Sori warderi gi den sani di Yesus du leki a Moro Bigi David èn a Moro Bigi Salomo

„Wan sma di bigi moro Salomo de dya.”​—MAT. 12:42.

1, 2. Fu san ede a ben o fruwondru libisma taki Samuel ben musu salfu David leki kownu?

DI A profeiti Samuel si David, dan a ben feni taki a no ben gersi wan kownu. A ben feni taki a ben gersi wan yongu skapuman. Boiti dati, Betlehem, a foto pe David ben gebore, no ben de wan prenspari foto. Bijbel e taki dati a foto disi ben ’pikin so te, taki sma no ben e teri en srefi leki wan fu den foto fu Yuda’ (Mika 5:2). Ma aladi a ben gersi leki David no ben prenspari, èn aladi a ben komoto fu wan pikin foto, toku a profeiti Samuel ben o salfu a yonkuman disi leki a kownu fu Israel.

 ² Di Isai ben tyari den manpikin fu en gi Samuel so taki a ben kan salfu wan fu den, dan a yongu boi David no ben de a fosiwan di a ben tyari kon. David ben de a lastiwan fu den aiti boi fu Isai, èn a no ben de na oso srefi di Samuel kon na a oso fu en papa. Samuel ben kon fu salfu wan fu den manpikin fu Isai leki a nyun kownu fu Israel. Ma Yehovah ben teki David leki kownu, èn na dati ben de prenspari.​—1 Sam. 16:1-10.

3. (a) San na den moro prenspari sani gi Yehovah te a e ondrosuku wan sma? (b) San pasa baka di David tron wan salfuwan?

³ Yehovah ben si san Samuel no ben man si. Gado ben man si san de na ini David en ati, èn a ben lobi san A ben e si. Gi Gado, den sani di sma man si nanga ai, a no den moro prenspari sani. San prenspari gi Gado, na a fasi fa wan sma de na ini en ati. (Leisi 1 Samuel 16:7.) Sobun, di Samuel kon sabi taki Yehovah no ben teki nowan fu den seibi boi fu Isai, dan a seni sma go na den weigron fu go kari a moro yongu manpikin kon. Bijbel e taki: „Ne Isai seni sma go kari [David]. A ben de wan moi rediredi yonkuman di abi moi ai. Dan Yehovah taki: ’Opo, salfu en, bika na en mi teki!’ Dati meki Samuel teki a tutu di ben abi oli na ini, dan a salfu a boi na fesi den brada fu en. Sensi a dei dati, a yeye fu Yehovah ben de na tapu David.”​—1 Sam. 16:12, 13.

David ben e prenki Krestes

4, 5. (a) Fruteri fa a libi fu David nanga Yesus e kruderi nanga makandra. (b) Fu san ede wi kan taki dati Yesus na a Moro Bigi David?

⁴ Neleki David, Yesus ben gebore tu na ini Betlehem, èn dati ben de sowan 1100 yari baka di David gebore. Furu sma ben feni tu taki Yesus no ben gersi wan kownu. Fu taki en leti, a no ben de a sortu kownu di furu sma na ini Israel ben e fruwakti. Ma neleki David, Yesus ben de a sma tu di Yehovah ben teki. Yehovah ben lobi Yesus tu, neleki fa a ben lobi David (Luk. 3:22). * A ’yeye fu Yehovah ben de tu tapu’ Yesus.

⁵ Moro sani e sori taki a libi fu Yesus nanga David ben e kruderi nanga makandra. Fu eksempre, David ondrofeni taki Akitofel, a raiman fu en, tori en. Yesus ondrofeni taki Yudas Iskariot, na apostel fu en, tori en (Ps. 41:9; Yoh. 13:18). David nanga Yesus ben abi bigi lespeki gi na oso fu Yehovah (Ps. 27:4; 69:9; Yoh. 2:17). Yesus ben o teki a kownu makti abra fu David. Fosi Yesus gebore, wan engel ben taigi en mama: „Yehovah Gado o gi en a kownusturu fu en papa David” (Luk. 1:32; Mat. 1:1). Ma fu di ala pramisi di abi fu du nanga a Mesias, sa feni den kontru na ini Yesus, meki Yesus prenspari furu leisi moro David. En na a Moro Bigi David, a Mesias Kownu di sma ben e fruwakti langa ten kaba.​—Yoh. 7:42.

Waka baka a Skapuman-Kownu

6. Fu san ede David ben de wan bun skapuman?

⁶ Yesus na wan skapuman tu. O ten wi kan taki dati wan sma na wan bun skapuman? Wan bun skapuman na wan sma di e du ala muiti fu luku den skapu fu en, fu gi den nyanyan, èn fu kibri den. A e du ala den sani dati, awansi ogri kan miti en (Ps. 23:2-4). Di David ben de wan yongu boi, dan a ben de wan skapuman, èn a ben e luku den skapu fu en papa heri bun.Te wan lew noso wan beer ben e suku fu kiri den skapu, dan David ben e kibri den skapu, awansi a ben kan lasi en libi.​—1 Sam. 17:34, 35.

7. (a) San sreka David gi a wroko di a ben o abi leki kownu? (b) Fa Yesus sori taki en na a Tumusi Bun Skapuman?

⁷ Den yari di David ben e luku den skapu na ini den weigron èn na tapu den bergi, sreka en gi den hebi wroko nanga frantwortu di a ben o kisi te a ben o tiri a pipel fu Israel (Ps. 78:70, 71). * Yesus na wan tumusi bun skapuman tu. Yesus e kisi krakti nanga rai fu Yehovah aladi a e tiri a „pikin ipi” fu en èn sosrefi den „tra  skapu” (Luk. 12:32; Yoh. 10:16). Sobun, Yesus na a Tumusi Bun Skapuman. A sabi den skapu fu en so bun, taki a e kari ibriwan fu den na den nen. A lobi den skapu fu en so te, taki di a ben de na grontapu, a ben de klariklari fu du iniwan sani gi a bun fu den ede (Yoh. 10:3, 11, 14, 15). Leki a Tumusi Bun Skapuman, Yesus du wan sani di David noiti no ben man du. A frulusu-ofrandi fu en e gi libisma na okasi fu kisi frulusu, so taki den no sa abi fu dede moro. Noti sa tapu en fu tiri a „pikin ipi” fu en, so taki den kan kisi libi na ini hemel pe den no sa dede noiti moro. Èn noti kan tapu en fu tiri den „tra skapu” fu en, so taki den kan kisi têgo libi na ini wan regtfardiki nyun grontapu pe nowan sma no sa du den ogri.​—Leisi Yohanes 10:27-29.

Waka baka a Kownu di o wini den feanti fu en

8. Fu san ede wi kan taki dati David ben de wan kownu di wini den feanti fu en?

⁸ Leki kownu, David ben de wan fetiman di ben abi furu deki-ati. A ben e kibri a kondre fu a pipel fu Gado èn „na ala sei pe David ben e go, Yehovah tan yepi en”. Di David ben e tiri leki kownu, dan a kondre fu en ben bigi fu a liba fu Egepte te go miti na Eufraat-liba (2 Sam. 8:1-14). Nanga yepi fu a krakti fu Yehovah, David kon tron wan tumusi makti tiriman. Bijbel e taki: „Sma na ini ala kondre, kon sabi suma na David èn Yehovah meki ala den pipel disi kon frede David.”​—1 Kron. 14:17.

9. Fruteri fu san ede Yesus, a Sma di ben o tron Kownu, ben de wan winiman.

⁹ Neleki Kownu David, Yesus ben abi deki-ati. Leki a Sma di ben o tron Kownu, a ben sori taki a makti moro den ogri yeye, èn a frulusu sma di ben de na ini a makti fu den (Mark. 5:2, 6-13; Luk. 4:36). Srefi Satan Didibri, a moro bigi feanti fu en, no abi krakti na en tapu. Fu di Yehovah horibaka gi Yesus, meki a wini a grontapu di de na ini a makti fu Satan.​—Yoh. 14:30; 16:33; 1 Yoh. 5:19.

10, 11. San Yesus e du leki Fetiman-Kownu na hemel?

¹⁰ Sowan 60 yari baka di Yesus dede èn a kisi wan opobaka fu go na hemel, dan na apostel Yohanes kisi wan fisyun. Na ini a fisyun dati, a si Yesus leki a Fetiman-Kownu na hemel. Yohanes e skrifi: „Ne mi si wan weti asi; a sma di ben e sidon na en tapu ben abi wan bo; a ben kisi wan kownu-ati èn a ben go fu feti a wan feti baka a trawan èn fu wini a feti fu en” (Openb. 6:2). A sma na tapu a weti asi, na Yesus. „A ben kisi wan kownu-ati” na ini 1914, di a tron Kownu fu a hemel Kownukondre. Baka dati, a ’go fu feti a wan feti baka a trawan, èn fu wini a feti fu en’. Iya, neleki David, Yesus na wan kownu di e wini den feanti fu en. Syatu baka di a tron Kownu fu Gado Kownukondre, a wini Satan, èn a fringi en nanga den ogri yeye fu en go na grontapu (Openb. 12:7-9). A sa tan feti nanga den feanti fu en, teleki a „wini a feti fu en”. Iya, a sa pori na ogri sistema fu Satan dorodoro.​—Leisi Openbaring 19:11, 19-21.

¹¹ Ma neleki David, Yesus na wan kownu di abi sari-ati, èn a sa kibri a „bigi ipi”, so taki den kan pasa Armagedon libilibi (Openb. 7:9, 14). Boiti dati, te Yesus sa tiri makandra nanga den tra salfu kownu, noso den 144.000 di kisi wan opobaka, dan Gado sa gi „wan opobaka na den regtfardikiwan èn na den onregtfardikiwan” (Tori. 24:15). Den wan di sa kisi wan opobaka na grontapu, sa abi a howpu fu libi fu têgo. Dati na trutru wan tumusi moi ten di e wakti den! Meki wi alamala abi a fasti bosroiti fu tan „du san bun”, so taki wi sa de na libi te grontapu sa lai nanga regtfardiki èn koloku sma di e saka densrefi na ondro a tiri fu a Moro Bigi David.​—Ps. 37:27-29.

Gado e piki a begi fu Salomo

12. San Salomo begi Gado?

¹² Salomo, David en manpikin, ben e prenki Yesus tu. * Di Salomo tron kownu, dan Yehovah kon na en na ini wan dren, èn a taigi en taki a ben o gi en iniwan sani di a ben wani. Salomo ben kan aksi Gado fu gi en moro gudu, moro  makti, noso wan langa libi. Ma Salomo no ben e denki ensrefi nomo. Na presi fu dati, a aksi Yehovah: „Gi mi koni nanga sabi now, so taki mi kan go na dorosei èn kon na inisei na fesi a pipel disi, bika suma ben kan krutu a bigi pipel disi fu yu?” (2 Kron. 1:7-10) Yehovah piki a begi fu Salomo.​—Leisi 2 Kroniki 1:11, 12.

13. Fu san ede Salomo ben koni moro leki iniwan sma fu a ten fu en? Suma ben gi en a koni fu en?

¹³ Solanga Salomo ben e tan gi yesi na Yehovah, a ben e taki nanga moro koni leki iniwan sma na ini a ten fu en. Salomo ben taki „dri dusun odo” (1 Kow. 4:30, 32, 34). A ben skrifi furu fu den odo disi poti na tapu papira, èn te nanga a dei fu tide, sma di wani abi koni, lobi fu leisi den odo disi. Na umakownu fu Skeiba, teki waka sowan 2400 kilometer fu „go aksi [Salomo] wan lo sani di ensrefi no ben man frustan”. Den sani di Salomo taki, naki na uma disi en ati, èn a no ben man bribi fu si fa a kownukondre fu Salomo ben e go na fesi (1 Kow. 10:1-9). Luku fa Bijbel e sori suma na a Sma di gi Salomo a koni fu en: „Ala sma fu grontapu ben e kon na en fu yere den koni sani di Gado ben e meki Salomo taki.”​—1 Kow. 10:24.

Waka baka a koni Kownu

14. Fu san ede Yesus ben de „wan sma di bigi moro Salomo”?

¹⁴ Wán libisma nomo ben koni moro Salomo. Dati ben de Yesus Krestes, di ben kari ensrefi „wan sma di bigi moro Salomo” (Mat. 12:42). Yesus ben taki „wortu di e gi sma têgo libi” (Yoh. 6:68). Fu eksempre, a Bergitaki e yepi wi fu frustan wan tu fu den odo fu Salomo moro fini. Salomo ben taki fu difrenti sani di kan meki taki wan anbegiman fu Yehovah de koloku (Odo 3:13; 8:32, 33; 14:21; 16:20). Yesus ben sori krin taki wan sma sa de koloku trutru soso te a e anbegi Yehovah èn te a e kisi wini fu den pramisi fu En. Yesus ben taki: „Koloku fu den sma di sabi taki den de na nowtu na yeye fasi, bika den sa kisi a kownukondre fu hemel” (Mat. 5:3). Den sma di e hori densrefi na den gronprakseri di de fu feni na ini den leri fu Yesus, e kon moro krosibei na Yehovah, „a Sma fu pe a libi komoto” (Ps. 36:9; Odo 22:11; Mat. 5:8). Krestes e prenki „a koni fu Gado” (1 Kor. 1:24, 30). Leki a Mesias Kownu, Yesus Krestes abi „a yeye fu koni”.​—Yes. 11:2.

15. Fa wi kan kisi wini fu a koni fu Gado?

¹⁵ Fa wi leki bakaman fu a Moro Bigi Salomo, kan kisi wini fu a koni fu Gado? Fu di a Wortu fu Yehovah e tyari a koni fu en kon na krin, meki wi musu du ala muiti fu feni a koni dati. Wi sa feni en te wi e studeri Bijbel, spesrutu den sani di Yesus taki, èn te wi e denki dipi fu den sani di wi leisi (Odo 2:1-5). Boiti dati, wi musu tan aksi Gado fu gi wi koni. Gado Wortu e gi wi a dyaranti taki te wi e begi Gado nanga wi heri ati fu yepi wi, dan a sa piki den begi fu wi (Yak. 1:5). Nanga yepi fu a santa yeye, wi sa feni warti koni na ini Gado Wortu, èn a koni disi kan yepi wi te wi abi problema èn a sa yepi wi fu teki bun bosroiti (Luk. 11:13). Bijbel e kari Salomo sosrefi „a sma di e tyari sani kon na wán”, èn a sma di ’tan leri a pipel fu kon sabi sani doronomo’ (Preik. 12:9, 10). Leki Edeman fu a Kresten Gemeente, Yesus e tyari a pipel fu en kon na wán tu (Yoh. 10:16; Kol. 1:18). Dati meki a bun te wi e go na den gemeente konmakandra pe wi e ’kisi leri doronomo’.

16. Fa Yesus ben de leki Salomo?

¹⁶ Leki kownu, Salomo ben du furu sani. A ben orga wan bow programa na ini a heri kondre fu en, a teki fesi na ini a wroko di sma ben e du fu bow kownu-oso, pasi, sistema fu sorgu taki den sma na ini a kondre ben abi watra, foto  pe a ben meki maksin fu kibri sani, foto pe a ben poti den asiwagi fu en, èn foto gi den sma di ben e rèi asi (1 Kow. 9:17-19). A heri kownukondre ben e kisi wini fu den sani di a ben bow. Yesus e bow sani tu. A bow a gemeente fu en na tapu a „bigi ston” (Mat. 16:18). A sa teki fesi tu na ini a bow-wroko di o du na ini a nyun grontapu.​—Yes. 65:21, 22.

Waka baka a Kownu fu vrede

17. (a) San na wan tumusi moi sani fu a tiri fu Salomo? (b) San Salomo no ben man du?

¹⁷ A nen Salomo komoto fu wan wortu di wani taki „vrede”. Kownu Salomo ben e tiri komoto fu Yerusalem, èn a nen dati wani taki „A abi vrede pasa marki”. Na ini den 40 yari di Salomo tiri leki kownu, a pipel fu Israel ondrofeni vrede leki noiti bifo. Bijbel e taki fu den yari dati: „Nowan sma fu Yuda nanga Israel ben frede taki ogri ben o miti den. Solanga Salomo ben de na libi, ibriwan sma di ben e libi na mindri Dan nanga Berseiba ben man sidon na ondro en eigi droifibon èn na ondro en eigi figabon” (1 Kow. 4:25). Ma aladi Salomo ben abi so furu koni, toku a no ben man frulusu a pipel fu en di ben de na ondro a makti fu siki, sondu, nanga dede. Ma a Moro Bigi Salomo sa fri den futuboi fu en fu ala den sani dati.​—Leisi Romesma 8:19-21.

18. Sortu blesi wi e kisi na ini a Kresten gemeente?

¹⁸ Srefi na ini a ten disi, vrede de na ini a Kresten gemeente. Iya, Gado e blesi a pipel fu en trutru. Wi de na ini vrede nanga Gado èn nanga tra sma. Luku san a profeiti Yesaya ben taki fu den blesi di wi e kisi na ini a ten disi: „Den sa musu naki den feti-owru fu den kon tron plugu èn den lansri fu den kon tron grasi-nefi. Pipel no sa opo feti-owru fu feti nanga pipel, sosrefi den no sa leri feti moro” (Yes. 2:3, 4). Te wi e meki a yeye fu Gado tiri wi, dan wi e yepi fu meki a vrede disi tan.

19, 20. Fu san ede wi e prisiri?

¹⁹ Ma wi sa kisi moro blesi na ini a ten di e kon. Na ondro a tiri fu Krestes, libisma di e gi yesi, sa abi vrede leki noiti bifo, èn safrisafri den sa „komoto na ini a katibo di e tyari pori kon”, teleki den no sa abi sondu moro (Rom. 8:21). Baka te den pasa a lasti tesi na a kaba fu a Dusun Yari Tiri, dan „den safri-atisma srefi sa abi grontapu leki a gudu fu den, èn den sa prisiri srefisrefi fu di vrede sa de pasa marki” (Ps. 37:11; Openb. 20:7-10). Fu tru, a tiri fu Krestes Yesus sa bun omeni tron moro a di fu Salomo!

²⁰ A pipel fu Israel ben e prisiri di den ben abi Moses, David, nanga Salomo leki fesiman, ma wi sa abi moro bigi prisiri na ondro a tiri fu Krestes (1 Kow. 8:66). Wi e taki Yehovah tangi nanga wi heri ati, fu di a gi wi en wan-enkri Manpikin, di de sosrefi a Moro Bigi Moses, a Moro Bigi David, èn a Moro Bigi Salomo!

[Futuwortu]

Yu kan tyari disi kon na krin?

• Fu san ede Yesus na a Moro Bigi David?

• Fu san ede Yesus na a Moro Bigi Salomo?

• San yu lobi fu a Moro Bigi David, di de sosrefi a Moro Bigi Salomo?

[Aksi fu a tori disi]

[Prenki na tapu bladzijde 31]

A koni di Gado gi Salomo ben e prenki a koni fu a Moro Bigi Salomo

[Prenki na tapu bladzijde 32]

A tiri fu Yesus sa bun omeni tron moro a di fu Salomo èn a di fu David!