Owruten sani di sma skrifi e horibaka gi Bijbel

BAKA di Gado bruya a tongo fu libisma na Babel, dan difrenti sortu fasi kon de fa sma ben e skrifi sani. Den sma di ben e libi na ini Mesopotamia, soleki den Sumeriasma nanga den Babilonsma, ben e skrifi sani nanga yepi fu spesrutu skrifimarki. Den ben e gebroiki wan wrokosani di ben e meki marki di ben gersi dri-uku. Den ben e meki den marki disi na tapu plata pisi kleidoti di nati.

Sabiman feni furu sani di ben abi owruten skrifimarki na tapu, èn den sani disi e taki fu sma na ini Bijbel èn fu tori di pasa na ini Bijbel ten. San wi sabi fu a fasi disi fa sma fu owruten ben e skrifi? Èn fa den sani dati e horibaka gi Bijbel?

Owruten sani di de ete

Sabiman e bribi taki fosi, den sma fu Mesopotamia ben e skrifi sani nanga yepi fu marki noso prenki. Ibriwan fu den sani disi ben e prenki wan wortu noso wan prakseri. Fu eksempre, a marki di den ben e gebroiki fu prenki wan mankaw, ben gersi na ede fu wan mankaw. Fu di a ben e kon de fanowdu moro nanga moro gi den sma disi fu skrifi sani, meki den bigin skrifi sani nanga yepi fu owruten skrifimarki. Wan buku e taki: „Now, den marki no ben e prenki soso wortu, ma sosrefi pisi fu wortu. Te sma ben e moksi difrenti pisi fu wortu disi kon na wán, dan den ben wani taki wan tra sani” (NIV Archaeological Study Bible). Te fu kaba, sowan 200 difrenti owruten skrifimarki ben de „di ben e prenki soifri san sma ben e taki”.

Di Abraham ben de na libi na a ten fu a yari 2000 bifo Krestes, dan furu sma ben gwenti fu skrifi sani nanga yepi fu owruten skrifimarki. Ma na ini den 20 yarihondro baka dati, pikinmoro 15 difrenti pipel bigin skrifi a tongo fu den nanga yepi fu den skrifimarki disi. Moro leki 99 procent fu den owruten tori di sma feni, ben skrifi na tapu plata pisi kleidoti. Na ini den 150 yari di pasa, sma feni bun furu fu den plata pisi kleidoti disi na ini Ur, Uruk, Babilon, Nimrud, Nipur, Asur, Ninefei, Mari, Ebla, Ugarit, nanga Amarna. Wan buku e taki: „Sabiman e bribi taki sma feni pikinmoro tu milyun plata pisi kleidoti kaba di abi owruten skrifimarki na tapu, èn den e feni sowan 25.000 fu den sani disi ibri yari” (Archaeology Odyssey).

Na heri grontapu, sabiman di e ondrosuku owruten skrifimarki, abi a hebi wroko fu kon sabi san den skrifimarki disi wani taki. Sma e denki taki „sabiman na ini a ten disi ondrosuku 10 procent nomo fu ala den sani di abi owruten skrifimarki na tapu”.

Sma ben feni sosrefi plata pisi kleidoti pe tu noso dri tongo skrifi na tapu na ini owruten skrifimarki. Den sani disi yepi sabiman fu kon sabi san den skrifimarki wani taki. Sabiman kon si taki den owruten skrifimarki na tapu den sani di sma ben feni, ben e taki fu den srefi sani, ma den ben skrifi na ini difrenti tongo. Sabiman kon si taki nen, famirilin fu tiriman, èn sosrefi sani di sma ben e taki fu meki bigi, nofo tron ben skrifi furu leisi. A sani disi ben yepi den sabiman fu kon frustan san den skrifimarki wani taki.

Na a ten fu den yari baka 1850, sabiman ben kan leisi den skrifimarki fu owruten tongo di sma fu a Mindri Owstusei, den Akadiasma, den Asiriasma nanga den Babilonsma ben e taki. Wan buku e taki: „Baka di sabiman ben man leisi den owruten skrifimarki fu den Akadiasma, dan dati yepi den fu tyari kon na krin san den owruten skrifimarki fu tra tongo ben wani taki.” Fa den sani dati e horibaka gi Bijbel?

Den tori di e kruderi nanga Bijbel

Bijbel e taki dati kownu fu Kanan ben e tiri Yerusalem, teleki David ben teki a foto disi abra na a ten fu 1070 bifo Krestes (Yos. 10:1; 2 Sam. 5:4–9). Son sabiman ben e tweifri efu a tori disi tru. Ma na ini 1887, wan uma di ben e libi na ini wan burugron,  feni wan plata pisi kleidoti na ini Amarna, na Egepte. Te fu kaba, sma feni sowan 380 plata pisi kleidoti drape di ben abi owruten skrifimarki na tapu. Sabiman kon si taki den tori di ben skrifi na tapu den pisi kleidoti disi, na brifi di den tiriman fu Egepte (Amenhotep III nanga Achnaton) nanga den kownu fu Kanan ben seni gi makandra. Siksi fu den brifi ben de fu ‘Abdi-Heba, a tiriman fu Yerusalem.

Wan tijdschrift e taki: „Den plata pisi kleidoti di sma feni na Amarna, e sori krin taki Yerusalem no ben de wan bigi kontren di ben de fu wan spesrutu famiri. Den sani di skrifi na tapu a pisi kleidoti, e sori taki Yerusalem ben de wan foto. Den sani dati ben e sori tu taki ‘Abdi-Heba ben de wan tiriman di ben abi en eigi tanpresi, èn taki a ben abi wan srudatikampu fu 50 srudati na ini Yerusalem. Den srudati disi ben de fu Egepte. Ala den sani disi e sori taki Yerusalem ben de wan pikin kownukondre na tapu wan bergi” (Biblical Archaeology Review). A srefi tijdschrift disi ben taki bakaten: „Den sani di skrifi na tapu den pisi kleidoti fu Amarna, e gi wi na overtoigi taki Yerusalem ben de wan prenspari foto na ini a ten dati.”

Nen di skrifi na tapu owruten sani fu Asiria nanga Babilon

Den Asiriasma, èn bakaten den Babilonsma, ben skrifi den tori fu den na tapu plata pisi kleidoti, na tapu ston, grasi, èn na tapu monumenti. Sobun, di sabiman leri leisi den owruten skrifimarki fu den Akadiasma, dan den kon si taki den sani di den sma disi ben skrifi, ben e taki fu sma di kari tu na ini Bijbel.

Wan buku e taki: „Na ini 1870, Sabiman Samuel Birch ben hori wan taki gi wan nyun grupu fu sabiman (Society of Biblical Archaeology). Na ini a taki dati, a ben man leisi den nen fu den Hebrew kownu Omri, Akab, Yehu, Asaria . . . , Menahem, Peka, Hosea, Heskia nanga Manase [di ben skrifi nanga yepi fu owruten skrifimarki]. A ben man leisi sosrefi den nen fu den kownu Tiglat-Pileser . . . [III], Sargon, Sanherib, Esarhadon nanga Asurbanipal. Disi ben de den kownu fu Asiria. Wan tu tra nen di a ben man leisi, ben de den nen fu den Siriasma Benhadad, Hasaèl, nanga Resin” (The Bible in the British Museum).

Wan tra buku e sori fa den sani di Bijbel e taki fu Israel nanga Yuda fu owruten, e kruderi nanga den sani di sma skrifi nanga yepi fu owruten skrifimarki. San a buku disi e tyari kon na krin? „Den sani di sma fu tra kondre skrifi, e taki fu 15 noso 16 kownu fu Yuda nanga Israel. Boiti den nen fu den kownu disi, sosrefi a ten di den kownu ben de na libi, e kruderi nanga san Bijbel e taki na ini den buku Kownu. Den buku disi e taki fu ibriwan fu den kownu di kari” (The Bible and Radiocarbon Dating).

Na ini 1879, sma feni wan pisi ston di nen a Siruscilinder, èn a ben abi owruten skrifimarki na tapu. A pisi ston disi di furu sma sabi, e taki dati baka di Sirus ben teki Babilon abra na ini 539 bifo Krestes, dan a meki wan wet di ben e taki dati ala katiboman ben musu drai go baka na a mamakondre fu den. Den Dyu ben kisi wini tu fu a wet disi (Esra 1:1-4). Furu sabiman fu a di fu 19 yarihondro ben e tweifri efu a wet disi di Bijbel e taki fu en ben de trutru. Ma neleki a Siruscilinder, tra sani di ben abi owruten skrifimarki na tapu, èn di ben de fu a ten di Persiakondre ben de wan grontapumakti, e sori taki san Bijbel e taki na tru tori.

Na ini 1883, sma feni moro leki 700 owruten sani pe skrifimarki fu owruten ben skrifi na tapu. Den feni den sani disi na ini Nippur, krosibei fu Babilon. Pikinmoro 70 fu den 2500 nen di ben skrifi na tapu den owruten sani disi, na Dyu nen. Soleki fa historia skrifiman Edwin Yamauchi e taki, dan den nen disi na fu sma di ben meki kontrakti nanga makandra, sosrefi nen fu bisnisman, kotoigi, sma di ben e teki belasting moni gi lanti, èn sma di ben e wroko gi a kownu. Furu buweisi de taki den Dyu fu a ten dati ben e tan du den sortu wroko disi krosibei fu Babilon. Disi e horibaka gi a profeititori di e taki dati aladi wan „fikapisi” fu den Israelsma ben drai go baka na Yuda, baka di den ben komoto na ini katibo na Asiria nanga Babilon, toku furu fu den no ben du dati.—Yes. 10:21, 22.

Na ini den 1000 yari bifo Krestes, sma ben e skrifi sani nanga yepi fu owruten skrifimarki èn nanga yepi fu na alfabet. Ma te fu kaba, den Asiriasma nanga den Babilonsma bigin skrifi sani soso nanga yepi fu na alfabet èn den tapu fu skrifi sani nanga yepi fu owruten skrifimarki.

Sabiman musu ondrosuku dusundusun plata pisi kleidoti ete di de na ini museum. Den wan di sabiman ondrosuku kaba e sori krin taki den sani di Bijbel e taki na tru tori. Wi no sabi sortu tra sani sa kon na krin ete te sabiman ondrosuku den tra sani di abi owruten skrifimarki na tapu.

[Prenki na tapu bladzijde 21]

Photograph taken by courtesy of the British Museum