Yu musu de nomonomo fu du sani soleki fa yu wani?

TU PIKIN-NENGRE e prei nanga makandra. Te wán fu den pikin teki a preisani di a trawan lobi, dan a trawan e grabu a sani puru na en anu, èn a e bari: „Na fu mi!” Yonguyongu kaba, sondu libisma e sori taki son leisi den e denki densrefi nomo (Gen. 8:21; Rom. 3:23). Boiti dati, a grontapu disi e gi sma deki-ati fu denki densrefi nomo. Efu wi no wani abi a fasi disi, dan wi musu du tranga muiti fu basi den firi di wi e kisi fu denki wisrefi nomo. Te wi no e du dati, dan makriki wi kan meki trawan naki futu, èn a matifasi di wi abi nanga Yehovah kan kon pori.​—Rom. 7:21-23.

Na apostel Paulus e gi wi deki-ati fu prakseri sortu krakti den sani di wi e du abi tapu trawan. A ben skrifi: „Wi mag du ala sani, ma a no ala sani bun fu du. Wi mag du ala sani, ma a no ala sani e gi deki-ati.” Paulus ben taki tu: ’Un no musu du nowan sani di e meki trawan fadon’ (1 Kor. 10:23, 32). Te a abi fu du nanga den sani di wi lobi, dan a bun fu aksi wisrefi: ’Awansi mi abi a reti fu du den sani di mi lobi, mi de klariklari fu libi den sani dati, so taki trobi no e kon na ini a gemeente? Mi de klariklari fu hori misrefi na Bijbel gronprakseri, srefi te a muilek fu du dati?’

Te a abi fu du nanga grontapuwroko

Furu sma feni taki den abi a reti fu bosroiti gi densrefi sortu grontapuwroko den sa du, èn den feni taki den no e du nowan ogri. Ma luku na ondrofenitori fu wan bisnisman di e libi na ini wan  pikin foto na ini Zuid-Amerika. Sma ben sabi en leki wan man di ben lobi dòbel èn di ben lobi dringi sopi. Ma di a studeri Bijbel nanga Yehovah Kotoigi, dan a go na fesi na ini a tru anbegi, èn a kenki en libi (2 Kor. 7:1). Di a taigi wan owruman taki a ben wani teki prati na a preikiwroko makandra nanga a gemeente, dan na wan lespeki fasi na owruman gi en deki-ati fu poti prakseri na a grontapuwroko fu en. Wan pisi ten, a man disi ben de a moro prenspari sma di ben e seri tranga sopi na ini a foto drape. Sma kan gebroiki a sopi disi di meki fu ken, gi difrenti sani. Ma na ini a kontren dati den ben gwenti fu moksi en nanga tra dringi, soso fu kon drungu.

A man kon si taki efu a ben o preiki oso fu oso, aladi a ben e seri sopi ete, dan a gemeente ben o kisi porinen. Boiti dati, a sani disi ben kan pori a matifasi di a abi nanga Gado. Aladi a ben musu sorgu gi wan bigi osofamiri, toku a tapu fu seri sopi. Now a e seri papira sani fu man sorgu gi en osofamiri. A man disi, a wefi fu en, nanga tu fu den feifi pikin fu den, na dopu Kresten now. Den e preiki a bun nyunsu fayafaya, èn den e taki fri.

Te a abi fu du nanga den mati fu wi

A de so taki wi kan bosroiti gi wisrefi efu wi wani de mati nanga sma di no de tru Kresten? Noso wi musu hori wisrefi na Bijbel gronprakseri te a abi fu du nanga a tori disi? Wan sisa ben wani go na wan fesa makandra nanga wan man di no ben de wan tru Kresten. Aladi sma bari en taki a sani disi ben kan tyari problema kon gi en, toku a ben feni taki a ben abi a reti fu go na a fesa makandra nanga a man disi. Èn na dati a du tu. Syatu baka di a doro na a fesa, a kisi wan dringi di ben moksi nanga wan hebi drugs. A wiki wan tu yuru baka dati, èn a kon si taki a man di a ben e si leki wan mati, ben abi seks nanga en sondro taki a ben sabi.​—Luku Genesis 34:2.

Te wi abi demakandra nanga sma di no de tru Kresten, dan kande wi no sa abi den sortu takru bakapisi disi ala ten. Ma toku Bijbel e gi wi a warskow disi: „A sma di e waka nanga konisma, sa kon koni, ma a sma di abi demakandra nanga donsma, no sa abi bun bakapisi” (Odo 13:20). A no de fu taki dati te wi abi takru mati, dan ogri kan miti wi! Odo 22:3 e taki: „A sma di si a rampu èn go kibri, koni, ma den sma di no abi ondrofeni, waka go doro èn den musu kisi a strafu.” Den mati fu wi kan abi krakti na wi tapu, èn den kan pori a matifasi di wi abi nanga Gado.​—1 Kor. 15:33; Yak. 4:4.

Te a abi fu du nanga den krosi di wi e weri èn a fasi fa wi e moi wisrefi

Ibri leisi baka, wan nyun sortu modo e kon. Ma den Bijbel gronprakseri di abi fu du nanga den krosi di wi e weri èn nanga a fasi fa wi e moi wisrefi, no e kenki noiti. Paulus ben gi Kresten uma a rai fu „moi densrefi nanga krosi di fiti, èn den musu du dati na wan lespeki fasi èn nanga krin frustan” (1 Tim. 2:9). A no de fu taki dati mansma musu hori densrefi tu na a gronprakseri disi. Paulus no ben taki dati Kresten no mag  meki modo. A no ben taki tu dati ala Kresten musu weri den srefi sortu krosi. Ma dati wani taki dati den musu meki modo na wan fasi di e sori taki den no abi lespeki gi densrefi noso gi trawan? Soleki fa wan wortubuku e sori, dan sma di abi a sortu lespeki dati, na sma di ’no e denki tumusi furu fu densrefi, den e weri krosi di fiti, den e taki na wan fasi di fiti, èn den e tyari densrefi na wan fasi di fiti’.

Wi musu aksi wisrefi: ’Mi kan taki nanga leti taki mi abi a sortu lespeki dati, te mi de nomonomo fu weri krosi di e meki taki sma e poti tumusi furu prakseri na mi? A fasi fa mi e weri krosi e meki sma kisi wan takru denki fu mi, noso fu a bribi fu mi?’ Te a abi fu du nanga a tori disi, dan wi no sa „du sani di e meki trawan fadon”. Wan fasi fa wi kan du dati, na taki wi no musu ’poti prakseri na wi eigi afersi wawan, ma wi musu poti prakseri na den afersi fu trawan tu’.​—2 Kor. 6:3; Fil. 2:4.

Te a abi fu du nanga bisnis afersi

Seryusu problema ben opo kon na ini a gemeente Korente. Son sma ben e du ogri èn den ben e handri na wan kruka fasi. Di den sani dati pasa, dan Paulus skrifi: „A no moro bun te unu e meki trawan du unu ogri? A no moro bun te unu e meki trawan bedrigi unu?” Paulus ben gi den Kresten a rai fu de klariklari fu libi wan sani, na presi fu tyari wan Kresten brada fu den go na krutu (1 Kor. 6:1-7). Wan brada na Amerkankondre ben gi yesi na a rai disi. En nanga a basi fu en di de wan Kotoigi tu, no ben man agri fu wan moni tori. A brada disi ben feni taki a basi fu en ben musu pai en moni. Den tu brada disi taki nanga makandra difrenti leisi, soleki fa Bijbel e leri wi. Ma toku den no ben man agri nanga makandra. Te fu kaba, den go „taki nanga a gemeente”, noso den Kresten owruman di e teki presi gi a gemeente.​—Mat. 18:15-17.

A sari fu taki dati toku den no ben man agri nanga makandra. A brada di ben e wroko gi a basi fu en begi Gado furu leisi. Baka dati, a bosroiti fu libi furu fu a moni gi a basi fu en. Fu san ede a du dati? Bakaten a taki: „A kesekese disi ben e meki mi lasi prisiri, èn a ben e teki tumusi furu fu a prenspari ten di mi ben kan gebroiki na ini a Kresten diniwroko.” Baka di a brada disi teki a bosroiti dati, dan a firi taki a bigin kisi prisiri baka na ini na anbegi fu en, èn a kon si taki Yehovah ben e blesi a diniwroko fu en.

Srefi te a abi fu du nanga pikinpikin sani

Wi sa kisi blesi tu te wi no de nomonomo fu du sani soleki fa wi wani, srefi te a abi fu du nanga pikinpikin sani. Na a fosi dei fu a distrikt kongres, wan pionier trowpaar doro drape fruku, èn den seti bun presi gi densrefi. Di a programa bigin, dan wan bigi osofamiri nanga furu pikin hasti densrefi kon na ini a kongreshal di ben lai nanga sma. Di a pionier trowpaar si taki na osofamiri ben e suku bun presi fu sidon, dan den gi den sma disi a presi fu den. Na so a heri osofamiri ben kan sidon na makandra. Wan tu dei baka a kongres, den tu pionier disi kisi wan brifi fu na osofamiri disi di ben wani taki den tangi. Na osofamiri fruteri den fa den ben e firi brokosaka di den doro lati na a kongres. Ma fu di den pionier disi ben sori switifasi gi den, meki den no ben e firi lasi-ati moro langa, ma den ben breiti èn den ben de nanga tangi.

Te wi musu libi spesrutu sani di wi lobi fu man du trawan wan bun, dan meki wi de klariklari fu du dati te dati kan. Te wi e sori lobi di „no e suku en eigi bun”, dan wi e yepi fu meki a vrede na ini a gemeente tan, èn wi e tan abi vrede tu nanga tra sma (1 Kor. 13:5). Ma san moro prenspari, na taki wi sa tan abi wan bun matifasi nanga Yehovah.

[Prenki na tapu bladzijde 20]

Yu de klariklari fu libi spesrutu sani di yu lobi, te a abi fu du nanga a fasi fa yu e meki modo?

[Prenki na tapu bladzijde 20, 21]

Yu de klariklari fu gi yu Kresten brada noso sisa a sidonpresi fu yu?