fu abi seks nanga den, mansma di abi seks nanga tra mansma . . . no sa kisi a kownukondre fu Gado” (1 Kor. 6:9, 10). Dati meki, a de krin taki sma di no e libi na wan fasi di fiti èn di no wani kenki den libi, no sa kisi a grani fu libi na ini a nyun grontapu fu Gado.
10. Soleki fa Mateyus 4:5, 6 e sori, dan san ben de wan tra fasi fa Satan tesi Yesus fu meki a trangayesi Gado?
10 Luku san Bijbel e taki fu wan fu den tesi di Yesus ben kisi na ini a gran sabana: „Didibri tyari en go na a santa foto èn a poti en na tapu a skotu fu a tempel, dan a taigi en: ’Efu yu na wan manpikin fu Gado, dan fringi yusrefi go na gron; bika Gado Buku taki: „A sa taigi den engel fu en fu tyari yu na tapu den anu, so taki noiti yu sa naki yu futu na wan ston”’” (Mat. 4:5, 6). Satan ben denki taki Yesus ben o du wan kefalek sani fu sori taki a ben de a Mesias. Ma fu taki en leti, efu Yesus ben du san Satan ben aksi fu en, dan a ben o sori taki a ben abi heimemre. Boiti dati, Gado no ben o feni a sani dati bun èn a no ben o horibaka gi Yesus. Disi leisi sosrefi, Yesus tan gi yesi na Yehovah, èn a sori en san Bijbel e taki. A taki: „Agen Gado Buku taki: ’Yu no musu tesi Yehovah yu Gado.’”—Mat. 4:7; Deut. 6:16.
11. Fa Satan kan tesi wi, èn san kan de a bakapisi?
11 Satan kan tesi wi na difrenti fasi fu meki wi suku glori. Kande a sa pruberi fu gi wi deki-ati fu teki na eksempre fu grontapusma, te a abi fu du nanga den krosi di wi e weri, a fasi fa wi e moi wisrefi, èn a fasi fa wi e meki prisiri. Ma te wi e weigri fu gi yesi na a rai di Bijbel e gi wi, èn te wi e du leki grontapusma, dan wi no kan fruwakti taki den engel sa kibri wi gi den takru bakapisi fu dati. Aladi Kownu David ben sori berow gi a sondu di a ben du nanga Batseiba, toku Gado no kibri en gi den takru bakapisi fu a sondu dati (2 Sam. 12:9-12). Wi no musu tesi Yehovah na wan fasi di no fiti, iya, wi no musu tron wan mati fu grontapu.—Leisi Yakobus 4:4; 1 Yohanes 2:15-17.
12. Fa Satan tesi Yesus, soleki fa Mateyus 4:8, 9 e sori? Fa a Manpikin fu Gado pasa a tesi dati?
12 Ete wan fasi fa Didibri tesi Yesus na ini a gran sabana, na taki a ben wani gi en a makti fu tiri grontapu. Satan sori Yesus ala den kownukondre fu grontapu nanga a glori fu en, èn a taki: „Mi o gi yu ala den sani disi efu yu boigi èn anbegi mi wan leisi nomo” (Mat. 4:8, 9). Satan pruberi fu kisi na anbegi di Yehovah musu kisi, èn a ben wani kori Yesus fu trangayesi Gado. A sani disi sori krin taki Satan abi bedrigifasi! Fosi, a ben de wan engel di ben e gi yesi na Gado. Ma fu di a ben wani nomonomo taki sma anbegi en, meki a tron Satan Didibri di lobi fu du sondu, di abi bigi-ai, èn di e tesi sma na wan ogri-ati fasi (Yak. 1:14, 15). Ma Yesus ben de heri tra fasi leki Satan, fu di a ben abi a fasti bosroiti fu tan gi yesi na en hemel Tata. Fu dati ede a taki: „Gowe fu dya, Satan! Bika Gado Buku taki: ’Na Yehovah yu Gado, yu musu anbegi èn na en wawan yu musu dini.’” Na so Yesus kakafutu agen gi Didibri, èn a du dati na wan krakti fasi èn sondro fu degedege. Gado en Manpikin no ben wani abi noti fu du nanga a grontapu fu Satan, èn noiti a ben o anbegi na ogri yeye dati!—Mat. 4:10; Deut. 6:13; 10:20.
„Kakafutu gi Didibri, èn a sa lon gowe fu unu”
13, 14. (a) Di Satan sori Yesus ala den kownukondre fu grontapu, dan san a ben wani gi en? (b) Fa Satan e pruberi fu pori wi ati?
13 Di Satan sori Yesus ala den kownukondre fu grontapu, dan fu taki en leti, a ben wani gi en makti di nowan sma ben abi ete. Satan ben howpu taki Yesus ben o lobi den sani di a ben e si, èn taki a ben o wani tron a moro makti tiriman fu grontapu. Na ini a ten disi, Didibri no e suku fu gi wi kownukondre, ma a e pruberi fu pori wi ati nanga yepi fu den sani di wi e si, e yere, èn e prakseri.
14 Didibri e tiri a grontapu disi. Fu dati ede, furu fu den felem, den poku, nanga den buku fu grontapu e leri sma fu tyari densrefi na wan fasi di no fiti, èn fu du ogri nanga tranga. Den bisnisman fu grontapu e pruberi fu meki wi kisi na angri fu bai wan lo sani di wi no abi fanowdu. Na so Satan doronomo e gebroiki den sani di wi e si, e yere, èn e prakseri fu tesi wi, so taki wi e bigin feti baka gudu. Ma te wi e weigri fu luku, fu arki, èn fu leisi sani di Bijbel no feni bun, dan fu taki en leti wi e taki: „Gowe fu dya, Satan!” Na so fasi wi e teki na eksempre fu Yesus di ben abi a fasti bosroiti fu no tron mati fu a grontapu fu Satan di no krin. Wan tra fasi fa wi e sori taki wi no de mati fu a grontapu fu Satan, na fu di wi no frede fu sori taki wi na Yehovah Kotoigi èn bakaman fu Krestes. Wi e sori dati na skoro, na ini a birti pe wi e tan, èn te wi de na mindri famiriman.—Leisi Markus 8:38.
15. Fu san ede wi musu de na ai doronomo fu man kakafutu gi Satan?
15 Didibri pruberi fu a di fu dri leisi fu meki Yesus trangayesi Gado, ma a no ben abi bun bakapisi. Dati meki „Didibri gowe libi en” (Mat. 4:11). Ma Satan no ben kaba nanga Yesus, fu di Bijbel e taki: „Di Didibri kaba tesi en na ala fasi [na ini a gran sabana], a gowe libi en fu kon baka na wan moro bun ten” (Luk. 4:13). Te wi kakafutu gi Didibri, dan wi musu taki Yehovah tangi. Ma wi musu tan aksi Gado fu yepi wi, fu di Didibri sa kon baka fu tesi na wan ten di a feni moro bun. Èn a no abi fu de so taki a sa tesi wi na wan ten di wi e fruwakti dati. Fu dati ede, wi musu de na ai ala ten, èn wi musu de klariklari fu tan du santa diniwroko gi Yehovah, awansi sortu tesi wi e kisi.
16. Sortu bigi krakti Yehovah e gi wi, èn fu san ede wi musu begi fu kisi a krakti dati?
16 Wan sani di sa yepi wi fu kakafutu gi Satan, na te wi e begi Gado fu gi wi a santa yeye fu en, a moro bigi krakti di de. A yeye disi sa yepi wi fu du sani di noiti wi ben o man du nanga wi eigi krakti. Yesus ben gi den bakaman fu en a dyaranti taki den ben kan kisi a yeye fu Gado. A ben taigi den: „Efu unu di abi takru fasi, sabi fa fu gi un pikin bun sani, dan a no abi misi taki a Tata di de na hemel sa gi santa yeye na den sma di e aksi en!” (Luk. 11:13) Meki wi tan begi Yehovah fu gi wi a santa yeye fu en. Te a moro bigi krakti disi e yepi wi fu tan kakafutu gi Didibri, dan wi sa abi bun bakapisi. Wi musu begi fayafaya, èn wi musu du dati doronomo. Boiti dati, wi musu sorgu taki wi abi ala den sani di Gado gi wi fu feti. Na so wi o man „tanapu kánkan gi den triki di Didibri e gebroiki fu kori sma”.—Ef. 6:11-18.
17. Sortu prisiri di Yesus ben abi, yepi en fu kakafutu gi Didibri?
17 Ete wan sani de di yepi Yesus fu kakafutu gi Didibri, èn a sani dati kan yepi wi tu. Bijbel e taki: „Bika na fu a prisiri di ben e wakti [Yesus], meki a dede na a pina-postu èn a no ben broko en ede taki a ben o kisi syen; a go sidon na a reti-anusei fu a kownusturu fu Gado” (Hebr. 12:2). Wi kan abi a prisiri dati tu te wi e tan gi yesi na Yehovah leki a Moro Hei Tiriman, te wi e gi glori na a santa nen fu en, èn te wi e tan prakseri a howpu di wi abi fu libi fu têgo. Boiti taki wan kaba sa kon na Satan nanga ala den wroko fu en, Bijbel e taki tu dati ’den safri-atisma sa kisi grontapu èn den sa prisiri srefisrefi fu di vrede sa de pasa marki’. Te den sani disi pasa, dan wi sa de koloku trutru! (Ps. 37:11) Dati meki wi musu tan kakafutu gi Didibri, neleki fa Yesus du dati.—Leisi Yakobus 4:7, 8.
San yu ben sa piki?
• Sortu buweisi de taki Yehovah e kibri a pipel fu en?
• Fa Yesus ben de wan eksempre gi wi di a kakafutu gi Satan?
• Na sortu fasi yu kan kakafutu gi Didibri?
[Aksi fu a tori disi]
[Prenki na tapu bladzijde 29]
Te wi de mati fu grontapu, dan wi sa tron feanti fu Gado
[Prenki na tapu bladzijde 31]
Di Satan ben wani gi Yesus ala den kownukondre fu grontapu, dan Yesus weigri fu teki den