Yu e memre disi ete?

Yu ben prisiri fu leisi den Waktitoren di kon na doro no so langa pasa? We, luku efu yu kan gi wan piki tapu den aksi di e kon now:

• A „soifri tongo”, na den tru tori di abi fu du nanga Gado èn nanga den sani di a o du. San wi musu du fu man taki a tongo disi bun? (Sef. 3:9)

Fu man taki a „soifri tongo” bun, dan neleki fa a de nanga wan trutru tongo, wi musu arki bun, èn wi musu leri fu den wan di e taki a tongo bun. Wi musu memre den nen tu fu den Bijbel buku, èn wi musu memre son bijbeltekst. Boiti dati, wi musu poti prakseri ibri tron baka na den sani di wi e leri, wi musu leisi nanga wan tranga sten, èn wi musu kon sabi den tru tori fu Bijbel finifini. Te fu kaba, wi musu meki muiti fu tan go na fesi, wi musu poti fasti ten na wan sei fu studeri, èn wi musu „taki” a soifri tongo.—15/8, bladzijde 21-25.

• O ten wan sma kan taki dati a sabi suma na Gado?

„Yehovah na en nen”, èn a wani taki sma musu sabi en na a nen dati (Ex. 15:3). En na „a Gado fu lobi èn fu vrede” (2 Kor. 13:11). En na „wan Gado di sabi ala sani” èn a de a Gado „fu frulusu” (1 Sam. 2:3; Ps. 25:5). Sobun, Gado sa kon krosibei na den wan di sabi en.—1/9, bladzijde 4-7.

• San den wortu „dri titei di frekti kon na wán” wani taki te a abi fu du nanga a trowlibi?

Den wortu „dri titei di frekti kon na wán” e prenki wan sani (Preik. 4:12). Te a abi fu du nanga a trowlibi, dan a masra nanga a wefi na den tu titei di frekti kon na wán nanga a moro prenspari titei. A titei dati na Gado. Te wan trowpaar abi wan bun matifasi nanga Gado, dan dati sa gi den a krakti fu horidoro te den abi problema. Na so den sa abi wan koloku trowlibi.—15/9, bladzijde 16.

• San den wortu „a poti di sma e poti anu na tapu trawan” na Hebrewsma 6:2 wani taki?

A sani disi no abi fu du nanga a poti di brada ben e poti trawan leki owruman. Ma soleki fa a sori, den wortu dati abi fu du nanga a poti di den brada ben e poti anu na tapu trawan fu gi den a presenti fu a santa yeye, so taki den ben kan du wondru (Tori. 8:14-17; 19:6).—15/9, bladzijde 32.

• San wan bun papa musu gi den pikin fu en?

Wan tu fu den sani di pikin abi fanowdu na: (1) a lobi fu a papa fu den, (2) wan bun eksempre, (3) wan osofamiri pe den e firi taki den de koloku, (4) a leri fu Gado, (5) trangaleri, (6) èn den musu kisi kibri.—1/10, bladzijde 18-21.

• Fa den wan di e teki fesi kan sori lespeki gi trawan?

Wán fasi fa wan owruman kan du dati, na taki noiti a musu aksi trawan fu du sani di ensrefi no ben o wani du. A e sori lespeki tu gi trawan te a e taigi den fu san ede a wani den fu du wan spesrutu sani, noso fu san ede a gi den spesrutu rai.—15/10, bladzijde 22.

• San kan yepi trowpatna fu tan hori densrefi na a pramisi di den meki tapu a trowdei fu den?

Tu fu den sani dati na: (1) Si a trowlibi fu yu leki a moro prenspari sani. (2) Wai pasi gi iniwan sani di kan meki yu du hurudu. Awansi a trowlibi fu yu e waka bun, noso awansi dati no de so, a trowpatna fu yu musu si taki yu e du ala san de fanowdu fu meki a trowlibi waka bun. Den tu prenspari penti di kari sa yepi yu fu du dati.—1/11, bladzijde 18-21.

• San wan Kresten owruman kan leri fu a fasi fa wan skapuman na ini Israel ben e gebroiki a tiki fu en?

Wan skapuman ben e gebroiki wan tiki fu tiri den skapu fu en. Te den skapu ben e go na ini a pen, noso te den ben e komoto na ini a pen, dan a ben ’teri den nanga en tiki’ (Lef. 27:32). Na so a de tu taki wan Kresten owruman musu sabi na ipi fu Gado bun, èn a musu sabi fa a e go nanga ibriwan fu den.—15/11, bladzijde 9.

• Fa wan mama kan sori taki a e si en leki wan prenspari sani fu hori ala sani krin?

Difrenti sani kan meki taki nyanyan e kon pori. Sobun, wan mama musu wasi en anu fosi a sreka nyanyan èn a musu sorgu taki a nyanyan tapu bun. A e hori na oso krin fu sorgu taki alata, moisimoisi, nanga tra insekt no e kon. Boiti dati, a e teki en leki wan gwenti fu wasi en krosi èn fu wasi en skin. Bijbel e sori taki a bun fu du den sani disi.—1/12, bladzijde 9-11.