Den leri fu Yesus kan meki wi tron koloku sma
Den leri fu Yesus kan meki wi tron koloku sma
„[Yesus] kren go na tapu a bergi; èn a . . .bigin gi den leri.”—MAT. 5:1, 2.
1, 2. (a) San ben de a situwâsi di Yesus ben hori a Bergitaki fu en? (b) Fa Yesus bigin a taki fu en?
NA INI a yari 31, Yesus e tapu fu wan syatu pisi ten nanga a preikiwroko di a e du na ini Galilea. A e go hori a Paskafesa na ini Yerusalem (Yoh. 5:1). Te a drai go baka na Galilea, dan a e begi Gado heri neti fu tiri en te a o teki den 12 apostel fu en. A dei baka dati, wan bigi grupu sma e kon na wán te Yesus e dresi sikisma. Den disipel nanga tra sma de drape tu. Ne Yesus e go sidon na a skin fu a bergi, èn a e bigin gi den sma leri.—Mat. 4:23–5:2; Luk. 6:12-19.
2 Na a bigin fu a taki fu en, di wi sabi leki a Bergitaki, Yesus e sori den sma taki den o de koloku te den abi wan bun matifasi nanga Gado. (Leisi Mateyus 5:1-12.) Wan sma di de koloku ’e firi bun, a de tevrede, èn son leisi a e prisiri srefisrefi’. Yesus taki fu neigi sani di e meki taki Kresten de koloku. Den sani dati di a ben taki 2000 yari pasa, tyari furu wini kon gi den sma fu a ten dati, èn den e tyari furu wini kon tu gi wi na ini a ten disi. Wi sa poti prakseri na den neigi sani disi.
„Den sma di sabi taki den de na nowtu na yeye fasi”
3. Te wan sma sabi taki a de na nowtu na yeye fasi, dan san dati wani taki?
3 „Koloku fu den sma di sabi taki den de na nowtu na yeye fasi, bika den sa kisi a kownukondre fu hemel” (Mat. 5:3) „Den sma di sabi taki den de na nowtu na yeye fasi” e frustan taki den abi a tiri nanga a sari-ati fu Gado fanowdu.
4, 5. (a) Fu san ede den sma di sabi taki den de na nowtu na yeye fasi, de koloku? (b) Fa wi kan kon abi wan bun matifasi nanga Gado?
4 Den sma di sabi taki den de na nowtu na yeye fasi, de koloku, „bika den sa kisi a kownukondre fu hemel”. Fu di den fosi disipel fu Yesus ben e si en leki a Mesias, meki den kisi a grani fu tiri makandra nanga en na ini a hemel Kownukondre fu Gado (Luk. 22:28-30). Son Kresten abi a howpu fu tiri makandra nanga Krestes na hemel, èn trawan fu den abi a howpu fu libi fu têgo na ini a paradijs na grontapu, na ondro a tiri fu a Kownukondre. Ma wi alamala kan de koloku trutru te wi sabi taki wi de na nowtu na yeye fasi, èn taki wi abi Gado fanowdu na ini wi libi.
5 A no ala sma sabi taki den de na nowtu na yeye fasi, fu di furu fu den sma disi no abi bribi, èn den no abi warderi gi santa sani (2 Tes. 3:1, 2; Hebr. 12:16). Wan tu fasi fa wi kan kon abi wan bun matifasi nanga Gado, na te wi e studeri Bijbel fayafaya, te wi e wroko tranga fu meki disipel, èn te wi e go na den Kresten konmakandra doronomo.—Mat. 28:19, 20; Hebr. 10:23-25.
Sma di e sari de „koloku”
6. Suma na „den sma di e sari”, èn fu san ede den sma disi de „koloku”?
6 „Koloku fu den sma di e sari, bika den o kisi trowstu” (Mat. 5:4). „Den sma di e sari” na den srefi sortu sma di „sabi taki den de na nowtu na yeye fasi”. A sari di den sma disi e sari no wani taki dati den no breiti nanga a fasi fa den libi e waka. Den sma disi e sari fu di den abi sondu èn fu di den sondu fu libisma tyari so furu problema kon na grontapu. Fu san ede den sortu sma disi de „koloku”? Fu di den abi bribi na ini Gado nanga Krestes, èn fu di a bun matifasi di den abi nanga Yehovah de wan trowstu gi den.—Yoh. 3:36.
7. Fa wi musu si a grontapu fu Satan?
7 A de so taki wi e sari fu den someni takru sani di e pasa na ini a grontapu fu Satan? Fa wi e si den sani di a grontapu disi abi fu gi wi? Na apostel Yohanes ben skrifi: „Ala den sani di de fu grontapu, namku a lostu fu a skin, a lostu fu den ai, èn a prodo di wan sma e prodo nanga den gudu di a abi, no e kon fu a Tata” (1 Yoh. 2:16). Son leisi „a yeye fu grontapu”, noso a denki di abi krakti tapu libisma di no e anbegi Gado, safrisafri kan kon abi krakti tapu na anbegi fu wi. San wi musu du te dati e pasa nanga wi? We, wi musu begi Gado fayafaya, wi musu studeri a Wortu fu en, èn wi musu suku yepi na den owruman. Te wi e kon moro krosibei na Yehovah, dan wi sa „feni trowstu”, awansi sortu broko-ede wi abi.—1 Kor. 2:12; Ps. 119:52; Yak. 5:14, 15.
Den „safri-ati sma” de koloku trutru!
8, 9. San a wani taki fu de wan safri-ati sma, èn fu san ede den sortu sma dati de koloku?
8 „Koloku fu den safri-ati sma, bika den o kisi grontapu” (Mat. 5:5).Te wan sma abi safri-atifasi, dan dati no wani taki dati a swaki, noso taki a e du neleki a abi switifasi (1 Tim. 6:11). Te wi na safri-atisma, dan wi sa du a wani fu Yehovah, èn wi sa teki a tiri fu en. A fasi fa wi e handri nanga wi Kresten brada nanga sisa èn nanga tra sma, sa sori tu taki wi na safri-atisma. Te wi e tyari wisrefi na a fasi disi, dan wi e sori taki wi e gi yesi na a rai fu Paulus.—Leisi Romesma 12:17-19.
9 Fu san ede den safri-atisma de koloku? Yesus di ben abi safri-atifasi, ben taki: Fu di „den o kisi grontapu”. Yesus na a moro prenspari Sma di o kisi grontapu leki gudu (Ps. 2:8; Mat. 11:29; Hebr. 2:8, 9). Ma safri-atisma sa kisi grontapu tu leki ’gudu makandra nanga Krestes’ (Rom. 8:16, 17). Te a Kownukondre fu Yesus sa tiri grontapu, dan furu tra safri-atisma sa kisi têgo libi.—Ps. 37:10, 11.
10. Te wi no abi safri-atifasi, dan fa dati kan tapu wi fu kisi frantwortu na ini a gemeente, èn fu meki mati?
10 Wi musu abi safri-atifasi tu neleki Yesus. Ma fa a de te trawan sabi wi leki sma di lobi meki trobi? Te wi e atibron esi-esi, èn te wi lobi meki trobi, dan kande tra sma no o wani bumui nanga wi. Te brada di wani kisi frantwortu na ini a gemeente abi den fasi disi, dan den no sa kisi den grani dati (1 Tim. 3:1, 3). Paulus ben taigi Titus fu tan memre den Kresten na ini Kreita taki den no ben musu de sma di „lobi strei”. Na presi fu dati, den ’ben musu de sma di e fiti densrefi makriki na trawan èn di abi trutru safri-ati gi ala sma’ (Tit. 3:1, 2). Den sma di abi a safri-atifasi disi, de wan blesi trutru gi tra sma!
Den e angri fu „regtfardikifasi”
11-13. (a) Te wan sma e angri gi regtfardikifasi, dan san dati wani taki? (b) Fa den sma di e angri gi regtfardikifasi e „kisi sani bogobogo”?
11 „Koloku fu den sma di e angri trutru fu regtfardikifasi, bika den o kisi sani bogobogo” (Mat. 5:6). Di Yesus ben taki fu „regtfardikifasi”, dan a ben e taki fu sma di e du a wani fu Gado èn di e gi yesi na den komando fu en. A psalm skrifiman ben taki dati en ’ati ben broko fu di a ben e angri gi’ den krutubosroiti fu Gado (Ps. 119:20). Wi e angri tu gi regtfardikifasi?
12 Yesus ben taki dati den sma di e angri gi regtfardikifasi ben o de koloku fu di den ben o „kisi sani bogobogo”. Disi pasa baka a Pinksterfesa fu a yari 33, fu di na a ten dati, Yehovah en santa yeye bigin „sori grontapu krin . . . san na regtfardikifasi” (Yoh. 16:8). Nanga yepi fu santa yeye, Gado meki mansma skrifi den Kresten Griki Buku fu Bijbel di bun srefisrefi „fu gi trangaleri na wan regtfardiki fasi” (2 Tim. 3:16). A yeye fu Gado e yepi wi tu fu ’tron nyun sma di de soleki fa Gado wani, nanga trutru regtfardikifasi’ (Ef. 4:24). Den wan di abi berow èn e aksi Gado pardon fu den sondu fu den nanga yepi fu a frulusu-ofrandi fu Yesus, kan kon bun baka nanga Gado. A sani disi e gi wi trowstu, a no so?—Leisi Romesma 3:23, 24.
13 Efu wi abi a howpu fu libi na grontapu, dan wi sa ondrofeni regtfardikifasi dorodoro te wi e kisi têgo libi na ini wan grontapu pe regtfardikifasi sa de. Na a srefi ten, meki wi abi a fasti bosroiti fu hori wisrefi na den markitiki fu Yehovah. Yesus ben taki: „Tan suku a kownukondre nanga [Gado] En regtfardikifasi fosi” (Mat. 6:33). Te wi e du dati, dan wi sa abi furu fu du na ini na anbegi fu Gado, èn wi sa de koloku trutru.—1 Kor. 15:58.
Fu san ede „den sma di abi sari-ati gi trawan” de koloku?
14, 15. Fa wi kan sori sari-ati gi trawan? Fu san ede sma di „e sori sari-ati gi trawan” de koloku?
14 „Koloku fu den sma di abi sari-ati gi trawan, bika sma o abi sari-ati gi den” (Mat. 5:7) „Den sma di abi sari-ati gi trawan”, e firi gi trawan. Yesus ben e du wondru fu yepi furu sma di ben e pina, èn a du dati fu di a ben e firi gi den (Mat. 14:14). Sma kan sori sari-ati gi den wan di du ogri nanga den. Dati wani taki dati den e gi den sortu sma dati pardon, neleki fa Yehovah e gi pardon na sma di abi berow (Ex. 34:6, 7; Ps. 103:10). Wi kan sori sari-ati tu gi trawan na a fasi dati. Èn te wi e taki èn e du sani fu sori switifasi gi sma di abi yepi fanowdu, dan dati sa de wan trowstu gi den sma dati. Wan moi fasi fa wi kan sori sari-ati gi trawan, na te wi e meki den kon sabi den tru tori fu Bijbel. Fu di Yesus ben e firi gi wan bigi ipi sma, meki a „bigin leri den furu sani”.—Mark. 6:34.
15 Wi kan agri nanga a sani disi di Yesus ben taki: „Koloku fu den sma di abi sari-ati gi trawan, bika sma o abi sari-ati gi den.” Te wi e sori sari-ati gi trawan, dan kande den sa du a srefi gi wi. Te wi e sori sari-ati gi trawan, dan Gado kan bosroiti fu sori sari-ati gi wi te a sa krutu wi (Yak. 2:13). Soso den sma di lobi fu sori sari-ati gi trawan, sa kisi pardon fu sondu, èn na den wawan sa kisi têgo libi.—Mat. 6:15.
Fu san ede „den sma di abi wan krin ati” de koloku?
16. San a wani taki fu „abi wan krin ati”? Fa den sma di abi a fasi dati e „si Gado”?
16 „Koloku fu den sma di abi wan krin ati, bika den o si Gado” (Mat. 5:8). Efu wi abi „wan krin ati”, dan dati sa de fu si na den sani di wi lobi, na den sani di wi e angri gi, èn di wi e du. Wi sa sori ’lobi fu di wi abi wan krin ati’ (1 Tim. 1:5). Te wi abi wan krin ati, dan wi sa „si Gado”. A no abi fu de so taki wi sa si Yehovah nanga wi eigi ai, fu di „nowan libisma man si [Gado], dan a tan na libi” (Ex. 33:20). Fu di Yesus ben sori den fasi fu Gado na wan heri bun fasi, meki a ben taki: „A sma di si mi, si a Tata tu” (Yoh. 14:7-9). Leki anbegiman fu Yehovah na grontapu, wi man si fa Gado e handri fu a bun fu wi, èn na so wi e „si Gado” (Yob 42:5). Ma den salfu Kresten sa kisi wan tumusi bigi grani te den kisi wan opobaka fu libi leki yeye na hemel, pe den sa si a hemel Tata fu den trutru.—1 Yoh. 3:2.
17. Te wi abi wan krin ati, dan sortu krakti dati sa abi na wi tapu?
17 Wan sma di abi wan krin ati e tyari ensrefi na wan fasi di e fiti, èn a e anbegi Gado na wan yoisti fasi. Fu dati ede, so wan sma no e tan prakseri sani di no krin na ini Yehovah ai (1 Kron. 28:9; Yes. 52:11). Efu wi abi wan krin ati, dan den sani di wi e taki èn den sani di wi e du sa de krin, èn wi no sa du neleki wi e anbegi Yehovah nanga wi heri ati, aladi dati no de so.
„Den sma di e suku vrede” e tron manpikin fu Gado
18, 19. Fa „den sma di e suku vrede” e tyari densrefi?
18 „Koloku fu den sma di e suku vrede, bika sma sa kari den, ’manpikin fu Gado’” (Mat. 5:9). Na den sani di wan sma e du èn den sani di a no e du, e sori efu a de wan „sma di e suku vrede”. Na fu den sortu sma dati Yesus ben taki. Efu wi na wan fu den sma dati, dan noiti wi ’sa pai ogri nanga ogri baka’. Na presi fu dati, wi ’sa du muiti fu du bun gi tra sma ala ten’.—1 Tes. 5:15.
19 A Griki wortu di vertaal nanga „suku vrede” na Mateyus 5:9, trutru wani taki „sma di e meki vrede”. Fu man de sma di e suku vrede, dan wi musu du ala muiti fu tyari vrede kon. Sma di e meki vrede no e du sani di e „prati den wan di de bun nanga makandra” (Odo 16:28). Fu di wi na sma di e suku vrede, meki wi e „du muiti fu abi vrede nanga ala sma”.—Hebr. 12:14.
20. Suma na den „manpikin fu Gado” na ini a ten disi, èn suma moro sa tron pikin fu Gado te fu kaba?
20 Den sma di e suku vrede de koloku fu di „sma sa kari den ’manpikin fu Gado’”. Yehovah teki getrow salfu Kresten fu tron „manpikin fu [En]”. Den Kresten disi di de pikin fu Yehovah, abi wan bun matifasi kaba nanga En. Dati e kon fu di den abi bribi na ini Krestes, èn fu di den e anbegi „a Gado fu lobi nanga vrede”, nanga den heri ati (2 Kor. 13:11; Yoh. 1:12). Fa a de nanga den „tra skapu” fu Yesus di lobi fu suku vrede? Den skapu disi sa abi Yesus leki den Têgo Tata na a ten fu a Dusun Yari Tiri fu en. Ma na a kaba fu a tiri dati, Yesus sa saka ensrefi na ondro Yehovah, èn den skapu fu en sa tron trutru pikin fu Gado.—Yoh. 10:16; Yes. 9:6; Rom. 8:21; 1 Kor. 15:27, 28.
21. Fa wi sa tyari wisrefi te wi e „meki a yeye tiri wi libi”?
21 Efu wi e „meki a yeye tiri wi libi”, dan sma sa si wantewante taki wi na sma di e suku vrede. Wi no sa „strei nanga makandra”, noso „wi no suku sma mofo” (Gal. 5:22-26; Nyun Testamenti). Na presi fu dati, wi sa meki muiti fu „libi na ini vrede nanga ala sma”.—Rom. 12:18.
Den de koloku aladi sma e frufolgu den!
22-24. (a) Soleki fa wi si, dan den wan di sma e frufolgu fu di den de regtfardiki, na sma di de koloku. Fu san ede dati de so? (b) Na sortu tori wi sa poti prakseri na ini den tu studie-artikel di e kon?
22 „Koloku fu den sma di kisi frufolgu fu di den de regtfardiki, bika a kownukondre fu hemel na fu den” (Mat. 5:10). Yesus ben taki moro fara: „Koloku fu unu te sma e gi unu porinen èn te den e frufolgu unu, aladi den e lei èn e taki ala sortu ogri fu unu, fu mi ede. Un musu breiti èn prisiri pasa marki, fu di unu o kisi wan bigi pai na hemel; bika na so sma ben frufolgu den profeiti di ben de fosi unu.”—Mat. 5:11, 12.
23 Neleki den profeiti fu Gado na ini owruten, Kresten e fruwakti taki sma sa kosi den, frufolgu den, èn fruteri lei fu den. Iya, den sabi taki den sani disi o pasa nanga den „fu di den de regtfardiki”. Ma te wi e horidoro na wan getrow fasi, dan wi sa plisi Yehovah èn wi sa gi grani na en. A sani dati sa meki wi firi bun (1 Petr. 2:19-21). Awansi wi e pina, toku dati no kan meki wi lasi prisiri na ini a diniwroko di wi e du gi Yehovah na ini a ten disi, èn na ini a ten di e kon. Èn wi sa tan koloku fu di wi abi a howpu fu tiri makandra nanga Krestes na ini a hemel Kownukondre, èn fu di wi abi a howpu fu libi fu têgo na grontapu na ondro a tirimakti dati. Den blesi disi e sori taki Gado feni wi bun, èn taki a lobi fu du bun sani gi wi.
24 Moro sani de ete di wi kan leri fu a Bergitaki. Na ini den tu studie-artikel di e kon, wi sa poti prakseri na difrenti sani di Yesus Krestes ben leri wi. Meki wi go luku fa wi kan fiti den sani dati na ini wi libi.
San yu ben sa piki?
• Fu san ede „den sma di sabi taki den de na nowtu na yeye fasi”, de koloku?
• Fu san ede den „safri-ati sma” de koloku?
• Fu san ede Kresten de koloku aladi den e kisi frufolgu?
• Sortuwan fu den neigi sani di Yesus ben taki, naki yu ati?
[Aksi fu a tori disi]
[Prenki na tapu bladzijde 7]
Neleki fa a ben de fosi, den neigi sani di Yesus ben taki na a bigin fu a Bergitaki, e tyari wini kon tu gi wi na ini a ten disi
[Prenki na tapu bladzijde 8]
Wan moi fasi fa wi kan sori sari-ati gi trawan, na te wi e meki den kon sabi den tru tori fu Bijbel