A Dinari fu Yehovah „kisi mankeri fu wi sondu ede”

„A ben kisi mankeri fu wi sondu ede, èn den ben fon en fu wi ogridu ede; . . . èn nanga en fonfon wi ben kon bun baka.”​—YES. 53:5, Da Bijbel na ini Sranantongo.

1. San wi musu hori na prakseri te wi de na a Memrefesa, èn sortu profeititori sa yepi wi fu du dati?

WI E HORI a Memrefesa fu memre a dede fu Krestes, èn fu memre sosrefi ala den winimarki di a dede èn na opobaka fu en tyari kon gi wi. A Memrefesa e memre wi taki a musu kon na krin taki na Yehovah abi a reti fu tiri, taki a nen fu en musu kon santa, taki a wani fu en musu kon tru, èn taki libisma musu kisi frulusu. A profeititori na ini Yesaya 53:3-12 e taki finifini fu na ofrandi fu Krestes, èn a e sori krin tu sortu wini na ofrandi dati tyari kon. * Kande nowan tra profeititori na ini Bijbel e taki so finifini fu den tori disi. Yesaya ben taki dati a Dinari ben o nyan pina, èn a ben taki finifini fa Krestes ben o dede. A ben sori finifini tu sortu blesi a dede fu Krestes ben o tyari gi den salfu brada fu En, èn gi den „tra skapu” fu en.​—Yoh. 10:16.

2. San a profeititori fu Yesaya e sori, èn sortu krakti a sa abi na wi tapu te wi e studeri a profeititori dati?

² Seibi hondro yari bifo Yesus gebore na grontapu, Yehovah ben meki Yesaya skrifi wan profeititori. A profeititori disi e sori taki a Dinari di Yehovah ben teki, ben o tan gi yesi na En, awinsi a ben o kisi bun hebi tesi. A skrifi di Yehovah meki Yesaya skrifi a profeititori disi na wan buweisi  taki A ben abi a frutrow taki en Manpikin ben o tan du a wani fu en. Te wi e studeri a profeititori disi, dan dati sa naki wi ati, èn a bribi fu wi o kon moro tranga.

Den ’ferakti en èn den no luku en nanga bun ai’

3. Fu san ede den Dyu ben musu breiti nanga Yesus? Fa den Dyu handri nanga Yesus?

³ Leisi Yesaya 53:3. A wan-enkri Manpikin di Gado srefi meki, ben gowe libi hemel, pe a ben abi a moi grani fu wroko makandra nanga en Papa. Prakseri fa a sani dati ben de gi en! A kon na grontapu fu dede leki wan srakti-ofrandi, so taki libisma ben kan kisi frulusu fu sondu nanga dede (Fil. 2:5-8). Na ofrandi fu en ben o gi wi na okasi fu kisi trutru pardon fu den sondu fu wi. Disi na wan sani di den meti ofrandi fu a Wet di Gado ben gi Moses, no ben man du, fu di den ofrandi dati ben de wan skaduw nomo fu na ofrandi fu Krestes (Hebr. 10:1-4). Sma ben musu breiti nanga Yesus èn den ben musu gi en grani, a no so? Efu den Dyu nomo ben e du dati, dan a ben o bun kaba, fu di na den ben e fruwakti a pramisi Mesias (Yoh. 6:14). Ma soleki fa Yesaya ben taki na fesi, den Dyu ben „ferakti” Krestes, èn den „no ben luku en nanga bun ai”. Iya, den Dyu ben wisiwasi Yesus, èn den ben si en leki wan sma di no warti noti. Na apostel Yohanes ben skrifi: „A kon na en eigi pipel, ma den no ben wani en” (Yoh. 1:11). Na apostel Petrus ben taigi den Dyu: „A Gado fu . . . wi afo, gi en Futuboi (noso Dinari) Yesus glori; na en unu ben tyari go na fesi Pilatus, èn di Pilatus ben bosroiti fu lusu en, dan unu no ben wani. Iya, unu no ben wani abi noti fu du nanga a sma dati di ben de santa èn regtfardiki.”​—Tori. 3:13, 14.

4. Fa Yesus ben tron „wan sma di sabi sari”, noso siki?

⁴ A profeititori fu Yesaya ben sori tu taki Yesus ben de „wan sma di sabi sari”, noso siki. Na a ten di Yesus ben e du a diniwroko fu en, dan a no de fu taki dati a ben e kon weri son leisi. Ma Bijbel no e sori taki a ben kon siki (Yoh. 4:6). Ma te a ben e preiki a bun nyunsu gi sma, dan a ben e si den siki di den ben abi. A ben e firi sari gi den, èn a dresi furu fu den (Mark. 1:32-34). Na so Yesus meki a profeititori kon tru di e taki: „Fu tru, a ben tyari wi sari [noso siki], èn a ben tyari wi pina.”​—Yes. 53:4a; Mat. 8:16, 17.

A ben de neleki „Gado ben naki en”

5. Fa furu fu den Dyu ben e denki fu a dede fu Yesus? Fu san ede a sani disi ben meki a pina fu Yesus kon moro hebi?

⁵ Leisi Yesaya 53:4b. Furu sma fu a ten fu Yesus no ben e frustan fu san ede a ben musu pina èn dede. Den ben e denki taki Gado ben e strafu en, iya, a ben gersi leki Gado ben e meki wan takru siki pina en (Mat. 27:38-44). Den Dyu ben feni taki Yesus ben e taki ogri fu Gado (Mark. 14:61-64; Yoh. 10:33). A no de fu taki dati Yesus no ben e sondu, èn a no ben e taki ogri fu Gado. Ma a Dinari ben lobi en Papa Yehovah trutru. Dati meki a prakseri wawan taki a ben musu dede fu di sma ben e feni taki a ben e taki ogri fu Gado, ben e meki a pina fu en kon moro hebi. Toku a ben de klariklari fu du a wani fu Yehovah.​—Mat. 26:39.

6, 7. Fa Yehovah „naki” a Dinari fu en? Fu san ede a sani disi gi Gado „prisiri”?

⁶ Wi kan frustan fu san ede a profeititori fu Yesaya ben taki dati trawan ben o denki taki na „Gado ben naki” Krestes. Ma kande a e fruwondru  wi te wi e leisi san a profeititori e taki moro fara. Yesaya skrifi: „A ben prisiri Masra fu naki en” (Yes. 53:10). Soleki fa wi si, dan Yehovah ben taki: ’Luku, mi dinari di mi frukisi. Mi sili abi prisiri nanga en’. Efu Yehovah ben taki dati, dan fa a ben kan ’prisiri fu naki en’? (Yes. 42:1) Na sortu fasi a sani disi gi Yehovah prisiri?

⁷ Fu man frustan a pisi disi fu a profeititori, dan wi musu hori na prakseri taki Satan meki sma tweifri efu na Yehovah abi a reti fu tiri. Satan ben wani meki sma bribi taki nowan fu den futuboi fu Gado na hemel èn na grontapu ben o tan gi yesi na En (Yob 1:9-11; 2:3-5). Fu di Yesus tan gi yesi na Gado te na dede, meki a sori krin taki Satan no ben abi leti. Sobun, aladi Yehovah ben gi pasi taki den feanti fu Krestes kiri en, toku wi kan de seiker taki a hati Yehovah fu si fa sma kiri a Dinari fu en. Ma Yehovah ben prisiri srefisrefi fu si taki en Manpikin tan gi yesi na en na ini ala sani (Odo 27:11). Wan tra reide fu san ede Yehovah ben e prisiri trutru, na fu di a ben sabi taki a dede fu en Manpikin ben o tyari furu blesi kon gi den libisma di abi berow.​—Luk. 15:7.

„A ben kisi mankeri fu wi sondu ede”

8, 9. (a) Fa Yesus „kisi mankeri fu wi sondu ede”? (b) Fa Petrus sori taki disi pasa trutru?

⁸ Leisi Yesaya 53:6. Sondu libisma waka bruyabruya neleki lasi skapu, aladi den e suku fu kon fri fu siki nanga dede di wi kisi fu Adam (1 Petr. 2:25). Fu di den bakapikin fu Adam abi sondu, meki no wan fu den ben man bai baka san Adam lasi (Ps. 49:7). Ma fu di a lobi di Yehovah abi gi wi tranga so te, meki a ’poti a sondu fu wi alamala na tapu’ en lobi Manpikin èn a Dinari di a teki. Fu di Krestes meki sma gi en „mankeri fu wi sondu ede” èn fu di a meki den „fon en fu wi ogridu ede”, meki a tyari den sondu fu wi na a pina-postu, èn a dede na ini a presi fu wi.

⁹ Na apostel Petrus ben skrifi: „Gado kari unu fu tyari unsrefi na a fasi disi, bika srefi Krestes ben nyan pina gi unu èn a libi wan eksempre gi unu, so taki unu kan waka soifri na en baka. Ensrefi ben tyari den sondu fu wi na ini en eigi skin di a dede na a postu, so taki wi no ben sa abi noti fu du moro nanga sondu, èn wi ben sa libi na wan regtfardiki fasi.” Baka dati, Petrus taki den wortu disi di skrifi na ini a profeititori fu Yesaya: „Èn ’unu kon betre nanga yepi fu den soro fu en’” (1 Petr. 2:21, 24; Yes. 53:5). A sani disi opo a pasi gi sondusma fu kon bun baka nanga Gado, soleki fa Petrus ben taki moro fara: „Krestes srefi dede wán leisi nomo gi sondu, iya, wan regtfardiki sma gi sma di no de regtfardiki, so taki a ben kan tyari unu go na Gado.”​—1 Petr. 3:18.

„Den ben tyari en kon leki wan pikin skapu fu srakti”

10. (a) Fa Yohanes a Dopuman ben kari Yesus? (b) Fu san ede den wortu fu Yohanes fiti?

¹⁰ Leisi Yesaya 53:7, 8. Di Yohanes a Dopuman si Yesus e waka kon miti en, dan a taki nanga wan tranga sten: „Luku! A Pikin Skapu fu Gado di e puru a sondu fu grontapu!” (Yoh. 1:29) Di Yohanes kari Yesus a Pikin Skapu, dan a kan taki a ben abi den wortu fu Yesaya na prakseri. A profeiti dati ben taki: „Den ben tyari en kon leki wan pikin skapu fu srakti” (Yes. 53:7). Yesaya ben taki tu: „A ben trowe en sili na dede” (Yes. 53:12). A moi fu sabi taki na a neti di Yesus seti a Memrefesa fu a dede fu en, a langa wan kan win gi den 11 apostel di ben tan horibaka gi en, èn a taki: „Disi e prenki mi ’brudu fu a frubontu’, di o kanti trowe gi furu sma, so taki den kan kisi pardon fu sondu.”​—Mat. 26:28.

11, 12. (a) Te wi e luku taki Isak ben de klariklari fu gi en libi leki wan ofrandi, dan san disi e sori wi fu na ofrandi fu Krestes? (b) Te wi de na a Memrefesa, dan san wi musu hori na prakseri fu a Moro Bigi Abraham, Yehovah?

¹¹ Neleki Isak fu owruten, Yesus ben de klariklari fu gi en libi leki wan srakti-ofrandi na tapu na agersi altari di e prenki a wani fu Yehovah (Gen. 22:1, 2, 9-13; Hebr. 10:5-10). Aladi Isak ben de klariklari fu gi en libi leki wan ofrandi, toku na Abraham ben de a sma di ben wani tyari na ofrandi (Hebr. 11:17). Na so a de tu taki Yesus ben de klariklari fu dede, ma na Yehovah ben bosroiti fa a lusu-paiman ben o pai. Na ofrandi fu en Manpikin sori taki a lobi di Gado abi gi libisma, tranga fu tru.

¹² Yesus srefi ben taki: „Gado ben lobi  grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi” (Yoh. 3:16). Na apostel Paulus ben skrifi: „Gado sori wi a lobi fu en na a fasi disi: taki Krestes dede gi wi, aladi wi ben de sondari ete” (Rom. 5:8). Fu dati ede, aladi wi e gi grani na Krestes te wi e memre a dede fu en, toku wi noiti no musu frigiti taki a sma di bosroiti fa a lusu-paiman ben o pai, na a Moro Bigi Abraham, Yehovah. Wi e hori a Memrefesa fu gi glori na en.

A Dinari meki taki „furu sma kon regtfardiki”

13, 14. Fa a Dinari fu Yehovah meki taki „furu sma kon regtfardiki”?

¹³ Leisi Yesaya 53:11, 12. Yehovah ben taki fu a Dinari fu en: „Mi opregti dinari sa meki furu sma kon regtfardiki.” Fa Yesus du dati? A lasti pisi fu vers 12 e yepi wi fu kisi piki tapu na aksi disi. A pisi dati e taki: „[A Dinari] ben begi gi den sondari.” Ala den bakapikin fu Adam gebore leki sondusma, noso „sondari”, èn dati meki den e kisi „a pai di sma e kisi gi sondu”, iya, den e dede (Rom. 5:12; 6:23). A de fanowdu taki sondu libisma kon bun baka nanga Yehovah. Kapitel 53 fu a profeititori fu Yesaya e tyari heri moi kon na krin fa Yesus ben „begi” gi libisma. A profeititori e taki: „A fonfon fu wi vrede ben de na en tapu, èn nanga en fonfon wi ben kon bun baka.”​—Yes. 53:5.

¹⁴ Fu di Krestes teki den sondu fu wi na en tapu èn fu di a dede gi wi, meki a yepi ’furu sma fu kon regtfardiki’. Paulus ben skrifi: „Gado ben feni en bun taki ala sani de bogobogo na ini [Krestes], èn Gado ben feni en bun tu taki ala tra sani, efu na grontapu den de, noso efu na ini hemel, kon bun baka nanga en nanga yepi fu a sma disi, fu di a meki vrede nanga yepi fu a brudu fu a sma dati, iya, a brudu di lon na a pina-postu.”​—Kol. 1:19, 20.

15. (a) Suma na ’den sani na ini hemel’ soleki fa Paulus ben taki? (b) Suma wawan abi a reti fu nyan fu a brede èn fu dringi fu a win na a Memrefesa, èn fu san ede?

¹⁵ ’Den sani na ini hemel’ di kon bun baka nanga Yehovah nanga yepi fu a brudu fu Krestes, na den salfu Kresten. Den salfuwan disi kisi a kari fu tiri makandra nanga Krestes na ini hemel. Den Kresten di „kisi a kari fu go na hemel”, na sma di Gado fruklari „regtfardiki, so taki den kan kisi libi” (Hebr. 3:1; Rom. 5:1, 18). Te den kisi a kari disi, dan Yehovah e teki den leki en yeye manpikin. Santa yeye e sori den taki den na ’sma di o kisi wan gudu makandra nanga Krestes’. Dati wani taki dati den kisi a kari fu tiri leki kownu nanga priester na ini a hemel Kownukondre (Rom. 8:15-17; Openb. 5:9, 10). Den e tron memre fu na agersi Israel, noso „na Israel fu Gado”, èn Gado e teki den na ini a „nyun frubontu” (Yer. 31:31-34; Gal. 6:16). Leki memre fu a nyun frubontu, den abi a reti fu nyan fu a brede èn fu dringi fu a win na a Memrefesa. Disi na san Yesus ben taki fu a kan nanga redi win: „A kan disi e prenki a nyun frubontu di seti fu di mi gi mi brudu di o lon fu unu ede.”​—Luk. 22:20.

16. San na ’den sani na grontapu’, èn na sortu fasi Yehovah fruklari den regtfardiki?

¹⁶ ’Den sani na grontapu’, na den tra skapu fu Krestes, di abi a howpu fu libi fu têgo na grontapu. A Dinari fu Yehovah meki taki den wan disi kon regtfardiki na ini Yehovah ai. Den skapu disi e bribi na ini a frulusu-ofrandi fu Krestes, èn na  so fasi „den wasi den langa krosi fu den èn den meki den kon weti na ini a brudu fu a Pikin Skapu”. Fu dati ede, Yehovah fruklari den regtfardiki. A no e si den leki en yeye manpikin, ma a e si den leki en mati. Disi e gi den a tumusi moi howpu fu pasa „a bigi banawtu” libilibi (Openb. 7:9, 10, 14; Yak. 2:23). Den tra skapu no de na ini a nyun frubontu, sobun den no abi a howpu fu libi na ini hemel. Dati meki den no e nyan fu a brede èn den no e dringi fu a win na a Memrefesa. Ma te den de na a Memrefesa disi, dan den e poti ala den prakseri na san e pasa na a okasi disi.

Na Yehovah nanga a Dinari fu en musu kisi ala grani!

17. Now di wi studeri den profeititori fu Yesaya di abi fu du nanga a Dinari, dan fa dati sreka wi gi a Memrefesa?

¹⁷ Now di wi studeri den profeititori fu Yesaya di abi fu du nanga a Dinari, dan dati sreka wi bun gi a Memrefesa fu a dede fu Krestes. A studie disi yepi wi fu „poti ala wi prakseri na a Moro Prenspari Fesiman èn a Sma di meki a bribi fu wi kon de volmaakti” (Hebr. 12:2). Wi leri taki a Manpikin fu Gado no e opo ensrefi teige en Papa. Tra fasi leki Satan, a e prisiri fu kisi leri fu Yehovah, èn a e si En leki a Moro Hei Masra. Wi si tu taki, di Yesus ben e du a diniwroko fu en na grontapu, dan a sori sari-ati gi den sma di a ben e preiki gi. A ben e dresi den wan di ben siki, èn a ben e yepi den fu kon bun baka nanga Gado. Na so a sori san a sa du leki Mesias Kownu na ini a nyun sistema te a sa „seti krutu na grontapu” (Yes. 42:4). Yesus di ben de „wan leti gi [libisma]”,ben e preiki a bun nyunsu fu a Kownukondre fayafaya. Disi e memre den bakaman fu en taki den musu preiki a bun nyunsu fayafaya tu na heri grontapu.​—Yes. 42:6.

18. Fu san ede a profeititori fu Yesaya e meki wi de nanga tangi trutru gi den sani di Yehovah nanga a Dinari fu en du gi wi?

¹⁸ A profeititori fu Yesaya e yepi wi tu fu frustan moro bun o furu Yehovah du gi wi di a seni en Manpikin kon na grontapu fu pina èn dede gi wi. Yehovah no ben e prisiri fu si fa a Manpikin fu en ben e pina, ma a ben prisiri fu si taki Yesus tan gi yesi na en te na dede. Neleki Yehovah, wi musu prisiri tu, èn wi musu frustan krin sortu sani Yesus du fu sori taki Satan na wan leiman. Wi musu frustan tu sortu sani a du fu santa a nen fu Yehovah, so taki a ben kan kon na krin taki na Yehovah abi a reti fu tiri ala sani. Boiti dati, Krestes teki den sondu fu wi na en tapu èn a dede gi wi. Na so, a opo pasi gi a pikin ipi salfu brada fu en èn den tra skapu, fu tron sma di de regtfardiki na ini Yehovah ai. Te wi e kon makandra fu hori a Memrefesa, dan meki a de so taki wi de nanga tangi trutru gi ala den sani di Yehovah nanga a getrow Dinari fu en du gi wi.

[Futuwortu]

Luku baka san wi leri

• Fa a gi Yehovah „prisiri” taki sma „naki” en Manpikin?

• Fa Yesus „kisi mankeri fu wi sondu ede”?

• Fa a Dinari meki taki „furu sma kon regtfardiki”?

• Now di yu studeri den profeititori di abi fu du nanga a Dinari, dan fa dati sreka yu ati nanga yu frustan gi a Memrefesa?

[Aksi fu a tori disi]

[Prenki na tapu bladzijde 26]

’Den ben ferakti en, èn wi no ben luku en nanga bun ai’

[Prenki na tapu bladzijde 28]

„A ben trowe en sili na dede”

[Prenki na tapu bladzijde 29]

Den „tra skapu” di de na a Memrefesa e poti ala den prakseri na san e pasa na a okasi dati