Meki den leri fu Yesus abi krakti tapu a denki fu yu

„A sma di Gado seni kon, e taki san Gado e taki.”​—YOH. 3:34.

1, 2. Nanga san wi kan agersi den sani di Yesus taki na ini a Bergitaki? Fu san ede wi kan taki dati Yesus ben taki „san Gado e taki”?

WAN fu den moro bigi dyamanti di sma sabi na ini a ten disi, na a 530-karaat dyamanti di nen Star of Africa (Stari fu Afrika). A no de fu taki dati a dyamanti disi na wan tumusi warti diriston! Den tumusi moi rai di Yesus gi na ini a Bergitaki fu en de leki diriston tu, ma den warti omeni tron moro a dyamanti disi. Dati no e fruwondru wi, fu di den rai di Krestes gi, e komoto fu Yehovah! Luku san Bijbel e taki fu Yesus: „A sma di Gado seni kon, e taki san Gado e taki.”​—Yoh. 3:34-36.

² Kande a Bergitaki no ben teki moro langa leki wan afu yuru. Toku Yesus taki fu 21 tekst di a teki puru fu aiti fu den Hebrew Buku fu Bijbel. Sobun, Yesus ben e taki trutru „san Gado e taki”. Meki wi go poti prakseri now na a tumusi moi taki di a lobi Manpikin fu Gado ben hori. Wi sa luku fa wi kan gebroiki wan tu fu den tumusi prenspari rai dati na ini wi libi.

„Go meki vrede nanga yu brada fosi”

3. Baka di Yesus warskow den disipel fu en gi den bakapisi fu atibron, dan sortu rai a gi den?

³ Leki Kresten, wi de koloku èn wi lobi fu suku vrede. Dati e kon fu di wi abi a santa yeye fu Gado, èn prisiri nanga vrede na tu fu den fasi di wi sa abi te a yeye dati e tiri wi (Gal. 5:22, 23). Yesus ben wani taki den disipel fu en ben musu tan na ini vrede èn taki den ben musu tan koloku. Dati meki a warskow den fu no tan atibron nanga trawan, fu di dati ben kan tyari dede kon gi den. (Leisi Mateyus 5:21, 22.) Baka dati, Yesus taki: „Te yu e tyari yu ofrandi go na a altari èn drape yu e memre taki yu brada abi wan sani teige yu, dan libi yu ofrandi drape na fesi na altari, èn gowe go meki vrede nanga yu brada fosi, èn te  yu drai kon baka, dan yu kan gi na ofrandi fu yu.”​—Mat. 5:23, 24.

4, 5. (a) San na a „ofrandi” di Yesus ben e taki fu en na ini Mateyus 5:23, 24? (b) O prenspari a de fu meki vrede nanga wan brada noso wan sisa di abi wan sani teige yu?

⁴ Na „ofrandi” di Yesus ben taki fu en, ben de iniwan ofrandi di sma ben e tyari na ini a tempel na Yerusalem. Fu eksempre, meti ofrandi ben prenspari, fu di den ben abi fu du nanga a fasi fa a pipel Israel ben e anbegi Yehovah na a ten dati. Ma Yesus ben poti prakseri na wan sani di prenspari moro den meti ofrandi dati. A ben sori taki a prenspari srefisrefi taki wan sma meki vrede nanga wan brada noso wan sisa di abi wan sani teige en, fosi a tyari na ofrandi fu en gi Gado.

⁵ Den wortu „meki vrede”, wani taki ’meki sani bun baka’. Sobun, san wi kan leri fu a rai disi di Yesus ben gi? A no de fu taki dati Yesus ben wani sori wi taki a fasi fa wi e handri nanga trawan abi furu krakti tapu a matifasi di wi abi nanga Yehovah (1 Yoh. 4:20). Iya, te wan sma na ini owruten no ben e handri bun nanga trawan, dan den ofrandi di a ben e tyari gi Gado no ben warti noti.​—Leisi Mika 6:6-8.

Wi musu abi sakafasi

6, 7. Fu san ede wi musu abi sakafasi fu man meki vrede nanga wan brada noso wan sisa di abi wan sani teige wi?

⁶ Wi musu abi sakafasi fu man meki vrede nanga wan brada noso wan sisa di abi wan sani teige wi. Sma di abi sakafasi no e haritaki nanga trawan, èn den no e strei nanga trawan soso fu di den feni taki den abi leti. A sani dati no ben o bun gi a gemeente. Efu dati ben o pasa, dan a situwâsi na ini a gemeente ben o de leki a wan na ini a Kresten gemeente fu owruten Korente. Na apostel Paulus ben taki wan sani fu a situwâsi dati, èn a sani dati e poti wi na prakseri. A ben taki: „Efu unu e tyari makandra go na krutu, dan dati wani taki dati unu lasi krinkrin. A no moro bun te unu e meki trawan du unu ogri? A no moro bun te unu e meki trawan bedrigi unu?”​—1 Kor. 6:7.

⁷ Yesus no ben taki dati wi musu go na wi brada noso sisa, soso fu overtoigi en taki wi abi leti èn taki na en abi a fowtu. Wi musu go na wi brada noso sisa fu meki en bun baka nanga en. Efu wi wani meki vrede, dan wi musu taki krin fa wi e firi. Wi musu agri tu taki wi hati den firi fu a tra sma. Èn efu na wi abi a fowtu, dan wi musu aksi a sma dati pardon na wan saka fasi.

„Efu yu retisei ai e meki yu du sondu”

8. Fruteri syatu san Yesus ben tyari kon na krin na ini Mateyus 5:29, 30.

⁸ Na ini a Bergitaki fu en, Yesus ben gi bun rai di e sori wi fa wi musu tyari wisrefi. A ben sabi taki wi sondu skin kan meki wi du sani di kan tyari takru bakapisi kon gi wi. Yesus ben taki: „Efu yu retisei ai e meki yu du wan sondu, dan hari en puru èn trowe en gowe. Bika a moro bun te yu e lasi wan pisi fu yu skin leki te yu heri  skin e trowe go na ini Gehena. Sosrefi, efu yu reti-anu e meki yu du wan sondu, dan koti en puru èn trowe en gowe. Bika a moro bun te yu e lasi wan pisi fu yu skin leki te yu heri skin e go na ini Gehena.”​—Mat. 5:29, 30.

9. Fa wi „ai” noso wi „anu” kan meki wi „du wan sondu”?

⁹ Na „ai” di Yesus ben taki fu en, e prenki a poti di wi man poti prakseri na wan sani. Èn na „anu” e prenki den sani di wi e du nanga den anu fu wi. Efu wi no e luku bun, dan den pisi disi fu wi skin kan meki wi „du wan sondu”, so taki wi e tapu fu ’waka nanga Gado’ (Gen. 5:22; 6:9). Sobun, te wi e kisi a firi fu trangayesi Yehovah, dan wi musu handri wantewante. Na wan agersi fasi wi musu hari wan fu den ai fu wi puru, noso wi musu koti wan anu puru.

10, 11. San kan yepi wi fu wai pasi gi hurudu?

¹⁰ Fa wi kan sorgu taki wi no e luku sani di no fiti? Yob, di ben abi frede gi Gado, ben taki: „Mi meki wan frubontu nanga mi ai. Sobun, fa mi ben kan poti prakseri na wan nyunwenke?” (Yob 31:1) Yob ben trow kaba, èn a ben abi a fasti bosroiti fu no pasa den wet fu Gado. Na a srefi denki dati wi musu abi, awinsi wi trow, noso awinsi wi no trow. Efu wi no wani du hurudu, dan wi musu meki a santa yeye fu Gado tiri wi. A yeye disi e yepi den wan di lobi Gado, fu dwengi densrefi.​—Gal. 5:22-25.

¹¹ Efu wi wani wai pasi gi hurudu, dan wi musu aksi wisrefi a sani disi: ’Mi lobi luku fisti sekstori na ini buku, tapu telefisi, noso tapu Internet?’ Meki wi hori a sani disi na prakseri tu di a disipel Yakobus ben taki: „Ibri sma e kisi tesi fu di en eigi lostu e hari en èn e kori en. Dan te a lostu kon lepi, a e tyari sondu kon; te a sondu du kaba, dan dati e tyari dede kon” (Yak. 1:14, 15). Fu taki en leti, efu wan sma di gi ensrefi abra na Gado „e tan luku” wan trawan fu di a wani abi seks nanga en, dan a musu handri wantewante. Iya, na wan agersi fasi a musu hari wan ai fu en puru èn a musu trowe en gowe.​—Leisi Mateyus 5:27, 28.

12. Sortu rai di Paulus ben gi kan yepi wi fu feti teige den takru lostu fu a skin?

¹² Te wi no e gebroiki wi anu na a yoisti fasi, dan dati kan meki wi du sani di Yehovah no feni bun. Dati meki wi musu abi a fasti bosroiti fu tan tyari wisrefi na wan fasi di fiti. Fu dati ede, wi musu gi yesi na a rai disi di Paulus ben gi: „Un musu kiri . . . den pisi fu un skin na grontapu, èn di abi fu du nanga hurudu, morsu libi, seks lostu, takru lostu, nanga bigi-ai, wan sani di de a srefi leki te wan sma e anbegi kruktugado” (Kol. 3:5). A wortu „kiri” e sori krin taki wan sma musu meki tranga muiti fu feti teige den takru lostu fu a skin.

13, 14. Fu san ede a de tumusi prenspari taki wi no e prakseri sani di no fiti, èn taki wi no e du den sortu sani dati tu?

¹³ A no de fu taki dati wan sma di wani tan na libi, sa de klariklari fu meki datra koti wan siki futu, noso wan siki anu fu en puru. A de tumusi prenspari taki wi e ’trowe wi ai nanga wi anu gowe’ na wan agersi fasi. Dati sa yepi wi fu no prakseri èn fu no du sani di no fiti, fu di den sani dati kan meki taki Yehovah no feni wi bun moro. A wan-enkri fasi fa wi kan sorgu taki wi no e doro na ini Gehena di e prenki têgo pori, na te wi e tan abi wan krin denki, te wi e tyari wisrefi na wan fasi di fiti, èn te wi e tan anbegi Gado na a yoisti fasi.

¹⁴ Fu di wi gebore nanga sondu, meki wi musu du muiti fu tan tyari wisrefi na wan fasi di fiti. Paulus ben taki: „Mi e kofu mi skin èn mi e basi en neleki a de wan srafu, so taki a no sa de so, taki na wan noso tra fasi, baka te mi preiki gi tra sma, Gado no feni mi bun” (1 Kor. 9:27). Dati meki wi musu abi a fasti bosroiti fu gi yesi na den rai di Yesus gi fu sori wi fa wi kan tyari wisrefi na wan fasi di fiti. Iya, noiti wi musu tyari wisrefi na wan fasi di e sori taki wi no abi warderi gi a lusu-paiman fu en.​—Mat. 20:28; Hebr. 6:4-6.

„Abi a gwenti fu gi sma sani”

15, 16. (a) San wi e leri fu Yesus te wi e luku taki a ben de klariklari fu gi sani? (b) San Yesus ben wani leri wi nanga den wortu di skrifi na Lukas 6:38?

¹⁵ Den rai fu Yesus èn a tumusi moi eksempre fu en e gi wi deki-ati fu kon abi a  gwenti fu gi sma sani. Di Yesus kon na grontapu fu a bun fu sondu libisma, dan dati ben de wan tumusi moi fasi fa a sori taki a lobi fu gi sani. (Leisi 2 Korentesma 8:9). Yesus ben de klariklari fu libi a glori di a ben abi na ini hemel, fu tron wan libisma èn fu dede gi sondu libisma. Wan tu sma ben o kisi wan gudu na ini hemel, fu di den ben o tiri makandra nanga en na ini a Kownukondre (Rom. 8:16, 17). Èn a no de fu taki dati Yesus gi sma deki-ati fu gi trawan sani, di a taki:

¹⁶ „Abi a gwenti fu gi sma sani, dan sma sa gi unu sani tu. Den o lai wan baskita, stampu en moi, seki en bun, furu en pasa marki, dan den o kanti en poti na ini a saka fu un krosi. Bika na a fasi fa unu e handri nanga trawan, na a fasi dati den sa handri nanga unu tu” (Luk. 6:38). Den wortu „kanti en poti na ini a saka fu un krosi” abi fu du nanga wan gwenti di son seriman ben abi fu furu a saka fu den sma di ben bai sani na den. Den sma disi ben e fow a bradi tapusei krosi fu den èn den ben e tai en nanga wan titei, so taki a ben e tron wan saka pe den ben kan tyari sani na ini. Te wi de klariklari fu gi sma sani sondro taki den abi fu aksi wi, dan kande wi sa kisi bogobogo tu te wi de na nowtu.​—Preik. 11:2.

17. Fa Yehovah gi wi a moro bun eksempre te a abi fu du nanga a gi di wi musu gi sani? Sortu sani wi musu gi fu man de koloku?

¹⁷ Yehovah lobi den wan di de klariklari fu gi sani, èn a e blesi den tu. Yehovah srefi gi wi a moro bun eksempre. A gi wi en wan-enkri gebore Manpikin „so taki ala sma di e bribi na ini en no sa dede, ma sa kisi têgo libi” (Yoh. 3:16). Paulus ben skrifi: „A sma di e sai pikinso-pikinso nomo, sa koti pikinso nomo tu; èn a sma di e sai bogobogo, sa koti bogobogo tu. Meki ibri sma gi soleki fa a bosroiti na ini en ati, ma a no musu du dati nanga krutukrutu, noso fu di sma dwengi en, bika Gado lobi a sma di e gi sani nanga prisiri” (2 Kor. 9:6, 7). Te wi e gebroiki wi ten, wi krakti, nanga den gudu fu wi fu horibaka gi a tru anbegi, dan a no de fu taki dati wi sa de koloku, èn wi sa kisi furu blesi.​—Leisi Odo 19:17; Lukas 16:9.

„No panya a tori na ala sei”

18. O ten wi ’no sa kisi pai’ fu wi hemel Tata?

¹⁸ „Luku bun taki te unu e du regtfardiki sani, unu no e du disi fu sma ai; bika te unu e du dati, unu no sa kisi pai fu un Tata di de na hemel” (Mat. 6:1). Di Yesus gebroiki den wortu „regtfardiki sani”, dan a ben wani sori wi taki wi musu tyari wisrefi na wan fasi di e kruderi nanga a wani fu Gado. Yesus no ben taki dati tra sma noiti no mag si taki wi e du a wani fu Gado, fu di a ben taigi den disipel fu en taki den ben musu „meki ala sma si a leti fu [den]” (Mat. 5:14-16). Ma wi „no sa kisi pai” fu wi hemel Tata te wi e du sani „fu sma ai” èn fu di wi wani kisi prèise, neleki sma di e prei komediprei  na ini wan komedi-oso. Efu nanga a denki dati wi e gi sani, dan wi no sa abi wan bun matifasi nanga Gado, èn wi no sa kisi den têgo blesi di a Kownukondre sa tyari kon.

19, 20. (a) San Yesus ben wani leri wi di a taki dati ’wi no musu panya a tori’ te wi e ’du bun gi pôtiwan’? (b) Fa wi no e meki wi kruktu-anu sabi san wi reti-anu e du?

¹⁹ Te wi abi a yoisti denki, dan wi sa gi yesi na a rai disi di Yesus e gi wi: „Fu dati ede, te unu e du pôtisma wan bun fu di unu abi sari-ati nanga den, dan no panya a tori na ala sei, leki fa den hoigriman e du na ini den snoga èn na tapu strati so taki sma kan prèise den. Fu tru, mi e taigi unu: Den kisi a pai fu den krinkrin kaba” (Mat. 6:2). Den wortu ’du pôtisma wan bun fu di unu abi sari-ati nanga den’, abi fu du nanga a gi di sma ben e gi sani na trawan di ben de na nowtu (Leisi Yesaya 58:6, 7). Yesus nanga den apostel fu en ben e poti moni na wan sei fu yepi den pôtiwan (Yoh. 12:5-8; 13:29). Yesus ben sori taki te wi e ’du pôtiwan wan bun fu di wi abi sari-ati nanga den’ dan wi no musu „panya a tori na ala sei,” soleki fa den Dyu Fariseiman ben e du. Yesus ben kari den man disi hoigriman, fu di den ben e fruteri ala sma „na ini den snoga èn na tapu strati” sortu bun den ben du gi trawan. Den hoigriman dati ben „kisi a pai fu den krinkrin”. Sma ben e prèise den hoigriman disi, èn a kan taki den ben e kisi a grani fu sidon na sei prenspari leriman na ini a snoga. Ma dati ben de den wan-enkri pai di den ben o kisi, fu di den no ben o kisi noti fu Yehovah (Mat. 23:6). Ma fa den disipel fu Krestes ben musu handri? Wi kan kisi wini tu fu a rai disi di Yesus ben gi den. A ben taki:

²⁰ „Ma te yu e du pôtisma wan bun fu di yu abi sari-ati nanga den, dan no meki yu kruktu-anu sabi san yu reti-anu e du, so taki sma no abi fu sabi taki yu du pôtisma wan bun; dan yu Tata di sma no man si, sa pai yu baka” (Mat. 6:3, 4). Nofo tron, wi e gebroiki ala tu anu fu du sani. Dati meki di Yesus taki dati wi no musu meki wi kruktu-anu sabi san wi reti-anu e du, dan a ben wani sori wi taki tra sma no abi fu sabi sortu bun wi du gi trawan. Iya, aladi den tu anu fu wi e wroko bun nanga makandra, toku a wán no abi fu sabi san a trawan e du. Na so a de tu taki srefi den bun mati fu wi no abi fu kon sabi sortu bun wi e du gi trawan.

21. Fa a Wan „di sma no man si” o pai wi?

²¹ Te wi no e meki bigi fu den bun di wi e du gi trawan ’fu di wi abi sari-ati nanga den’, dan tra sma no sa kon sabi san wi du. Te wi e du dati, dan wi Tata di e libi na ini hemel èn „di sma no man si”, sa pai wi (Yoh. 1:18). A pai di wi sa kisi fu Yehovah, a Wan „di sma no man si”, na taki a sa meki wi abi wan krosibei matifasi nanga en, a sa gi wi pardon fu sondu, èn a sa gi wi têgo libi (Odo 3:32; Yoh. 17:3; Ef. 1:7). Den blesi disi bun omeni tron moro leki a prèise di libisma e gi wi fu di wi du bun gi trawan!

Wi musu abi warderi gi den tumusi moi leri fu Krestes

22, 23. Fu san ede wi musu abi warderi gi den leri fu Yesus?

²² A no de fu taki dati wi kan leri furu moi sani fu a Bergitaki. Den tumusi moi rai na ini a taki disi, trutru kan yepi wi fu de koloku, srefi na ini a bruya grontapu disi. Iya, wi sa de koloku te wi abi warderi gi den leri fu Yesus, èn te wi e meki den leri disi abi krakti tapu a denki fu wi èn tapu a libi fu wi.

²³ Ibri sma di e „yere” èn di e „du” san Yesus leri sma, sa kisi blesi. (Leisi Mateyus 7:24, 25.) Sobun, meki wi abi a fasti bosroiti fu gi yesi na a rai fu Yesus. Na ini a tra studie artikel, wi sa poti prakseri na tra rai di Yesus gi na ini a Bergitaki.

San yu ben sa piki?

• Fu san ede a de prenspari fu meki vrede nanga wan Kresten brada noso sisa di abi wan sani teige yu?

• Fa wi kan sorgu taki wi „reti-sei ai” no e meki wi du sondu?

• Nanga sortu denki wi musu du bun gi trawan?

[Aksi fu a tori disi]

[Prenki na tapu bladzijde 11]

A bun srefisrefi fu „meki vrede” nanga wan Kresten brada noso sisa di abi wan sani teige yu!

[Prenki na tapu bladzijde 12, 13]

Yehovah e blesi den wan di e gi sma sani nanga prisiri