A Wortu fu Yehovah de libilibi

Edepenti fu a buku Openbaring—Pisi II

SAN e wakti den sma di e anbegi Yehovah Gado? Èn san e wakti den wan di no e du dati? San o pasa nanga Satan èn den ogri yeye fu en? Sortu blesi libisma di e gi yesi na Gado sa kisi na a ten fu a Dusun Yari Tiri fu Krestes? Den piki tapu den aksi disi èn tapu tra tumusi prenspari aksi sosrefi, de fu feni na Openbaring 13:1–22:21. * Den kapitel disi e taki fu den lasti neigi fisyun di na apostel Yohanes ben kisi. Soleki fa wi sabi, na apostel disi ben kisi 16 fisyun na a kaba fu a fosi yarihondro.

Yohanes ben skrifi: „Koloku fu a sma di e leisi den wortu fu a profeititori disi nanga wan tranga sten; koloku fu den sma di e yere a profeititori disi èn di e du den sani di skrifi na ini” (Openb. 1:3; 22:7). Te wi e leisi a buku Openbaring, èn te wi e du den sani di wi e leri, dan dati kan gi wi deki-ati fu dini Gado nanga wi heri ati. Boiti dati, wi sa kisi wan moro tranga bribi na ini Gado èn na ini a Manpikin fu en, Yesus Krestes. Èn wi sa kisi wan moi howpu tu gi a ten di e kon. *​—Hebr. 4:12.

DEN E KANTI DEN SEIBI KOMKI FU NA ATIBRON FU GADO

(Openb. 13:1–16:21)

Openbaring 11:18 e taki: „Den kondre kon atibron srefisrefi èn [Gado] kon atibron srefisrefi tu; a reti ten doro fu . . . tyari wan pori kon na tapu den wan di e pori grontapu.” A di fu aiti fisyun e meki wi kon sabi fu san ede Gado kisi atibron. A fisyun disi e sori san ’wan ogri meti di abi tin tutu nanga seibi ede’ e du.​—Openb. 13:1.

Na ini a di fu neigi fisyun, Yohanes e si „a Pikin Skapu e tanapu na tapu Sionbergi, makandra nanga wan hondro fotenti na fo dusun sma”. Den sma disi „bai puru na mindri libisma” (Openb. 14:1, 4). Baka dati, engel e meki boskopu bekènti a wán baka a trawan. Na ini a di fu tin fisyun, Yohanes e si ’seibi engel di abi seibi rampu’. Soleki fa a sori, dan Yehovah srefi e gi den engel disi a komando fu kanti „den seibi komki fu na atibron fu Gado” na tapu difrenti pisi fu a grontapu fu Satan. A sani di de na ini den komki disi e prenki boskopu nanga warskow di abi fu du nanga a krutu di libisma o kisi fu Gado (Openb. 15:1; 16:1). Den tu fisyun disi e fruteri finifini sortu tra krutuboskopu ben o meki bekènti te a Kownukondre o tiri. Den krutuboskopu disi abi fu du nanga a di fu dri helu, èn nanga a di fu seibi trompeti di o bari.​—Openb. 11:14, 15.

Piki tapu den aksi fu Bijbel

13:8​—San na „a bukulolo fu libi, di de fu a Pikin Skapu”? Disi na wan agersi bukulolo di abi soso den nen fu den wan na ini di e tiri makandra nanga Yesus Krestes na ini en hemel Kownukondre. A bukulolo disi abi sosrefi den nen fu den salfu Kresten di de ete na grontapu, èn di abi a howpu fu libi na hemel.

13:11-13​—Fa na ogri meti di abi tu tutu e du leki wan bigi kaiman, èn fa a e meki faya saka komoto fu hemel? A taki di na ogri meti di abi tu tutu e taki leki wan bigi kaiman, e sori taki a e tapu skreki gi sma, a e kwinsi sma, èn a e du ogri nanga sma fu dwengi den fu saka densrefi na ondro a tiri fu en. Na ogri meti disi e prenki na Anglo-Amerkan Grontapumakti. Te a e meki faya saka komoto fu hemel, dan dati  wani taki dati a e du neleki en na wan profeiti. Iya, a e taki dati a wini ogri na ini den tu grontapufeti fu a di fu 20 yarihondro, èn taki a wini a Communist tiri.

16:17​—San na „a loktu” di na engel e kanti a di fu seibi komki go na tapu? „A loktu” e prenki a denki fu Satan, noso „a yeye [noso a denki] di e wroko now na ini den sma di e trangayesi Gado”. A takru loktu disi, abi krakti tapu a heri ogri sistema fu Satan.​—Ef. 2:2.

Sani di wi kan leri:

13:1-4, 18. „Wan ogri meti” di e prenki libisma tirimakti, e opo komoto „na ini a se”. A se disi e prenki den ipi-ipi sma di lobi meki opruru (Yes. 17:12, 13; Dan. 7:2-8, 17). Na ogri meti disi di Satan meki èn di a e gi krakti, abi a nomru 666, èn dati e sori krin taki a no de volmaakti srefisrefi. A bun te wi e frustan san na ogri meti e prenki, fu di dati sa tapu wi fu waka na en baka. Boiti dati, wi no sa gi en grani, èn wi no sa anbegi en soleki fa furu sma e du.​—Yoh. 12:31; 15:19.

13:16, 17. Awansi wi e kisi problema te wi e du aladei sani soleki „bai noso seri sani”, toku wi no musu gi pasi taki na ogri meti e tiri wi libi. Te wi e teki ’a marki fu na ogri meti na tapu wi anu noso na tapu wi fesi-ede’ dan fu taki en leti, wi e gi pasi taki na ogri meti e tiri wi libi nanga wi denki.

14:6, 7. Den boskopu fu den engel e leri wi taki wi musu meki bekènti fayafaya taki a Kownukondre fu Gado seti. Wi musu yepi den bijbelstudenti fu wi fu kon abi a yoisti frede gi Yehovah, èn wi musu yepi den tu fu gi glori na En.

14:14-20. Te a kotiwroko fu „a nyanyan fu grontapu” kon na wan kaba, noso te ala den wan di sa kisi frulusu tyari kon na wán, dan a ten sa doro taki na engel fringi den droifi fu „a droifibon fu grontapu” go „na ini a bigi baki pe den e masi droifi fu meki win; a baki disi na a atibron fu Gado”. A droifibon e prenki ala den ogri tirimakti fu Satan di e tiri libisma, èn den „bosu droifi” fu en e prenki den ogri fasi fu den tirimakti. Den alamala sa kisi pori fu têgo. Wi musu abi a fasti bosroiti fu no gi pasi taki a droifibon fu grontapu abi krakti na wi tapu.

16:13-16. Den „tegu sani” na ini den tekst disi, e prenki sani di den ogri yeye e meki bekènti fu sorgu taki den kownu fu grontapu no kenki den prakseri te den seibi komki fu Gado en atibron kanti kon na grontapu. Na presi fu dati, den e kisi deki-ati fu opo densrefi teige Yehovah.​—Mat. 24:42, 44.

16:21. Syatu bifo a kaba fu a grontapu disi doro, a kan taki Yehovah sa taigi den sma fu na ogri sistema fu Satan krin sortu strafu den sa kisi. A kan taki ijs e prenki den sani di a sa taki. Ma toku, furu libisma sa tan taki ogri fu Gado.

A KOWNU DI WINI E TIRI

(Openb. 17:1–22:21)

„Babilon a Bigiwan”, a grontapumakti fu falsi bribi, na wan tegu pisi fu na ogri grontapu fu Satan. A di fu 11 fisyun e prenki en leki wan „bigi huru-uma”, èn na uma disi „e sidon na tapu wan redi ogri meti”. „Den tin tutu” fu a meti di na uma e sidon na tapu, sa pori na uma disi dorodoro (Openb. 17:1, 3, 5, 16). A fisyun di Yohanes e si baka dati, e prenki a huru-uma leki wan „bigi foto” di o kisi pori, èn a fisyun disi e gi a pipel fu Gado a seryusu warskow fu „komoto drape”. Furu sma o sari fu di a bigi foto disi kisi pori. Ma den engel na hemel e prisiri nanga „a trowdei fu a Pikin Skapu” (Openb. 18:4, 9, 10, 15-19; 19:7). Na ini a di fu 13 fisyun, a sma di e rèi „wan weti asi”, e go feti nanga den pipel. A e pori na ogri grontapu fu Satan.​—Openb. 19:11-16.

Fa a de nanga ’a fosi sneki di de Didibri nanga Satan’? O ten Gado sa „fringi en go na ini a se di e bron nanga faya”? A di fu 14 fisyun e taki tu fu a tori dati (Openb. 20:2, 10). Den lasti tu fisyun e meki wi kon sabi pikinso fa a libi sa de na a ten fu a Dusun Yari Tiri. Te na „openbaring” e kon na wan kaba, dan Yohanes e si ’wan liba di ben abi watra di e gi libi, èn a watra ben e lon leti mindri fu a bigi pasi’. Yohanes e si tu taki „ibri sma di watra e kiri en”, e kisi wan moi kari.​—Openb. 1:1; 22:1, 2, 17.

 Piki tapu den aksi fu Bijbel:

17:16; 18:9, 10​—Fu san ede „den kownu fu grontapu” e sari fu a sani di densrefi pori? Den e sari fu di den e denki densrefi nomo. Baka te Babilon a Bigiwan kisi pori, dan a no de fu taki dati den kownu fu grontapu sa kon si taki a ben e tyari furu wini kon gi den. Babilon a Bigiwan ben e meki a gersi leki den kownu disi ben abi leti fu du den ogri di den ben e du. A yepi den kownu disi tu fu sreka yonguwan fu go feti na ini orloku. Boiti dati, a du furu sani fu sorgu taki sma saka densrefi na ondro den tiriman.

19:12​—Fa a du kon taki Yesus wawan sabi a nen fu en di no skrifi na ini Bijbel? A nen disi abi fu du nanga a posisi èn nanga den grani di Yesus e kisi na ini a dei fu Masra. Den sani dati skrifi na ini Yesaya 9:6. Taki en wawan sabi a nen disi, e sori taki den grani di a kisi, na grani di nowan enkri sma sa kisi, èn en wawan kan frustan san a wani taki fu abi so wan hei posisi. Ma Yesus e gi wan tu fu den grani disi na den memre fu a grupu di de leki en trowmisi. Fu taki en leti, a e ’skrifi a nyun nen fu en na den tapu’.​—Openb. 3:12.

19:14​—Suma o rèi makandra nanga Yesus na Armagedon? Den wan di sa feti makandra nanga Yesus na ini na orloku fu Gado, na ’den legre na hemel’, noso den engel èn den salfu winiman di kisi libi kaba na hemel.​—Mat. 25:31, 32; Openb. 2:26, 27.

20:11-15​—Den nen fu sortu sma skrifi na ini „a bukulolo [noso, „a buku”] fu libi”? Disi na a bukulolo di abi den nen fu ala den sma di sa kisi têgo libi. Dati na den salfu Kresten, den memre fu a bigi ipi, nanga den getrow futuboi fu Gado di sa kisi na ’opobaka fu den regtfardikiwan’ (Tori. 24:15; Openb. 2:10; 7:9). Te den ’onregtfardikiwan kisi wan opobaka’, dan a nen fu den sa skrifi na ini „a bukulolo fu libi” soso te den handri na wan fasi di e kruderi nanga den „sani di skrifi na ini den bukulolo” di e gi rai. Den bukulolo disi sa opo na a ten fu a Dusun Yari Tiri. Ma den nen no sa skrifi nanga enki di no man figi puru moro. Te den salfuwan sori taki den de getrow te na dede, dan den nen fu den sa skrifi fu têgo (Openb. 3:5). Den nen fu den wan di e kisi libi na grontapu, sa skrifi fu têgo na ini den bukulolo te den sma disi e pasa a lasti tesi na a kaba fu den dusun yari.​—Openb. 20:7, 8.

Sani di wi kan leri:

17:3, 5, 7, 16. „A koni fu Gado” e yepi wi fu frustan „a kibritori fu na uma, èn fu [a redi] ogri meti di e tyari na uma” (Yak. 3:17). Na agersi ogri meti disi bigin leki a Folkubontu, èn bakaten a kisi libi baka leki den Verenigde Nâsi. Now di wi kon sabi san a kibritori disi wani taki, dan dati musu gi wi deki-ati fu preiki a bun nyunsu fu Gado Kownukondre fayafaya, èn wi musu meki bekènti taki a dei e doro taki Yehovah o strafu den ogrisma.

21:1-6. Wi kan abi a dyaranti taki den blesi di wi sa kisi te a Kownukondre sa tiri, sa kon tru. Fu san ede wi kan abi a dyaranti dati? Fu di Bijbel e taki fu den sani dati: „Den sani disi pasa kaba!”

22:1, 17. A „liba di ben abi watra di e gi libi” e prenki den sani di Yehovah seti fu puru libisma di e gi yesi na en, na ondro a makti fu sondu nanga dede. Pikinso fu a watra disi de fu kisi now. Meki wi sori warderi gi a watra disi, èn meki wi teki a kari fu kon èn fu „dringi fu a watra di e gi libi èn di de fu kisi fu soso”. Boiti dati, meki wi du ala muiti fu gi trawan a watra disi!

[Futuwortu]

[Prenki na tapu bladzijde 5]

Libisma di e gi yesi na Gado trutru sa kisi tumusi moi blesi te a Kownukondre o tiri!