Tan poti prakseri na a prijs

„Mi e du muiti fu doro a marki, so taki mi kan wini a prijs.”​—FIL. 3:14.

1. Sortu prijs na apostel Paulus ben o kisi?

NA APOSTEL Paulus, di wi sabi tu leki Saulus fu Tarsus, ben komoto fu wan prenspari famiri. A ben kweki na ini a bribi fu den afo fu en, èn a kisi leri fu Gamalièl, wan pôpi leriman fu Wet (Tori. 22:3). Paulus ben o man tron wan prenspari man na ini a bribi fu en, ma toku a drai baka gi a bribi dati, èn a tron wan Kresten. Baka dati, a tan poti prakseri na a prijs di a ben o kisi, namku têgo libi. Iya, a ben o kisi a grani fu tron kownu èn sosrefi priester na ini a hemel Kownukondre fu Gado, èn a no ben o dede noiti moro. A Kownukondre dati sa tiri grontapu di o tron wan paradijs.—Mat. 6:10; Openb. 7:4; 20:6.

2, 3. O furu warderi Paulus ben abi gi a têgo libi di a ben o kisi na ini hemel?

² Paulus ben abi furu warderi gi a prijs dati, èn fu dati ede a ben taki: „Fu Krestes ede, mi ben de klariklari fu libi ala sani di ben tyari wini kon gi mi. Iya, fu dati ede mi kan taki dati mi e si ala sani trutru leki soso sani, fu di a sabi fu Krestes Yesus, mi Masra, warti moro ala sani. Mi lasi ala sani, ma fu en ede mi teki a lasi dati, èn mi e si den leki wan ipi doti” (Fil. 3:7, 8). Furu sma e si sani soleki posisi, gudu, nanga biginen leki prenspari sani, ma Paulus ben si den sani dati leki doti di a kon sabi san Yehovah o du gi libisma.

³ Sensi a ten dati, a sani di ben prenspari srefisrefi gi Paulus, na a warti sabi di a ben abi fu Yehovah nanga Krestes. Di Yesus ben e begi Gado, dan a taki fu a sabi disi: „Efu sma wani kisi têgo libi, dan den musu tan leri sabi yu, a wan-enkri tru Gado, èn a sma di yu seni kon, Yesus Krestes” (Yoh. 17:3). Paulus trutru ben wani kisi têgo libi, èn dati de krin fu si te yu e luku san a skrifi na Filipisma 3:14. A tekst dati e taki: „Mi e du muiti fu doro a marki, so taki mi kan wini a prijs, namku a kari di Gado gi mi fu go na hemel nanga yepi fu Krestes Yesus.” Iya, Paulus ben e tan poti prakseri na a têgo libi di a ben o kisi na hemel leki wan fu den kownu fu a Kownukondre fu Gado.

Têgo libi na grontapu

4, 5. Sortu prijs milyunmilyun sma di e du a wani fu Gado, sa kisi na ini a ten di e kon?

⁴ Gi furu fu den sma di e du a wani fu Gado, a prijs di den musu suku fu kisi, na têgo libi na ini a nyun grontapu fu Gado (Ps. 37:11, 29). Yesus ben sori taki a howpu dati ben o kon tru seiker. A ben taki: „Koloku fu den safri-ati sma, bika den o kisi grontapu” (Mat. 5:5). Soleki fa Psalm 2:8 e sori, dan Yesus srefi na a moro prenspari sma di sa kisi grontapu leki gudu. Boiti dati, a sa tiri na hemel makandra nanga 144.000 tra sma (Dan. 7:13, 14, 22, 27). Den sma di de leki skapu, sa libi na grontapu na ondro a tiri fu a Kownukondre ’di sreka gi den sensi a ten di grontapu seti’ (Mat. 25:34, 46). Èn wi e kisi a dyaranti taki ala den sani disi sa kon tru fu di Gado di „no man lei”, e pramisi dati (Tit. 1:2). Neleki Yosua, wi kan abi na overtoigi taki den pramisi fu Gado sa kon tru. Yosua ben taigi den Israelsma: „Yehovah un Gado du ala den bun sani di a ben pramisi unu. Ala den sani disi kon tru. Iya, a du ala den sani di a pramisi.”​—Yos. 23:14.

⁵ A libi na ini a nyun grontapu fu Gado no sa de leki a libi fu tide di no e gi sma prisiri. A libi sa de heri tra fasi, fu di orloku no sa de, sma no sa du ogri, den no o pôti, den no sa du kruktudu, den no sa siki, èn den no sa dede. Na a ten dati, sma sa gosontu dorodoro, èn den sa libi na ini wan grontapu di kenki kon tron wan paradijs. A libi dati sa gi wi prisiri moro leki san wi ben fruwakti oiti. Iya, na a ten dati, wi sa prisiri  srefisrefi ibri dei. Dati na trutru wan tumusi moi prijs di wi sa kisi!

6, 7. (a) Fa Yesus ben sori san o pasa na ini a nyun grontapu fu Gado? (b) Fa den dedewan sosrefi sa bigin wan nyun libi?

⁶ Di Yesus ben de na grontapu, dan Gado poti en santa yeye na en tapu, so taki a ben kan sori sma sortu tumusi moi sani o pasa na ala sei fu a nyun grontapu. Fu eksempre, Yesus ben taigi wan man di ben lan 38 yari kaba, fu opo waka. Bijbel e taki dati a man disi du san Yesus ben taigi en fu du. (Leisi Yohanes 5:5-9.) Na wan tra okasi, Yesus miti „wan man di [ben] breni sensi di a gebore”, èn a dresi a man disi. Bakaten, sma aksi a man disi di ben breni fosi, fu fruteri den fu a Sma di ben dresi en. A man piki den: „Sensi owruten noiti unu no yere taki wan sma opo den ai fu wan sma di ben breni di a gebore. Efu a man disi no ben komopo fu Gado, dan a no ben o man du notinoti” (Yoh. 9:1, 6, 7, 32, 33). Yesus ben man du ala den sani disi fu di Gado ben gi en krakti. Na iniwan presi pe Yesus ben e go, a ben e „meki den sikisma di ben abi yepi fanowdu, kon betre”.​—Luk. 9:11.

⁷ Boiti taki Yesus ben man dresi sikisma nanga malengrisma, a ben man wiki dedesma tu. Fu eksempre, wan meisje di ben abi 12 yari, ben dede, èn a papa nanga a mama fu a meisje disi ben e sari srefisrefi. Ma Yesus taki: „Meisje, mi e taigi yu: Opo!” Èn na dati a meisje du tu! Yu kan frustan fa a papa, a mama, èn sosrefi den tra sma di ben de drape, ben e firi! (Leisi Markus 5:38-42.) Na ini a nyun grontapu fu Gado, sma sa „prisiri srefisrefi”, te milyunmilyun sma e kisi wan opobaka. Iya, Bijbel e taki dati „Gado sa gi wan opobaka na den regtfardikiwan èn na den onregtfardikiwan” (Tori. 24:15; Yoh. 5:28, 29). Den sma disi sa bigin wan nyun libi, èn den sa abi a howpu fu libi fu têgo.

8, 9. (a) San o pasa nanga a sondu di libisma kisi fu Adam, na a ten fu a Dusun Yari Tiri fu Krestes? (b) Fu sortu sani den dedewan sa kisi krutu?

⁸ Den sma di sa kisi wan opobaka, sa kisi na okasi fu tan na libi. Den sma disi no sa kisi strafu gi den sondu di den ben du fosi den dede (Rom. 6:7). Na a ten fu a Dusun Yari Tiri fu Krestes, te wi sa kisi wini fu a frulusu-ofrandi, dan den wan di e saka densrefi na ondro a Kownukondre tiri, te fu kaba no sa abi sondu moro. Te fu kaba, a sondu fu Adam no sa abi nowan enkri krakti na den sma disi tapu (Rom. 8:21). Fu taki en leti, Yehovah „sa swari dede trutru fu têgo, èn a Moro Hei Masra Yehovah trutru sa figi den watra-ai puru fu ala den fesi” (Yes. 25:8). Gado Wortu e taki tu dati ’bukulolo sa opo’, èn disi wani taki dati den sma di e libi na a ten dati, sa leri nyun sani (Openb. 20:12). Te grontapu kon tron wan paradijs, dan „regtfardikifasi na san den sma di e libi na tapu a fatu gron sa leri trutru”.​—Yes. 26:9.

⁹ Den sma di sa kisi wan opobaka sa kisi krutu, ma den no sa kisi krutu fu a sondu di den kisi fu Adam. Tra fasi leki dati, den sa kisi krutu fu den sani di densrefi bosroiti fu du. Openbaring 20:12 e taki: „Nanga yepi fu den sani di skrifi na ini den bukulolo, den ben krutu den dedesma fu den sani di den du”, noso den sani di den du baka di den kisi wan opobaka. Disi na wan tumusi moi eksempre di e sori taki Yehovah ala ten e du san reti, taki a abi sari-ati nanga wi, èn taki a lobi wi! Èn fa a de nanga den sari sani di ben miti den sma disi na ini na owru sistema? We, „sma no sa memre den sani fu fositen moro, èn den no sa kon na ini na ati tu” (Yes. 65:17). Den nyun sani di den sma disi sa leri sa gi den deki-ati, èn den sa kisi furu blesi. Den takru sani fu fositen no o gi den broko-ede moro. Den sa frigiti den sani di den ben ondrofeni na ini a ten di pasa (Openb. 21:4). Na so a sa de tu nanga a „bigi ipi” di o pasa Armagedon libilibi.​—Openb. 7:9, 10, 14.

10. (a) Fa a libi o de na ini a nyun grontapu fu Gado? (b) San o yepi yu fu tan poti prakseri na a prijs?

¹⁰ Na ini a nyun grontapu fu Gado, sma o man libi sondro taki den e siki baka, èn sondro taki den e dede. Bijbel e taki: „Nowan sma di e libi drape sa taki: ’Mi siki’” (Yes. 33:24). Te fu kaba, den sma di sa libi na ini a nyun grontapu,  sa wiki ibri mamanten leki sma di gosontu dorodoro, èn den o man fruwakti wan tumusi moi dei. Den o man du wroko di sa gi den prisiri, èn den sa abi demakandra nanga sma di e suku soso a bun fu den. A libi dati na wan tumusi moi prijs fu tru! Grantangi, opo yu Bijbel èn luku den profeititori na Yesaya 33:24, èn na Yesaya 35:5-7. Pruberi fu si yusrefi drape. Dati sa yepi yu fu tan poti prakseri na a prijs.

Den no tan poti prakseri na a prijs

11. Fruteri fa Salomo ben de di a bigin tiri leki kownu.

¹¹ Te wi kon sabi fu a prijs, dan wi musu meki ala muiti fu tan poti prakseri na a prijs dati, fu di wi ben kan lasi warderi gi en. Fu eksempre, di Salomo tron kownu fu owruten Israel, dan a begi Gado na wan saka fasi fu gi en koni nanga frustan, so taki a ben kan krutu a pipel fu En na wan reti fasi. (Leisi 1 Kownu 3:6-12.) Dati meki Bijbel e taki: „Gado tan gi Salomo bigi koni, so taki a ben sabi sani moro iniwan tra sma. A ben e meki taki Salomo ben man frustan sani heri bun.” Iya, „Salomo ben koni moro iniwan sma fu Owstusei èn fu Egepte”.​—1 Kow. 4:29-32.

12. Sortu warskow Yehovah gi den wan di ben o tron kownu na ini Israel?

¹² Ma wan pisi ten na fesi, Yehovah ben warskow iniwan sma di ben o tron kownu, taki a ’no ben musu teki wan lo asi gi ensrefi’, èn a ’no ben musu teki furu wefi tu, bika den wefi ben kan meki taki a drai baka gi Gado’ (Deut. 17:14-17). Wan kownu di ben e teki moro nanga moro asi, ben e sori taki a no ben e frutrow tapu Yehovah, a Kibriman, fu kibri a kondre fu en. Na presi fu dati, a ben e sori taki a ben e frutrow tapu a legre fu en. Èn te wan kownu ben e teki moro nanga moro wefi, dan a sani dati ben kan tyari bigi problema kon gi en. Iya, kande sonwan fu den wefi dati ben o de fu den kondre na ini a kontren dati, pe sma ben e anbegi falsi gado. Den wefi disi ben kan meki a kownu drai baka gi a tru anbegi fu Yehovah.

13. San meki taki Salomo lasi warderi gi den sani di a ben kisi?

 ¹³ Salomo no gi yesi na den warskow disi. Na presi fu dati, a du soifri san Yehovah ben taigi den kownu fu no du. A kon abi dusundusun asi nanga sma di ben sabi rèi asi (1 Kow. 4:26). A kon abi sosrefi 700 wefi nanga 300 tra uma, èn furu fu den uma disi ben de fu den kondre krosibei, pe sma ben e anbegi falsi gado. Den wefi disi meki taki a ’bigin anbegi tra gado, èn a no ben e dini Yehovah en Gado nanga en heri ati moro’. Salomo bigin teki prati na a tegu falsi anbegi fu den wefi fu en di ben de fu tra kondre. Dati meki Yehovah taki dati a ben o „puru a kownukondre” na Salomo en anu.​—1 Kow. 11:1-6, 11.

14. San ben de a bakapisi di Salomo nanga a pipel fu Israel trangayesi Gado?

¹⁴ Salomo no ben e poti prakseri moro na a tumusi moi grani di a ben kisi fu teki presi gi a tru Gado. A kownu bigin poti ala en prakseri na falsi anbegi. Baka wan pisi ten, a heri pipel drai baka gi a tru anbegi, èn a sani dati meki taki a kondre kisi pori na ini 607 bifo Krestes. Te fu kaba, den Dyu seti a tru anbegi baka, ma aladi dati pasa, toku Yesus taki hondrohondro yari bakaten: „Den sa puru a kownukondre fu Gado na un anu èn den sa gi en na wan pipel di e meki den froktu fu a kownukondre.” Na dati pasa tu. Yesus ben taki: „Luku! Gado o gowe libi un oso gi unu” (Mat. 21:43; 23:37, 38). Fu di a pipel no ben gi yesi moro na Gado, meki den lasi a tumusi bigi grani di den ben abi fu teki presi gi a tru Gado. Na ini a yari 70, den legre fu Rome pori Yerusalem nanga a tempel, èn furu fu den Dyu di ben tan na libi, kon tron srafu.

15. Taki fu wan tu man di no ben tan poti prakseri na den moro prenspari sani.

¹⁵ Yudas Iskariot ben de wan fu den 12 apostel fu Yesus. Yudas ben yere den tumusi moi leri fu Yesus, èn a ben si den wondru di Yesus ben du nanga yepi fu a santa yeye fu Gado. Ma Yudas no ben kibri en ati. A ben kisi a frantwortu fu luku a monikisi pe a moni fu Yesus nanga den 12 apostel ben tan na ini. Ma Yudas „ben de wan fufuruman èn a monikisi ben de na en; a ben gwenti fu teki a moni di ben poti na ini a kisi” (Yoh. 12:6). Fu di a ben gridi, meki te fu kaba a span anu makandra nanga den edeman fu den priester. A tori Yesus, èn den priester disi pai en 30 pisi solfru moni (Mat. 26:14-16). Wan tra sma di no ben tan poti prakseri na den moro prenspari sani, na Deimas, wan mati fu na apostel Paulus. Deimas no ben kibri en ati. Paulus ben taki: „Deimas gowe libi mi fu di a lobi a grontapu disi.”​—2 Tim. 4:10; leisi Odo 4:23.

San wi e leri fu den tori disi?

16, 17. (a) Fa Satan e pruberi fu kori wi? (b) San kan yepi wi fu kakafutu gi iniwan tesi di Satan e tyari kon na wi tapu?

¹⁶ Ala den futuboi fu Gado musu poti seryusu prakseri na den eksempre di skrifi na ini Bijbel, fu di Bijbel e taki: „Den sani disi ben pasa nanga den leki eksempre gi wi, èn den ben skrifi leki wan warskow gi wi di e libi na a kaba fu a grontapu sistema” (1 Kor. 10:11). Wi e libi na ini den lasti dei fu na ogri sistema disi.​—2 Tim. 3:1, 13.

¹⁷ Satan Didibri, „a gado fu a grontapu sistema disi” sabi taki „en ten syatu” (2 Kor. 4:4; Openb. 12:12). A sa du ala san a man fu kori den futuboi fu Yehovah, so taki den no e tan hori densrefi na Bijbel gronprakseri. Satan e tiri a grontapu disi, èn a abi krakti tu tapu den boskopu di sma e prati nanga yepi fu radio, telefisi, nanga tra sani. Ma a pipel fu Yehovah abi wan sani di tranga moro den sani dati. Dati na „a krakti di bigi pasa marki” (2 Kor. 4:7). Wi kan abi a frutrow taki a krakti disi di e komoto fu  Gado, sa yepi wi fu kakafutu gi iniwan tesi di Satan e tyari kon na wi tapu. Dati meki wi e kisi a rai fu begi doronomo, èn wi kan abi na overtoigi taki Yehovah sa „gi santa yeye na den sma di e aksi en”.​—Luk. 11:13.

18. Fa wi musu si a grontapu sistema disi?

¹⁸ Wi e kisi deki-ati tu fu di wi sabi taki heri esi a heri sistema fu Satan o kisi pori, ma tru Kresten sa tan na libi. Bijbel e taki: „Grontapu e pasa gowe nanga den lostu fu en, ma a sma di e du a wani fu Gado sa tan fu têgo” (1 Yoh. 2:17). Dati meki a no ben o de wan koni sani kwetikweti te wan fu den futuboi fu Gado ben o feni taki wan sani na ini a sistema disi, warti moro leki a matifasi di a abi nanga Yehovah! A grontapu disi di de na ondro a makti fu Satan, de leki wan sipi di e sungu. Yehovah seti a Kresten gemeente gi den futuboi fu en, so taki den kan feni kibri na ini. Aladi den e hari go na a nyun grontapu, den kan bribi a pramisi disi: „Den ogrisma srefi sa koti puru, ma den wan di e howpu tapu Yehovah na den wan di sa abi grontapu leki a gudu fu den” (Ps. 37:9). Dati meki yu musu tan poti prakseri na a tumusi moi prijs!

Yu e memre disi ete?

• Fa Paulus ben e si a prijs di a ben o kisi?

• San Yehovah o luku te a o krutu den wan di abi a howpu fu libi fu têgo na grontapu?

• Sortu koni sani yu musu du now?

[Aksi fu a tori disi]

[Prenki na tapu bladzijde 12, 13]

Te yu e leisi den tori na ini Bijbel, dan yu e si kaba fa yu e kisi a prijs?