Edepenti fu a buku Openbaring—Pisi I
A Wortu fu Yehovah de libilibi
Edepenti fu a buku Openbaring—Pisi I
DI NA apostel Yohanes ben de na strafu na a èilanti Patmos, dan a grani man disi kisi 16 difrenti fisyun. Na ini den fisyun dati, Yohanes e si san Yehovah Gado nanga Yesus Krestes sa du na ini a dei fu Masra. Dati na a pisi ten sensi 1914, di a Kownukondre fu Gado seti, te go miti a kaba fu a Dusun Yari Tiri fu Krestes. A buku Openbaring di Yohanes skrifi na a ten fu a yari 96, na wan tumusi moi buku di e taki fu den fisyun disi.
Meki wi poti prakseri now na den edepenti fu Openbaring 1:1–12:17. A pisi disi e taki fu den fosi seibi fisyun di Yohanes kisi. Den fisyun disi prenspari gi wi fu di den e poti prakseri na den sani di e pasa na grontapu na ini a ten disi. Den e sori tu san Yehovah sa du na ini a ten di e kon. Sma di e poti bribi na ini den fisyun disi te den e leisi den, trutru sa kisi trowstu nanga deki-ati.—Hebr. 4:12.
„A PIKIN SKAPU” E PURU SIKSI FU DEN SEIBI LAKSTAMPU
A fosi sani di Yohanes e si, na Yesus Krestes di kisi glori. Ne a e kisi difrenti boskopu di a musu ’skrifi na ini wan bukulolo fu seni go gi den seibi gemeente’ (Openb. 1:10, 11). Baka dati, Yohanes e si wan fisyun fu wan kownusturu na ini hemel. A Sma di e sidon na tapu a kownusturu, abi wan bukulolo na ini en reti-anu, èn a bukulolo disi tapu nanga seibi lakstampu. A wan-enkri sma di „warti fu opo a bukulolo”, na „a Lew fu a lo fu Yuda”, noso ’a pikin skapu di abi seibi tutu nanga seibi ai’.—Openb. 4:2; 5:1, 2, 5, 6.
A di fu dri fisyun e sori san e pasa te „a Pikin Skapu” e puru den fosi siksi lakstampu, wan-fru-wan. Te a puru a di fu siksi lakstampu, dan wan bigi gronseki e pasa, èn a bigi dei fu a bigi atibron doro (Openb. 6:1, 12, 17). Ma na ini a fisyun di Yohanes e si baka dati, ’fo engel e hori den fo winti fu grontapu bun steifi’, teleki ala den 144.000 salfuwan kisi wan marki. Baka dati, Yohanes e si „wan bigi ipi sma” di no kisi wan marki, èn den sma disi e„tanapu na fesi a kownusturu”.—Openb. 7:1, 9.
Piki tapu den aksi fu Bijbel:
1:4; 3:1; 4:5; 5:6—San den wortu „den seibi yeye” wani taki? A nomru seibi e prenki a doro di wan sani doro a marki, soleki fa Gado e si dati. Sobun, a boskopu gi „den seibi gemeente” te fu kaba abi fu du nanga a heri pipel fu Gado di a tyari kon na wán na ini moro leki 100.000 gemeente na heri grontapu (Openb. 1:11, 20). Fu di Yehovah e gi en santa yeye so taki a wani fu En kan kon tru, meki den wortu „den seibi yeye” wani taki dati a yeye e wroko dorodoro fu meki sma frustan sani, èn fu blesi den sma di e poti prakseri na a profeititori. Soleki fa a sori, dan a buku Openbaring e taki ibri tron baka fu seibi difrenti sani. Na ini a buku disi, a nomru seibi e prenki a doro di wan sani doro a marki. Èn a de so trutru taki a buku e poti prakseri na „a santa kibritori fu Gado” di „kon tru” dorodoro.—Openb. 10:7.
1:8, 17—Nanga suma den nen „na Alfa nanga Omega” èn „a Fosiwan nanga a Lastiwan” abi fu du? A nen „na Alfa nanga Omega” abi fu du nanga Yehovah. A nen disi e sori krin taki nowan enkri almakti Gado ben de fosi en, èn nowan enkriwan sa de tu baka en. En na „a bigin nanga a kaba” (Openb. 21:6; 22:13). Na Openbaring 22:13 den wortu „a fosiwan nanga a lastiwan”, abi fu du nanga Yehovah, fu di nowan-enkri almakti Gado ben de fosi en, èn nowan enkriwan sa de baka en. Ma den sani di skrifi na ini Openbaring kapitel 1 e sori taki a nen „a Fosiwan nanga a Lastiwan” abi fu du nanga Yesus Krestes. Yesus ben de a fosi libisma di kisi wan opobaka fu libi leki wan yeye di no man dede. Boiti dati, a ben de a lasti sma di Yehovah srefi gi so wan opobaka.—Kol. 1:18.
2:7—San na „a paradijs fu Gado”? Fu di den wortu disi skrifi gi den salfu Kresten, meki a musu de so taki a paradijs disi abi fu du nanga hemel di de leki wan paradijs, fu di Gado srefi de drape. Den salfuwan di e dini Gado nanga den heri ati, sa kisi a grani fu nyan „den froktu fu a bon di e gi libi”. Den no o dede noiti moro.—1 Kor. 15:53.
3:7—O ten Yesus kisi „a sroto fu David”, èn fa a gebroiki a sroto dati? Di Yesus teki dopu na ini a yari 29, dan a tron a Sma di Gado ben o poti leki Kownu di komoto fu a famirilin fu David. Ma Yesus ben musu wakti teleki a yari 33, fosi a kisi a sroto fu David. Na ini a yari dati, a kisi a grani fu go sidon na a reti-anusei fu Gado na hemel. Drape a kisi ala den reti fu a Kownukondre fu David. Sensi a ten dati, Yesus e gebroiki a sroto fu gi sma okasi fu du diniwroko fu a bun fu a Kownukondre. Na ini 1919, Yesus gi „a getrow èn koni srafu” „a sroto fu na oso fu David”. Dati wani taki dati a poti a srafu dati „fu luku ala den sani di a abi”.—Yes. 22:22; Mat. 24:45, 47.
3:12—San na a „nyun nen” fu Yesus? A nen disi abi fu du nanga a nyun posisi èn den nyun grani di Yesus kisi (Fil. 2:9-11). Tra sma no e kon sabi a nen dati na a fasi fa Yesus sabi en. Ma Yesus skrifi a nen disi na tapu den salfu brada fu en na hemel, èn na so den e kon abi wan bun matifasi nanga en (Openb. 19:12). Den salfuwan disi e kisi wan tu fu den tumusi moi grani tu di Yehovah gi Yesus.
Sani di wi kan leri:
1:3. Fu di „a reti ten [taki Gado strafu a grontapu fu Satan] de krosibei”, meki a de tumusi prenspari taki wi e kon frustan a boskopu na ini a buku Openbaring. A de tumusi prenspari tu taki wi e gi yesi na a boskopu disi.
3:17, 18. Fu man kon gudu na yeye fasi, dan wi musu bai gowtu na Yesus, iya, „gowtu di meki kon soifri na ini faya”. Dati wani taki dati wi musu pruberi fu du furu bun wroko (1 Tim. 6:17-19). Wi musu weri sosrefi „weti krosi” di e sori taki wi na bakaman fu Krestes. Boiti dati, wi musu gebroiki „ai-salfu”, soleki den rai di skrifi na ini A Waktitoren. Dati sa yepi wi fu kon sabi san Gado feni bun èn san a no feni bun.—Openb. 19:8.
7:13, 14. Den 24 owruman na den 144.000 salfuwan di kisi glori na hemel, pe den e dini leki kownu nanga priester. Den priester na ini Israel fu owruten di Kownu David ben orga na ini 24 grupu, ben e prenki a salfu grupu disi. Wan fu den owruwan e meki Yohanes kon sabi suma na a bigi ipi. Dati meki a musu de so taki den salfu Kresten bigin kisi wan opobaka syatu bifo 1935. Fu san ede dati de so? Fu di na ini a yari dati, den salfu futuboi fu Gado na grontapu kon sabi krin suma na a bigi ipi.—Luk. 22:28-30; Openb. 4:4; 7:9.
TE NA ENGEL E PURU A DI FU SEIBI LAKSTAMPU, DAN SEIBI TROMPETI E BARI
A Pikin Skapu e puru a di fu seibi lakstampu. Seibi engel e kisi seibi trompeti. Siksi fu den engel e bro den trompeti fu sori taki„wan di fu dri pisi” fu grontapu, noso Krestenhèit, o kisi strafu (Openb. 8:1, 2, 7-12; 9:15, 18). Na den sani disi Yohanes e si na ini a di fu feifi fisyun. Na ini a fisyun di a e si baka dati, Yohanes e nyan a pikin bukulolo èn a e marki a tempel. Baka te na engel bro a di fu seibi trompeti, dan Yohanes e yere tranga sten di e taki: „A kownukondre fu grontapu kon tron a kownukondre fu wi Masra èn fu a Krestes fu en.”—Openb. 10:10; 11:1, 15.
A di fu seibi fisyun e taki moro fini fu den sani di skrifi na Openbaring 11:15, 17. Wan tumusi aparti marki ben de fu si na ini hemel. Na uma na hemel e kisi wan boi, wan manpikin. Den engel fu Yehovah e fringi Didibri komoto na hemel. Fu di Didibri abi bita-ati gi na uma na hemel, meki a e „go feti nanga den pikin fu na uma di ben tan abra”.—Openb. 12:1, 5, 9, 17.
Piki tapu den aksi fu Bijbel:
8:1-5—Fu san ede ala sani ben kon tiri na ini hemel, èn san ben fringi kon na grontapu? Na wan agersi fasi, ala sani kon tiri na ini hemel, so taki „den begi fu den santawan” na grontapu ben kan de fu yere. A sani disi pasa na a kaba fu a fosi grontapufeti. Salfu Kresten no opo go na hemel na a kaba fu a ten fu den Heiden, soleki fa furu fu den Kresten disi ben e fruwakti. Den kisi hebi tesi na a ten fu a grontapufeti. Dati meki na ini a ten dati, den begi Gado fayafaya fu tiri den. Leki piki tapu den begi fu den, na engel fringi wan agersi faya go na grontapu, èn a faya dati meki taki den salfu Kresten bigin wroko fayafaya. Aladi a grupu fu den no ben bigi, toku den bigin preiki a bun nyunsu na heri grontapu, so taki ala sma kon yere a boskopu fu Gado Kownukondre. Na so den leti wan faya na ini Krestenhèit. Den Bijbel boskopu di den tyari gi sma ben de leki bigi dondru, èn den tru tori di den ben e fruteri sma fu Bijbel ben de leki faya di e koti na hemel. Den sani disi seki a fondamenti fu falsi bribi, neleki fa gronseki e meki taki oso e seki.
8:6-12; 9:1, 13; 11:15—O ten den seibi engel sreka densrefi fu bro den trompeti fu den? O ten den bro den trompeti, èn fa den du dati? Na ini a pisi ten di den engel sreka densrefi fu bro den seibi trompeti, den tiri den memre fu a Yohanes-grupu na grontapu di ben kisi krakti baka. Dati pasa na ini a pisi ten fu 1919 te go miti 1922. Na ini a pisi ten dati, den salfuwan disi ben e orga a preikiwroko baka, èn den ben e seti presi pe den ben kan meki buku (Openb. 12:13, 14). A bro di den trompeti bro, e prenki den krutuboskopu di a pipel fu Gado meki bekènti teige a grontapu fu Satan. Den meki den boskopu disi bekènti sondro frede, aladi den engel ben e horibaka gi den. A moi fu sabi taki a sani disi bigin nanga a kongres di ben hori na ini Cedar Point, Ohio na ini 1922, èn a e go doro teleki a ten fu a bigi banawtu.
8:13; 9:12; 11:14—Fu san ede den lasti dri leisi te den trompeti e bari, wani taki „helu” gi den sma di e libi na grontapu? Te den fosi fo trompeti e bari, dan den na agersifasi den e meki bekènti taki Gado no e tiri Krestenhèit srefisrefi. Ma te den lasti dri trompeti e bari, dan dati wani taki helu gi grontapu. A sani disi e sori taki spesrutu sani o pasa. Te a di fu feifi trompeti e bari, dan dati abi fu du nanga a pipel fu Gado di e kisi frulusu fu „a dipi peti” pe den no ben man du noti moro. Dati pasa na ini 1919. A di fu feifi trompeti di bari abi fu du tu nanga a preikiwroko di a pipel fu Gado tan du doronomo, èn a preikiwroko disi ben de leki wan hebi strafu gi Krestenhèit (Openb. 9:1). A di fu siksi trompeti di bari abi fu du nanga a moro bigi legre di oiti ben hari go feti, èn a abi fu du tu nanga a preikiwroko di e du na heri grontapu sensi 1922. Te a lasti trompeti e bari, dan dati abi fu du nanga a Mesias Kownukondre di seti.
Sani di wi kan leri:
9:10, 19. Den tru tori di skrifi na ini den Bijbel publikâsi di „a getrow èn koni srafu” e tyari kon na doro, abi wan krakti boskopu na ini (Mat. 24:45). A boskopu disi abi fu du nanga den tere fu den sprenka di abi „maka neleki di fu kruktutere”. A boskopu disi e taki tu fu den asi fu wan legre, èn den tere fu den asi disi de leki „sneki”. Fu san ede dati de so? Fu di den publikâsi disi e warskow sma gi a „dei fu [Yehovah en] atibron” (Yes. 61:2). Meki wi prati den boskopu disi fayafaya èn sondro frede.
9:20, 21. Na ini kondre pe a Kresten bribi no de a moro prenspari bribi, furu safri-atisma teki a boskopu di wi e meki bekènti. Ma wi no e fruwakti taki ipi-ipi sma di no de fu Krestenhèit sa teki a tru bribi. Bijbel e kari den sma dati „den tra sma di no dede na ini den rampu disi”. Toku wi e tan du a diniwroko fu wi.
12:15, 16. A wortu „grontapu” na ini den tekst disi, e prenki spesrutu tiriman na ini Satan en eigi sistema, noso den tirimakti na ini den difrenti kondre. Den tiriman noso tirimakti disi, gi pasi taki sma anbegi Gado fri. Na ini den yari baka 1940, den tirimakti disi „swari a liba [fu frufolgu] di a bigi kaiman ben spiti puru na ini en mofo”. Iya, Yehovah kan meki den tirimakti du san a wani, èn a kan du dati o ten A wani. Dati meki a fiti taki Odo 21:1 e taki: „Na ati fu wan kownu de leki libawatra na ini na anu fu Yehovah. A e drai en go pe a wani.” A sani disi musu tranga a bribi di wi abi na ini Gado.