Den sani di Yehovah meki e sori taki a koni

„Den eigifasi fu Gado di sma no man si nanga den ai,  . . de fu si na den sani di a meki.”​—ROM. 1:20.

1. Sortu krakti a koni fu grontapu abi tapu furu sma na ini a ten disi?

NA INI a ten disi furu sma feni taki sma di abi furu sabi, na konisma. Ma den sma dati koni trutru? Nôno, bika den sma disi di e taki dati den koni, no man yepi trawan fu kon sabi san na a trutru marki fu a libi. Na presi fu dati, den sma di e gi pasi taki trawan e kori den nanga a koni fu grontapu, te fu kaba „e degedege neleki te winti e naki skwala go na ala sei èn di sma e bedrigi nanga ala sortu leri”.​—Ef. 4:14.

2, 3. (a) Fu san ede Yehovah abi „ala koni”? (b) Fa a koni fu Gado e difrenti fu a koni fu grontapu?

² Ma a de heri tra fasi nanga den sma di e kon abi trutru koni. A koni disi e komoto fu Yehovah Gado! Bijbel e taki dati Yehovah „abi ala koni” (Rom. 16:27). A sabi ala sani fu hemel nanga grontapu, a sabi sosrefi fa den meki èn fa a du kon taki den de so. Na Yehovah meki ala den wet fu a naturu di libisma gebroiki fu ondrosuku sani moro fini. Sobun, den sani di libisma meki èn a bigi koni di den abi, no de wan kefalek sani kwetikweti gi Yehovah. Bijbel e taki: „A koni fu a grontapu disi na wan don sani gi Gado.”​—1 Kor. 3:19.

³ Bijbel e fruteri wi taki Yehovah „e gi koni” na den futuboi fu en (Odo 2:6). Tra fasi leki a koni fu libisma, a koni fu Gado no e bruya sma. Na presi fu dati, a koni fu Gado e yepi wi fu teki koni bosroiti nanga yepi fu soifri sabi. (Leisi Yakobus 3:17.) A koni fu Gado ben e naki na ati fu na apostel Paulus. A ben skrifi: „A koni nanga a sabi fu Gado, dipi pasa marki! Wi no man frustan soifri fa a e krutu sani èn wi no man kon sabi finifini fa den pasi fu en e waka!”(Rom. 11:33) Fu di Yehovah abi ala koni, meki wi abi a frutrow taki den wet fu en kan yepi wi fu libi na a moro bun fasi. Te yu e luku en bun, dan Yehovah sabi moro leki iniwan tra sma san wi abi fanowdu fu man de koloku.​—Odo 3:5, 6. 

Yesus ben de „wan tumusi bun wrokoman”

4. San na wan fasi fa wi kan si a koni fu Yehovah?

⁴ A koni fu Yehovah èn den tumusi moi fasi fu en, de fu si na den sani di a meki. (Leisi Romesma 1:20.) Den moro pikin sani di Yehovah meki èn sosrefi den moro bigi sani, e sori den fasi fu En. Awansi pe wi e luku, wi e si furu buweisi di e sori taki wan lobi-ati Mekiman de di abi ala koni. Te wi e luku den sani di a meki, dan wi kan leri furu fu En.​—Ps. 19:1; Yes. 40:26.

5, 6. (a) Suma ben wroko makandra nanga Yehovah di a ben e meki sani? (b) San wi o luku èn fu san ede?

⁵ Di Yehovah „meki hemel nanga grontapu”, dan a no ben de en wawan (Gen. 1:1). Bijbel e sori taki langa ten bifo Yehovah ben meki hemel nanga grontapu, a ben meki wan engel èn nanga yepi fu na engel disi a ben „meki ala tra sani”. Na engel dati ben de a wan-enkri Manpikin fu Gado, „a fosiwan fu ala sani di Gado meki”, èn bakaten a ben libi na grontapu leki a man Yesus (Kol. 1:15-17). Neleki Yehovah, Yesus abi koni. Fu taki en leti, Odo kapitel 8 e taki fu a sma di e prenki koni, èn dati na Yesus. Wan tra nen di Yesus abi tu na ini a kapitel dati, na „tumusi bun wrokoman” fu Gado.​—Odo 8:12, 22-31.

⁶ Sobun, den sani na hemel èn na grontapu, e sori a koni fu Yehovah èn fu a Tumusi  Bun Wrokoman fu en, Yesus. Wi kan leri furu fu den sani di Gado meki. Meki wi go luku fo sani di Gado meki, èn di abi „foeroe sabi” soleki fa a skrifi na Odo 30:24-28, Da Bijbel na ini Sranantongo. *

Wi kan leri wan sani fu a mira

7, 8. Sortu moi sani yu kan leri fu mira?

⁷ Te wi e luku fa den moro „pikin” sani na grontapu meki èn san den e du, dan wi kan leri fu den sani dati srefi. Fu eksempre, luku a koni di Gado poti na ini a mira.​—Leisi Odo 30:24, 25, Da Bijbel na ini Sranantongo.

⁸ Bun furu mira e wroko tranga na tapu a gron èn na ondro gron. Miri lai omeni leisi moro libisma. Son sabiman e taki dati a nomru fu mira na 200.000 leisi so furu leki a di fu libisma. Mira e libi na ini nesi èn na ini furu nesi dri sortu mira de. Dati na mama-mira, man-mira, nanga wroko-mira. Den dri sortu mira disi abi den eigi fasi fa den e yepi sorgu gi a grupu. Wan spesrutu mira, a prasoro-mira fu Zuid-Amerika, na wan heri bun gronman. A pikin mira disi e sorgu taki a gron e kon fatu, èn a e du tra sani tu di de fanowdu fu meki a gron fu en gi bogobogo nyanyan. Ondrosukuman kon si taki a koni mira disi, ala ten e sorgu taki nofo nyanyan de gi den mira na ini a nesi fu en. *

9, 10. Fa wi kan wroko tranga neleki a mira?

⁹ Wi kan leri wan sani fu den mira. Den e leri wi taki wi musu du tranga muiti efu wi wani abi bun bakapisi. Bijbel e taki: „Go na a mira, yu lesiman; luku den pasi fu en èn kisi koni. Aladi a no abi kapten, fesiman noso tiriman, toku a e sreka en nyanyan na dreiten srefi; srefi na a ten fu a kotiwroko a e tyari en nyanyan kon na wán” (Odo 6:6-8). Yehovah nanga en Tumusi Bun Wrokoman, Yesus, e wroko tranga. Yesus ben taki: „Mi Tata tan wroko teleki now èn misrefi e tan wroko tu.”​—Yohanes 5:17.

¹⁰ Fu di wi na sma di e teki na eksempre fu Gado nanga Krestes, meki wi musu wroko tranga tu. Awansi sortu wroko wi e du na ini na organisâsi fu Gado, wi alamala musu abi „furu fu du na ini a wroko fu Masra” (1 Kor. 15:58). Dati meki, a ben o bun fu teki a rai di Paulus ben gi den Kresten na ini Rome. A ben taigi den: „Un no musu lesi te unu e du wroko. De nanga faya nanga yepi fu a yeye. Dini Yehovah leki srafu” (Rom. 12:11). A muiti di wi e meki fu du a wani fu Yehovah, no de fu soso, fu di Bijbel e gi wi a dyaranti disi: „Gado no de onregtfardiki taki a sa frigiti den wroko fu unu èn taki a sa frigiti a lobi di unu sori gi a nen fu en.”​—Hebr. 6:10.

Wi e kisi kibri fu Gado

11. Fruteri wan tu sani fu a klipdas.

¹¹ A klipdas na ete wan pikin meti di Gado  meki èn di kan leri wi prenspari sani. (Leisi Odo 30:26.) A meti disi gersi wan bigi konikoni, ma a abi syatu lontu yesi èn den futu fu en syatu tu. A pikin meti disi e libi na mindri stonbergi. Den srapu ai fu a klipdas e yepi en fu si wantewante efu ogri kan miti en. Boiti dati, den olo na ini den stonbergi e yepi en fu kibri gi den feanti fu en. Fu di den klipdas e libi na ini grupu, meki den e kisi kibri nanga waran na ini den kowru pisi ten fu a yari. *

12, 13. San wi kan leri fu a klipdas?

¹² San wi kan leri fu a klipdas? A fosi sani, na taki a meti disi e luku bun taki den feanti fu en no e kisi en fu du ogri nanga en. Na presi fu dati, den srapu ai fu en e yepi en fu si den feanti fu en fu farawe kaba. Boiti dati, a e tan krosibei fu den olo na ini den stonbergi, pe a kan go kibri te ogri kan miti en. Wi musu tan na ai tu fu man si sortu ogri kan miti wi na ini a grontapu fu Satan. Na apostel Petrus ben gi Kresten a rai disi: „Tan nanga krin frustan, de na ai. Didibri, a feanti fu unu, e waka lontu leki wan lew di e bari, fu di a e suku fu swari wan sma” (1 Petr. 5:8). Di Yesus ben de na grontapu, dan a ben e tan na ai doronomo so taki Satan no ben kan kisi en fu trangayesi Gado (Mat. 4:1-11). Yesus ben de wan bun eksempre gi den bakaman fu en!

¹³ Wan fasi fa wi kan tan na ai, na te wi e kisi wini fu a kibri di Yehovah e gi wi. Wi musu studeri Gado Wortu, èn wi musu go na den Kresten konmakandra doronomo (Luk. 4:4; Hebr. 10:24, 25). Èn neleki fa sani e waka bun nanga den klipdas fu di den e libi na ini grupu, na so wi musu tan krosibei fu wi Kresten brada nanga sisa, so taki wi kan „gi makandra deki-ati” (Rom. 1:12). Te wi e kisi wini fu a kibri di Yehovah e gi wi, dan wi e sori taki wi e agri nanga a psalm skrifiman David di ben skrifi: „Yehovah de leki wan stonbergi èn wan fortresi gi mi. Na en na mi Frulusuman. Mi Gado de leki wan bigi ston gi mi. Na en mi o lon go kibri.”​—Ps. 18:2.

Wi e tan horidoro aladi wi e kisi gens

14. Kande wan-enkri sprenka na wan lawlaw sani gi wi, ma san wi kan taki fu wan bigi grupu sprenka?

¹⁴ Wi kan leri wan sani tu fu a sprenka. Kande wan-enkri sprenka di langa sowan  5 centimeter, na wan lawlaw sani gi wi. Ma wan bigi grupu sprenka kan hari wi prakseri. (Leisi Odo 30:27.) Fu di wan grupu sprenka e nyanyan ala sani di den e feni na tapu den pasi, meki heri esi den e pori wan heri gron nanga nyanyan di lepi kaba fu koti. Bijbel e agersi a babari fu wan grupu wasiwasi, noso sprenka di e frei kon, nanga a babari di asiwagi e meki èn nanga a babari fu faya di e bron drei grasi (Yoèl 2:3, 5). Sma meki faya fu tapu pasi gi grupu sprenka di e kon fu pori wan gron nanga nyanyan, ma nofo tron den faya disi no e yepi. Fu san ede? Fu di den sprenka di e dede na ini a faya e kiri a faya, èn baka dati, den tra sprenka e hari go moro fara sondro problema. Aladi den sprenka no abi wan kownu noso wan fesiman, toku den e wroko makandra leki wan legre di orga bun, èn noti no man tapu pasi gi den. *​—Yoèl 2:25.

15, 16. Fa den Kownukondre preikiman fu a ten disi de leki wan bigi grupu sprenka?

¹⁵ A profeiti Yoèl ben agersi a wroko di den futuboi fu Yehovah e du, nanga a fasi fa sprenka e handri. A ben skrifi: „Den e lon leki tranga man. Leki srudati den e kren skotu. Ibriwan fu den sabi pe a e go èn den no e komoto na den pasi. Den no e pusu makandra. Den e waka leki wan tranga man di e waka na tapu en pasi. Awinsi peiri kiri wan tu fu den, toku den trawan e go doro.”​—Yoèl 2:7, 8.

¹⁶ A profeititori disi e sori krin fa den sma di e preiki Gado Kownukondre na ini a ten disi e wroko! Nowan enkri „skotu” di sma poti fu tapu pasi gi den, sa man tapu a preikiwroko fu den. Na presi fu dati, den e teki na eksempre fu Yesus, di ben e tan du a wani fu Gado, aladi furu sma ben e wisiwasi en (Yes. 53:3). A tru taki „peiri kiri” son Kresten, fu di sma kiri den fu a bribi fu den ede. Ma toku a preikiwroko tan go doro, èn a nomru fu Kownukondre preikiman e tan gro. Fu taki en leti, te den futuboi fu Yehovah e kisi frufolgu,  dan nofo tron dati e yepi fu prati a bun nyunsu na sma di tra fasi no ben o yere a Kownukondre boskopu (Tori. 8:1, 4). Yu e horidoro tu na ini a diniwroko fu yu neleki fa den sprenka e horidoro na ini a wroko di den e du? Yu e du dati aladi sma no wani arki èn aladi yu e kisi gens?​—Hebr. 10:39.

„Tan hori yusrefi na sani di bun”

17. Fu san ede den futu fu wan kamrawenke man tan hori wan grati skotu noso plafon?

¹⁷ A pikin kamrawenke man kren wan skotu sondro fu fadon go na gron, èn a man tan fasi na plafon. Fu taki en leti, sabiman no man frustan fa a pikin kamrawenke disi kan kren wan skotu èn fa a kan lon pasa wan grati plafon sondro taki a e fadon. Fa a du kon taki a kamrawenke man du dati? A no de so taki a e weri wan sani na en futu di e soigi en hori na a plafon, èn a no de so tu taki a abi lijm na en futu. Na presi fu dati, ibriwan fu den finga fu wan kamrawenke abi dusundusun wiwiri. Èn ibriwan fu den wiwiri abi hondrohondro pikin pisi titei, èn a fesisei pisi fu den titei disi plata. Ala den titei disi makandra kan hori wan sani di hebi moro a kamrawenke. Den man hori a kamrawenke srefi te a e lon pasa wan grasi fensre! Sabiman di e fruwondru fu den sani di a kamrawenke man du, e taki dati efu libisma e meki sani di e wroko na a srefi fasi leki fa den futu fu wan kamrawenke e wroko, dan den o man gebroiki den sani dati heri bun fu plak sani kon na wan. *

18. Fa wi kan sorgu taki wi ala ten e ’tan hori wisrefi na sani di bun’?

¹⁸ San wi kan leri fu a kamrawenke? Bijbel e gi wi a rai disi: „Tan hori yusrefi na sani di bun” (1 Tes. 5:21). Den takru sani di de na ala sei fu a grontapu fu Satan, kan meki taki wi no e tan hori wisrefi na den gronprakseri fu Gado. Fu eksempre, te wi abi demakandra nanga sma di no e hori densrefi na den wet fu Gado, dan kande wi no sa abi a fasti bosroiti moro fu tan du san bun. Wi ben kan abi a demakandra dati na skoro, noso na wi wrokope. Te wi abi prisiriten di Gado no feni bun, dan dati kan abi a srefi krakti na wi tapu. No meki a sani dati pasa nanga yu! Gado Wortu e gi wi a warskow disi: „No kon koni na ini yu eigi ai” (Odo 3:7). Na presi fu dati, tan gi yesi na a koni rai disi di Moses ben gi a pipel fu Gado na ini owruten: „Un musu abi frede gi Yehovah un Gado. Na en un musu dini, èn na en un musu tai hori” (Deut. 10:20). Te wi e tai hori na Yehovah, dan wi sa teki na eksempre fu Yesus, èn Bijbel e taki fu en: „Yu ben lobi regtfardikifasi, èn yu no ben lobi kruktudu kwetikweti.”​—Hebr. 1:9.

San wi kan leri fu den sani di Gado meki?

19. (a) Sortu fasi fu Yehovah yu e si na ini den sani di a meki? (b) Fa wi kan kisi wini fu a koni fu Gado?

¹⁹ Soleki fa wi si, den sani di Yehovah meki, e sori den fasi fu en krin, èn wi kan leri furu fu den sani dati. O moro wi e ondrosuku den sani di Yehovah meki, o moro a koni fu en e naki wi ati. Te wi e poti prakseri na a koni fu Gado, dan wi sa de moro koloku, èn wi sa kisi kibri na ini a ten di e kon (Preik. 7:12). Iya, ibriwan fu wi sa ondrofeni taki den sani di skrifi na Odo 3:13, 18, de tru. Drape skrifi: „Koloku a sma de di e feni koni, èn a sma di e kisi a koni fu man si sani krin, A de wan bon fu libi gi den wan di e grabu en hori, èn den wan di e tan hori en steifi na sma di den sa taki dati den de koloku sma.”

[Futuwortu]

Yu e memre disi ete?

Sortu bun sani yu leri fu . . .

• a mira?

• a klipdas?

• a sprenka?

• a kamrawenke?

[Aksi fu a tori disi]

[Prenki na tapu bladzijde 16]

Yu e wroko tranga neleki a prasoro-mira?

[Prenki na tapu bladzijde 17]

Den klipdas e kisi kibri fu di den e tan na ini grupu. Yu e teki na eksempre fu a meti disi?

[Prenki na tapu bladzijde 18]

Kresten preikiman e horidoro neleki sprenka

[Prenki na tapu bladzijde 18]

Neleki fa a kamrawenke e tan hori na plafon nanga skotu, na so Kresten e tan hori densrefi na sani di bun

[Sma di abi a reti fu a prenki na tapu bladzijde 18]

Stockbyte/​Getty Images