A di fu 125 klas fu a Gileadskoro

Den zendeling kisi a deki-ati fu de leki Yeremia

„A KLAS disi fu a Gileadskoro na wan tumusi prenspariwan, te yu e luku omeni zendeling a skoro disi seni go kaba na tra kondre”, na so Brada Geoffrey Jackson fu a Tiri Skin ben taki. A ben e taki nanga den 6156 sma di ben de na a konmakandra fu den zendeling di klari a di fu 125 klas fu a Waktitoren Bijbelskoro Gilead, tapu 13 september 2008. Makandra nanga den 56 zendeling fu a klas disi, a Gileadskoro seni moro leki 8000 zendeling go na „den moro farawe presi fu grontapu”!​—Tori. 1:8.

Brada Jackson, a fesiman fu a programa, ben taki: „Te sma e frutrow yu, dan yu o man du a diniwroko fu yu moro bun.” Baka dati, a kari fo sani di o meki taki sma frutrow den zendeling. Den musu abi a yoisti fasi fu denki, den musu de wan bun eksempre gi trawan, a leri di den e gi musu komoto fu Gado Wortu, èn den musu meki Yehovah en nen bekènti.

David Schafer, di e dini na ini a Leri Komte, ben hori a lezing disi: „Yu o frustan ala sani?” A ben gi den Gilead studenti a dyaranti taki awansi den no o frustan ala sani na ini a tongo di sma e taki na ini a kondre pe den e go, noso awansi den no e frustan a kulturu fu den sma, toku den kan „frustan ala sani”. Den o man du dati te den e tan suku Yehovah èn te den de klariklari fu saka densrefi na ondro a tiri fu „a getrow èn koni srafu”.​—Odo 28:5; Mat. 24:45.

Baka dati, John E. Barr fu a Tiri Skin ben hori a lezing di nen: „No meki noti puru yu fu a lobi fu Gado.” Neleki wan lobi-ati papa, Brada Barr gi den zendeling, èn den papa nanga mama fu den a deki-ati fu no broko den ede tumusi nanga den sani di den nyun zendeling o miti kande na ini a kondre pe den o go. „Te wi de na ini a lobi fu Gado, dan wi o abi a firi taki sani o waka bun gi wi”, na so a brada ben taki. Nowan sani kan puru den zendeling fu a lobi fu Gado, efu den no puru densrefi fu Gado.

Brada Sam Roberson fu a Bijbelskoro kantoro, gi den arkiman a deki-ati fu teki na eksempre fu Yesus. Te den zendeling e ondrosuku den sani di Yesus ben du èn te den e fiti den sani dati na ini den libi, dan na so fasi den kan „de leki Masra Yesus Krestes” (Rom. 13:14). Baka dati, William Samuelson, fesiman fu a Bijbelskoro kantoro, ben tyari kon na krin san e meki taki wan sma de warti. A no a fasi fa libisma e si den o meki taki den warti, ma na a fasi fa Gado e si den.

Michael Burnett, wan fu den leriman fu a skoro, ben aksi den studenti fu fruteri san den ben ondrofeni na ini a preikiwroko, di den ben de drape na a Gileadskoro na Patterson, New York. Aladi furu fu den studenti ben musu go preiki na ini kontren pe brada nanga sisa e preiki furu kaba, toku den ben miti sma di ben wani arki. Brada Gerald Grizzle fu a Kongres kantoro ben taki nanga dri brada di ben go na a Skoro gi memre fu a Bijkantoro Komte. Den sani di den brada disi taki ben yepi den studenti fu sreka densrefi gi den sani di den o miti na ini a kondre pe den musu go dini.

Brada David Splane fu a Tiri Skin èn fu a di fu 42 klas fu a Gileadskoro, ben hori a lezing di nen  „De leki Yeremia”. Aladi Yeremia ben frede fu du a wroko di Yehovah ben gi en, toku Yehovah ben gi en krakti (Yer. 1:7, 8). Gado sa du a srefi gi den nyun zendeling disi. Brada Splane ben taki: „Efu yu abi wan problema nanga wan sma, dan go sidon èn skrifi tin sani di yu lobi fu a sma dati. Èn efu yu no man kon tapu tin sani, dan dati wani taki dati yu no sabi a sma bun.”

Yeremia ben de klariklari fu gi ensrefi. Di a ben wani tapu nanga a wroko, dan a ben begi Yehovah, èn Yehovah ben de nanga en (Yer. 20:11). Brada Splane ben taki: „Te yu lasi-ati, taki nanga Yehovah fu dati. Yu sa fruwondru fu si fa Yehovah o yepi yu.”

Na a kaba fu a programa disi, a fesiman memre den arkiman taki den nyun zendeling leri san na wan tu difrenti sani di den kan du so taki sma frutrow den. Te sma e si taki den kan frutrow den zendeling, dan a boskopu fu den o abi moro krakti tapu sma.​—Yes. 43:8-12.

[Faki na tapu bladzijde 22]

WAN TU SANI FU A KLAS

A nomru fu den kondre pe den studenti komoto: 6

A nomru fu den kondre pe den studenti o go: 21

A nomru fu studenti: 56

Gemiddeld yari di den abi: 32,9

Gemiddeld yari di den dopu: 17,4

Gemiddeld yari di den de na ini a furuten diniwroko: 13

[Prenki na tapu bladzijde 23]

A di fu 125 klas fu a Waktitoren Bijbelskoro Gilead

Den nen di de fu si na ondrosei, poti na ini rèi di nomru fu fesisei go na bakasei, èn na ini ibri rèi den nen poti fu a kruktu-anusei go na a reti-anusei.

(1) Hodgson, A.; Wall, A.; Beerens, K.; Hortelano, M.; Newman, L.; De Caso, A. (2) Jenkins, J.; Jarzemski, T.; Méndez, N.; Corona, V.; Canalita, L. (3) Fryer, H.; Savage, M.; Tidwell, K.; Erickson, N.; Dyck, E.; McBeath, R. (4) Perez, L.; Puse, L.; Skidmore, A.; Young, B.; McBride, N.; Rondón, P.; Goodman, E. (5) Beerens, M.; Ferguson, J.; Pearson, N.; Chapman, L.; Wardle, J.; Canalita, M. (6) Perez, P.; De Caso, D.; Young, T.; Rondón, D.; Goodman, G.; Jenkins, M.; Dyck, G. (7) Corona, M.; Wall, R.; Puse, S.; Méndez, F.; Jarzemski, S.; Savage, T. (8) Newman, C.; Ferguson, D.; Skidmore, D.; Erickson, T.; McBride, J.; Pearson, M.; Chapman, M. (9) Hodgson, K.; Wardle, A.; McBeath, A.; Tidwell, T.; Fryer, J.; Hortelano, J.