Den e „tan waka na baka a Pikin Skapu”

„Den na den wan di e tan waka na baka a Pikin Skapu awansi pe a e go.”​—OPENB. 14:4.

1. Fa den tru disipel fu Yesus ben feni en fu de wan bakaman fu en?

SOWAN tu nanga afu yari baka di Yesus ben bigin nanga a diniwroko fu en, a „ben e gi leri na ini a konmakandra-presi na Kaperna-um”. „Furu fu den disipel fu en gowe fu go du den sani baka di den ben libi èn den no ben wani waka moro nanga en”, fu di den ben feni taki den sani di a ben e taki ben gi den groskin. Di Yesus aksi den 12 apostel fu en efu den no ben wani go tu, dan Simon Petrus piki en: „Masra, na suma wi musu go? Yu abi wortu di e gi sma têgo libi; wi e bribi èn wi kon sabi taki yu na a Santawan fu Gado” (Yoh. 6:48, 59, 60, 66-69). Den tru disipel fu Yesus no ben wani tapu fu waka na en baka. Baka di Gado salfu den nanga santa yeye, den tan teki a tiri fu Yesus.​—Tori. 16:7-10.

2. (a) Suma na „a getrow èn koni srafu”, noso „a getrow futuboi”? (b) Fa a srafu-grupu sori na wan moi fasi taki a e tan „waka na baka a Pikin Skapu”?

² Fa a de nanga den salfu Kresten na ini a ten disi? Yesus ben taki wan profeititori di abi fu du nanga „a marki fu [en] denoya èn fu a kaba fu a grontapu sistema disi”. Na ini a profeititori dati a kari den salfu bakaman fu en na grontapu „a getrow èn koni srafu”, noso „a getrow futuboi” (Mat. 24:3, 45; Luk. 12:42). A srafu-grupu disi sori na wan heri moi fasi taki a e „waka na baka a Pikin Skapu awansi pe a e go”. (Leisi Openbaring 14:4, 5.) Den memre fu a srafu-grupu e tan krin na yeye fasi fu di den no e doti densrefi nanga den bribi èn den gwenti fu „Babilon a Bigiwan”, a grontapumakti fu falsi bribi (Openb. 17:5). Nowan falsi leri „e komoto na ini den mofo”, èn den de „sondro fowtu”, fu di den e tan hori densrefi aparti fu a grontapu fu Satan (Yoh. 15:19). Na ini a ten di e kon, den salfuwan di de ete na grontapu ’o go’ na hemel te fu kaba fu de makandra nanga a Pikin Skapu.​—Yoh. 13:36.

3. Fu san ede wi musu abi frutrow na ini a srafu-grupu?

³ Yesus poti a getrow èn koni srafu fu luku „den futuboi fu en”, noso den difrenti memre fu a srafu-grupu. A srafu disi musu „gi den nyanyan na a reti ten”. Yesus gi a srafu a frantwortu tu „fu luku ala den sani di a abi” (Mat. 24:45-47). Wan fu den „sani di a abi” na a „bigi ipi” „tra skapu” di e kon bigi moro nanga moro (Openb. 7:9; Yoh. 10:16). Dati meki ibri salfu Kresten èn sosrefi ibri Kresten di de fu den „tra skapu”, musu abi frutrow na ini a srafu-grupu disi di Yesus poti fu luku den futuboi fu en. Furu reide de fu san ede wi musu abi frutrow na ini a srafu-grupu. Luku tu prenspari reide fu san ede wi musu du dati: (1) Yehovah abi frutrow na ini a srafu-grupu. (2) Yesus abi frutrow tu na ini a srafu-grupu. Meki wi go luku den buweisi di de taki Yehovah Gado nanga Yesus Krestes abi ala frutrow na ini a getrow èn koni srafu.

Yehovah abi frutrow na ini a srafu-grupu

4. Fu san ede wi kan abi ala frutrow na ini a yeye nyanyan di wi e kisi fu a getrow èn koni srafu?

⁴ Luku fa a du kon taki a getrow èn koni srafu man gi den futuboi fu Gado yeye nyanyan na a reti ten. Yehovah e taki: „Mi sa gi yu koni fu man si sani krin èn mi sa sori yu a pasi di yu musu waka.” A e taki moro fara: „Mi sa gi yu rai aladi mi ai sa de na yu tapu” (Ps. 32:8).  Iya, Yehovah e tiri a srafu-grupu. Fu dati ede, wi kan abi ala frutrow na ini den sani di a srafu e leri fu Bijbel. A srafu disi e yepi wi tu fu kon frustan Gado Wortu, èn a e tiri wi tu nanga yepi fu a Wortu disi. Wi kan abi ala frutrow taki a srafu e du den sani disi na a yoisti fasi.

5. San e sori taki a yeye fu Gado e tiri a srafu-grupu?

⁵ Yehovah e blesi a srafu-grupu tu nanga yepi fu en santa yeye. Aladi wi no man si a santa yeye, toku wi kan si te a e tiri wan sma. Prakseri san a getrow èn koni srafu ben man du fu di den gi kotoigi na heri grontapu, fu Yehovah Gado, fu en Manpikin, èn fu a Kownukondre. Den anbegiman fu Yehovah e preiki a Kownukondre boskopu fayafaya na ini moro leki 230 kondre nanga grupu fu èilanti. Yu no feni taki a sani disi e sori krin taki a yeye fu Gado e tiri a srafu-grupu? (Leisi Tori fu den Apostel 1:8.) A srafu-grupu disi musu teki tumusi prenspari bosroiti na ini a wroko di den abi fu gi a pipel fu Yehovah na heri grontapu yeye nyanyan na a reti ten. Te a srafu-grupu e du san a bosroiti, dan a e du dati na wan fasi di e sori taki a abi lobi, safri-atifasi, èn sosrefi den tra fasi fu a froktu fu a yeye.​—Gal. 5:22, 23.

6, 7. Omeni frutrow Yehovah abi na ini a getrow srafu?

⁶ Fu man frustan omeni frutrow Yehovah abi na ini a getrow srafu, dan a bun fu poti prakseri na a sani di a pramisi a grupu disi. Na apostel Paulus ben skrifi: „A trompeti o bari, èn den dedesma o opo baka nanga wan skin di no man pori moro, èn wi o kenki. Bika a skin di man pori, musu tron wan skin di no man pori moro, èn a skin di kan dede, musu tron wan skin di no man dede moro” (1 Kor. 15:52, 53). Den salfu bakaman fu Krestes, di e dini Gado na wan getrow fasi èn di e dede na ini wan skin di man pori, e kisi wan opobaka. Ma den no sa kisi wan opobaka fu de yeye nomo di abi têgo libi. Fu taki en leti, den no sa dede noiti moro, èn noiti den o man kisi pori. Boiti dati, den e kisi wan skin di no man pori, èn soleki fa a sori, den man hori densrefi na libi. Openbaring 4:4 e taki dati den wan disi di kisi wan opobaka, e sidon na tapu kownusturu èn den weri gowtu kownu-ati na tapu den ede. Den salfu Kresten disi sa kisi glori fu di den o tiri leki kownu. Ma moro buweisi de ete di e sori taki Yehovah abi frutrow na ini a srafu-grupu.

⁷ Openbaring 19:7, 8 e taki: „A trowdei fu a Pikin Skapu doro èn a trowmisi fu en sreka  ensrefi kaba. Iya, a trowmisi kisi primisi fu weri krosi fu fini linnen di krin èn di e brenki, bika a krosi fu fini linnen e prenki den regtfardiki sani di den santawan du.” Yehovah teki den salfu Kresten leki a trowmisi di o trow nanga a Manpikin fu en na ini a ten di e kon. Iya, den salfuwan o kisi wan skin di no e pori moro, den no sa dede noiti moro, den o tron kownu, èn den o tron a trowmisi fu a Pikin Skapu. Disi na tumusi moi grani di den o kisi! Den sani disi e sori krin taki Gado abi frutrow na ini den salfuwan di e „tan waka na baka a Pikin Skapu awansi pe a e go”.

Yesus abi frutrow na ini a srafu-grupu

8. Fa Yesus e sori taki a abi frutrow na ini den bakaman fu en di salfu nanga santa yeye?

⁸ San e sori taki Yesus abi ala frutrow na ini den bakaman fu en di salfu nanga santa yeye? A lasti neti di Yesus ben de na grontapu, a pramisi den 11 getrow apostel fu en wan sani. A taigi den: „Unu na den wan di tan nanga mi di mi ben kisi tesi; mi e meki wan frubontu nanga unu, neleki fa mi Tata meki wan frubontu nanga mi gi wan kownukondre, so taki unu kan nyan èn dringi na mi tafra na ini mi kownukondre, èn so taki unu kan sidon na tapu kownusturu fu krutu den twarfu lo fu Israel” (Luk. 22:28-30). Te fu kaba, ala den 144.000 salfu Kresten sa kisi wini fu a frubontu di Yesus ben sroto nanga den 11 apostel (Luk. 12:32; Openb. 5:9, 10; 14:1). Efu Yesus no ben abi frutrow na ini den salfuwan, dan yu denki taki a ben o sroto wan frubontu nanga den, di ben o gi den na okasi fu tiri makandra nanga en na ini a Kownukondre?

9. San na wan tu fu „den sani di [Krestes] abi”?

⁹ Boiti dati, Yesus Krestes poti a getrow èn koni srafu fu luku „ala den sani di a abi”, noso ala den Kownukondre afersi na grontapu (Mat. 24:47). Wan tu fu den sani disi na den difrenti gebow fu na edekantoro fu Yehovah Kotoigi, sosrefi den bijkantoro na ini den difrenti kondre, den Kongreshal, nanga den Kownukondre zaal na heri grontapu. Ete wan tu fu den sani di de fu Yesus, na a Kownukondre preikiwroko èn a wroko di wi e du fu meki disipel. Efu wan sma no ben o frutrow wan trawan, dan yu denki taki a ben o poti en fu luku den gudu fu en?

10. Sortu buweisi de taki Yesus Krestes e horibaka gi den salfu bakaman fu en?

¹⁰ Baka di Yesus kisi wan opobaka, a sori ensrefi na den getrow disipel fu en, syatu bifo a  opo go na hemel. Na a okasi dati, a pramisi den a sani disi: „Unu o si taki mi sa de nanga unu ala dei te na a kaba fu a grontapu sistema” (Mat. 28:20). Yesus hori ensrefi na a pramisi disi? Na ini den 15 yari di pasa, a nomru fu gemeente fu Yehovah Kotoigi kren fu sowan 70.000 go miti sowan 100.000. Dati na moro leki 40 procent. Èn fa a de nanga den nyun sma di tron disipel? Sowan 4.5 milyun disipel teki dopu na ini den lasti 15 yari di pasa. Dati na moro leki 800 disipel ibri dei. Te yu luku o moi a wroko e go na fesi, dan a de krin fu si taki Krestes e tiri den salfu bakaman fu en te den de na den gemeente konmakandra, èn te den e du a wroko di den kisi fu meki disipel.

A srafu de getrow èn a koni

11, 12. Fa a srafu sori taki a de getrow, èn taki a koni?

¹¹ Efu Yehovah Gado nanga Yesus Krestes abi ala frutrow na ini a getrow èn koni srafu, dan wi musu du dati tu, a no so? Fu taki en leti, a srafu-grupu sori taki a du a wroko di a kisi, na wan getrow fasi. Fu eksempre, a tijdschrift Watchtower e kon na doro sowan 130 yari kaba. Te nanga a dei fu tide, den gemeente konmakandra, den kongres, nanga den tra bigi konmakandra e yepi Yehovah Kotoigi fu kon abi wan moro tranga bribi.

¹² Boiti taki a srafu de getrow, a koni tu fu di a no e prefuru fu handri fosi Yehovah taigi en fu du dati. Èn te Gado e sori en krin san fu du, dan a no e draidrai fu teki a tiri dati. Fu eksempre, furu grontapusma e suku den eigi bun, èn den e du sani di Gado no feni bun kwetikweti. Son fesiman fu falsi bribi e tapu ai gi den sani disi, ma trawan fu den e sori krin taki den e agri nanga a fasi fa den sma dati e libi. Tra fasi leki den fesiman disi, a srafu-grupu e warskow wi gi den trapu fu na ogri sistema fu Satan. A srafu man gi wi koni rai, èn a man warskow wi biten, fu di Yehovah Gado nanga Yesus Krestes e blesi den. Dati meki, wi musu abi ala frutrow na ini a srafu-grupu. Ma fa wi kan sori taki wi abi frutrow na ini a getrow èn koni srafu?

„Go nanga” den salfuwan di e waka na baka a Pikin Skapu

13. Soleki fa a profeititori fu Sakaria e sori, dan fa wi kan sori taki wi abi frutrow na ini a getrow èn koni srafu?

¹³ A Bijbel buku Sakaria e taki fu „tin man” di e go na „wan Dyu”, èn den e taki: „Wi wani go nanga unu.” (Leisi Sakaria 8:23.) A wortu „unu”, e sori taki a „Dyu” e prenki wan grupu. Na ini a ten disi, a „Dyu” e prenki den salfu Kresten di de na grontapu ete, èn di de memre fu „na Israel fu Gado” (Gal. 6:16). Den „tin man di e taki ala tongo fu den pipel” e prenki a bigi ipi fu tra skapu. Neleki fa den salfu Kresten e waka na baka Yesus awansi pe a e go, na so a bigi ipi e „go nanga” a getrow èn koni srafu. Den memre fu a bigi ipi noiti no musu syen fu meki sma kon sabi taki den e horibaka gi den wan di „kisi a kari tu fu go na hemel” (Hebr. 3:1). Yesus no e syen fu kari den salfuwan, en „brada”.​—Hebr. 2:11

14. Fa wi kan yepi den brada fu Krestes na wan getrow fasi?

¹⁴ Te wi e horibaka na wan getrow fasi gi den brada fu Yesus Krestes, dan gi Yesus a de  neleki wi e horibaka gi en. (Leisi Mateyus 25:40.) Sobun, na sortu fasi den wan di abi a howpu fu libi na grontapu, kan yepi den salfu brada fu Krestes? A moro prenspari fasi fa den kan du dati, na fu yepi den preiki a Kownukondre boskopu (Mat. 24:14; Yoh. 14:12). Aladi a nomru fu salfuwan na grontapu saka na ini den yari di pasa, a nomru fu den tra skapu kren. Te den wan di abi a howpu fu libi na grontapu, e teki prati na a preikiwroko, kande leki furuten preikiman, dan den e yepi den salfuwan fu du a wroko di den kisi fu meki disipel (Mat. 28:19, 20). Wi no musu frigiti taki wi kan gi moni tu na difrenti fasi fu horibaka gi a wroko disi.

15. Fa wi musu si a yeye nyanyan di wi e kisi na a reti ten fu a srafu? Fa wi musu si den bosroiti di a srafu e teki na ini na organisâsi?

¹⁵ Soleki fa wi sabi, a getrow srafu e gi den futuboi fu Gado yeye nyanyan na a reti ten, èn a e du dati nanga yepi fu Bijbel publikâsi, èn nanga yepi fu Kresten konmakandra. Fa wi musu si den sani disi? Wi abi warderi gi a yeye nyanyan disi, èn wi de klariklari fu du san wi leri? Fa wi e si den kenki di a srafu e tyari kon na ini na organisâsi? Te wi de klariklari fu teki a tiri fu a srafu, dan wi e sori taki wi abi frutrow na ini den seti fu Yehovah.​—Yak. 3:17.

16. Fu san ede ala Kresten musu arki den brada fu Krestes?

¹⁶ Yesus ben taki: „Mi skapu e arki mi sten; mi sabi den èn den e waka na mi baka” (Yoh. 10:27). Na dati den salfu Kresten e du. Fa a de nanga den wan di e „go nanga” den? Den sma disi musu arki Yesus. Den musu arki den brada fu Yesus tu. Fu taki en leti, na den abi a moro bigi frantwortu fu tiri a pipel fu Gado, èn fu yepi den fu tan krosibei na Gado. San a wani taki fu arki a sten fu den brada fu Krestes?

17. San a wani taki fu arki a srafu-grupu?

¹⁷ Na ini a ten disi, a Tiri Skin e teki presi gi a getrow èn koni srafu. A Tiri Skin abi a frantwortu fu tiri a Kownukondre preikiwroko na heri grontapu. Den memre fu a Tiri Skin na owruman di abi ondrofeni, èn di salfu nanga santa yeye. Spesrutu den man disi na den wan di e ’teki fesi na wi mindri’ (Hebr. 13:7). Fu di den salfu opziener disi musu sorgu gi pasa 7.000.000 Kownukondre preikiman na ini moro leki 100.000 gemeente na heri grontapu, meki den abi „furu fu du na ini a wroko fu Masra” (1 Kor. 15:58). Te wi e arki a srafu-grupu, dan dati wani taki dati wi e horibaka gi a Tiri Skin di e teki presi gi den.

Den wan di e arki a srafu e kisi blesi

18, 19. (a) Sortu blesi den wan di e arki a getrow èn koni srafu, e kisi? (b) Sortu fasti bosroiti wi musu abi?

¹⁸ Sensi a getrow èn koni srafu kisi a frantwortu fu luku den futuboi fu Yehovah, a srafu disi „yepi furu sma fu kon de regtfardiki” (Dan. 12:3). Furu fu den sma disi abi a howpu fu tan na libi te na ogri sistema disi o kisi pori. A de wan blesi trutru te Gado e si wi leki regtfardikisma!

¹⁹ Na ini a ten di e kon, ’a santa foto, a Nyun Yerusalem [noso den 144.000 salfuwan] sa saka komopo fu Gado na ini hemel, èn a sa sreka ensrefi leki wan trowmisi gi a masra fu en’. San o pasa nanga den wan di arki a sten fu a srafu? Bijbel e taki: „Gado srefi o de nanga den. A o figi ala watra puru na den ai, èn dede no sa de moro; nowan sari, noso krei, noso pen no sa de moro. Den fositen sani pasa gowe” (Openb. 21:2-4). Sobun, meki wi arki Krestes nanga den salfu brada fu en di de fu frutrow.

San yu leri?

• San e sori taki Yehovah abi frutrow na ini a getrow èn koni srafu?

• San e sori taki Yesus Krestes abi ala frutrow na ini a srafu-grupu?

• Fu san ede wi musu abi frutrow na ini a getrow futuboi?

• Fa wi kan sori taki wi abi frutrow na ini a srafu?

[Aksi fu a tori disi]

[Prenki na tapu bladzijde 25]

Yu sabi suma Yehovah teki leki trowmisi fu trow nanga en Manpikin na ini a ten di e kon?

[Prenki na tapu bladzijde 26]

Yesus Krestes poti a getrow èn koni srafu fu luku „den sani di a abi”

[Prenki na tapu bladzijde 27]

Te wi e teki prati na a preikiwroko, dan wi e horibaka gi den salfuwan