Meki Bijbel tiri yu te yu e suku datrayepi

„Yu musu lobi Yehovah yu Gado . . . nanga yu heri frustan, èn nanga ala yu krakti.”​—MARK. 12:30.

1. San Gado ben abi na prakseri gi libisma di a meki den?

DI YEHOVAH GADO meki libisma, dan a no ben wani taki den e kon siki èn taki den e dede. A ben poti Adam nanga Eva na ini a dyari fu Eden, fu „wroko a gron èn fu sorgu a dyari” disi. A no ben wani taki den ben musu libi 70 noso 80 yari nomo, ma den ben musu libi fu têgo (Gen. 2:8, 15; Ps. 90:10). Efu den fosi tu sma dati ben tan gi yesi na Yehovah, èn efu den ben tan saka densrefi na wan lobi-ati fasi na ondro a tiri fu en, dan noiti den ben o kon siki, den no ben o kon swaki, èn den no ben o dede.

2, 3. (a) Fa a buku Preikiman e prenki owrudei? (b) Suma de frantwortu gi a dede di libisma e dede, èn fa wan kaba sa kon na a dede disi?

² Preikiman kapitel 12 e sori krin san e pasa na ini „den muilek dei” fu sondu libisma di kon owru. (Leisi Preikiman 12:1-7.) A kapitel dati e agersi weti wiwiri nanga a bromki fu „na amandrabon”. A e agersi futu nanga „tranga man”, di boigi densrefi èn di e beifi. A kapitel disi e taki sosrefi fu uma di e waka go na wan fensre fu luku go na dorosei, ma den e si soso dungru. Disi na wan moi fasi fu agersi den ai fu owrusma, di no man si krin moro. Fu di owrusma lasi wan tu tifi, meki a kapitel e taki dati „den uma di e mara sani ben tapu fu wroko bika den no de furu moro”.

³ A no de fu taki dati Gado no ben wani taki libisma kon abi futu di e degedege, ai di no e si so krin moro, nanga mofo di no abi tifi. Boiti dati, a sondu di wi kisi fu Adam, na wan fu „den wroko fu Didibri” di a Manpikin fu Gado sa puru na pasi nanga yepi fu en Mesias Kownukondre. Na apostel Yohanes ben skrifi: „Na fu dati ede meki a Manpikin fu Gado ben kon, namku fu tyari wan kaba kon na den wroko fu Didibri.”—1 Yoh. 3:8.

A fiti taki wi e du muiti fu tan gosontu

4. Fu san ede a fiti taki den futuboi fu Yehovah e du muiti fu tan gosontu? Ma san den e hori na prakseri?

⁴ Nownowde, sonwan fu den futuboi fu Yehovah e siki èn den kon owru, soleki fa dati e pasa nanga ala sondusma. Te den sani disi e miti wi, dan a fiti taki wi e du muiti fu kon betre baka. Boiti dati, disi kan tyari wini kon gi wi. Wi wani dini Yehovah ’nanga ala wi krakti’, a no so? (Mark. 12:30) Ma aladi wi e suku fu tan gosontu, toku wi musu hori na prakseri taki wi no man tapu pasi gi owrudei, èn wi no man wai pasi tu gi ala siki.

5. San wi kan leri fu a fasi fa futuboi fu Gado handri di den ben siki?

⁵ Furu futuboi fu Yehovah kisi problema nanga a gosontu fu den. Epafroditus ben de wan fu den futuboi disi (Fil. 2:25-27). Na apostel  Paulus en bun mati Timoteyus, ben abi problema nanga en maag doronomo, èn Paulus gi en a rai fu dringi „pikinso win” (1 Tim. 5:23). Paulus srefi ben abi ’wan maka na ini en skin’. A kan taki a ben e siki na en ai, noso taki a ben abi wan tra siki di sma no ben man dresi na a ten dati (2 Kor. 12:7; Gal. 4:15; 6:11). Paulus ben begi Yehovah fayafaya fu yepi en nanga ’a maka di a ben abi na ini en skin’. (Leisi 2 Korentesma 12:8-10.) Gado no puru a „maka” disi na wan wondru fasi. Na presi fu dati, a gi Paulus a krakti fu horidoro. Di Yehovah yepi Paulus di ben swaki, dan na so A sori a krakti fu en. San wi kan leri fu a tori disi?

No broko yu ede tumusi nanga a gosontu fu yu

6, 7. Fu san ede wi no musu broko wi ede tumusi nanga a gosontu fu wi?

⁶ Soleki fa yu sabi, Yehovah Kotoigi e teki datrayepi èn sosrefi tra sortu yepi te a abi fu du nanga a gosontu fu den. Nofo tron, na Ontwaakt! abi artikel na ini di e taki fu gosontu afersi. Èn aladi wi no e gi sma deki-ati fu teki wan spesrutu sortu datrayepi, wi e warderi a yepi di wi e kisi fu den difrenti sortu datra. A no de fu taki dati wi sabi taki libisma no man de gosontu dorodoro. Fu dati ede, a bun te wi no e broko wi ede tumusi nanga a gosontu fu wi. Wi musu de tra fasi leki den sma di no abi „nowan howpu”. Den sortu sma dati e denki taki a libi disi na ala, èn den de klariklari fu teki iniwan sortu datrayepi, soso fu di den wani kon betre (Ef. 2:2, 12). Wi sabi taki te wi e tan gi yesi na Gado, dan wi sa „grabu a trutru libi hori bun steifi”, èn dati na têgo libi na ini a nyun sistema di A pramisi wi. Dati meki wi abi a fasti bosroiti fu no lasi a bun-ati fu Yehovah, soso fu di wi wani kibri a libi di wi abi now.—1 Tim. 6:12, 19; 2 Petr. 3:13.

⁷ Wan tra reide de fu san ede wi no e broko wi ede tumusi nanga a gosontu fu wi. A sani dati kan meki taki wi e bigin denki wisrefi nomo. Paulus ben warskow gi a sani dati di a gi den Filipisma a rai fu ’no poti prakseri na den eigi afersi wawan, ma sosrefi na den di fu trawan’ (Fil. 2:4). Soleki fa wi sabi, dan a fiti te wi e du muiti fu tan gosontu. Ma te wi e sori taki wi e broko wi ede trutru nanga den brada nanga sisa fu wi èn nanga den sma di wi e fruteri „a bun nyunsu disi fu a kownukondre”, dan wi no sa broko wi ede tumusi nanga a gosontu fu wi.—Mat. 24:14.

8. San kan pasa te wi e broko wi ede tumusi nanga a gosontu fu wi?

⁸ Te wan Kresten e broko en ede tumusi nanga a gosontu fu en, dan dati kan meki taki a no e poti so furu prakseri moro na den Kownukondre afersi. Wan tra sani di kan pasa, na taki wi kan bigin dwengi trawan fu si sani soleki fa wi e si den. Kande wi o pruberi fu dwengi den fu nyan spesrutu sortu nyanyan, fu teki wan spesrutu sortu datrayepi, noso fu gebroiki spesrutu sortu sani fu man firi moro bun. Te a abi fu du nanga den tori dati, dan luku san wi e leri fu a sani disi di Paulus ben taki: „Kon sabi san na den moro prenspari sani, so taki te na a dei fu Krestes unu kan de sondro fowtu èn unu no sa meki trawan fadon.”—Fil. 1:10.

San na den moro prenspari sani?

9. San na den moro prenspari sani di wi musu hori na prakseri, èn fu san ede?

⁹ Efu wi kon sabi san na den moro prenspari sani, dan wi sa teki prati fayafaya na a wroko di Kresten e du fu yepi trawan fu kon abi wan bun matifasi nanga Gado. Wi kan yepi sma fu kon abi a matifasi dati, te wi e preiki a Wortu fu Gado, èn te wi e gi sma leri fu a Wortu dati. A wroko disi e gi wi prisiri, èn a e tyari wini kon gi wi èn gi den wan di wi e gi leri (Odo 17:22; 1 Tim. 4:15, 16). Ten na ten, A Waktitoren nanga na Ontwaakt! abi artikel na ini di e taki fu Kresten brada nanga sisa fu wi di abi seryusu siki. Son leisi den tori disi e sori fa den Kresten disi e pruberi fu yepi trawan fu kon sabi Yehovah èn den tumusi moi pramisi fu en. Den tori e sori tu taki a sani dati e yepi den fu horidoro, èn a e puru den  prakseri tu fu a siki fu den, awansi na fu wan syatu pisi ten nomo. *

10. Fu san ede wi musu hori na prakseri fa Yehovah e denki fu a datrayepi di wi e teki?

¹⁰ Te Kresten di bigi kaba e siki, dan ibriwan fu den musu „tyari en eigi lai”. Dati wani taki dati densrefi sa musu bosroiti sortu datrayepi den sa teki (Gal. 6:5). Ma te wi e teki a bosroiti dati, dan wi musu prakseri fa Yehovah e denki fu a tori. Wi e „tan fara . . . fu brudu”, fu di wi wani gi yesi na Bijbel gronprakseri. Na so a bigi lespeki di wi abi gi Gado Wortu musu tapu wi tu fu teki datrayepi di sa pori a matifasi di wi abi nanga Yehovah (Tori. 15:20). Sonwan fu den sani di sma e du fu kon betre, abi fu du nanga afkodrei. Yehovah ben krutu den trangayesi Israelsma di ben e gebroiki „towfru krakti” noso afkodrei. A ben taki: „No tyari nyanyan-ofrandi kon moro di no warti noti. Switismeri —mi e tegu gi a sani dati. Nyunmun-fesa nanga sabat, a hori di unu e hori konmakandra — mi no feni en bun taki unu e gebroiki towfru krakti aladi unu e hori santa konmakandra” (Yes. 1:13). Te wi siki, dan wi no musu du nowan sani di kan tapu pasi gi den begi fu wi èn di kan pori a matifasi di wi abi nanga Gado. Dati no ben o de wan koni sani fu du trutru.​—Kragi. 3:44.

Wi musu de nanga „krin frustan”

11, 12. Fu san ede wi musu de nanga wi „krin frustan” te wi e bosroiti sortu datrayepi wi sa teki?

¹¹ Te wi siki, dan wi no kan fruwakti taki Yehovah sa du wan wondru fu dresi wi. Ma wi kan begi en fu gi wi a koni fu kon si san na a moro bun datrayepi di wi kan teki. Te wi e teki den sortu bosroiti dati, dan wi musu meki Bijbel gronprakseri tiri wi, èn wi musu gebroiki wi frustan. Te a abi fu du nanga wan seryusu siki, dan a bun fu suku rai na moro leki wán datra efu dati kan. A sani dati e kruderi nanga Odo 15:22 pe skrifi: „Sani no sa waka bun te sma no e taki krin nanga makandra, ma te furu raiman de, dan sani sa waka bun.” Na apostel Paulus ben gi den Kresten brada nanga sisa fu en a rai fu „libi nanga wan krin frustan èn na wan regtfardiki fasi èn sosrefi na wan fasi di e sori taki wi e dini Gado getrow na ini a grontapu sistema disi”.—Tit. 2:12.

¹² Furu sma de na ini wan srefi sortu situwâsi leki a di fu a siki uma na ini a ten fu Yesus. Markus 5:25, 26 e taki: „Wan uma ben drape tu di ben e lasi brudu twarfu yari kaba; wan lo datra ben pina na uma èn a ben gebroiki ala en gudu kaba, ma toku a no ben feni yepi; na presi fu dati, sani ben kon moro ogri gi en.” Yesus ben dresi na uma dati èn a sori switifasi gi en (Mark. 5:27-34). Furu Kresten di no ben sabi moro san fu du, teki datrayepi di no e kruderi nanga den gronprakseri fu a tru anbegi.

13, 14. (a) Fa Satan kan kori wi fu teki datrayepi di kan pori a matifasi di wi abi nanga Yehovah? (b) Fu san ede wi musu wai pasi gi iniwan sani di abi fu du nanga afkodrei?

¹³ Satan sa du iniwan sani fu meki wi drai baka gi a tru anbegi. Satan e kori sma fu du  hurudu èn fu feti baka gudu, soso fu meki den naki futu. Ma a e kori sma tu fu teki yepi di abi fu du nanga afkodrei, soso fu meki den drai baka gi a tru anbegi. Wi e begi Yehovah fu frulusu wi fu „na ogriwan” èn fu „ala sortu kruktudu”. Dati meki wi musu wai pasi gi iniwan sani di abi fu du nanga afkodrei. Na so fasi, Satan no o man kori wi.—Mat. 6:13; Tit. 2:14.

¹⁴ Yehovah ben warskow den Israelsma fu no du lukuman-wroko noso bonuwroko (Deut. 18:10-12). Paulus ben taki dati „afkodrei” na wan fu „den sani di sondu libisma e du” (Gal. 5:19, 20). Boiti dati, „den sma di e du afkodrei” no sa kisi a grani fu libi na ini a nyun sistema fu Yehovah (Openb. 21:8). Sobun, a de krin taki Yehovah e tegu gi iniwan sani di abi fu du nanga afkodrei.

„Meki ala sma kon sabi taki unu de klariklari fu fiti unsrefi”

15, 16. Fu san ede wi abi koni fanowdu te wi musu bosroiti sortu datrayepi na a moro bunwan fu teki? Sortu koni rai a tiri skin fu a fosi yarihondro ben gi den Kresten fu a ten dati?

¹⁵ Fu di wi kon sabi ala den sani disi, meki a ben o bun fu no teki spesrutu datrayepi te wi e tweifri fu den. Ma a no fu di wi no sabi krin fa spesrutu sortu datrayepi e wroko, meki wi musu denki taki a abi fu du nanga afkodrei. Fu man tan abi a yoisti denki fu datrayepi, dan wi musu sabi fa Gado e denki fu a tori dati, èn wi musu man si sani krin. Odo kapitel 3 e gi wi a rai disi: „Frutrow tapu Yehovah nanga yu heri ati èn no frutrow tapu yu eigi frustan. Poti prakseri na en na ini ala san yu e du, èn ensrefi sa meki yu pasi kon reti. . . . Kibri koni nanga frustan, èn a sa kon na krin taki den sani disi na libi gi yu.”—Odo 3:5, 6, 21, 22.

¹⁶ Sobun, te wi e siki, noso te wi kon owru, dan wi musu luku bun taki wi no e lasi a bun-ati fu Gado, soso fu di wi wani du ala san wi man fu tan gosontu. Te a abi fu du nanga a gosontu fu wi, èn nanga tra sani sosrefi, dan wi musu hori wisrefi na Bijbel gronprakseri. Na so fasi, ’ala sma sa kon sabi taki wi de klariklari fu fiti wisrefi’ (Fil. 4:5). A tiri skin fu a fosi yarihondro ben skrifi wan tumusi prenspari brifi gi den Kresten fu a ten dati. Na ini a brifi dati, den warskow den brada nanga sisa taki den ben musu tan fara fu na anbegi fu kruktugado, brudu, nanga hurudu. A brifi dati ben gi den a dyaranti disi tu: „Efu unu e tan fara fu den sani disi, dan a sa go bun nanga unu” (Tori. 15:28, 29). Fa so?

Wi abi a howpu taki siki no sa de moro na ini a ten di e kon

17. Fa wi kisi wini fu di wi e gi yesi na Bijbel gronprakseri?

¹⁷ A ben o bun te ibriwan fu wi e aksi ensrefi a sani disi: ’Sortu wini a tyari kon gi mi fu di mi e hori misrefi doronomo na Bijbel gronprakseri te a abi fu du nanga brudu èn nanga hurudu?’ Prakseri sosrefi den wini di wi kisi fu di wi du muiti fu „krin wisrefi fu ibri sani di kan doti wi skin nanga wi denki” (2 Kor. 7:1). Te wi e hori wisrefi na Bijbel gronprakseri di e leri wi fu de krin, dan wi no sa kon siki makriki. Wi e kisi wini fu di wi no e smoko èn fu di wi no e gebroiki drugs. Disi e yepi wi fu tan abi wan bun matifasi nanga Gado, èn a e yepi wi tu fu tan gosontu. Prakseri tu sortu wini a e tyari kon te wi no e nyan noso dringi pasa marki. (Leisi Odo 23:20; Titus 2:2, 3.) A tru taki wi e firi moro bun te wi e rostu nofo èn te wi e oefen wi skin. Ma a moro prenspari reide fu san  ede a e go bun nanga wi èn fu san ede wi abi wan bun matifasi nanga Gado, na fu di wi e gi yesi na den rai di Bijbel e gi wi.

18. San musu de a moro prenspari sani gi wi? Èn a kontru fu sortu profeititori wi e fruwakti si?

¹⁸ Ma san moro prenspari, na taki wi musu sorgu taki wi e tan abi wan bun matifasi nanga wi hemel Tata, a Sma di e gi wi ’a libi di wi abi now èn a libi di wi o kisi na ini a ten di e kon na ini a nyun grontapu di a pramisi’. Boiti dati, wi musu du muiti fu kon moro krosibei na En (1 Tim. 4:8; Ps. 36:9). Na ini a nyun grontapu fu Gado, sma sa kisi pardon fu sondu nanga yepi fu a frulusu-ofrandi fu Yesus. Leki bakapisi fu dati, libisma no sa abi nowan enkri sondu noso siki moro. Yesus Krestes, a Pikin Skapu fu Gado, sa tyari wi go na „den peti di abi watra di e gi libi”, èn Gado sa figi ala watra puru na den ai (Openb. 7:14-17; 22:1, 2). Na a ten dati, wi sa si sosrefi a kontru fu a tumusi moi profeititori disi: „Nowan sma di e libi drape sa taki: ’Mi siki.’”—Yes. 33:24.

19. Sortu frutrow wi kan abi aladi wi e du muiti fu tan gosontu?

¹⁹ Wi abi na overtoigi taki heri esi wi sa kisi frulusu, èn wi e wakti fayafaya teleki a dei doro te Yehovah sa tyari wan kaba kon na siki nanga dede. Na a srefi ten, wi abi a frutrow taki wi hemel Tata sa yepi wi fu horidoro aladi wi abi pen nanga siki. A sa du dati fu di ’a e broko en ede nanga wi’ (1 Petr. 5:7). Dati meki wi musu du muiti fu tan gosontu, èn ala ten wi musu du dati na wan fasi di e kruderi nanga a Wortu fu Gado!

[Futuwortu]

Luku baka san wi leri

• Suma meki taki libisma e siki, èn suma sa frulusu wi fu den bakapisi fu sondu?

• Aladi a fiti taki wi e du muiti fu tan gosontu, toku gi sortu sani wi musu wai pasi?

• Fu san ede wi musu hori na prakseri fa Yehovah e denki fu a datrayepi di wi e teki?

• Te a abi fu du nanga a gosontu fu wi, dan fa wi kan kisi wini te wi e hori wisrefi na Bijbel gronprakseri?

[Aksi fu a tori disi]

[Prenki na tapu bladzijde 23]

Gado no ben meki libisma fu kon siki èn fu kon owru

[Prenki na tapu bladzijde 25]

Aladi anbegiman fu Yehovah e siki son leisi, toku den e du a diniwroko nanga prisiri