Un masra, sori lobi neleki Krestes!

TAPU a lasti neti fu Yesus en libi na grontapu, a taigi den apostel fu en di ben tan waka na en baka: „Mi e gi unu wan nyun komando, taki un musu lobi makandra; neleki fa mi lobi unu, na so un musu lobi makandra tu. Na a fasi disi ala sma o sabi taki unu na mi disipel, te unu lobi makandra” (Yoh. 13:34, 35). Iya, tru Kresten musu lobi makandra.

Na apostel Paulus ben skrifi a sani disi spesrutu gi den Kresten masra: „Un masra, tan lobi un wefi, neleki fa Krestes lobi a gemeente èn neleki fa a ben gi ensrefi gi a gemeente” (Ef. 5:25). Fa wan Kresten masra kan fiti a Bijbel rai disi na ini en trowlibi, spesrutu te a wefi fu en na wan futuboi fu Yehovah?

Krestes ben lobi a gemeente

Bijbel e taki: „Den masra musu lobi den wefi leki den eigi skin. A man di lobi en wefi, lobi ensrefi tu, bika nowan man abi bita-ati gi en eigi skin; ma a e sorgu a skin èn a e luku en bun, neleki fa Krestes e du nanga a gemeente” (Ef. 5:28, 29). Yesus trutru ben lobi den disipel fu en. Aladi den ben e meki fowtu, toku a ben e sori switifasi gi den èn a ben e handri bun nanga den. Fu di a ben wani ’teki a gemeente di abi bigi glori’ gi ensrefi, meki a ben poti prakseri na den bun fasi fu den disipel fu en.​—Ef. 5:27.

Neleki fa Krestes ben sori lobi gi a gemeente, na so wan masra musu sori lobi gi en wefi. A o du dati nanga den sani di a e taki èn e du. Te wan masra gwenti sori en wefi taki a lobi en, dan a wefi o firi taki en masra abi warderi gi en èn a o de koloku. Na a tra sei, wan wefi kan abi wan bun oso nanga ala sortu kefalek sani, ma te en trowpatna no e poti prakseri na en, dan a no sa de koloku kwetikweti.

Fa wan masra e sori taki a lobi en wefi? Te a e taki nanga trawan fu en wefi, dan a e du dati na wan lespeki fasi, èn a no e syen fu taki dati en wefi e horibaka gi en. Efu en wefi yepi fu du wan prenspari sani na ini na osofamiri, dan a masra no e draidrai fu fruteri trawan dati. Te masra nanga wefi wawan de makandra, dan a wefi o firi taki en masra lobi en. A kan gersi wan pikin sani te a masra e hori en wefi anu, te a e lafu nanga en, te a e brasa en, noso te a e taigi en taki a du wan bun sani. Ma den sani disi e meki wan uma firi bun srefisrefi.

A no ben „e syen fu taki dati den na en ’brada’”

Krestes Yesus no ben „e syen fu taki dati den [salfu bakaman fu en] na en ’brada’” (Hebr. 2:11, 12, 17). Efu yu na wan Kresten masra, dan hori na prakseri taki yu wefi na yu Kresten sisa tu. A gi di a gi ensrefi abra na Yehovah de moro prenspari leki a pramisi di a meki di a trow, awansi a dopu bifo noso baka di a trow nanga yu. Te wan brada e teki fesi na wan gemeente konmakandra, èn a o gi yu wefi wan piki, dan soleki fa a fiti a e kari yu wefi „sisa”. Sobun, yu wefi na yu sisa tu, na ini a Kownukondre zaal èn sosrefi na oso. Neleki fa a de prenspari fu abi switifasi èn fu handri bun nanga yu wefi te yu de na a Kownukondre zaal, na so yu musu du tu na oso.

Te yu abi wan tu frantwortu na ini a gemeente, dan yu kan feni en muilek son leisi fu tyari den frantwortu fu yu na ini a gemeente èn na ini na osofamiri, na wan bun fasi. Te owruman e wroko bun nanga makandra èn  nanga den dinari ini a diniwroko, èn te den e leri trawan fu du son sani na ini a gemeente, dan dati kan yepi yu fu abi moro ten gi a sisa di abi yu moro fanowdu, yu wefi. No frigiti taki tra brada de na ini a gemeente di kan du den wroko di yu kisi fu du, ma nowan fu den kan teki presi gi yu leki masra.

Boiti dati, yu na a ede fu yu wefi. Bijbel e taki: „Krestes na a ede fu ibri man; a man na a ede fu na uma” (1 Kor. 11:3). Fa yu musu tyari yu frantwortu leki edeman? Yu musu du dati na wan lobi-ati fasi. A no te yu e kari a Bijbeltekst dati ibri leisi baka gi yu wefi, noso te yu e dwengi yu wefi fu sori lespeki gi yu. A moro bun fasi fa yu kan tyari yu frantwortu leki edeman, na te yu e teki na eksempre fu Yesus Krestes. Na so fasi yu sa man handri bun nanga yu wefi.​—1 Petr. 2:21.

„Unu na mi mati”

Yesus ben kari den disipel fu en, en mati. A ben taigi den: „Mi no e kari unu srafu moro, fu di wan srafu no sabi san en masra e du. Ma mi kari unu mi mati, fu di mi taigi unu ala den sani di mi yere fu mi Tata” (Yoh. 15:14, 15). Yesus nanga den disipel fu en ben e taki bun nanga makandra. Den ben e du sani makandra tu. „Yesus nanga den disipel fu en” ben kisi wan kari fu go na wan trowfesa na ini Kana (Yoh. 2:2). Den ben lobi fu go na son presi, soleki a dyari fu Getseimanei. Bijbel e taki dati „Yesus ben go drape nanga den disipel fu en furu leisi”.​—Yoh. 18:2.

A no de fu taki dati wan wefi musu firi taki en masra na en moro bun mati. A de tumusi prenspari taki masra nanga wefi e du prisiri sani makandra! Dini Gado makandra. A musu de wan prisiri sani gi den fu studeri Bijbel makandra. Du sani makandra, soleki fu koiri, fu taki tori, èn fu nyan nanga makandra. Unu no musu de nomo leki trowpatna, ma un musu de bun mati fu makandra.

„A ben lobi den te na a kaba”

Yesus ’ben lobi den disipel fu en te na a kaba’ (Yoh. 13:1). Son masra no e teki na eksempre fu Krestes ini a tori disi. Kande den e gowe libi ’a wefi fu den yongu yari’ srefi, gi wan moro yongu uma.​—Mal. 2:14, 15.

Trawan, leki Willi, e teki na eksempre fu Krestes. Fu di a wefi fu Willi, ben e kon siki moro nanga moro, meki taki a ben abi yepi fanowdu furu yari langa. Fa Willi ben denki fu a sani disi? A taki: „Ala ten mi ben si a wefi fu mi leki wan kado fu Gado èn mi ben tan abi warderi gi en. Boiti dati, 60 yari pasa mi pramisi taki mi ben o sorgu gi en na ini bun ten èn na ini takru ten. Noiti mi sa frigiti a pramisi dati.”

Un Kresten masra, sori lobi neleki Krestes. Tan lobi yu wefi di e anbegi Gado, fu di en na yu sisa èn yu mati.

[Prenki na tapu bladzijde 20]

Yu wefi na yu moro bun mati?

[Prenki na tapu bladzijde 20]

’Tan lobi yu wefi’