„Kon nanga mi èn tron wan bakaman fu mi”
„Kon nanga mi èn tron wan bakaman fu mi”
„Efu wan sma wani kon na mi baka, dan a no musu teri ensrefi moro, ma meki a teki en pina-postu ibri dei baka èn meki a tan waka na mi baka.”—LUK. 9:23.
1, 2. (a) Sortu kari Yesus ben e gi sma? (b) Yu teki a kari fu Yesus?
NA A KABA fu a diniwroko fu en, Yesus ben e gi kotoigi na ini Perea. Dati na wan kontren na abrasei fu Yordan-liba, na a noordsei fu Yudea. Wan yonkuman kon na en, èn a aksi en san a musu du fu kan kisi têgo libi. Baka di Yesus kon si taki a yonkuman disi ben e hori ensrefi finifini na a Wet di Gado ben gi Moses, dan a gi en wan tumusi moi kari. Yesus taki: „Go seri den sani di yu abi èn prati a moni gi den pôtisma, dan yu sa kisi wan gudu na hemel; kon nanga mi èn tron wan bakaman fu mi” (Mark. 10:21). Denki a tori: A yonkuman ben kisi wan kari fu tron wan bakaman fu Yesus, a wan-enkri Manpikin di a Moro Hei Gado srefi meki!
2 A yonkuman dati no ben teki a kari fu Yesus, ma tra sma ben teki en. Wan pisi ten na fesi, Yesus ben taigi Filipus: „Kon waka na mi baka” (Yoh. 1:43). Filipus teki a kari, èn bakaten a tron wan apostel. Yesus ben gi Mateyus a srefi kari dati, èn ensrefi ben teki en (Mat. 9:9; 10:2-4). Iya, Yesus ben gi ala sma di lobi fu du san reti, a srefi kari dati di a taki: „Efu wan sma wani kon na mi baka, dan a no musu teri ensrefi moro, ma meki a teki en pina-postu ibri dei baka èn meki a tan waka na mi baka” (Luk. 9:23). Sobun, iniwan sma kan tron wan bakaman fu Yesus, efu trutru den wani dati. Yu wani tron wan bakaman fu Yesus? Furu fu wi teki a kari kaba di Yesus gi wi na wan lobi-ati fasi, èn wi e gi tra sma a srefi kari disi te wi de na ini a preikiwroko.
3. San wi kan du fu sorgu taki wi e tan waka baka Yesus?
3 Ma a de wan sari sani taki son sma di ben wani kon sabi moro fu Bijbel, no e tan studeri Bijbel. Na presi fu dati, den e lasi a faya di den ben abi fosi, èn te fu kaba den e „drifi gowe”. Fu taki en leti, den sma disi e tapu fu waka baka Yesus (Hebr. 2:1). Fa wi kan sorgu taki a sani disi no e pasa nanga wi? A ben o bun fu aksi wisrefi: ’San na a trutru reide fu san ede mi e waka baka Yesus? San a wani taki fu de wan bakaman fu en?’ Te wi e hori den piki tapu den tu aksi dati na prakseri, dan dati sa yepi wi fu kon abi wan moro tranga overtoigi fu tan waka na tapu a bun pasi di wi ben bosroiti fu waka na tapu. A sa yepi wi tu fu gi trawan deki-ati fu waka baka Yesus.
Fu san ede wi e waka baka Yesus?
4, 5. Fu san ede Yesus bun nofo fu de wi Fesiman?
4 A profeiti Yeremia ben taki: „Mi sabi heri bun, o Yehovah, taki a no de na libisma fu luku gi ensrefi sortu pasi a wani teki. A no de na wan libisma di e waka srefi fu taki pe a wani poti en futu” (Yer. 10:23). A fasi fa sani waka na ini den hondrohondro yari di pasa, e sori taki Yeremia ben abi leti. A e kon na krin moro nanga moro taki sondu libisma no man tiri densrefi. Wi teki a kari fu tron bakaman fu Yesus fu di wi kon sabi taki a bun nofo fu de wi Fesiman, èn taki nowan libisma oiti man de leki en. Luku wan tu reide fu san ede Yesus de wan bun Fesiman.
5 A fosi reide, na taki Yehovah srefi teki Yesus leki a Mesias di ben o tron Fesiman. Suma sabi moro bun leki wi Mekiman, sortu Fesiman bun gi wi? A di fu tu reide, na taki Yesus abi tumusi moi fasi, èn wi kan sori den srefi fasi dati. (Leisi Yesaya 11:2, 3.) A de a moro bun eksempre gi wi (1 Petr. 2:21). A di fu dri reide, na taki Yesus e broko en ede trutru nanga den bakaman fu en, èn a sori dati di a dede gi den. (Leisi Yohanes 10:14, 15.) Boiti dati, a de wan lobi-ati skapuman di e tiri wi so taki wi kan de koloku now, èn te fu kaba a sa meki wi kisi têgo libi na ini wan paradijs (Yoh. 10:10, 11; Openb. 7:16, 17). Na fu den reide disi, èn fu tra reide sosrefi, meki wi teki a koni bosroiti fu waka na en baka. Ma san a wani taki fu de wan bakaman fu Yesus?
6. San a wani taki fu de wan bakaman fu Yesus?
6 Te wi na bakaman fu Krestes, dan dati no wani taki nomo dati wi e kari wisrefi Kresten. Na ini a ten disi, sowan tu milyard sma e kari densrefi Kresten, ma den sani di den e du e sori taki den na „sma di e du kruktudu” (Leisi Mateyus 7:21-23.) Te sma wani tron bakaman fu Yesus, dan wi e sori den taki tru Kresten e hori densrefi na den leri fu Yesus na ini ala san den e du. Boiti dati, den e teki na eksempre fu en. Den e du dati ibri dei. Wi kan kon sabi moro fini san a wani taki fu waka baka Yesus, te wi e poti prakseri na wan tu sani di wi sabi fu en.
Handri nanga koni neleki Yesus
7, 8. (a) San na koni, èn fu san ede Yesus ben abi so furu koni? (b) Fa Yesus sori taki a abi koni, èn fa wi kan teki na eksempre fu en?
7 Yesus ben abi furu moi fasi, ma wi sa poti prakseri na fo fu den fasi dati: A koni fu en, a sakafasi fu en, a faya di a ben abi gi a diniwroko, èn a lobi fu en. Meki wi poti prakseri fosi na a koni fu en. Iya, Yesus ben abi koni, fu di a ben gebroiki a sabi fu en na wan fasi di e tyari wini kon. Na apostel Paulus ben skrifi: „Ala den gudu fu koni èn fu sabi kibri bun na ini [Yesus]” (Kol. 2:3). Pe a koni dati komoto? Yesus srefi ben taki: „Mi e taki den sani disi soleki fa a Tata leri mi” (Yoh. 8:28). Yesus ben kisi a koni fu Yehovah, èn dati meki a no e fruwondru wi taki a ben e teki koni bosroiti.
8 Fu eksempre, te wi e luku a fasi fa Yesus ben e libi, dan wi e si taki a ben teki wan koni bosroiti. A ben bosroiti fu libi sondro tumusi furu pranpran, èn wán sani nomo ben prenspari gi en: A ben wani du a wani fu Gado. A ben e gebroiki ala en ten nanga en krakti fu horibaka gi Kownukondre afersi. Dati ben de wan koni sani fu du. Wan fasi fa wi kan teki na eksempre fu Yesus, na te wi e pruberi fu hori wi „ai krin”. Na so wi no sa teki wan lo hebi na wi tapu di e teki furu fu wi ten nanga wi krakti (Mat. 6:22). Furu Kresten tyari wan tu kenki kon fu no abi tumusi furu hebi na den tapu, so taki den kan du moro na ini a diniwroko. Son sma go pionier. Efu yu na wan fu den sma disi, dan yu e du wan kefalek bun sani. Te wi e ’suku a kownukondre fosi’, dan wi sa de koloku trutru èn wi sa abi wan korostu firi.—Mat. 6:33.
Sori sakafasi neleki Yesus
9, 10. Fa Yesus sori sakafasi?
9 Wi sa poti prakseri now na a sakafasi fu Yesus. Te sondu libisma e kisi makti, dan nofo tron den e bigin denki tumusi furu fu densrefi. Ma Yesus ben de heri tra fasi! Aladi Yesus ben de a moro prenspari sma di Yehovah ben gebroiki fu meki a wani fu En kon tru, toku noiti Yesus ben abi heimemre. Èn wi e kisi a rai fu teki na eksempre fu en. Na apostel Paulus ben skrifi: „Tan abi a srefi denki disi di Krestes Yesus ben abi tu; aladi a ben abi a srefi sortu skin leki Gado, toku a no prakseri fu teki sani abra nanga tranga, namku fu kan de a srefi leki Gado. Nôno, ma a gowe libi ala san a ben abi, a tron leki wan srafu èn a ben tron leki libisma” (Fil. 2:5-7). San dati ben wani taki?
10 Yesus ben abi a tumusi moi grani fu libi makandra nanga en Tata na hemel, ma a ben de klariklari fu „gowe libi ala san a ben abi”. Gado poti a libi fu en na ini a muru fu wan Dyu nyunwenke, èn baka neigi mun a gebore na ini na osofamiri fu wan pôti temreman. Now, Yesus ben de wan beibi di no ben man du noti gi ensrefi. Na ini na oso fu Yosef, Yesus gro kon bigi moro nanga moro. A no ben abi sondu. Ma leki yonguwan, Yesus ben e saka ensrefi ala ten na ondro en papa nanga mama di ben de sondu libisma (Luk. 2:51, 52). Dati na wan tumusi moi fasi fa a sori sakafasi!
11. Na sortu fasi wi kan sori sakafasi neleki Yesus?
11 Wi e sori sakafasi neleki Yesus, te wi de klariklari fu du wroko di sma e si leki lagi wroko. Fu eksempre, luku a wroko di wi kisi fu preiki a bun nyunsu. Kande sma e si a wroko dati leki wan lagi wroko, spesrutu te son sma no wani arki wi, te den e spotu wi, noso te den e frufolgu wi. Ma te wi e tan preiki, dan wi e yepi trawan fu teki a kari di Yesus e gi sma fu tron en bakaman. Na so fasi wi e yepi sma fu no kisi pori. (Leisi 2 Timoteyus 4:1-5.) Wan tra eksempre na a wroko di wi abi fu hori a Kownukondre zaal krin. Kande wi musu leigi den dotibaki, dweiri a gron, noso kande wi musu krin den toilet. Wi musu abi sakafasi fu du den wroko disi! Toku wi e frustan taki a de fanowdu fu hori a Kownukondre zaal krin, fu di a sani dati abi fu du tu nanga a santa diniwroko fu wi. Boiti dati, a Kownukondre zaal na a presi na ini a kontren fu wi pe wi e anbegi a tru Gado. Te wi de klariklari fu du wroko di sma e si leki lagi wroko, dan wi e sori taki wi abi sakafasi, èn na so wi e teki na eksempre fu Krestes.
De fayafaya neleki Yesus
12, 13. (a) Fa Yesus ben sori taki a ben de fayafaya, èn fu san ede a ben de fayafaya? (b) San kan yepi wi fu de fayafaya na ini a preikiwroko?
12 Luku fa Yesus ben de fayafaya na ini a diniwroko fu en. Yesus ben du furu sani di a ben de na grontapu. Fosi a ben bigin nanga a diniwroko fu en, dan a ben musu de so taki a ben e wroko makandra nanga en kwekipapa Yosef di ben de wan temreman. Na a ten di Yesus ben e du a diniwroko fu en, a ben e du wondru. A ben e dresi sikisma èn a ben e gi dedesma wan opobaka. Ma a moro prenspari wroko di a ben e du, na taki a ben e preiki a bun nyunsu, èn a ben e gi leri na den wan di ben e arki en (Mat. 4:23). Leki bakaman fu Yesus, wi abi a srefi wroko fu du. Fa wi kan teki na eksempre fu Yesus? Wan fasi fa wi kan du dati, na te wi e du a wroko nanga den srefi reide di Yesus ben abi fu du a wroko.
13 Ma a moro prenspari reide fu san ede Yesus ben e preiki a bun nyunsu èn fu san ede a ben e gi sma leri, na fu di a ben lobi Gado. Ma Yesus ben lobi den tru tori tu di a ben e leri sma. A ben e si den tru tori dati leki warti gudu, èn a ben e angri fu fruteri sma den tori disi. Wi leki leriman, abi a srefi denki disi. Prakseri wan tu fu den warti tru tori nomo di wi leri na ini Gado Wortu! Wi sabi taki a musu kon na krin suma abi a reti fu tiri hemel nanga grontapu, èn wi sabi tu fa dati sa kon na krin. Wi sabi heri bun san Bijbel e leri fu a situwâsi fu den dedewan, èn fu den blesi di wi sa kisi na ini a nyun grontapu fu Gado. Awansi wi leri den tru tori dati wan syatu pisi ten na fesi, noso langa ten kaba, toku den e tan prenspari tori. Iya, den tru tori disi trutru na warti gudu. (Leisi Mateyus 13:52.) Te wi e preiki fayafaya, dan wi e sori trawan taki wi lobi den sani di Yehovah leri wi.
14. Fa wi kan gi leri neleki fa Yesus ben du dati?
14 Poti prakseri tu na a fasi fa Yesus ben e gi sma leri. A ben e sori sma doronomo san skrifi na ini den Santa Buku fu Bijbel. Nofo tron te a ben o taki wan prenspari sani, dan a ben taki a sani disi fosi: „Gado Buku taki” (Mat. 4:4; 21:13). Soleki fa wi kan leisi na ini Bijbel, Yesus e teki sani puru fu pikinmoro afu fu den Hebrew Buku fu Bijbel, noso a e taki fu sani di skrifi na ini den buku dati. Neleki Yesus, wi abi a gwenti fu gi sma leri fu Bijbel te wi e du a diniwroko fu wi, èn wi e gebroiki Bijbel so furu leki wi man. Na so wi e yepi reti-atisma fu kon si taki wi no e leri den wi eigi denki, ma taki wi e leri den a denki fu Gado. Wi breiti srefisrefi te wan sma wani leisi san skrifi na ini Bijbel, èn te a wani taki fu den bun sani di sma kan leri fu a Wortu fu Gado! Èn te den sma disi e teki a kari fu tron bakaman fu Yesus, dan wi e prisiri pasa marki.
Bakaman fu Yesus musu sori lobi gi trawan
15. San na a moro moi fasi fu Yesus, èn sortu krakti a abi na wi tapu te wi e poti prakseri na a fasi disi?
15 Leki lasti, wi sa taki fu a moro moi fasi fu Yesus, èn dati na a lobi di a abi gi libisma. Na apostel Paulus ben skrifi: „A lobi di Krestes abi, e naki wi ati” (2 Kor. 5:14). Te wi e prakseri a lobi di Yesus abi gi libisma, èn gi ibriwan fu wi, dan a sani dati e naki wi ati, èn a e gi wi deki-ati fu teki na eksempre fu en.
16, 17. Na sortu fasi Yesus sori lobi gi sma?
16 Fa Yesus ben sori lobi gi sma? A moro moi fasi fa a du dati, na taki a ben de klariklari fu dede gi libisma (Yoh. 15:13). Ma na a ten di Yesus ben e du a diniwroko fu en, a ben sori lobi na tra fasi tu. Fu eksempre, a ben e firi gi den sma di ben e pina. Di a si taki Maria nanga tra sma ben e krei di Lasarus ben dede, dan a firi gi den sma disi di ben e sari. Aladi di Yesus ben de fu gi Lasarus wan opobaka, toku a ben e sari so te taki a „bigin krei”.—Yoh. 11:32-35.
17 Syatu baka di Yesus ben bigin nanga a diniwroko fu en, dan wan gwasiman go na en èn a taigi en: „Efu yu wani nomo, yu kan meki mi kon krin.” San Yesus du di a man taigi en dati? Bijbel e taki: ’A ben firi sari.’ Ne a du wan tumusi moi sani. „A langa en anu, fasi a man, èn a taigi en: ’Mi wani. Kon krin.’ Wantewante a gwasi komopo na a man tapu, èn a kon krin.” Soleki fa a Wet di Gado ben gi Moses ben e sori, dan gwasiman no ben de krin. A no de fu taki dati Yesus ben kan dresi a man sondro taki a fasi en. Ma toku Yesus fasi a man fu meki a firi fa a de te wan tra sma e fasi en. Kande dati ben de a fosi leisi na ini omeni yari di wan sma ben fasi a gwasiman disi. A no de fu taki dati Yesus sori na wan heri moi fasi taki a ben e firi gi a man!—Mark. 1:40-42.
18. Fa wi kan sori „sari-ati gi trawan”?
18 Leki bakaman fu Krestes, wi e kisi a rai fu sori „sari-ati gi trawan”, èn na so wan fasi wi sa sori taki wi lobi den sma disi (1 Petr. 3:8). Te wan Kresten brada noso sisa abi wan seryusu siki, noso te a e firi brokosaka srefisrefi, dan kande a no makriki gi wi fu frustan fa a sma disi e firi. Dati de so spesrutu te wi srefi no ondrofeni den sani dati. Toku Yesus ben man firi gi sikisma, aladi ensrefi noiti no ben siki. Fa wi kan leri fu firi gi trawan neleki fa Yesus ben du dati? Wi kan du dati te wi e arki nanga pasensi te wan sma e fruteri wi san de na tapu en ati. Wi ben kan aksi wisrefi a sani disi tu: ’Efu mi ben de na ini a situwâsi dati, dan fa mi ben o firi?’ Te wi e leri fu firi gi trawan, dan dati sa meki en moro makriki gi wi fu „taki na wan fasi di e trowstu den sma di lasi-ati” (1 Tes. 5:14). Na so wi sa teki na eksempre fu Yesus.
19. Sortu krakti na eksempre fu Yesus abi na wi tapu?
19 A no de fu taki dati wi kan leri furu fu den sani di Yesus Krestes taki èn fu den sani di a du! O moro wi e leri fu en, o moro wi o wani de leki en, èn o moro wi o wani yepi trawan fu du a srefi. Sobun, meki a de wan prisiri gi wi fu waka baka a Mesias Kownu, now èn fu têgo!
Yu kan tyari disi kon na krin?
• Fa wi kan handri nanga koni, neleki Yesus?
• Na sortu fasi wi kan sori sakafasi?
• San o yepi wi fu de fayafaya na ini a diniwroko?
• Fa wi kan sori lobi gi trawan neleki fa Yesus ben du dati?
[Aksi fu a tori disi]
[Faki/Prenki na tapu bladzijde 5]
WAN BUKU DI E YEPI WI FU TEKI NA EKSEMPRE FU KRESTES
Na a distrikt kongres fu 2007, a buku „Kom, wees mijn volgeling” („Kon nanga mi èn tron wan bakaman fu mi”) kon na doro. A buku disi di abi 192 bladzijde, meki fu yepi Kresten fu poti prakseri na a eksempre fu Yesus, spesrutu na den fasi fu en èn na den sani di a du. Den fosi tu kapitel fu a buku e meki wi kon sabi fu sortu tori a buku e taki. Baka dati, a fosi pisi fu a buku e poti prakseri na den tumusi moi fasi fu Yesus. Dati na a sakafasi fu en, a deki-ati fu en, a koni fu en, a fasi fa a ben e gi yesi na Gado, èn a fasi fa a ben e horidoro.
Baka te a buku e taki fu den fasi fu Yesus, a e poti prakseri na den sani di a du leki leriman èn leki preikiman fu a bun nyunsu. A buku e poti prakseri tu na wan tu fu den fasi fa Yesus sori taki a abi furu lobi gi sma. Den tori di skrifi na ini a buku disi, na fu yepi Kresten fu teki na eksempre fu Yesus.
Wi de seiker taki a buku disi sa gi wi alamala deki-ati fu ondrosuku wisrefi èn fu aksi wisrefi: ’Mi e waka baka Yesus trutru? Fa mi kan waka moro soifri na en baka?’ A buku sa yepi ’ala den wan di abi a yoisti denki fu man kisi têgo libi’ fu tron bakaman fu Krestes.—Tori. 13:48.
[Prenki na tapu bladzijde 4]
Yesus ben de klariklari fu kon na grontapu fu gebore leki wan beibi. Sortu fasi a ben musu abi fu man du dati?
[Prenki na tapu bladzijde 6]
San o yepi wi fu de fayafaya na ini a diniwroko?