Fu san ede yu musu tan du san reti?
Fu san ede yu musu tan du san reti?
„Krutu mi, o Yehovah, meki a kon na krin taki . . . mi lobi fu du san reti.”—PS. 7:8.
1, 2. San na wan tu situwâsi pe Kresten nofo tron musu sori taki den na sma di lobi fu du san reti?
LUKU den dri situwâsi disi: Wan tu boi e fruferi wan tra boi na skoro. Kande den wani meki a kisi atibron, so taki a e bigin kosi den, noso taki a e bigin feti nanga den. A boi disi sa du dati? Noso a sa hori ensrefi èn waka gowe? Wan masra de na oso en wawan, èn a e suku wan tu sani tapu Internet. Wantronso, wan faki e sori en wan Web site pe a kan go luku fisti sekstori. A sa go luku a Web site dati? Noso a sa wai pasi gi en? Wan Kresten uma e taki tori nanga wan tu tra sisa. Now den e bigin taki takru fu wan sisa na ini a gemeente. A sisa disi sa teki prati na a tori dati? Noso a sa pruberi fu kenki a tori?
2 Aladi den situwâsi disi e difrenti fu makandra, toku den ala dri abi fu du nanga a muiti di wi leki Kresten musu meki fu tan du san reti. Te a abi fu du nanga den broko-ede fu yu, den winsi fu yu, nanga den marki di yu wani doro na ini a libi, dan yu e prakseri fu du san Gado feni bun? Doronomo, sma e broko den ede nanga a fasi fa den tan èn nanga a gosontu fu den. Tra sani di e gi sma broko-ede, na te den e prakseri fa den o sorgu densrefi, fa den musu lusu problema di den abi nanga mati, noso nanga wan sma di den e hori nanga en. Kande wi e poti furu prakseri na den sortu sani dati. Ma san na a moro prenspari sani gi Yehovah te a e ondrosuku wi ati? (Ps. 139:23, 24) Yehovah wani si efu wi na sma di lobi fu du san reti.
3. Sortu grani Yehovah gi wi, èn na sortu sani wi sa poti prakseri na ini na artikel disi?
3 Yehovah, a Sma di e gi wi „ibri bun presenti nanga ibri volmaakti kado”, gi ibriwan fu wi difrenti sortu presenti (Yak. 1:17). Tangi fu en meki wi abi wan skin, wan frustan, wan bun gosontu, èn a koni fu man du spesrutu sani (1 Kor. 4:7). Ma Yehovah no e dwengi wi fu du san reti. A e meki wi bosroiti gi wisrefi efu wi sa du dati (Deut. 30:19). Dati meki wi musu kon sabi san a wani taki fu de wan sma di lobi fu du san reti. Wi sa poti prakseri tu na dri reide fu san ede a de so prenspari fu de so wan sma.
O ten wi kan taki dati wan sma lobi fu du san reti?
4. O ten wi kan taki dati wan sma lobi fu du san reti? San wi kan leri fu a wet fu Yehovah, te a abi fu du nanga meti-ofrandi?
4 Soleki fa a sori, dan furu sma no sabi krin san a wani taki fu de wan sma di lobi fu du san reti. Fu eksempre, te politiekman e meki bigi taki den na sma di lobi fu du san reti, dan nofo tron den wani sori nanga dati taki den no abi bedrigifasi. Ma te wan sma no abi bedrigifasi, dan dati no wani taki dati a e du san reti ala ten. Soleki fa Bijbel e sori, dan wan sma di lobi fu du san reti, ala ten e tyari ensrefi na wan fasi di fiti. Den Hebrew wortu di abi fu du nanga a lobi di sma lobi fu du san reti, e komoto fu wan tra Hebrew wortu di wani taki ’bun dorodoro’, noso ’sondro fowtu’. Bijbel e gebroiki wan fu den wortu disi fu taki fu den ofrandi di den Dyu ben musu tyari gi Yehovah. Yehovah ben feni wan meti-ofrandi bun, soso te na ofrandi dati ben bun dorodoro. (Leisi Lefitikus 22:19, 20.) Te sma ben e tyari malengri meti, siki meti, noso breni meti leki ofrandi, dan Yehovah no ben e feni dati bun kwetikweti.—Mal. 1:6-8.
5, 6. (a) Sortu eksempre e sori taki nofo tron wi lobi sani di bun dorodoro? (b) A de so taki libisma musu de volmaakti fu man du san reti? Tyari dati kon na krin.
5 A no e fruwondru wi te sma e suku fu abi sani di bun dorodoro, èn te sma lobi den sani dati. Luku na eksempre disi: Wan sma di e suku spesrutu sortu buku, e feni wan prenspari buku di a ben e suku langa ten kaba. Ma te a feni a buku disi, dan a e si taki wan tu prenspari bladzijde e mankeri. Kande a sani disi e meki taki a no wani a buku moro. Noso, prakseri wan uma di e waka na sekanti aladi a e suku moi skropu di skwala wasi kon na syoro. Fu di a lobi den moi skropu disi di e difrenti fu makandra, meki ten na ten a e bukundu fu luku wan tu fu den moro fini. Sortuwan a o teki? Den wan di no abi nowan enkri tyepi. Na so Gado e suku sma tu di de sondro fowtu.—2 Kron. 16:9.
6 Ma kande yu e aksi yusrefi efu wan sma musu de volmaakti fu man du san reti ala ten. Fu di wi na sondusma, meki a kan taki wi e si wisrefi leki wan buku di no abi ala bladzijde, noso leki skropu di abi wan tyepi. Na so yu e firi tu son leisi? Yu kan abi a dyaranti taki Yehovah no e fruwakti taki wi musu de volmaakti. Noiti a e fruwakti moro fu wi leki sani wi man du (Ps. 103:14; Yak. 3:2). * Toku a wani taki wi e tan du san reti. A tru taki sondu libisma man du san reti? Iya. Luku na eksempre disi: Wan yonkuman lobi wan yongu uma, èn a o trow nanga en. A no de fu taki dati a no kan fruwakti taki a yongu uma disi no sa meki fowtu. Ma a fiti te a e fruwakti taki na uma disi musu lobi en nanga en heri ati, èn taki a musu lobi en wawan. Na wan srefi sortu sani Yehovah e fruwakti fu wi, fu di a de „wan Gado di wani taki sma musu anbegi en wawan” (Ex. 20:5). A no e fruwakti taki wi de volmaakti, ma a wani taki wi musu lobi en nanga wi heri ati, èn taki wi e anbegi en wawan.
7, 8. (a) Fa Yesus ben de wan eksempre gi wi na ini a fasi fa a tan du san reti? (b) San a wani taki fu de wan sma di lobi fu du san reti, soleki fa Bijbel e sori?
7 Kande wi sabi ete san Yesus ben piki den sma di ben aksi en san na a moro bigi komando. (Leisi Markus 12:28-30.) Boiti taki Yesus piki na aksi fu den, a fasi fa a ben e libi ben e kruderi tu nanga a piki di a ben gi den. A ben de a moro bun eksempre fu wan sma di lobi Yehovah nanga en heri frustan, en heri ati, èn nanga en heri sili. A ben sori taki wi no musu taki nomo dati wi lobi fu du san reti, ma wi musu du sani tu di e tyari dati kon na krin. Boiti dati, wi musu du den sani dati nanga wan krin ati. Te wi wani du san reti, dan wi musu teki na eksempre fu Yesus.—1 Petr. 2:21.
8 Luku san a wani taki fu de wan sma di lobi fu du san reti. Soleki fa Bijbel e sori, dan a sma dati e dini Yehovah Gado di de na hemel, nanga en heri ati. Boiti dati, a e du a wani fu Yehovah, èn a e horibaka gi den sani di A o du. Te wi na sma di e du san reti, dan wi sa du ala san wi man fu plisi Yehovah Gado na ini wi aladei libi. Den sani di prenspari gi Yehovah, sa de den moro prenspari sani gi wi. Meki wi go luku dri reide fu san ede a de prenspari fu du san reti.
1. Te wi e du san reti, dan wi e sori taki Yehovah na a Sma di abi a reti fu tiri
9. Fu san ede wi musu du san reti fu man sori taki wi e si Yehovah leki a Sma di abi a reti fu tiri?
9 Yehovah na a Sma di abi a reti fu tiri ala sani, awansi wi e gi yesi na en, noso awansi wi no e du dati. A tiri fu en de regtfardiki èn a de fu têgo, èn a abi a reti fu tiri hemel nanga grontapu. Na so a sa de ala ten, awansi san iniwan libisma noso engel e taki noso e du. Ma den takru sani di Satan fruteri fu Yehovah, meki taki engel na hemel èn sosrefi sma na grontapu bigin tweifri efu na En abi a reti fu tiri. Dati meki a musu sori ala engel nanga ala libisma taki a de wan bun Tiriman di e tiri na wan reti fasi èn na wan lobi-ati fasi. Leki Kotoigi fu Yehovah, wi lobi fu fruteri iniwan sma di wani arki, taki na Gado abi a reti fu tiri hemel nanga grontapu. Fa wi kan sori taki wi e si Yehovah leki a Sma di abi a reti fu tiri? Na te wi e du san reti.
10. San Satan taki fu libisma èn fa yu wani sori en taki a de wan leiman?
10 Luku fu san ede a de fanowdu taki yu e du san reti. Te yu e luku en bun, dan Satan ben taki dati nowan libisma sa horibaka gi Yehovah leki a Moro Hei Tiriman, èn taki nowan sma sa dini En fu di den lobi en nanga den heri ati. Wan bun bigi grupu engel ben de drape tu di Didibri taigi Yehovah: „Skin fu skin, èn ala san wan libisma abi, a sa gi fu kibri en sili” (Yob 2:4). Hori na prakseri taki a sani di Satan taki no ben abi fu du nanga Yob wawan. A sani di a ben taki ben abi fu du nanga ala libisma. Dati meki Bijbel e kari Satan „a sma di e taki ogri fu wi brada” (Openb. 12:10). A e spotu Yehovah fu di a e taki dati Kresten no sa tan gi yesi na En. Na dati a e taki tu fu yu. Fa yu feni den sani disi di Satan e taki fu yu? Yu no ben o wani sori Satan taki en na wan leiman? Yu kan du dati te yu e tan du san reti.
11, 12. (a) Gi wan tu eksempre di e sori fu san ede wi musu du san Gado feni bun te wi e teki bosroiti? (b) Fu san ede wi musu si en leki wan grani taki wi man du san reti?
11 Soleki fa wi si, dan a de prenspari trutru fu luku bun ibri dei fa wi e tyari wisrefi, èn sortu bosroiti wi e teki. Meki wi poti prakseri baka na den dri situwâsi di kari na a bigin fu na artikel. Fa den sma dati ben kan sori taki den lobi fu du san reti? A boi di den skoropikin e suku nanga trobi trutru wani kosi den pikin dati, ma a e prakseri a rai disi: „No teki refensi, mi lobiwan, ma libi en gi na atibron fu Gado; bika Gado Buku taki: ’Na mi o teki refensi; mi o pai den baka gi den ogri di den du, na so Yehovah taki’” (Rom. 12:9). Sobun, a boi e waka gowe. A masra di de tapu Internet ben kan luku tori di e wiki den sekslostu fu sma, ma a e memre a sani di a e leri fu den wortu fu Yob: „Mi meki wan frubontu nanga mi ai. Sobun, fa mi ben kan poti prakseri na wan nyunwenke?” (Yob 31:1) A masra disi e weigri tu fu luku sani di no fiti, èn a e wai pasi gi den sani dati fu di den kan tyari takru bakapisi kon gi en. Na uma di e taki nanga wan tu tra sisa e yere fa den e bigin taki takru fu wan sma. A no e teki prati na a tori, fu di a e memre a rai disi: „Meki ibriwan fu wi plisi tra sma nanga sani di bun, so taki dati kan gi den deki-ati” (Rom. 15:2). A no ben o gi trawan deki-ati efu a ben o teki prati na a tori dati. A tori di den e taki ben o gi a Kresten sisa fu en porinen, èn a hemel Tata fu en no ben o feni dati bun tu. Dati meki a e bosroiti fu no teki prati na a tori, èn a e drai a tori.
12 Na ini ibriwan fu den situwâsi dati, a Kresten e teki wan bosroiti. Fu taki en leti, ibriwan fu den e taki: ’Yehovah na mi Tiriman. Mi sa pruberi fu du san a feni bun.’ Yu e pruberi tu fu du san Yehovah feni bun te yu musu teki bosroiti? Te yu e du dati, dan yu e gi yesi trutru na den moi wortu di skrifi na Odo 27:11: „Sori taki yu koni, mi manpikin, èn meki mi ati prisiri, so taki mi kan gi wan piki na a sma di e spotu mi.” A de wan grani trutru taki wi man meki na ati fu Gado prisiri! A sani disi e gi wi deki-ati fu du ala san wi man fu du san reti, a no so?
2. Te wi e du san reti, dan Gado sa feni wi bun
13. Fa den wortu fu Yob nanga David e sori taki Yehovah sa feni wi bun te wi lobi fu du san reti.
13 Wi si kaba taki te wi e du san reti, dan wi e sori taki wi e si Yehovah leki a Sma di abi a reti fu tiri. Na dati sa meki taki Gado feni wi bun. Yob ben frustan a sani disi heri bun. (Leisi Yob 31:6.) Yob ben sabi taki Gado e wegi ala libisma na tapu wan „ soifri wegi”, èn a e krutu wi na wan reti fasi fu si efu wi na sma di lobi fu du san reti. David ben taki tu: „Yehovah srefi sa krutu a pipel fu en. Krutu mi, o Yehovah, meki a kon na krin taki mi na wan bun sma, èn taki mi lobi fu du san reti. . . . Èn Gado di de regtfardiki e ondrosuku na ati èn den niri” (Ps 7:8, 9). Wi sabi taki Gado kan luku dipi na ini wi agersi ’ati nanga niri’. Ma wi musu hori na prakseri san Gado e suku na ini wi. Soleki fa David ben taki, Yehovah sa feni wi bun te wi lobi fu du san reti.
14. Fu san ede wi leki sondu libisma noiti musu denki taki wi no man tan du san reti?
14 Prakseri taki na ini a ten disi, Yehovah Gado e ondrosuku na ati fu milyunmilyun sma (1 Kron. 28:9). Omeni fu den sma disi e du san reti soleki fa a fiti wan Kresten? A no de fu taki dati furu fu den sma disi no de! Ma wi no musu denki taki wi abi tumusi furu fowtu fu man tan du san reti. Na presi fu dati, te wi e du san reti, dan neleki David nanga Yob, wi kan de seiker taki Yehovah sa si dati, awansi wi na sondusma. Memre tu taki te wan sma de volmaakti, dan a no abi fu de so ala ten taki a sa tan du san reti. Dri volmaakti sma nomo ben de na grontapu, èn tu fu den, Adam nanga Eva, no ben tan du san reti. Aladi dati de so, toku milyunmilyun sondusma e du san reti. Yu kan du dati tu.
3. Wi musu du san reti fu man si a kontru fu a howpu di wi abi
15. Fa David ben sori taki wi musu du san reti fu man si a kontru fu a howpu di wi abi?
15 Soleki fa wi si, dan Yehovah sa feni wi bun te wi lobi fu du san reti. Dati meki wi musu tan kweki a fasi dati fu man si a kontru fu a howpu di wi abi. David ben sabi taki a sani disi tru. (Leisi Psalm 41:12.) A ben warderi a howpu di a ben abi fu ondrofeni a bun-ati fu Gado fu têgo. Neleki tru Kresten na ini a ten disi, David ben abi a howpu fu libi fu têgo, èn fu tan kon moro krosibei na Yehovah Gado aladi a ben e dini en. David ben si taki a ben o abi fu tan du san reti efu a ben wani si a kontru fu a howpu dati. Na so a de tu taki te wi e tan du san reti, dan Yehovah e yepi wi, a e gi wi leri, a e tiri wi, èn a e blesi wi.
16, 17. (a) Fu san ede yu abi a fasti bosroiti fu tan du san reti? (b) Na sortu aksi wi sa poti prakseri na ini na artikel di e kon?
16 Fu man de koloku now, dan wi musu abi wan howpu. Te wi abi wan howpu, dan dati sa yepi wi fu de nanga prisiri na ini muilek ten. Howpu kan kibri wi frustan tu. Hori na prakseri taki Bijbel e agersi howpu nanga wan helm (1 Tes. 5:8). Neleki fa wan helm e kibri na ede fu wan srudati di e feti, na so howpu e kibri wi frustan gi den takru denki di Satan wani sma fu abi na ini a sistema disi di sa kisi pori heri esi. A no de fu taki dati te wi no abi wan howpu, dan a libi no e gi noti. Wi musu ondrosuku wisrefi bun fu kon sabi efu wi na sma di e du san reti, èn efu wi abi wan tranga howpu. No frigiti taki te yu e tan du san reti, dan yu e sori taki yu e si Yehovah leki a Sma di abi a reti fu tiri. Boiti dati, yu e kibri a warti howpu di yu abi. Meki a de so taki ala ten yu e du san reti!
17 Fu di a de so prenspari taki wi e tan du san reti, meki wi musu poti prakseri na ete wan tu aksi. Fa wi kan tron sma di lobi fu du san reti? Fa wi kan tan du san reti? Èn san wan sma kan du efu wan pisi ten a no ben e du san reti? Na ini na artikel di e kon wi sa poti prakseri na den aksi disi.
[Futuwortu]
^ paragraaf 6 A tru taki Yesus ben taki: „Fu dati ede un musu de volmaakti, neleki fa un Tata na hemel de volmaakti” (Mat. 5:48). A de krin taki Yesus ben e frustan taki srefi sondusma man du son sani sondro fowtu. Wi kan gi yesi na a komando di wi kisi fu lobi trawan nanga wi heri ati, èn na so wi e plisi Gado. Ma Yehovah wawan bun dorodoro. Iya, na en wawan man du ala ten san reti.—Ps. 18:30.
San yu ben sa piki?
• O ten wi kan taki dati wan sma lobi fu du san reti?
• Fu san ede wi musu du san reti fu man sori taki wi e si Yehovah leki a Sma di abi a reti fu tiri?
• Fu san ede wi musu tan du san reti fu man si a kontru fu a howpu di wi abi?
[Aksi fu a tori disi]
[Prenki na tapu bladzijde 5]
Ibri dei wi musu meki muiti fu du san reti