Yepi den fu drai kon baka wantewante!
Yepi den fu drai kon baka wantewante!
„Na suma wi musu go? Yu abi wortu di e gi sma têgo libi.”—YOH. 6:68.
1. San Petrus taki di furu disipel gowe libi Yesus?
WAN leisi, furu fu den disipel fu Yesus Krestes gowe libi en, fu di den no ben e agri nanga wan fu den leri fu en. Yesus aksi den apostel fu en: „Unu no wani go tu?” Petrus piki en: „Masra, na suma wi musu go? Yu abi wortu di e gi sma têgo libi” (Yoh. 6:51-69). Den no ben abi nowan tra presi fu go. Na a ten dati, a Dyu bribi no ben abi „wortu di e gi sma têgo libi”, èn na ini a ten disi, den wortu dati no de fu feni tu na ini Babilon a Bigiwan, a grontapu makti fu falsi bribi. Efu wan Kresten di gowe libi na ipi, wani plisi Yehovah, dan ’a yuru doro gi en fu wiki’, èn fu drai kon baka na a ipi.—Rom. 13:11.
2. San wan preikiman musu hori na prakseri te a abi fu du nanga tori di tra sma no mag sabi, èn di owruman musu krutu?
2 Yehovah ben sori taki a ben e broko en ede nanga den lasi skapu fu Israel. (Leisi Esekièl 34:15, 16.) Na so a de tu taki, owruman e angri fu yepi den skapu di gowe libi na ipi, èn den abi a frantwortu fu du dati. Kande den owruman e aksi wan preikiman fu studeri nanga wan sma di tapu nanga a diniwroko fu en, ma di wani kisi yepi. San a preikiman musu du te a kon sabi taki a sma disi du wan seryusu sondu? Te a abi fu du nanga afersi di owruman musu krutu, noso nanga tori di tra sma no mag sabi, dan a preikiman no musu gi a sma rai. Na presi fu dati, a musu gi a sma a rai fu go taki nanga den owruman. Efu a sma no wani du dati, dan a preikiman srefi musu go taki nanga den owruman.—Lef. 5:1; Gal. 6:1.
3. San a man di ben abi 100 skapu du di a feni wan fu den skapu fu en di ben lasi?
3 A fosi artikel ben taki fu wan agersitori di Yesus ben fruteri fu wan man di ben abi 100 skapu. Di wán fu den skapu ben lasi, dan a libi den 99 trawan èn a go suku a lasi skapu dati. A man ben breiti srefisrefi di a feni a skapu! (Luk. 15:4-7) Wi breiti tu te wan fu den lasi skapu fu Gado drai kon baka na a ipi. Fu di den owruman nanga den tra brada nanga sisa lobi a sma di ben tapu nanga a diniwroko fu en, meki a kan taki den go luku en. Den wani si tu taki a sma drai kon baka na a gemeente, so taki a kan kisi yepi, kibri, nanga blesi fu Gado (Deut. 33:27; Ps. 91:14; Odo 10:22). Efu den owruman nanga den tra brada nanga sisa abi na okasi fu yepi so wan sma, dan san den kan du?
4. San wi e leri fu Galasiasma 6:2, 5?
4 Wan sani di den kan du, na fu sori a sma na wan switi fasi taki Yehovah lobi den skapu fu en, èn taki a no e aksi den fu du sani di den no man du. A sani disi kan gi a sma deki-ati fu drai kon baka na a gemeente. Den sani di Gado e aksi fu wi, na fu studeri Bijbel, fu go na den Kresten konmakandra, èn fu preiki a bun nyunsu fu a Kownukondre. Kande a ben o bun fu leisi Galasiasma 6:2, 5 gi a sma èn fu sori en taki Kresten kan yepi makandra fu tyari den hebi fu den. Ma a bun tu fu meki a sma disi kon frustan taki „ibri sma sa tyari en eigi lai”, èn dati na den frantwortu di wi abi leki Kresten. Nowan sma kan dini Gado gi wi.
Den „sorgu fu na aladei libi” meki taki den gowe libi na ipi?
5, 6. (a) Fu san ede wi musu arki bun te wan sma di tapu nanga a diniwroko fu en, e taki san de na tapu en ati? (b) Fa yu kan yepi den sortu sma disi fu kon si taki a no tyari wini kon gi den di den tapu fu abi demakandra nanga a pipel fu Gado?
5 Efu owruman nanga tra lepi preikiman wani kon sabi fa den kan yepi wan brada noso sisa di tapu nanga a diniwroko, dan den musu arki bun te den sma disi e taki san de na tapu en ati. Kande yu leki owruman go luku wan trowpaar di no e kon na den konmakandra, fu di den „sorgu fu na aladei libi” meki taki den tapu nanga a diniwroko fu den (Luk. 21:34). Kande dati pasa fu di den abi moni problema noso fu di den frantwortu na ini na osofamiri kon moro hebi. Noso kande den wani teki en pikinso moro safri. Ma yu kan sori den taki a no sa yepi te den e hori densrefi aparti fu a gemeente. (Leisi Odo 18:1.) Yu ben kan aksi den na wan lespeki fasi: „Yu e firi moro koloku sensi di yu no e kon moro na den gemeente konmakandra? Na osofamiri-libi fu yu e waka moro bun? A prisiri di Yehovah e gi, de leki wan fortresi gi yu ete?”—Neh. 8:10.
6 A bun te sma di tapu nanga a diniwroko fu den e poti prakseri na den aksi disi. Dati kan yepi den fu kon si taki na fu di den no abi demakandra moro nanga a gemeente, meki den no e si sani moro soleki fa Yehovah e si sani. Èn a sani dati meki taki den no de so koloku moro (Mat. 5:3; Hebr. 10:24, 25). Kande yu leki owruman kan yepi den fu kon frustan taki na fu di den no e preiki a bun nyunsu moro, meki den no de nanga prisiri (Mat. 28:19, 20). Sobun, san na a moro bun sani di den kan du?
7. Sortu deki-ati wi kan gi den wan di gowe libi na ipi?
7 Yesus ben taki: „poti prakseri na unsrefi taki noiti un ati e kon hebi fu di unu e nyan pasa marki, noso fu di unu e dringi tumusi furu, noso fu di unu e broko un ede nanga den sorgu fu na aladei libi . . . Tan na ai èn begi ala ten taki unu man lowe gi ala den sani di musu pasa, èn taki unu kan tanapu na fesi a Manpikin fu libisma” (Luk. 21:34-36). Efu wan sma di gowe libi na ipi wani kon de koloku baka, dan wi kan gi en deki-ati fu begi Gado fu gi en santa yeye èn fu yepi en. Wi kan gi en deki-ati tu fu handri na wan fasi di e kruderi nanga a begi fu en.—Luk. 11:13.
Den naki futu?
8, 9. Fa wan owruman kan taki-go-taki-kon nanga wan sma di naki futu?
8 Fu di wi na sondu libisma, meki son leisi wi e kisi kesekese nanga makandra. A sani disi kan meki wan sma naki futu. Son sma naki futu fu di wan brada noso wan sisa di furu sma na ini a gemeente e lespeki, du wan sani di no e kruderi nanga Bijbel. Efu na fu dati ede wan sma tapu nanga a diniwroko, dan na owruman di go luku en kan sori en taki Yehovah no e meki sma naki futu. Sobun, fu san ede wan sma ben o bosroiti fu no de wan mati moro fu Gado èn fu a pipel fu En? A no ben o moro bun te a sma e tan dini Gado, aladi a abi a dyaranti taki „a sma di e krutu heri grontapu” sabi san pasa, èn taki a sa lusu a problema na wan reti fasi? (Gen. 18:25; Kol. 3:23-25) Efu wan sma naki en futu fadon na gron, dan a no ben o tan didon na gron fu espresi. Ma a ben o pruberi fu opo baka.
9 Na owruman di e pruberi fu yepi a sma, kan sori en taki baka wan pisi ten, son sma di ben naki futu, kon si taki a sani di meki den naki futu, no de so prenspari moro. Fu taki en leti, kande a sani dati no de moro. Efu wan sma naki futu fu di a ben kisi trangaleri, dan a bun te a e denki dipi fu a tori dati, èn te a e begi Gado fu yepi en. Disi kan yepi en fu kon frustan taki a trangaleri dati ben fiti, èn taki a no ben abi fu naki futu fu a sani dati ede.—Ps. 119:165; Hebr. 12:5-13.
Den no ben e agri nanga wan leri?
10, 11. San yu ben kan taki fu yepi wan sma di no e agri nanga wan Bijbel leri?
10 Son sma gowe libi na ipi fu Gado fu di den no ben e agri nanga wan Bijbel leri. Den Israelsma di ben komoto na ini katibo fu Egepte, „ben frigiti den sani di [Gado] du” gi den èn den „no ben wakti tapu den rai fu en” (Ps. 106:13). A ben o bun fu memre wan sma di tapu nanga a diniwroko fu en taki „a getrow èn koni srafu” e gi yeye nyanyan di kan tyari furu wini kon gi en (Mat. 24:45). Na dati yepi a sma fu kon sabi den tru tori fu Bijbel. Sobun, fu san ede a no ben o bosroiti fu teki prati baka na a tru anbegi?—2 Yoh. 4.
11 Te na owruman e pruberi fu yepi den wan di gowe libi na ipi fu Gado, dan a kan taki fu den disipel di ben gowe libi Yesus fu di den no ben e agri nanga wan fu den leri fu en (Yoh. 6:53, 66). Fu di den disipel disi no ben abi demakandra moro nanga Krestes èn nanga den getrow bakaman fu en, meki den lasi warderi gi den sani di den ben leri fu Gado, èn den no ben de koloku moro. Den sma disi di no e kon moro na den Kresten konmakandra feni wan tra presi pe bogobogo yeye nyanyan de fu kisi? Nôno, tra presi no de!
Den du wan seryusu sondu?
12, 13. Efu wan sma di gowe libi na ipi e taki dati a du wan seryusu sondu, dan fa wi kan yepi en?
12 Son sma tapu nanga a preikiwroko èn den no e kon moro na den konmakandra, fu di den du wan seryusu sondu. Kande den feni taki den owruman o puru den fu a gemeente efu den fruteri den taki den du wan seryusu sondu. Ma efu den tapu nanga a sondu èn efu den abi berow trutru, dan den brada no sa puru den fu a gemeente (2 Kor. 7:10, 11). Na presi fu dati, den owruman o breiti te den drai kon baka, èn den sa gi den a yepi di den abi fanowdu.
13 Kande yu na wan lepi preikiman di kisi a wroko fu yepi wan sma di tapu nanga a diniwroko fu en. San yu musu du efu a sma taigi yu taki a du wan seryusu sondu? Soleki fa wi si kaba, dan yu no musu pruberi fu kon sabi a tori moro fini. Na presi fu dati, gi a sma deki-ati fu go na den owruman. Efu a no wani du dati, dan yu musu handri soleki fa Bijbel e leri wi te a abi fu du nanga den tori disi. Na so fasi yu e sori taki yu e broko yu ede nanga a nen fu Yehovah èn nanga a tanbun fu a gemeente. (Leisi Lefitikus 5:1.) Den owruman sabi fa fu yepi wan sma di wani drai kon baka èn di wani du san Gado e aksi fu en. A kan de fanowdu taki den gi a sma trangaleri na wan lobi-ati fasi (Hebr. 12:7-11). Efu a sma agri taki a sondu teige Gado, efu a tapu nanga a sondu dati, èn efu a abi berow trutru, dan den owruman sa yepi en so taki Yehovah kan gi en pardon.—Yes. 1:18; 55:7; Yak. 5:13-16.
Wan papa breiti fu di en manpikin drai kon baka
14. Fruteri nanga yu eigi wortu san pasa na ini na agersitori fu a lasi manpikin?
14 Te wan preikiman kisi a wroko fu yepi wan lasi skapu fu drai kon baka, dan a preikiman dati kan taki fu na agersitori fu Yesus di skrifi na Lukas 15:11-24. Na ini na agersitori dati, wan yonguman e go libi wan yayolibi, èn a e frumorsu den gudu di a ben kisi fu en papa. Te fu kaba, a e bigin tegu gi a morsu libi di a e libi. Angri e kiri en, a e misi en famiri, èn a e teki wan bosroiti. A o go na oso baka! Te a de farawe ete, dan en papa e si en. A e lon go brasa a boi fu en, a e bosi en, èn a breiti srefisrefi. Te wan sma di gowe libi na ipi e poti prakseri na a agersitori disi, dan dati kan gi en deki-ati fu drai kon baka na a ipi. Fu di a sistema disi o kisi pori heri esi, meki den musu drai kon baka wantewante.
15. Fu san ede son sma e gowe libi a gemeente?
15 Furu sma di e gowe libi a gemeente, no e du dati na a fasi fa a lasi manpikin ben gowe libi en famiri. Sonwan fu den e drifi gowe safrisafri, neleki fa wan boto di ben de na syoro e drifi gowe safrisafri. Trawan fu den e broko den ede so furu nanga den sorgu fu a libi, taki den no e poti prakseri moro na a matifasi di den abi nanga Yehovah. Trawan baka e gi pasi taki wan brada noso sisa na ini a gemeente e meki den naki futu, noso den e gowe libi a gemeente fu di den no e agri nanga wan Bijbel leri. Wan tu fu den sma di gowe libi a gemeente e du seryusu sondu. Ma awinsi san meki taki den sma disi gowe libi a gemeente, pruberi fu gebroiki den rai di abi fu du nanga a situwâsi fu den fu gi den deki-ati. Kande dati sa yepi den fu drai kon baka, fosi a lati tumusi.
„Mi breiti taki yu drai kon baka, mi boi!”
16-18. (a) Fa wan owruman yepi wan brada di ben tapu nanga a Kresten diniwroko furu yari langa? (b) San meki taki a brada disi tapu nanga a Kresten diniwroko? Fa a kisi yepi, èn fa a gemeente handri di a drai kon baka?
16 Wan Kresten owruman e taki: „Wi leki owruman fu a gemeente e du ala muiti fu go luku den wan di tapu nanga a Kresten diniwroko. Mi prakseri wan brada di mi ben studeri nanga en, èn di mi yepi fu kon sabi den tru tori fu Bijbel. A brada disi no ben teki prati na a Kresten diniwroko sowan 25 yari langa, èn a ben abi bigi problema. Sobun, mi sori en taki a ben o feni yepi te a ben o du san Bijbel e taki. Baka wan pisi ten, a bigin kon na a Kownukondre zaal, èn a ben wani studeri Bijbel so taki a ben kan kisi moro deki-ati fu drai kon baka na a ipi.”
17 San meki taki a brada tapu nanga a Kresten diniwroko? A e taki: „Mi bigin poti moro prakseri na grontapu sani, na presi fu poti prakseri na a matifasi di mi ben abi nanga Yehovah. Te fu kaba, mi no ben e studeri Bijbel moro, mi no ben e preiki moro, èn mi no ben e go moro na den konmakandra. Fosi yu denki, mi no ben abi demakandra moro nanga a Kresten gemeente. Ma fu di na owruman sori taki a ben e broko en ede trutru nanga mi, meki mi ben man drai kon baka.” Baka di a brada disi bigin studeri Bijbel, dan safrisafri den problema fu en kon moro mendri. A e taki: „Mi kon si taki a sani di mi ben mankeri na ini mi libi, na a lobi nanga a tiri fu Yehovah nanga en organisâsi.”
18 Fa a gemeente ben feni en di a brada disi drai kon baka? A e taki: „Mi e firi neleki a lasi manpikin na ini na agersitori fu Yesus Krestes. Wan owru sisa de na ini a gemeente fu wi 30 yari kaba, èn a e dini Yehovah fayafaya ete. A sisa disi taigi mi: ’Mi breiti taki yu drai kon baka, mi boi!’ A sani dati naki mi ati trutru. Mi breiti taki mi drai kon baka na ini a gemeente. Èn mi e warderi en trutru taki na owruman dati nanga a heri gemeente sori lobi, switifasi, nanga pasensi gi mi. Mi e warderi en tu taki den ben e broko den ede nanga mi. A lobi di den abi gi Yehovah èn gi tra sma yepi mi fu drai kon baka na a ipi.”
Gi den deki-ati fu drai kon baka wantewante!
19, 20. Fa wi kan gi trawan deki-ati fu drai kon baka na a ipi wantewante? Fa wi kan sori den taki Gado no e fruwakti tumusi furu fu wi?
19 Wi e libi na ini den lasti dei, èn heri esi a sistema disi o kisi pori. Fu dati ede, wi musu gi den wan di tapu nanga a Kresten diniwroko deki-ati fu kon na den Kresten konmakandra. Gi den deki-ati fu kon wantewante. Sori den taki Satan e pruberi fu pori a matifasi di den abi nanga Gado, èn taki a wani meki den denki taki den sa kisi frulekti fu den hebi fu a libi, te den e gowe libi a tru anbegi. Yu kan gi den a dyaranti taki na soso te den e tan waka baka Yesus, den sa kisi trutru frulekti.—Leisi Mateyus 11:28-30.
20 Memre den sortu sma disi taki Gado e fruwakti taki wi e du ala san wi man fu plisi en. Di sma krutu Maria, a sisa fu Lasarus, fu di a ben kanti diri switismeri oli na tapu Yesus ede, dan Yesus ben taki: „Libi na uma. . . . Na uma disi du san a ben man du” (Mark. 14:6-8). Yesus prèise a pôti uma di ben poti pikinso moni na ini a monikisi fu a tempel. Na uma disi ben du tu san a ben man (Luk. 21:1-4). Furu fu wi man go na den Kresten konmakandra èn wi man teki prati na a Kownukondre preikiwroko. Yehovah kan yepi den wan di tapu nanga a Kresten diniwroko, fu du den srefi sani dati.
21, 22. Sortu dyaranti yu kan gi den wan di e drai kon baka na Yehovah?
21 Son leisi wan Kresten di gowe libi na ipi e frede fu miti den brada nanga sisa fu en baka. Kande yu kan memre en fa sma ben breiti di a lasi manpikin ben drai go baka na oso. Te sma e drai kon baka na a gemeente, dan den brada nanga sisa na ini a gemeente e prisiri tu. Gi den wan di gowe libi a gemeente deki-ati fu no draidrai, ma fu kakafutu gi Didibri èn fu kon krosibei na Gado.—Yak. 4:7, 8.
22 Den brada nanga sisa sa prisiri te sma e drai kon baka na Yehovah (Kragi. 3:40). Di den ben e dini Gado fosi, dan dati ben gi den prisiri. Den wan di e drai kon baka wantewante, sa kisi bun furu blesi na ini a ten di e kon!
San yu ben sa piki?
• Fa yu kan yepi wan Kresten di tapu nanga a diniwroko fu di a naki futu?
• San yu ben kan taki fu yepi wan sma di gowe libi na ipi fu Gado fu di a no e agri nanga wan Bijbel leri?
• Fa yu kan yepi wan sma te a e frede fu drai kon baka na a gemeente?
[Aksi fu a tori disi]
[Prenki na tapu bladzijde 13]
Arki bun te wan brada noso sisa di tapu nanga a Kresten diniwroko, e taki san de na tapu en ati
[Prenki na tapu bladzijde 15]
Te wan sma e poti prakseri na a agersitori fu a lasi manpikin, dan dati kan yepi en fu drai kon baka na a ipi