Den leri fu Yesus abi krakti tapu den begi fu yu?

„Di Yesus kaba taki den sani disi, dan ala den sma fruwondru fu a fasi fa a ben gi leri.”​—MAT. 7:28.

1, 2. Fu san ede den sma ben e fruwondru fu a fasi fa Yesus ben e gi leri?

WI MUSU bribi den leri fu Yesus Krestes, a wan-enkri Manpikin fu Gado, èn wi musu du tu san wi e leri. A no de fu taki dati Yesus ben de a moro bun leriman di oiti libi na grontapu. Iya, sma ben fruwondru fu a fasi fa a ben gi leri di a hori a Bergitaki!​—Leisi Mateyus 7:28, 29.

² Yehovah en Manpikin no ben gi leri leki den leriman fu wet. Den leriman dati ben e hori langa taki di ben abi fu du nanga leri fu sondu libisma. Krestes ben e gi leri „leki wan sma di kisi makti”, fu di den sani di a ben e taki, ben komoto fu Gado (Yoh. 12:50). Sobun, meki wi go luku fa den tra sani di Yesus ben leri wi na ini a Bergitaki, kan abi krakti tapu den begi fu wi. Meki wi go luku tu fa wi musu gi yesi na den leri dati.

Noiti un musu begi leki den hoigriman

3. Fruteri syatu san Yesus ben leri den disipel fu en na ini Mateyus 6:5.

³ Na ini a tru anbegi, a prenspari srefisrefi fu begi Yehovah, èn wi musu du dati doronomo. Ma den sani di Yesus ben leri den disipel fu en di a hori a Bergitaki, musu abi krakti tapu den begi fu wi. Yesus ben taki: „Te unu e begi, dan un no musu de leki den hoigriman; bika den lobi tanapu begi na ini den snoga èn na tapu den uku fu den bigi strati so taki sma kan si den. Fu tru, mi e taigi unu: Den kisi den pai krinkrin kaba.”​—Mat. 6:5.

4-6. (a) Fu san ede den Fariseiman ben „lobi tanapu begi na ini den snoga èn na tapu den uku fu den bigi strati”? (b) Fa den sortu hoigriman dati ben „kisi den pai krinkrin kaba”?

⁴ Te den disipel fu Yesus ben e begi, dan den no ben musu de leki den „hoigriman”. Dati ben de sma soleki den Fariseiman di ben abi heimemre, èn di ben e du neleki den lobi Gado (Mat. 23:13-32). Nofo tron den hoigriman dati ben „lobi tanapu begi na ini den snoga èn na tapu den uku fu den bigi strati”. Fu san ede? So taki ’sma ben kan si den’. Den Dyu fu a fosi yarihondro ben abi a gwenti fu begi leki gemeente te den ben e tyari bron-ofrandi na ini a tempel (dati ben de na a ten fu neigi yuru mamanten nanga dri yuru bakadina). Furu fu den sma di ben e libi na ini Yerusalem, ben gwenti fu begi na ini grupu na ini a tempel dyari. Dorosei fu a foto dati, Dyu di ben lobi Gado ben gwenti fu „tanapu begi na ini den snoga” tu leisi wan dei.​—Luku Lukas 18:11, 13.

⁵ Fu di furu sma no ben e libi krosibei fu a tempel noso fu wan snoga, meki den no ben man go begi drape te mamanten èn te neti. Son leisi den sma disi ben e begi na iniwan presi pe  den ben de na a ten dati. Sonwan fu den ben lobi fu begi te den ben de „na tapu den uku fu den bigi strati”. Den ben e du dati ’so taki sma di ben e pasa ben kan si den’. Den hoigriman disi di ben e du neleki den lobi Gado, ben e ’begi langa begi soso fu di den ben wani sma fu si den’ (Luk. 20:47). Wi no musu de leki den sma disi.

⁶ Yesus ben taki dati den hoigriman dati ben e „kisi den pai krinkrin kaba”. Den sma disi ben e angri fu kisi grani nanga prèise fu tra sma. Èn dati ben de ala san den ben o kisi. Iya, na so den ben o kisi den pai krinkrin, fu di Yehovah no ben o piki den begi fu den hoigriman dati. Ma Gado ben o piki den begi fu den tru bakaman fu Krestes. Na dati Yesus e tyari kon na krin te a e taki moro fara fu a tori disi.

7. Fu san ede Yesus e gi wi a rai fu begi na ini wi „kamra”?

⁷ „Ma te yu e begi, dan go na ini yu kamra, èn baka te yu tapu yu doro, begi yu Tata di sma no man si; dan yu Tata di e si ala sani, sa pai yu baka” (Mat. 6:6). A rai di Yesus e gi fu go begi na ini wan kamra èn fu tapu a doro, no wani taki dati wan sma no mag teki fesi fu begi na ini a gemeente. Yesus ben gi a rai disi fu sori taki a no fiti te wan sma di e begi na publiki, e du dati fu di a wani taki sma luku en, noso fu di a wani kisi prèise fu trawan. Wi musu hori a sani disi na prakseri te wi abi a grani fu begi na publiki gi a pipel fu Gado. Meki wi gi yesi na a rai di Yesus e gi moro fara te a abi fu du nanga begi.

8. Soleki fa Mateyus 6:7 e sori, dan sortu fowtu wi no musu meki te wi e begi?

⁸ „Te yu e begi, no taki den srefi sani ibri leisi baka leki fa den grontapusma e du, bika den e prakseri taki Gado sa arki den efu den e taki furu sani” (Mat. 6:7). Na so Yesus poti prakseri na ete wan fowtu di son sma e meki te den e begi. Den sma disi e taki den srefi sani ibri tron baka. Dati no wani taki dati wi no mag taki den srefi sani ibri tron baka te wi e begi Yehovah fu yepi wi nanga wan spesrutu sani. A sani disi no wani taki tu dati wi no mag taki Gado tangi difrenti leisi te wi e begi. Di Yesus ben e begi na ini a dyari fu Getseimanei a neti fosi a dede, dan a taki „den srefi sani” ibri tron baka.​—Mark. 14:32-39.

9, 10. San Yesus ben wani leri wi di a gi wi a rai fu no taki den srefi sani ibri tron baka te wi e begi?

⁹ A no ben o fiti fu begi leki „den grontapusma” di e taki den srefi sani ibri tron baka. „Ibri leisi baka” den e taki sani di den leri na ede, èn furu fu den sani dati den e taki fu soso. Den anbegiman fu Bâal ben e kari a nen fu a falsi gado disi ’fu mamanten te go miti brekten, èn den ben e taki: „Bâal, piki wi!”’ (1 Kow. 18:26) Ma a sani disi no tyari nowan enkri wini kon gi den. Na ini a ten disi, milyunmilyun sma e taki langa begi, èn den e taki den srefi sani ibri tron baka, fu di den e denki taki „Gado sa arki den”. Ma Yesus e yepi wi fu kon frustan taki te wi e taki furu sani na ini langa begi, èn te wi e taki den srefi sani dati ibri tron baka, dan den begi dati no warti srefisrefi gi Yehovah. Yesus ben taki moro fara:

¹⁰ „Fu dati ede, no tron leki den, bika Gado un Tata sabi san unu abi fanowdu, srefi bifo unu aksi en” (Mat. 6:8). Furu fu den Dyu kerki fesiman ben e tyari densrefi leki den sma di no ben de Dyu, fu di den ben e taki furu sani te den ben e begi. A de prenspari taki tru Kresten e begi Gado fayafaya. Iya, wi musu prèise Gado, wi musu taki en tangi, èn wi musu begi en fu yepi wi (Fil. 4:6). Ma toku, a no fiti te wi e taki densrefi sani ibri tron baka, soso fu di wi feni taki na so wawan wi kan meki Gado kon sabi san na den nowtu fu wi. Te wi e begi, dan wi musu hori na prakseri taki wi e taki nanga a Sma di ’sabi san wi abi fanowdu, srefi bifo wi aksi en’.

11. San wi musu hori na prakseri te wi kisi a grani fu begi na publiki?

¹¹ Den rai di Yesus ben gi wi fu sori wi fa wi no musu begi, musu memre wi taki Gado no lobi te sma e taki wan lo hebi wortu te den e begi. Wi musu hori na prakseri tu taki te wi e begi na publiki, dan wi no musu du dati fu di wi wani kisi prèise fu trawan. Wi no musu begi  so langa tu, taki sma e bigin aksi densrefi o ten wi sa taki „Amen”. Te wi e begi, dan wi no musu meki sani bekènti tu, èn wi no musu gi den arkiman rai. A sani dati no ben o kruderi nanga den leri di Yesus ben gi na ini a Bergitaki.

Yesus e leri wi fa fu begi

12. San den wortu „meki yu nen kon santa” wani taki?

¹² Soleki fa wi si kaba, dan Yesus ben warskow den disipel fu en fu lespeki a grani di den abi fu begi na publiki. Ma a ben leri den tu fa den musu begi. (Leisi Mateyus 6:9-13.) Wi no musu leri a Wi Tata begi na ede, soso fu taki en ibri leisi baka. Na presi fu dati, a begi disi e sori wi na sortu sani wi musu poti prakseri te wi e begi. Fu eksempre, Yesus ben poti prakseri na Gado fosi, di a bigin a begi fu en. A ben taki: „Wi Tata na hemel, meki yu nen kon santa” (Mat. 6:9). A fiti taki wi e kari Yehovah „wi Tata”, fu di a de wi Mekiman di e tan „na hemel”, di de bun farawe fu grontapu (Deut. 32:6; 2 Kron. 6:21; Tori. 17:24, 28). Te wi e luku taki Yesus gebroiki a wortu „wi”, dan dati musu memre wi taki den Kresten brada nanga sisa fu wi abi wan bun matifasi tu nanga Gado. Den wortu „meki yu nen kon santa”, na fu begi Yehovah fu santa ensrefi. Iya, wi e begi en fu krin en nen fu ala den lei di sma fruteri fu en sensi a ten di Satan, Adam, nanga Eva opo densrefi teige En na ini Eden. Leki piki tapu a begi dati, Yehovah sa puru ogridu fu grontapu, èn na so a sa santa ensrefi.​—Esek. 36:23.

13. (a) Te wi e begi „meki yu kownukondre kon”, dan fa a begi dati sa kisi piki? (b) San Gado o du na grontapu?

¹³ „Meki yu kownukondre kon. Meki yu wani pasa na grontapu soleki fa a e pasa na hemel” (Mat. 6:10). Te wi e aksi Gado a sani disi, dan wi musu hori na prakseri taki a „kownukondre” na a Mesias Kownukondre na hemel. Krestes nanga den „santawan” di kisi wan opobaka e tiri a kownukondre disi (Dan. 7:13, 14, 18; Yes. 9:6, 7). Te wi e begi Gado fu meki a Kownukondre fu en „kon”, dan wi e aksi taki a kownukondre disi kon fu strafu ala sma na grontapu di e gens a tirimakti fu Gado. A sani disi o pasa heri esi, èn leki bakapisi fu dati, grontapu o tron wan paradijs pe regtfardikifasi nanga vrede sa de, èn pe ala sani sa waka bun (Ps. 72:1-15; Dan. 2:44; 2 Petr. 3:13). A wani fu Yehovah e pasa na hemel, èn te wi e begi taki a wani fu En pasa na grontapu, dan wi e aksi en fu du san a abi na prakseri nanga grontapu. Wi e aksi en tu fu puru den sma di e gens en na ini a ten disi, neleki fa a ben puru den sortu sma dati na ini owruten.​—Leisi Psalm 83:1, 2, 13-18.

14. Fu san ede a fiti taki wi e begi Gado fu gi wi „a brede di wi abi fanowdu gi a dei disi”?

¹⁴ „Gi wi tide a brede di wi abi fanowdu gi a dei disi” (Mat. 6:11; Luk. 11:3). Te wi e begi Gado a sani disi, dan wi e aksi en fu gi wi a nyanyan  di wi abi fanowdu „gi a dei disi”. Na so wi e sori taki wi e bribi taki Yehovah man gi wi san wi abi fanowdu ibri dei. Disi no wani taki dati wi e begi Gado fu gi wi bogobogo sani. Te wi e begi Gado fu gi wi san wi abi fanowdu ibri dei, dan kande dati sa memre wi na a komando di Gado ben gi den Israelsma fu tyari mana kon na wán. Gado ben gi a komando tu taki ’ibriwan sma ben musu go piki san a ben fanowdu gi a dei dati’.​—Ex. 16:4.

15. San wi musu du efu wi wani taki Yehovah gi wi pardon?

¹⁵ A tra sani di Yesus e taki now na ini a Wi Tata begi, e poti wi prakseri na wan sani di wi musu du. Yesus ben taki: „Gi wi pardon fu den sondu fu wi leki fa wi e gi pardon na sma di du wan sondu teige wi” (Mat. 6:12). Na soso te wi ’gi pardon’ na den wan di sondu teige wi, wi kan fruwakti taki Yehovah sa gi wi pardon. (Leisi Mateyus 6:14, 15.) Wi musu de klariklari fu gi trawan pardon.​—Ef. 4:32; Kol. 3:13.

16. Te wi e begi Yehovah fu kibri wi gi tesi èn fu frulusu wi fu na ogriwan, dan san dati wani taki?

¹⁶ „No meki wi kisi tesi, ma frulusu wi fu na ogriwan” (Mat. 6:13). Fa wi musu frustan den tu aksi disi di abi fu du nanga makandra? Wan sani de krin: Yehovah no e tesi wi fu du sondu. (Leisi Yakobus 1:13.) Satan, „na ogriwan” na trutru „a Sma di e tesi libisma” (Mat. 4:3). Te Bijbel e taki dati Gado du son sani, dan son leisi dati wani taki nomo dati a gi pasi taki den sani dati pasa (Rut 1:20, 21; Preik. 11:5). Fu dati ede, te wi e begi Yehovah fu no „meki wi kisi tesi”, dan wi e aksi en fu no gi pasi taki wi e naki futu te wi e kisi tesi fu trangayesi en. Leki lasti, te wi e begi Yehovah fu „frulusu wi fu na ogriwan”, dan wi e aksi En fu tapu pasi gi Satan so taki a no e meki wi naki futu. Èn wi kan abi na overtoigi taki ’Gado no sa meki wi kisi tesi di hebi moro leki san wi man frudrage’.​—Leisi 1 Korentesma 10:13.

’Tan aksi, tan suku, èn tan naki na tapu a doro’

17, 18. San a wani taki fu ’tan aksi, fu tan suku, èn fu tan naki na tapu a doro’?

¹⁷ Na apostel Paulus ben gi den Kresten brada nanga sisa fu en a rai disi: „Tan begi” (Rom. 12:12). Yesus ben poti prakseri na wan prenspari sani di ben abi fu du nanga a tori dati. A ben taki: „Tan aksi, dan unu sa kisi; tan suku, dan unu sa feni; tan naki na tapu a doro, dan a doro sa opo gi unu. Bika a sma di e aksi, e kisi; a sma di e suku, e feni; a sma di e naki na tapu a doro, a doro sa opo gi en” (Mat. 7:7, 8). A fiti taki wi e „tan aksi” Gado iniwan sani di e kruderi nanga a wani fu en. Den wortu fu na apostel Yohanes e kruderi nanga den di fu Yesus. Yohanes ben skrifi: „Disi na san wi sabi seiker fu [Gado], taki awansi san wi e aksi akruderi a wani fu en, a e yere wi.”​—1 Yoh. 5:14.

¹⁸ A rai di Yesus e gi wi fu ’tan aksi èn fu tan suku’, wani taki dati wi musu begi fayafaya, èn wi no musu tapu fu du dati. A de prenspari tu taki wi e „tan naki na tapu a doro” fu man kon na ini a Kownukondre èn fu man kisi wini fu den blesi di a Kownukondre disi sa tyari kon. Ma wi kan abi na overtoigi taki Gado sa piki den begi fu wi? Iya, wi kan abi na overtoigi dati te wi e anbegi Yehovah nanga wi heri ati, fu di Krestes ben taki: „A sma di e aksi, e kisi; a sma di e suku, e feni; a sma di e naki na tapu a doro, a doro sa opo gi en.” Den futuboi fu Yehovah ondrofeni furu leisi taki Gado trutru na a „Yereman fu begi”.​—Ps. 65:2.

19, 20. Te wi e luku san Yesus taki na Mateyus 7:9-11, dan fa Yehovah de leki wan lobi-ati papa?

¹⁹ Yesus ben agersi Gado nanga wan lobi-ati  papa di e gi den bakapikin fu en bun sani. Prakseri fa a ben o de efu yu ben de drape di Yesus ben e hori a Bergitaki, èn yu ben yere fa a taki den wortu disi: „Suma fu unu sa gi en manpikin wan ston, te a e aksi en brede? Noso kande te a e aksi en wan fisi, dan a no sa gi en wan sneki, a no so? Fu dati ede, efu unu di abi takru fasi, sabi fa fu gi un pikin bun sani, dan a no abi misi taki un Tata di de na hemel sa gi bun sani na den sma di e aksi en!”​—Mat. 7:9-11.

²⁰ Ala papa abi wan tu „takru fasi”, èn dati e kon fu di den gebore leki sondusma. Ma aladi dati de so, toku den lobi den pikin fu den. Wan papa no ben o kori a pikin fu en, ma a ben o du muiti fu gi en „bun sani”. Neleki wan papa, wi lobi-ati hemel Tata e gi wi „bun sani”, èn wan fu den sani dati na a santa yeye fu en (Luk. 11:13). A santa yeye dati kan gi wi a krakti fu dini Yehovah na wan fasi di fiti, fu di Yehovah na a Sma di e gi wi „ibri bun presenti nanga ibri volmaakti kado”.​—Yak. 1:17.

Tan kisi wini fu den leri fu Yesus

21, 22. San moi fu sabi fu a Bergitaki, èn fa yu feni den leri disi fu Yesus?

²¹ A Bergitaki trutru ben de a moro prenspari taki di oiti ben hori na grontapu. A taki disi e leri wi tumusi moi sani fu Gado, èn a e meki wi kon frustan sani krin. Den sani di wi leri na ini na artikel disi, e sori krin taki wi kan kisi furu wini te wi e gi yesi na den rai di Yesus gi na ini a Bergitaki. Den sani di Yesus leri wi kan yepi wi fu kon abi wan moro bun libi nownowde, èn den kan gi wi a howpu fu abi wan koloku libi na ini a ten di e kon.

²² Na ini den artikel disi wi poti prakseri na wan tu nomo fu den tumusi moi leri na ini a Bergitaki fu Yesus. A no e fruwondru wi taki den sma di yere a taki disi ben „fruwondru fu a fasi fa a ben gi leri” (Mat. 7:28). Na dati wi sa ondrofeni tu te wi e meki den leri disi, èn sosrefi furu tra leri fu a Bigi Leriman, Yesus Krestes, abi krakti tapu wi ati nanga wi frustan.

San yu ben o piki?

• San Yesus ben taki fu den begi fu den hoigriman?

• Fu san ede wi no musu taki den srefi sani ibri tron baka te wi e begi?

• Sortu sani wi e aksi Gado na ini a Wi Tata begi fu Yesus?

• Fa wi kan ’tan aksi, tan suku, èn tan naki na tapu a doro’?

[Aksi fu a tori disi]

[Prenki na tapu bladzijde 15]

Yesus ben krutu den hoigriman di ben e begi soso fu di den ben wani sma fu si den èn fu yere den

[Prenki na tapu bladzijde 17]

Yu sabi fu san ede a fiti taki wi e begi Gado fu gi wi brede gi a dei fu tide?