„Disi na a pasi. Waka na en tapu”

Na ondrofenitori fu Emilia Pederson

Soleki fa Ruth E. Pappas fruteri

MI MAMA, Emilia Pederson, ben gebore na ini 1878. A ben tron wan skoromisi, ma fu taki en leti, a ben wani yepi sma fu kon moro krosibei na Gado. Wan buweisi fu dati, ben de a bigi kisi di ben de na ini wi oso. Wi ben e tan na ini a pikin foto Jasper, Minnesota, na Amerkankondre. Mi mama ben o gebroiki a kisi disi fu poti den sani fu en na ini te a ben o go na China. A ben wani go dini drape leki zendeling. Ma di en mama dede, dan a no go moro, èn a tan na ini Amerkankondre fu sorgu gi den pikin brada nanga pikin sisa fu en. Na ini 1907, a trow nanga Theodore Holien. Mi gebore tapu 2 december 1925, èn mi ben de a lastiwan fu den seibi pikin di mi papa nanga mama kisi.

Mi mama ben abi wan tu aksi di ben abi fu du nanga Bijbel, èn a trutru ben e meki muiti fu kisi piki tapu den aksi dati. Wan fu den aksi dati ben abi fu du nanga a leri di e taki dati hel na wan presi pe ogrisma sa kisi pina na ini faya. Di wan fesiman fu a Luther Kerki kon luku en, dan mi mama aksi en pe fu Bijbel a leri dati skrifi. Fu taki en leti, a man dati taigi en taki sma musu fu leri taki ogrisma o kisi pina na ini hel, awansi san Bijbel e taki.

Mi mama feni a tru bribi

Syatu baka a yari 1900, mi mama en sisa, Emma, ben go na Northfield, Minnesota, fu leri prei poku. A ben e tan na a oso fu Milius Christianson, a leriman fu en. A man disi en wefi ben de wan Bijbel Ondrosukuman, soleki fa sma ben e kari Yehovah Kotoigi na a ten dati. Emma taigi na uma disi taki wan sisa fu en ben lobi leisi Bijbel. A no ben teki langa baka dati, di Misi Christianson skrifi wan brifi seni go gi mi mama. Na ini a brifi dati a piki den aksi di mi mama ben abi fu Bijbel.

Wan dei, wan Bijbel Ondrosukuman di nen Lora Oathout, gowe libi a foto Sioux Falls, South Dakota, èn a teki loko fu kon preiki na ini a foto Jasper. Mi mama studeri den Bijbel publikâsi di a ben kisi, èn na ini 1915, a bigin fruteri tra sma den tru tori di a ben e leri na ini Bijbel. A ben e prati den buku tu di Lora ben gi en.

Na ini 1916, mi mama yere taki Charles Taze Russell ben o de na wan kongres di ben o hori na ini Sioux City, na Iowa. A ben wani go na a kongres disi. Na a ten dati, mi mama ben abi feifi pikin, èn Marvin, a moro pikinwan, ben abi feifi mun nomo. Toku, a teki loko go na a kongres di ben e hori na ini Sioux City di ben de sowan 160 kilometer moro fara, èn a teki ala den pikin tyari go nanga en. A yere den lezing fu Brada Russell, a si a „Photo-Drama der Schepping”, èn a teki dopu. Di a drai go baka na oso, dan a skrifi wan artikel fu fruteri fu a kongres, èn na artikel kon na doro na ini a koranti di nen Jasper Journal.

Na ini 1922, mi mama ben de na ini a grupu fu sowan 18.000 sma di ben de na a kongres di ben hori na Cedar Point, Ohio. Baka a kongres dati, a noiti no tapu fu preiki a Kownukondre fu Gado. Fu taki en leti, te a ben wani gi wi deki-ati, dan a ben gwenti fu taigi wi: „Disi na a pasi. Waka na en tapu.”​—Yes. 30:21.

 Tra sma e teki a Kownukondre boskopu

Na a ini den yari syatu baka 1920, mi papa nanga mi mama froisi go tan na ini wan oso di ben de pikinso moro fara fu a foto Jasper. Mi papa ben abi wan bisnis di ben e drai bun, èn a ben musu sorgu gi wan bigi osofamiri. A no ben e studeri Bijbel so furu leki mi mama, ma a ben e horibaka gi a preikiwroko nanga en heri ati. Boiti dati, a ben feni en bun taki opziener di e reis, ben e kon na wi oso. Na a ten dati wi ben e kari den brada disi pelgrim. Nofo tron te wan fu den opziener disi ben e hori wan lezing na wi oso, dan pikinmoro wán hondro sma ben e kon arki. Na den okasi disi a heri foroisi, a kukru, nanga a sribikamra ben e lai nanga sma.

Di mi ben abi sowan seibi yari, dan mi tanta Letti bèl mi mama, èn a fruteri en taki den birtisma fu en, namku Ed Larson nanga en wefi, ben wani studeri Bijbel. Den tu sma disi wantewante bribi den tru tori fu Bijbel, èn baka wan pisi ten, den kari wan tra birtisma na a studie. A sma dati ben de Martha van Daalen, wan mama di ben abi aiti pikin. Martha nanga en heri osofamiri tron Bijbel Ondrosukuman tu. *

Pikinmoro na a srefi ten dati, Gordon Kammerud, wan yonkuman di ben e libi wan tu kilometer moro fara fu wi, bigin wroko gi mi papa. Sma ben warskow Gordon taki a ben musu luku bun nanga den umapikin fu a basi fu en. Den taigi en taki wi ben abi wan fromu bribi. Ma Gordon bigin studeri Bijbel, èn fosi yu denki, a ben kisi na overtoigi taki a ben feni a tru bribi. Dri mun baka dati, a teki dopu. En papa nanga mama tron bribiman tu, èn den famiri fu wi kon tron bun mati fu makandra. Dati ben de a Holien famiri, a Kammerud famiri, nanga a Van Daalen famiri.

Den kongres e gi wi deki-ati

A kongres di ben hori na Cedar Point, ben gi mi mama so furu deki-ati, taki noiti moro a ben wani misi wan kongres. Sobun, mi e memre ete taki yonguyongu kaba wi ben e teki langa waka fu go na den bigi konmakandra dati. A kongres di ben hori na ini Columbus, Ohio, na ini 1931, ben de wan prenspariwan, fu di na a kongres dati wi kisi a nen Yehovah Kotoigi (Yes. 43:10-12). Mi e memre a kongres tu di ben hori na ini Washington, D.C., na ini 1935. Na a kongres dati wan tumusi prenspari lezing ben hori, èn na ini a lezing dati a kon na krin san na a „bigi ipi”, di kari na ini a buku Openbaring (Openb. 7:9). Den sisa fu mi, namku Lilian nanga Eunice, ben de na ini a grupu fu den moro leki 800 sma di teki dopu drape.

Na osofamiri fu wi go na a kongres di ben e hori na ini Columbus, Ohio, na ini 1937. Wi go tu na a wan di hori na ini Seattle, Washington, na ini 1938, èn na a wan di hori na ini New York City na ini 1939. A Van Daalen famiri, a Kammerud famiri, èn sosrefi tra sma, ben e kon nanga wi te wi ben e go na den kongres disi, èn wi ben e seti kampu te wi ben de na pasi fu go drape. Na ini 1940, Eunice trow nanga Leo Van Daalen, èn den go pionier. A srefi yari dati, Lilian trow nanga Gordon Kammerud, èn den go pionier tu.

 A kongres di hori na ini St. Louis, Missiouri, na ini 1941, ben de wan apartiwan. Na a kongres dati, dusundusun yonguwan kisi a buku Children (Pikin). A Kongres dati tyari bigi kenki kon na ini mi libi. Syatu baka dati, tapu 1 september 1941, mi, mi brada, nanga a wefi fu en, tron pionier. Mi ben abi 15 yari.

Na ini a kontren pe wi ben e tan, furu sma ben abi burugron. Dati meki a ben muilek gi ala den brada fu go na den kongres, bika nofo tron den kongres ben e hori na a ten te a kotiwroko ben musu du. Sobun, baka den kongres, wi ben e hori konmakandra na ini wi bakadyari, èn wi ben e taki fu den sani di wi ben leri na den kongres. Na so den brada nanga sisa di no ben man go na den kongres ben kan kisi wini fu den sani di wi ben leri. Den konmakandra dati ben e gi wi prisiri.

Wi e go na Gileadskoro, èn wi e go dini na tra kondre

Na ini februari fu a yari 1943, a Gileadskoro seti. Na a skoro disi pionier ben kan kisi leri fu go du zendelingwroko. Siksi sma fu a Van Daalen famiri ben de na ini a fosi klas. Dati ben de den brada Emil, Arthur, Homer, nanga Leo. Tra sma fu a famiri dati ben de Donald, a neef fu den, nanga mi sisa Eunice di ben trow nanga Leo. Aladi wi ben breiti taki den ben e gowe, toku wi ben e firi sari di wi taigi den adyosi. Dati ben e kon fu di wi no ben sabi o ten wi ben o si den baka. Baka di den siksi famiriman disi klari a skoro, dan den alamala ben musu go dini na Puerto Rico, pe a nomru fu Kotoigi no ben e doro 12 ete na a ten dati.

Wán yari baka dati, Lilian nanga Gordon, sosrefi Marvin nanga Joyce, go na a di fu dri klas fu a Gileadskoro. Den kisi a grani tu fu go dini na Puerto Rico. Èn na ini september fu a yari 1944, mi go na a di fu fo klas fu a Gileadskoro. Mi ben abi 18 yari na a ten dati. Baka di mi klari a skoro na ini februari fu a yari 1945, dan mi go na Puerto Rico fu go dini makandra nanga den brada nanga sisa fu mi. Dati ben de wan heri tra sortu libi gi mi! Aladi a no ben makriki gi wi fu leri Spanyorotongo, toku heri esi wan tu fu wi ben abi moro leki 20 bijbelstudie. Yehovah blesi a wroko. Tide na a dei, sowan 25.000 Kotoigi de na ini Puerto Rico!

Sari sani e miti wi osofamiri

Leo nanga Eunice tan na ini Puerto Rico baka di Mark, a boi fu den gebore na ini 1950. Na ini 1952, den seti sani fu go nanga fakansi na Amerkankondre, fu go luku den famiriman fu den. Tapu 11 april den gowe nanga opolani. Ma syatu baka di na opolani gowe libi na opolanigron, a fadon na ini a se. Leo nanga Eunice lasi den libi. Sma feni Mark, di ben abi tu yari. A ben e drifi na ini a se. Den poti en na ini wan pikin boto, èn den yepi en fu bro baka. Na a sani dati yepi en fu tan na libi. *

Feifi yari baka dati, tapu 7 maart fu a yari 1957, mi mama nanga mi papa ben e rèi go na a Kownukondre zaal, di wan banti fu den boro. Di mi papa ben e kenki a banti na sei pasi, dan wan oto di ben e rèi pasa, naki en. Mi papa dede leti drape. Sowan 600 sma kon arki a beri-lezing, èn a lezing dati ben de wan moi kotoigi gi den sma fu a birti drape di ben abi furu lespeki gi mi papa.

Mi e go dini na wan tra kondre

Syatu bifo mi papa lasi en libi, mi kisi a grani fu go dini na ini Argentinia. Na ini augustus fu a yari 1957, mi doro na ini a foto Mendoza di de na a futu fu na Andesbergi. Na ini 1958, George Pappas, wan brada di ben de fu a di fu 30 klas fu a Gileadskoro, ben kisi a grani fu go dini na  Argentinia. Mi nanga George kon tron bun mati, èn wi trow na ini april fu a yari 1960. Na ini 1961, mi mama dede. A ben abi 83 yari. A ben anbegi a tru Gado nanga en heri ati, èn a yepi furu sma fu du a srefi.

Tin yari langa mi nanga George dini makandra nanga tra zendeling na ini difrenti zendeling-oso. Baka dati wi dini seibi yari na ini a kringwroko. Na ini 1975, wi drai go baka na Amerkankondre fu yepi famiriman di ben e siki. Na ini 1980, mi masra kisi a grani fu tron kring-opziener fu den Spanyorotongo gemeente. Na a ten dati, sowan 600 Spanyorotongo gemeente ben de na ini Amerkankondre. Wi go luku furu fu den gemeente disi 26 yari langa, èn wi si fa a nomru fu den gemeente disi gro pasa 3000.

Den waka na ini „a pasi”

Mi mama ben abi a prisiri tu fu si taki den yonguwan fu a famiri fu en ben e go na ini a furuten diniwroko. Fu eksempre, Carol, na umapikin fu mi bigi sisa, Ester, bigin pionier na ini 1953. Carol trow nanga Dennis Trumbore, èn sensi a ten dati den de na ini a furuten diniwroko. Lois, a tra umapikin fu Ester, trow nanga Wendell Jensen. Den go na a di fu 41 klas fu a Gileadskoro, èn den dini 15 yari langa leki zendeling na ini Nigeria. Di Mark en papa nanga mama lasi den libi di na opolani fadon, dan Ruth La Londe nanga en masra, Curtis, teki en leki kwekipikin. Ruth ben de wan sisa fu Leo. Mark nanga en wefi Lavonne, pionier furu yari langa, èn den kweki den fo pikin fu den na ini „a pasi”.​—Yes. 30:21.

Orlen, a wan-enkri brada fu mi di de na libi ete, pasa 90 yari now. A e dini Yehovah nanga en heri ati ete. Mi nanga George e prisiri ete na ini a furuten diniwroko.

San mi mama libi na baka

Now mi abi wan fu den sani di ben prenspari srefisrefi gi mi mama. Dati na a skrifitafra fu en. Mi papa ben gi en a tafra disi leki trowkado. Na ini wan fu den la fu a tafra, wan owru buku de di ben de fu en. Na ini a buku disi a ben e poti brifi nanga koranti artikel di a ben skrifi fu gi wan moi kotoigi fu a Kownukondre. Sonwan fu den sani disi a skrifi na ini den yari syatu baka a yari 1900. Na ini den la fu a tafra, brifi de tu di den pikin fu mi mama ben seni go gi en di den ben e dini leki zendeling. Den brifi dati prenspari srefisrefi gi mi. Mi e leisi den ibri tron baka! Èn den brifi di a ben skrifi gi wi ben e gi wi deki-ati ala ten, fu di a ben e skrifi soso bun sani. Mi mama noiti no tron wan zendeling, soleki fa a ben wani. Ma a lobi di a ben abi gi a zendelingwroko naki na ati fu furu tra famiriman. Mi sa prisiri srefisrefi te mi kan miti mi mama, mi papa, nanga ala den someni famiriman fu mi baka na ini a paradijs na grontapu!​—Openb. 21:3, 4.

[Futuwortu]

[Prenki na tapu bladzijde 17]

Emilia Pederson

[Prenki na tapu bladzijde 18]

1916: Mi mama, mi papa (a e hori Marvin); na ondrosei, fu a kruktu-anusei go na a reti-anusei: Orlen, Ester, Lilian, Mildred

[Prenki na tapu bladzijde 19]

Leo nanga Eunice, syatu bifo den lasi den libi

[Prenki na tapu bladzijde 20]

1950: Fu a kruktu-anusei go na a reti-anusei, na tapusei: Ester, Mildred, Lilian, Eunice, Ruth; na ondrosei: Orlen, mi mama, mi papa, nanga Marvin

[Prenki na tapu bladzijde 20]

George nanga Ruth Pappas na ini a kringwroko, na ini 2001