Sori warderi gi den prenspari frantwortu di Yesus abi

„Mi na a pasi, a waarheid nanga a libi. Nowan sma kan kon na a Tata, efu mi no yepi en.”—YOH. 14:6.

1, 2. Fu san ede wi musu kon sabi fa Yesus de tra fasi leki ala tra sma?

NA INI den hondrohondro yari di pasa, furu sma pruberi fu de tra fasi leki trawan, ma furu fu den sma disi no ben abi bun bakapisi. Wan tu sma nomo kan taki nanga reti taki trutru den de tra fasi leki tra sma. Ma furu reide de fu san ede Yesus Krestes, a Manpikin fu Gado, de tra fasi leki ala tra sma.

² Fu san ede wi musu kon sabi moro fini fa Yesus de tra fasi leki ala tra sma? Fu di dati sa yepi wi fu tan abi wan bun matifasi nanga wi hemel Tata, Yehovah! Yesus ben taki: „Mi na a pasi, a waarheid nanga a libi. Nowan sma kan kon na a Tata, efu mi no yepi en” (Yoh. 14:6; 17:3). Meki wi go luku fu san ede Yesus de tra fasi leki ala tra sma. Disi sa yepi wi fu kisi moro warderi gi a fasi fa Gado e gebroiki en fu meki a wani fu En kon tru.

„A wan-enkri Manpikin di Gado srefi meki”

3, 4. (a) Fu san ede Yesus de heri tra fasi leki ala den tra yeye manpikin fu Gado? (b) Fu san ede wi kan taki dati Yesus ben abi wan prenspari frantwortu di Gado ben e meki ala tra sani?

³ Di Satan ben e tesi Yesus, dan a kari Yesus „wan manpikin fu Gado”. Ma Yesus ben de moro leki dati (Mat. 4:3, 6). Bijbel abi leti fu kari Yesus „a wan-enkri Manpikin di Gado srefi meki” (Yoh. 3:16, 18). A Griki wortu di vertaal nanga ’wan-enkri wan di meki’, wani taki „wán nomo fu en de”, noso „a wan di de heri tra fasi leki ala trawan”. Yehovah abi milyunmilyun yeye manpikin. Ma fu san ede wi kan taki dati Yesus de „heri tra fasi leki ala trawan”?

⁴ Yesus de heri tra fasi leki den tra engel, fu di en na a wan-enkri wan di en Tata srefi meki. En na a fosi Manpikin di Gado meki. Fu taki en leti, Yesus na „a fosiwan fu ala sani di Gado meki” (Kol. 1:15). Yesus na „a bigin fu den sani di Gado meki” (Openb. 3:14). A wan-enkri Manpikin di Gado srefi meki ben abi wan prenspari frantwortu tu di Gado ben e meki ala sani. Yesus no ben de a Mekiman, noso a Sma fu pe libi komoto. Ma Yehovah gebroiki en fu meki ala tra sani. (Leisi Yohanes 1:3.) Na apostel Paulus ben skrifi: „Fu taki en leti, wán Gado nomo de gi wi, a Tata; ala sani komopo fu en, èn wi e libi gi en; èn wán Masra nomo de, Yesus Krestes; ala sani kon de nanga yepi fu en èn wi kon de nanga yepi fu en.”—1 Kor. 8:6.

5. Fa Bijbel e tyari kon na krin taki Yesus de tra fasi leki ala tra sma?

⁵ Ma moro reide de fu san ede Yesus de tra fasi leki ala tra sma. Na ini Bijbel, Yesus abi difrenti nen di e tyari kon na krin sortu prenspari frantwortu a abi fu meki a wani fu Gado kon tru. Meki wi go luku feifi fu den nen disi di Yesus abi na ini den Kresten Griki Buku fu Bijbel.

„A Wortu”

6. Fu san ede a fiti taki Bijbel e kari Yesus „a Wortu”?

⁶ Leisi Yohanes 1:14. Fu san ede Bijbel e kari Yesus „a Wortu”, noso Logos? A nen disi e sori sortu wroko Yesus du sensi di Gado meki ala den tra engel nanga libisma. Yehovah gebroiki en Manpikin fu tyari boskopu gi den engel èn fu gi den rai. A gebroiki a Manpikin disi tu fu tyari boskopu gi libisma na grontapu. A de krin taki Yesus na a Wortu, noso a Sma di e taki gi Gado, te wi e luku a sani disi di Yesus ben taigi den Dyu di ben e arki en: „Den sani di mi e leri sma, a no  fu misrefi, ma den de fu a sma di seni mi kon. Efu wan sma wani du a wani fu En, dan a o sabi efu den sani di mi e leri sma kon fu Gado, noso efu den kon fu misrefi” (Yoh. 7:16, 17). Te nanga now Yesus na „A Wortu fu Gado”, srefi baka di a drai go na hemel.—Openb. 19:11, 13, 16.

7. Fa wi kan sori sakafasi neleki Yesus „a Wortu”?

⁷ Prakseri san a nen disi wani taki. Aladi Yesus na a moro koniwan fu ala den manpikin fu Gado, toku a no e frutrow tapu en eigi koni. A e taki san en Tata taigi en fu taki. A no e poti prakseri na ensrefi, ma ala ten a e poti prakseri na Yehovah (Yoh. 12:50). Dati na wan moi sani di wi e leri fu Yesus! Wi leki futuboi fu Gado, kisi a tumusi moi grani tu fu „preiki bun nyunsu di abi fu du nanga bun sani” (Rom. 10:15). Yesus ben abi sakafasi trutru. Te wi abi warderi gi a sani dati, dan neleki en wi no sa fruteri trawan wi eigi denki. Te wi e fruteri sma a boskopu fu Bijbel di kan kibri sma libi, dan wi musu „hori wisrefi na san skrifi”.—1 Kor. 4:6.

„Na Amen”

8, 9. (a) San a wortu „amen” wani taki, èn fu san ede Bijbel e kari Yesus „na Amen”? (b) Fa Yesus „na Amen”, ben tyari a frantwortu fu en?

⁸ Leisi Openbaring 3:14. Fu san ede Bijbel e kari Yesus „na Amen”? A wortu di vertaal leki „amen”, komoto fu wan Hebrew wortu di wani taki „na so a de” noso „fu tru”. A wortu dati komoto fu wan Hebrew wortu di wani taki „de fu frutrow”. Bijbel e gebroiki a srefi wortu disi fu taki dati Yehovah na wan Gado di de fu frutrow (Deut. 7:9; Yes. 49:7). Sobun, fa a frantwortu di Yesus abi leki „na Amen” e sori taki a de tra fasi leki ala tra sma? Luku fa 2 Korentesma 1:19, 20 e piki na aksi disi. Drape skrifi: ’A Manpikin fu Gado, Krestes Yesus, fu suma sma preiki gi unu, no ben tron Iya fosi, èn Nôno baka dati, ma a meki Iya tan Iya. Bika awinsi o furu den pramisi fu Gado de, den tron Iya nanga yepi fu en. Fu dati ede wi e taki „Amen” nanga yepi fu en sosrefi, so taki Gado kan kisi glori nanga yepi fu wi.’

⁹ Yesus na „a Amen” tapu ala den pramisi fu Gado. A ben gi yesi doronomo na Gado di a ben de na grontapu, èn a gi en libi leki wan srakti-ofrandi. Den sani disi ben de a buweisi taki ala den pramisi fu Yehovah Gado sa kon tru. Den sani disi e sori tu taki ala den pramisi dati sa kon tru nanga yepi fu Yesus. Soleki fa wi kan leisi na ini a buku fu Yob, dan Satan ben taki dati den futuboi fu Gado ben o drai baka gi En te problema ben o miti den, te den ben o pina, èn te den ben o kisi tesi. Ma fu di Yesus tan gi yesi na Gado, meki a sori taki Satan no ben abi leti di a taki den sani dati (Yob 1:6-12; 2:2-7). Fu ala den engel nanga libisma di Gado meki, a fosi Manpikin fu Gado ben de a yoisti sma di ben man piki na aksi dati krin. Boiti dati, a fasi fa Yesus gi yesi na en Tata, ben de a moro bun buweisi taki na Yehovah abi a reti fu tiri hemel nanga grontapu.

10. Fa wi kan teki na eksempre fu Yesus di abi a frantwortu leki „na Amen”?

¹⁰ Fa wi kan teki na eksempre fu Yesus di abi a frantwortu leki „na Amen”? Wi kan du dati te wi e tan gi yesi na Yehovah, èn te wi e tan si en leki a Sma di abi a reti fu tiri. Na so wi sa sori taki wi e gi yesi na a rai di skrifi na Odo 27:11. Drape skrifi: „Sori taki yu koni, mi manpikin, èn meki mi ati prisiri, so taki mi kan gi wan piki na a sma di e spotu mi.”

„A Mindriman fu wan nyun frubontu”

11, 12. Fa a frantwortu di Yesus abi leki „a Mindriman”, e sori taki a de tra fasi leki ala tra sma?

¹¹ Leisi 1 Timoteyus 2:5, 6. Yesus na a wán-enkri ’mindriman di de na mindri Gado nanga libisma’. En na „a mindriman fu wan nyun frubontu” (Hebr. 9:15; 12:24). Ma Bijbel e kari Moses wan mindriman tu. Iya, a ben de a mindriman fu a Wetfrubontu (Gal. 3:19). We dan, fa a frantwortu di Yesus abi leki „a Mindriman”, e sori taki a de tra fasi leki ala tra sma?

¹² A Griki wortu di vertaal nanga „mindriman” na wan wortu di sma e gebroiki na ini krutu-afersi. A wortu disi abi fu du nanga a reti di Yesus abi fu de Mindriman (noso, wan sortu afkati) fu a nyun frubontu di meki taki Gado ben kan teki wan nyun pipel, èn dati na „a Israel fu Gado” (Gal. 6:16). Den sma disi na salfu Kresten di e dini leki „wan grupu fu priester di o tiri leki  kownu” na hemel (1 Petr. 2:9; Ex. 19:6). A Wetfrubontu di ben abi Moses leki mindriman, no ben man tyari so wan pipel kon na wán.

13. Sortu frantwortu Yesus abi leki Mindriman?

¹³ Sortu frantwortu Yesus abi leki Mindriman? We, Yehovah e meki den wan di kon na ini a nyun frubontu, kisi wini fu a brudu fu Yesus. Na so Yehovah e fruklari taki den de regtfardiki (Rom. 3:24; Hebr. 9:15). Baka dati, Gado kan teki den na ini a nyun frubontu, fu meki den tron priester di e tiri leki kownu na hemel! Leki Mindriman fu den sma disi, Yesus e yepi den fu tan abi wan bun nen na Gado.—Hebr. 2:16.

14. Fu san ede ibri Kresten, awinsi sortu howpu den abi, musu sori warderi gi a frantwortu di Yesus abi leki a Mindriman?

¹⁴ Ma fa a de nanga den wan di no de na ini a nyun frubontu, èn di no abi a howpu fu libi na ini hemel, ma fu libi fu têgo na grontapu? Aladi den no de na ini a nyun frubontu, toku den e kisi wini fu en. Den e kisi pardon fu den sondu èn Gado e si den leki regtfardikisma di de en mati (Yak. 2:23; 1 Yoh. 2:1, 2). Awinsi wi abi a howpu fu libi na ini hemel noso na grontapu, toku ibriwan fu wi abi bun reide fu sori warderi gi Yesus leki a Mindriman fu a nyun frubontu.

„Granpriester”

15. Fa Yesus, a Granpriester, de heri tra fasi leki ala den tra man di dini leki granpriester?

¹⁵ Na ini a ten di pasa, furu man ben e dini leki granpriester, ma leki Granpriester, Yesus ben de heri tra fasi leki den man dati. Fa so? Paulus e taki: „A no abi fu tyari ofrandi ala dei leki den granpriester dati. Den ben musu tyari ofrandi gi den eigi sondu fosi èn baka dati gi den sondu fu a pipel: (bika di a wan disi gi ensrefi leki ofrandi, a du disi wán leisi nomo, iya, fu ala ten); bika a Wet e poti sma leki granpriester aladi den sma abi swakifasi; ma baka di den kisi a Wet, dan wan Manpikin di kon de volmaakti fu têgo, poti na wroko nanga yepi fu wan sweri.”—Hebr. 7:27, 28. *

16. Fu san ede na ofrandi fu Yesus de tra fasi leki ala tra ofrandi?

¹⁶ Neleki fa Adam no ben abi sondu na a bigin, na so Yesus no ben abi sondu (1 Kor. 15:45). Dati meki, Yesus ben de a wan-enkri libisma di ben man gi en libi leki wan volmaakti ofrandi, èn noiti a ben o de fanowdu moro taki wan sma ben o abi fu tyari so wan ofrandi. Den Israelsma di ben de na ondro a Wet di Gado ben gi Moses, ben e tyari ofrandi ibri dei. Ma ala den ofrandi dati, nanga ala den wroko di den priester ben e du, ben de wan skaduw nomo fu den sani di Yesus ben o du (Hebr. 8:5; 10:1). Fu di Yesus man du moro leki ala tra granpriester èn fu di a de Granpriester fu ala ten, meki a de heri tra fasi leki ala tra granpriester.

17. Fu san ede wi musu abi warderi gi Yesus, wi Granpriester, èn fa wi kan du dati?

¹⁷ Wi abi Yesus fanowdu leki Granpriester fu yepi wi fu abi wan bun nen na Gado. Èn a no de fu taki dati wi abi wan tumusi bun Granpriester! Paulus ben skrifi: „Wi no abi wan granpriester di no man frustan den swakifasi fu wi, ma wi abi wan granpriester di kisi tesi na ala fasi neleki wi, ma en no ben abi sondu” (Hebr. 4:15). Fu tru, te wi abi warderi gi a sani disi, dan wi ’no sa libi gi wisrefi moro, ma gi a sma di dede gi wi’.—2 Kor. 5:14, 15; Luk. 9:23.

A „Pikin” di Gado ben pramisi

18. Sortu profeititori Gado taki baka di Adam sondu? Sortu tra sani kon na krin fu a profeititori disi bakaten?

¹⁸ Di den fosi libisma na ini Eden sondu, dan dati meki taki libisma lasi ala sani. Den ben lasi  a matifasi di den abi nanga Gado, den lasi a howpu fu libi fu têgo, fu de koloku, èn fu libi na ini wan Paradijs. Dati meki Yehovah Gado pramisi taki a ben o seni wan Frulusuman kon. Bijbel e kari a Frulusuman dati a „pikin” (Gen. 3:15). Bun furu Bijbel profeititori abi fu du nanga a Pikin disi di nowan sma ben sabi ete, èn den profeititori disi kon tru na ini den hondrohondro yari di pasa. A ben o de wan bakapikin fu Abraham, Isak, nanga Yakob. A ben o de wan bakapikin tu fu Kownu David.—Gen. 21:12; 22:16-18; 28:14; 2 Sam. 7:12-16.

19, 20. (a) Suma na a pramisi Pikin? (b) Fu san ede wi kan taki dati boiti Yesus, tra sma de tu di tron bakapikin fu Abraham?

¹⁹ Suma ben de a pramisi Pikin? Wi kan feni a piki tapu na aksi dati na Galasiasma 3:16 (Leisi a tekst disi). Ma na ini a srefi kapitel disi, na apostel Paulus e taigi salfu Kresten a sani disi tu: „Boiti dati, efu unu na fu Krestes, dan unu na trutru pikin fu Abraham, sma di sa kisi a gudu di Gado pramisi” (Gal. 3:29). Efu Yesus na a pramisi Pikin, dan fa a du kon taki tra sma tron pikin tu fu Abraham?

²⁰ Milyunmilyun sma feni taki den na bakapikin fu Abraham, èn sonwan fu den ben e tyari densrefi leki profeiti. Son kerki e si en leki wan trutru prenspari sani taki den profeiti fu den na bakapikin fu Abraham. Ma a de so taki ala den profeiti dati na a pramisi Pikin? Nôno. Soleki fa Gado ben meki na apostel Paulus skrifi, dan a no ala den bakapikin fu Abraham kan taki dati den na a pramisi Pikin. Gado no ben gebroiki den bakapikin fu den tra manpikin fu Abraham fu blesi libisma. A pramisi Pikin ben o de wan bakapikin fu Isak wawan (Hebr. 11:18). Te fu kaba, wán man nomo, Yesus Krestes, de a pramisi Pikin, èn na ini Bijbel wi kan leisi fu ala den afo fu en te go miti Abraham. * Ala den tra sma di tron bakapikin fu Abraham bakaten, ben  man tron dati fu di den „na fu Krestes”. Iya, Yesus na a wan-enkri sma di ben kan meki a profeititori disi kon tru.

21. San yu lobi fu a fasi fa Yesus tyari a prenspari frantwortu di a abi fu meki a wani fu Yehovah kon tru?

²¹ Na ini na artikel disi, wi luku syatu sortu prenspari frantwortu Yesus abi fu meki a wani fu Yehovah kon tru. San wi leri fu ala den sani disi? Sensi di Gado bigin meki sani, teleki now, a Manpikin di Gado srefi meki, trutru de tra fasi leki ala tra sma. Ma a Manpikin disi fu Gado di tron Yesus bakaten, ala ten dini en Tata nanga sakafasi èn na wan fasi di a Tata feni bun. Noiti a suku glori gi ensrefi (Yoh. 5:41; 8:50). Wi e leri furu fu na eksempre fu en! Meki wi teki a bosroiti fu „du ala sani fu gi Gado glori”, neleki fa Yesus du dati.—1 Kor. 10:31.

[Futuwortu]

Yu e memre disi ete?

• San den nen di Yesus abi na ini Bijbel e leri yu fu a prenspari frantwortu di a abi? (Luku a faki.)

• Fa yu kan teki na eksempre fu a Manpikin fu Yehovah di ben de tra fasi leki ala tra sma?

[Aksi fu a tori disi]

[Faki/​Prenki na tapu bladzijde 15]

Wan tu fu den nen fu Yesus di e sori sortu prenspari frantwortu a abi

▪ A wan-enkri Manpikin di Gado srefi meki (Yoh. 1:3). Yesus na a wan-enkri Manpikin di en Tata srefi meki.

▪ A Wortu (Yoh. 1:14). Yehovah e gebroiki en Manpikin fu tyari boskopu gi den tra engel nanga libisma, èn fu gi den rai.

▪ Na Amen (Openb. 3:14). Yesus ben gi yesi doronomo na Gado di a ben de na grontapu, èn a gi en libi leki wan srakti-ofrandi. Den sani disi e sori taki ala den pramisi fu Yehovah Gado sa kon tru nanga yepi fu Yesus.

▪ A Mindriman fu a Nyun frubontu (1 Tim. 2:5, 6). Fu di Yesus abi a reti fu de Mindriman, meki Gado ben kan teki wan nyun pipel, èn dati na „a Israel fu Gado”. Den sma disi na salfu Kresten di e dini leki „wan grupu fu priester di o tiri leki kownu” na hemel.—Gal. 6:16; 1 Petr. 2:9.

▪ Granpriester (Hebr. 7:27, 28). Yesus ben de a wan-enkri libisma di ben man gi en libi leki wan volmaakti ofrandi, èn noiti a ben o de fanowdu moro taki wan sma ben o abi fu tyari so wan ofrandi. Yesus man krin wi fu den sondu fu wi èn a man puru wi na ondro a makti fu dede.

▪ A pramisi Pikin (Gen. 3:15). Wán man nomo na a pramisi Pikin, èn dati na Yesus Krestes. Ala den tra sma di tron bakapikin fu Abraham bakaten, „na fu Krestes”.—Gal. 3:29.