Yu e memre disi ete?

Yu ben prisiri fu leisi den Waktitoren di kon na doro no so langa pasa? Luku efu yu kan gi piki tapu den aksi di e kon now:

• Fu san ede a de so prenspari taki wi leki Kresten e tan du san reti?

Te wi e tan du san reti, fu di wi lobi Yehovah èn fu di wi wani sori taki Satan na wan leiman, dan na so fasi wi e sori taki na Yehovah abi a reti fu tiri. Boiti dati, Gado sa feni wi bun te wi e tan du san reti, èn a sani disi de prenspari fu man si a kontru fu a howpu di wi abi gi a ten di e kon.​—15/12, bladzijde 4-6.

• San na wan tu nen fu Yesus di e tyari kon na krin sortu prenspari frantwortu a abi fu meki a wani fu Gado kon tru?

A Manpikin di Gado srefi meki. A Wortu. Na Amen. A Mindriman fu wan nyun frubontu. A Granpriester. A Pikin di Gado ben pramisi.​—15/12, bladzijde 15.

• Elia ben meki a futuboi fu en luku go na a sei fu a se, aladi a profeiti ben begi taki alen kon. San disi e sori wi? (1 Kow. 18:43-45)

Elia sori taki a ben sabi fu pe na alen ben e komoto. A ben sabi taki na a dampu fu a se ben e meki den wolku, di a winti ben o wai go na a kondre, èn na so fasi na alen ben o kon.​—yanuari-maart, bladzijde 15, 16.

• Fa wi kan kon abi moro prisiri na ini wi diniwroko?

Wi kan sreka wi ati, fu di wi o poti prakseri fa wi kan yepi trawan moro. Wi kan preiki nanga a marki fu bigin Bijbelstudie. Te sma na ini a kontren fu wi no wani arki, dan wi kan bigin taki nanga den fu wan tori di sa hari den prakseri.​—15/1, bladzijde 8-10.

• Sortu krakti Bijbel leri musu abi tapu a fasi fa wan Kresten e denki èn e handri te a abi fu du nanga wan beri?

Aladi wan Kresten e sari kande te wan lobiwan fu en dede, toku a sabi taki den dedewan no sabi noti. Srefi efu sma di no de na bribi e krutu en, toku a e luku bun fu no abi noti fu du nanga den sani di sma gwenti du, fu di den e bribi taki den dedewan kan du sani gi den libiwan. Fu sorgu taki problema no e opo kon, son Kresten e skrifi na tapu papira san den wani sma du na a beri fu den.​—15/2, bladzijde 29-31.

• „A buku fu Yasyar” nanga „a buku di e taki fu den feti fu Yehovah”, na Bijbel buku di no de fu feni moro? (Yos. 10:13; Num. 21:14)

Nôno. Soleki fa a sori den tu buku dati di ben de na ini Bijbel ten, ben de dokumenti di no skrifi nanga yepi fu santa yeye. Boiti dati, Bijbel skrifiman ben taki nomo fu den buku dati.​—15/3, bladzijde 32.