Yob ben gi glori na a nen fu Yehovah

„Blesi de da nem foe MASRA.”​—JOB 1:21.

1. Suma skrifi a buku Yob, èn o ten dati pasa?

MOSES ben abi sowan 40 yari di a lowe komoto na Egepte, fu di Farao ben wani du ogri nanga en. A go tan na ini Midian (Tori. 7:23). Kande na di a ben e tan na ini a kondre dati, a kon sabi sortu tesi ben miti a man Yob di ben e libi krosibei fu a kondre Us. Yari baka dati, den Israelsma ben de krosibei fu drape, na ini a kondre Us, èn a no ben o teki langa moro fosi den ben o komoto na ini a gran sabana. A kan taki na a ten dati Moses kon sabi fa den lasti yari fu Yob ben waka. Soleki fa den fositen tori fu den Dyu e taki, dan Moses ben skrifi a buku Yob wan pisi ten baka di Yob dede.

2. Fa a buku Yob de wan deki-ati gi den futuboi fu Yehovah na ini a ten disi?

² A buku Yob e tranga a bribi fu den futuboi fu Gado na ini a ten disi. Na sortu fasi? A tori fu Yob e meki wi kon frustan sortu tumusi prenspari sani ben pasa na ini hemel, èn a e poti prakseri na a tumusi prenspari afersi di abi fu du nanga a reti di Gado abi fu tiri hemel nanga grontapu. A tori fu Yob e meki wi kon frustan moro krin tu san a wani taki fu tan gi yesi na Gado. A e yepi wi tu fu kon frustan fu san ede Yehovah e gi pasi son leisi taki den futuboi fu en e nyan pina. Boiti dati, a buku Yob e sori taki Satan Didibri na a moro bigi Feanti fu Gado èn fu libisma. Wan tra sani di a buku e sori, na taki sondu libisma kan tan gi yesi na Yehovah, awansi den e kisi hebi tesi. Meki wi go luku a buku Yob fu poti prakseri na wan tu fu den sani di ben pasa.

Satan e tesi Yob

3. San wi sabi fu Yob, èn fu san ede Satan tesi en?

³ Yob ben de wan guduman èn a ben de wan prenspari man tu. Boiti dati, a ben de wan famiri-edeman di ben abi bun fasi. A no de fu taki dati a ben de wan lespeki raiman di ben lobi fu yepi pôtisma. Ma san moro prenspari, na taki Yob ben abi frede gi Gado. Bijbel e taki dati Yob ben de wan „boen opregti man, disi ben frede Gado, en a ben tan farawe foe ogri”. A no a moni nanga a makti di Yob ben abi ben meki taki Satan Didibri tesi en. Nôno, Yob kisi tesi fu di a ben abi bigi lobi gi Gado.​—Yob 1:1; 29:7-16; 31:1. *

4. O ten wi kan taki dati wan sma e tan du san reti?

⁴ A buku Yob e bigin fruteri taki wan konmakandra ben de na hemel, èn den engel ben kon na fesi Yehovah. Satan ben de tu na a konmakandra disi, èn a bigin krutu Yob. (Leisi Yob 1:6-11.) Aladi Satan ben taki fu den gudu di Yob ben abi, a ben e suku moro furu fu tesi Yob, fu di a ben wani si efu Yob ben o tan du san reti. Wan sma di e tan du san reti, no abi fowtu, a e tan du bun èn a e tan gi yesi na Gado. Soleki fa Bijbel e sori, dan wan sma di e tan gi yesi na Yehovah, e anbegi En nanga en heri ati.

5. San Satan ben feni fu Yob?

⁵ Satan ben feni taki Yob no ben e anbegi Gado fu di a ben lobi En nanga en heri ati, ma fu di a ben e suku wini gi ensrefi. Satan ben taki dati solanga Yehovah ben e blesi Yob, èn solanga a ben e kibri en, dan Yob ben o tan gi yesi na En. Fu meki a kon na krin efu Satan ben abi leti, dan Yehovah gi pasi taki Satan tesi Yob. Dati meki na ini wán dei nomo, sma fufuru noso kiri den meti fu Yob. Sma kiri den futuboi  fu en, èn den tin pikin fu en dede (Yob 1:13-19). Yob drai baka gi Yehovah di Satan du den sani disi nanga en? Bijbel e sori san Yob ben taki di den rampu dati miti en: „MASRA ben gi, en MASRA ben teki baka; blesi de da nem foe MASRA.”​—Yob 1:21.

6. (a) San pasa na wan tra konmakandra di ben de na hemel? (b) Suma Satan ben abi na prakseri tu di a taigi Yehovah taki Yob no ben o tan gi yesi na En?

⁶ Bakaten, ete wan konmakandra ben de na hemel. Disi leisi, Satan krutu Yob baka, èn a taki: „Skin foe skin; ja, alasani disi wan soema abi a sa gi foe hori hemsrefi na libi. Ma langa Joe anoe now, en meri hem bonjo nanga hem skin, en a sa floekoe Joe na Joe fesi.” Luku taki Satan bigin krutu tra sma tu. Di Didibri taki: „Alasani disi wan soema abi a sa gi foe hori hemsrefi na libi”, dan nanga dati a sori taki a no ben e tweifri soso na Yob. Fu taki en leti, a ben e tweifri efu iniwan „soema” di e anbegi Yehovah ben o tan gi yesi na En. Baka dati, Gado gi pasi taki Satan naki Yob nanga wan takru siki (Yob 2:1-8). Ma Yob ben o kisi moro tesi ete.

San wi e leri fu Yob?

7. Fa Yob kisi kwinsi fu a wefi fu en èn fu den man di ben kon luku en?

⁷ Na a bigin di Yob ben e kisi tesi, dan a wefi fu en ben e nyan pina tu makandra nanga en. A ben musu fu firi sari di a lasi den pikin fu en, èn sosrefi den gudu di en nanga en masra ben abi. A ben musu fu hati en fu si fa en masra ben e pina fu di a ben abi wan takru siki. A bari gi Yob: „Joe hori joe boen manieri ete? Floekoe Gado, en dede.” Baka wan pisi ten dri man doro, namku Elifas, Bildad, nanga Sofar. Fu taki en leti, den man disi ben kon fu trowstu Yob. Ma fu di den ben abi triki fasi, meki a kon na krin taki den ben de „takroe troostoeman”. Fu eksempre, Bildad ben feni taki den pikin fu Yob ben musu fu dede fu di den ben du ogri. Elifas ben feni taki Yob ben e pina fu di a ben du sondu. A ben tweifri srefi efu sma di e tan gi yesi na Gado warti trutru na ini En ai! (Yob 2:9, 11; 4:8; 8:4; 16:2; 22:2, 3). Aladi Yob ben e kisi den hebi tesi dati, toku a tan gi yesi na Gado. A tru taki a no ben abi leti di a „meki hemsrefi kom regtvaardiki na presi foe Gado” (Yob 32:2). Ma aladi den sani disi ben e miti Yob, toku a tan gi yesi na Gado.

8. Fa Elihu de wan bun eksempre gi sma di e gi trawan rai na ini a ten disi?

⁸ A tori e taki moro fara fu Elihu, di ben kon luku Yob tu. Elihu arki fosi fa Yob nanga den dri mati fu en ben e krutu nanga makandra. Aladi Elihu ben yongu moro den fo tra man, toku a sori taki a ben koni moro den. A taki na wan lespeki fasi nanga Yob, èn a kari Yob na en nen. Elihu prèise Yob fu di a ben de wan opregti man. Ma a taigi Yob tu taki a no ben bun taki a ben e feti fu sori trawan taki a no ben abi fowtu. Ne, Elihu gi Yob a dyaranti taki te wan sma e dini Gado nanga en heri ati, dan dati e tyari  wini kon ala ten. (Leisi Yob 36:1, 11.) Dati na trutru wan moi eksempre gi sma di musu gi trawan rai na ini a ten disi! Elihu ben abi pasensi nanga Yob, a arki en bun, a prèise en te dati ben fiti, èn a gi en bun rai.​—Yob 32:6; 33:32.

9. Fa Yehovah yepi Yob?

⁹ Te fu kaba, Yob ondrofeni wan tumusi moi sani, di Yehovah taki nanga en. Bijbel e taki: „Dan MASRA ben piki Job komopo foe da draiwinti.” Yehovah poti difrenti aksi gi Yob, èn na so a yepi en na wan switi fasi èn na wan krakti fasi, fu kenki a denki fu en. Yob teki a piri-ai dati, èn a taki: „Mi veragti misrefi, en mi aksi pardon na ini stof nanga asisi.” Baka di Yehovah taki nanga Yob, dan a piri-ai gi den dri mati fu en fu di den no ben taki san „de reti”. Yob ben musu begi gi den. „En MASRA ben drai da katibo foe Job, di a ben begi gi hem mati; moro fara, MASRA ben gi Job dobroe foe alasani di a ben abi fosi.”​—Yob 38:1; 40:4; 42:6-10.

Wi lobi Yehovah nanga wi heri ati?

10. Fu san ede Yehovah no libi a sani di Satan ben taki, èn fu san ede a no pori en?

¹⁰ Yehovah na a Mekiman fu hemel nanga grontapu, èn en na a Sma di abi a reti fu tiri ala sani di a meki. Fu san ede a no libi a sani di Satan ben taki? Gado ben sabi taki efu a ben o libi a tori, èn efu a ben o pori Satan, dan dati no ben o tyari kon na krin suma ben abi leti. Didibri ben taki dati Yob, wan tumusi bun futuboi fu Yehovah, no ben o tan gi yesi na Gado efu a ben lasi den gudu fu en. Ma aladi Yob lasi den gudu fu en, toku a tan gi yesi na Gado. Baka dati, Satan ben feni taki iniwan sma ben o drai baka gi Gado efu a ben o nyan pina. Yob nyan pina, ma toku a tan gi yesi na Gado. Fu di a man disi tan gi yesi na Gado, aladi a ben abi sondu, meki a kon na krin taki Satan na wan leiman. Fa a de nanga den tra futuboi fu Gado?

11. Fa Yesus sori krin taki den sani di Satan ben fruteri, na soso lei?

¹¹ Soleki fa wi si, dan Yob tan gi yesi na Yehovah, awansi sortu tesi Satan tyari kon na en tapu. Fu taki en leti, ibri futuboi fu Gado di e du dati, e sori taki den sani di na ogri-ati feanti dati e taki fu libisma, na soso lei. Yesus ben kon na grontapu èn a sori krin taki Satan na wan leiman. Yesus ben de sondro sondu, neleki Adam, wi fosi papa. Fu di Yesus tan gi yesi na Gado te na dede, meki a sori krin taki Satan na wan leiman, èn taki den sani di a fruteri, na soso lei.​—Openb. 12:10.

12. Sortu okasi èn sortu frantwortu ibri futuboi fu Yehovah abi?

¹² Ma toku Satan e tan tesi den anbegiman fu Yehovah. Ibriwan fu wi abi na okasi èn a frantwortu fu sori taki wi no e dini Yehovah fu di wi e suku wini gi wisrefi, ma fu di wi lobi en. Na so wi e sori taki wi lobi Yehovah nanga wi heri ati. Fa wi e si a frantwortu dati? Wi e si en leki wan grani fu tan dini Yehovah nanga wi heri ati. A de wan trowstu tu gi wi fu sabi taki Yehovah e gi wi a krakti fu horidoro, èn neleki fa a ben du nanga Yob, a no sa meki wi kisi moro hebi tesi leki san wi man frudrage.​—1 Kor. 10:13.

Satan na wan trangayesi gensman di opo ensrefi teige Gado

13. San a buku Yob e fruteri wi moro fara fu Satan?

¹³ Den Hebrew Buku fu Bijbel e sori finifini fa Satan prefuru fu opo ensrefi teige Yehovah, èn fa a kori libisma. Den Kresten Griki Buku fu Bijbel e fruteri moro fini fa Satan gens Yehovah. Èn a buku Openbaring e fruteri fa Yehovah sa tyari kon na krin taki na En abi a reti fu tiri hemel nanga grontapu, èn fa Satan o kisi pori fu têgo. A buku Yob e meki wi kon sabi moro fini fa Satan ben opo ensrefi teige Gado. Di Satan ben de na den konmakandra na  hemel, dan a no go fu prèise Yehovah. Didibri ben abi wan takru ati, èn a ben e prakseri fu du wan ogri. Baka di Satan krutu Yob èn Gado gi en primisi fu tesi a man dati, dan a „komopo na da fesi foe MASRA”.​—Yob 1:12; 2:7.

14. Fa Satan handri nanga Yob?

¹⁴ Na so a buku Yob e tyari kon na krin taki Satan na wan ogri-ati feanti fu libisma. Sensi a ten fu a konmakandra di Yob 1:6 e taki fu en, wan pisi ten ben pasa fosi a tra konmakandra hori di skrifi na ini Yob 2:1. Na ini a pisi ten dati, Satan tesi Yob na wan ogri-ati fasi. Fu di Yob ben e tan gi yesi na Yehovah, meki A ben man taigi Satan: „En tokoe [Yob] hori hem boen manieri ete, alwasi joe ben bewegi Mi agensi hem, foe figi hem poeroe sondro a ben doe wan ogri.” Ma Satan no agri taki a ben fruteri lei fu Yob. Na presi fu dati, a taigi Gado fu tyari ete wan hebi tesi kon tapu Yob. Sobun, Didibri tesi Yob di a ben de wan guduman, èn sosrefi di a ben de wan pôtiman. A de krin taki Satan no e firi gi pôtisma noso gi sma di e ondrofeni rampu. A e tegu gi sma di e tan du san reti (Yob 2:3-5). Ma awansi fa a no fa, fu di Yob tan du san reti, meki a kon na krin taki Satan na wan leiman.

15. Fa den Kresten di e opo densrefi teige Gado, de leki Satan?

¹⁵ Satan ben de a fosi engel di opo ensrefi teige Gado. Anbegiman fu Yehovah di e opo densrefi teige a Gado fu den, e sori den srefi fasi fu Didibri. Kande den lobi fu krutu sma na ini den gemeente, sosrefi Kresten owruman, noso a Tiri Skin. Son Kresten di e opo densrefi teige Yehovah, no wani taki sma gebroiki a nen fu En. Den no wani kon sabi Yehovah moro bun, èn den no wani dini en. Neleki Satan, a papa fu den, den sortu sma disi e suku fu pori a bribi fu sma di lobi fu du san reti (Yoh. 8:44). Dati meki a no e fruwondru wi taki den futuboi fu Yehovah e wai pasi dorodoro gi den sma disi!​—2 Yoh. 10, 11.

Yob ben gi glori na a nen fu Yehovah

16. Fa Yob ben e denki fu Yehovah?

¹⁶ Yob ben gebroiki a nen fu Yehovah, èn a prèise a nen dati tu. Aladi Yob ben lasi-ati di a yere taki den pikin fu en dede, toku a no krutu Gado na nowan enkri fasi. Aladi Yob no ben abi leti fu taki dati na Gado meki a lasi den pikin fu en, toku a prèise a nen fu Yehovah. Na ini wan fu den puwema fu en di a ben skrifi bakaten, Yob e taki: „Loekoe, da frede foe MASRA, dati de sabi, en foe gowe libi ogri de froestan.”​—Yob 28:28.

17. San yepi Yob fu tan gi yesi na Gado?

¹⁷ San yepi Yob fu tan gi yesi na Gado? A de krin taki fosi den rampu miti Yob, a ben kon abi wan bun matifasi kaba nanga Yehovah. Aladi Bijbel no e taki efu Yob ben sabi taki Satan ben fruteri lei fu Yehovah, toku Yob ben abi a fasti bosroiti fu tan gi yesi na Yehovah. A ben taki: „Te leki mi sa dede mi no sa figi mi gerechtigheid  poeroe foe misrefi” (Yob 27:5). Fa Yob ben kon abi wan bun matifasi nanga Yehovah? A no de fu taki dati a ben yere fa Gado ben handri nanga Abraham, Isak, nanga Yakob, di ben de fara famiriman fu en. A ben musu de so tu taki den tori dati ben naki en ati. Boiti dati, a ben e poti prakseri na den sani di Yehovah meki. Na so a kon sabi den difrenti fasi fu Yehovah.​—Leisi Yob 12:7-9, 13, 16.

18. (a) Fa Yob sori taki a ben lobi Yehovah nanga en heri ati? (b) Na sortu fasi wi e teki a moi eksempre fu Yob?

¹⁸ Den sani di Yob kon sabi, wiki wan angri na ini en fu plisi Yehovah. Yob ben e hori na prakseri taki kande na osofamiri fu en ben du wan sani di Gado no feni bun, noso kande „dem ben kosi Gado na ini dem hati”. Dati meki a ben e tyari ofrandi doronomo (Yob 1:5). Srefi di Yob ben e kisi hebi tesi, a tan taki bun fu Yehovah (Yob 10:12). Dati na wan moi eksempre trutru! Wi musu meki muiti doronomo tu fu kon sabi Yehovah moro bun, èn wi musu kon sabi moro bun tu san a o du. Wi abi bun gwenti di e meki wi kon abi wan moro bun matifasi nanga Yehovah. Iya, wi e studeri Bijbel, wi e go na den konmakandra, èn wi e preiki a bun nyunsu. Boiti dati, wi e du ala san wi man fu meki a nen fu Yehovah bekènti. Èn neleki fa Yehovah ben breiti nanga Yob di ben e tan gi yesi na en, na so a sa breiti nanga den futuboi fu en di e tan du a srefi na ini a ten disi. Wi sa poti prakseri na a tori dati na ini a tra artikel.

[Futuwortu]

Yu e memre disi ete?

• Fu san ede Satan Didibri poti prakseri na Yob?

• Sortu tesi Yob kisi, èn fa a handri?

• San o yepi wi fu tan gi yesi na Gado neleki Yob?

• San a buku Yob e leri wi fu Satan?

[Aksi fu a tori disi]

[Prenki na tapu bladzijde 4]

A tori fu Yob e meki wi kon frustan a tumusi prenspari afersi di abi fu du nanga a reti di Gado abi fu tiri hemel nanga grontapu

[Prenki na tapu bladzijde 6]

Na sortu fasi yu kan kisi tesi fu sori taki yu e tan du san reti?