„De fayafaya fu du bun wroko”!

„[Yesus] gi ensrefi gi a bun fu wi, so taki a ben kan frulusu wi fu ala sortu kruktudu èn a ben kan krin wan pipel di ben o de spesrutu fu en. A pipel disi de fayafaya fu du bun wroko.”​—TIT. 2:14.

1. San ben pasa na ini a dyari fu a tempel di Yesus doro drape tapu 10 Nisan fu a yari 33?

TAPU 10 Nisan fu a yari 33, ipi-ipi anbegiman ben de na ini a dyari fu a tempel, èn den sma disi ben de fayafaya fu hori a Paskafesa. Wan tu dei nomo ben musu pasa fosi a fesa disi ben o hori. San ben o pasa te Yesus ben o doro? Dri Evangelie skrifiman, namku Mateyus, Markus nanga Lukas skrifi taki fu a di fu tu leisi, Yesus yagi den sma di ben e seri èn ben e bai sani na ini a tempel. A ben drai den tafra tapu fu den sma di ben e broko moni, èn sosrefi den bangi fu den sma di ben e seri doifi (Mat. 21:12; Mark. 11:15; Luk. 19:45). Iya, Yesus ben abi a srefi faya leki dri yari na fesi.​—Yoh. 2:13-17.

2, 3. Boiti taki Yesus yagi sma puru na ini a tempel, fa a sori moro fara taki a ben de fayafaya?

² Na Evangelie fu Mateyus e sori taki a yagi di Yesus yagi sma puru na ini a tempel, no ben de a wan-enkri sani di a ben du na a okasi dati. Yesus ben dresi brenisma di ben kon na en, èn sosrefi sma di ben lan (Mat. 21:14). Na Evangelie fu Lukas e taki fu tra sani di Yesus ben du. A e taki: „Ibri dei [Yesus] ben e gi leri na ini a tempel” (Luk. 19:47; 20:1). Den sani disi ben e sori krin taki Yesus ben de fayafaya na ini a diniwroko fu en.

 ³ Bakaten, na apostel Paulus skrifi wan brifi gi Titus, èn na ini a brifi dati a fruteri en taki Yesus „gi ensrefi gi a bun fu wi, so taki a ben kan frulusu wi fu ala sortu kruktudu èn a ben kan krin wan pipel di ben o de spesrutu fu en”. A ben taki moro fara: „A pipel disi de fayafaya fu du bun wroko” (Tit. 2:14). Na sortu fasi wi kan de „fayafaya fu du bun wroko” na ini a ten disi? Èn fa den eksempre fu den bun kownu fu Yuda kan gi wi deki-ati?

Den ben de fayafaya fu du a preikiwroko èn fu gi sma leri

4, 5. Fa den fo kownu fu Yuda ben sori taki den ben de fayafaya fu du bun wroko?

⁴ Asa, Yosafat, Heskia, nanga Yosia, ben seti sani fu rutu afkodrei puru na ini Yuda. Asa ben „puru den altari fu den trakondre sma. Boiti dati, a broko den presi puru pe sma ben e anbegi falsi gado. A broko den santa pilari èn a koti den santa postu trowe” (2 Kron 14:3). A faya di Yosafat ben abi gi a tru anbegi, gi en deki-ati fu ’broko den presi puru pe sma ben e anbegi falsi gado, èn a broko den santa postu na ini Yuda puru tu’.​—2 Kron. 17:6; 19:3. *

⁵ Heskia ben orga a santa Paskafesa na ini Yerusalem, èn a fesa disi ben hori seibi dei langa. Baka a fesa disi, „ala den Israelsma di ben de na Yerusalem, go na den difrenti foto fu Yuda. Ne den broko den santa pilari pisipisi, den koti den santa postu trowe, den broko den presi puru pe sma ben e anbegi falsi gado, èn sosrefi ala den altari di ben de na Yuda, Benyamin, Efraim, nanga Manase” (2 Kron. 31:1). Yosia tron kownu di a ben abi aiti yari nomo. Bijbel e taki: „Baka di Yosia ben e tiri aiti yari, a bigin dini a Gado fu en afo David. Na a ten dati a ben de wan yongu boi ete. Na ini a di fu twarfu yari a bigin krin Yuda nanga Yerusalem. A puru ala den presi pe sma ben e go anbegi falsi gado, den santa postu, nanga den tra popki” (2 Kron. 34:3). Sobun, ala den fo kownu disi ben de fayafaya fu du bun wroko.

6. Fu san ede wi kan agersi a diniwroko fu wi nanga a wroko di den reti-ati kownu fu Yuda ben e du?

⁶ Na ini a ten disi, wi e du wan wroko tu fu yepi sma fu kon fri fu falsi kerkileri èn fu afkodrei. Te wi de na ini a preikiwroko, dan wi e miti ala sortu sma (1 Tim. 2:4). Wan yongu meisje fu Asia e memre fa en mama ben e tanapu na fesi den someni popki na ini na oso fu den, fu hori seremonia gi den popki disi. Fu di a meisje ben e frustan taki a no ala den popki ben kan prenki a tru Gado, meki a ben e begi furu leisi fu kon sabi suma na a tru Gado. Wan dei a yere wan sma e naki na a doro fu en oso. Di a opo a doro, dan a si tu Kotoigi drape. Den Kotoigi disi ben de klariklari fu yepi en fu kon leri sabi a tumusi prenspari nen fu a tru Gado, Yehovah. A meisje ben breiti srefisrefi di a kon sabi krin san na falsi gado! Now a e teki prati fayafaya na ini a preikiwroko, èn a e yepi trawan fu kon sabi suma na Yehovah èn san na a wani fu En.​—Ps. 83:18; 115:4-8; 1 Yoh. 5:21.

7. Fa wi kan teki na eksempre fu den leriman di ben go na ala den foto na a ten di Yosafat ben e tiri leki kownu?

⁷ Te wi e teki prati na a oso-fu-oso preikiwroko, dan wi e wroko a kontren fu wi finifini? A moi fu si taki na ini a di fu dri yari di Yosafat ben e tiri leki kownu, a seni kari feifi granman, neigi Leifisma, nanga tu priester. A meki den go na ala den foto, fu leri a pipel den wèt fu Yehovah. Den man disi ben du a wroko fu den so bun, taki den sma na ini den kondre lontu Yuda bigin kisi frede gi Yehovah. (Leisi 2 Kroniki 17:9, 10.) Te wi e go na sma oso na difrenti ten èn na difrenti dei, dan wi o man taki nanga difrenti memre fu wan osofamiri.

8. San wi kan du fu man preiki gi moro sma?

⁸ Na ini a ten disi, furu futuboi fu Gado de klariklari fu gowe libi den oso, èn fu froisi go na presi pe moro Kotoigi de fanowdu di e preiki fayafaya. Yu kan du dati tu? Sonwan fu wi di no man froisi go na wan tra presi, kan pruberi fu gi kotoigi na sma di e libi na ini a kontren fu wi, ma di e taki wan tra tongo. Ron di abi  81 yari, e miti sma fu difrenti kondre na ini a kontren fu en. Dati meki a leri fu taki odi na ini 32 tongo! No so langa pasa, a miti wan trowpaar fu Afrika na strati. A trowpaar disi e taki Yorubatongo, èn Ron ben taki den odi na ini a tongo fu den. Den aksi Ron efu oiti a go na Afrika. Di a taigi den taki a no ben go drape noiti, dan den aksi en pe a leri taki a tongo fu den. A sani disi meki taki a ben man gi den wan moi kotoigi. A trowpaar ben de klariklari fu teki wan tu tijdschrift, èn den gi Ron na adres fu den. Bakaten, Ron seni na adres disi go gi a gemeente na ini a kontren pe a trowpaar e libi. Na so a gemeente ben kan seti sani fu studeri Bijbel nanga a trowpaar.

9. Fu san ede a prenspari fu leisi komoto fu Bijbel te wi e du a preikiwroko? Fruteri wan ondrofenitori di e sori disi.

⁹ Den leriman di Yosafat ben seni go na ala den foto na ini a kondre, ben tyari „a wètbuku fu Yehovah” go tu nanga den. Na heri grontapu, wi e pruberi fu gi sma leri nanga yepi fu Bijbel, fu di a buku disi na a Wortu fu Gado. Wi e du spesrutu muiti fu sori trawan san skrifi na ini Bijbel. Na so wi e sori sma o prenspari a buku disi de gi wi leki preikiman. Wan ososma ben taigi wan Kotoigi sisa di nen Linda, taki a no ben man tan taki nanga en, fu di a ben musu go na inisei fu luku en masra. A masra fu en ben kon siki fu di brudu ben naki en. Na uma ben taki: „Mi no sabi san mi du taki Gado meki a sani disi pasa nanga mi.” Linda piki en: „Mi kan sori yu wan sani?” Linda leisi gi na uma san skrifi na Yakobus 1:13, èn a taki: „Te wi, noso den lobiwan fu wi e pina, dan a no de so taki na Gado e strafu wi.” Di na uma yere dati, dan a gi Linda wan steifi brasa. Linda ben taki: „Mi ben man trowstu na uma disi, fu di mi gebroiki Bijbel. Son leisi den ososma noiti no yere den tekst di wi e leisi gi den na ini Bijbel.” A takimakandra dati meki taki Kotoigi ben man bigin wan Bijbelstudie nanga na uma.

Yonguwan di e du a diniwroko fu den fayafaya

10. Fa Yosia de wan bun eksempre gi yongu Kresten na ini a ten disi?

¹⁰ Te wi e poti prakseri baka na a eksempre fu Yosia, dan wi e si taki a ben e horibaka gi a tru anbegi di a ben yongu ete. A ben abi sowan 20 yari di a bigin rutu falsi anbegi puru na ini a kondre. (Leisi 2 Kroniki 34:1-3.) Na ini a ten disi, furu yonguwan e du a diniwroko fu den fayafaya tu.

11-13. San wi kan leri fu yonguwan di e dini Yehovah fayafaya na ini a ten disi?

¹¹ Hannah, di e libi na ini Ingrisikondre, ben abi 13 yari di a yere taki wan Fransitongo-grupu seti na ini wan foto krosibei fu pe a ben e libi. Na a ten dati, Hannah ben e leri Fransitongo na skoro. En papa ben de klariklari fu tyari en go na den konmakandra fu a grupu dati. Now Hannah abi 18 yari, èn a de wan gewoon pionier di e gi kotoigi fayafaya na ini Fransitongo. Yu man leri taki wan tra tongo, so taki yu kan yepi trawan fu kon leri sabi Yehovah?

¹² Rachel trutru ben lobi a video di nen Pursue Goals That Honor God (Du muiti fu doro  marki di e gi Gado grani). Luku san Rachel ben taki fu a fasi fa a ben denki di a bigin dini Yehovah na ini 1995. A e taki: „Mi ben denki taki mi ben e du en bun na ini a tru anbegi.” A ben taki moro fara: „Baka di mi luku a video, mi kon frustan taki na ini ala den yari dati, mi no ben e go na fesi. Mi musu meki tranga muiti fu tan na ini a tru anbegi, èn mi musu du muiti fu go na ini a preikiwroko èn fu studeri Bijbel.” Now Rachel feni taki a e dini Yehovah nanga moro faya. Sortu wini a kisi leki bakapisi fu dati? Rachel e taki: „Mi kon kisi wan moro bun matifasi nanga Yehovah. Te mi e begi, dan mi e taki san de tapu mi ati. Mi e studeri Bijbel moro dipi, èn dati e gi mi moro prisiri. Boiti dati, den tori na ini Bijbel abi moro krakti na mi tapu. Den sani disi e meki taki a preikiwroko e gi mi bun furu prisiri. Èn te mi e si fa den wortu fu Yehovah e trowstu trawan, dan dati e meki mi firi heri bun.”

¹³ Luke na wan yonguwan di kisi deki-ati fu wan tra video di nen Jonge mensen vragen — Wat ga ik met mijn leven doen? (Yongu sma e aksi—San mi o du nanga mi libi?) Baka di Luke luku a video disi, dan a skrifi: „Mi kisi deki-ati fu go sidon prakseri san mi e du nanga mi libi.” Luke e taki: „Fosi, sma ben e dwengi mi fu teki heiskoro-leri, so taki mi ben kan meki furu moni. Sma ben e taigi mi taki baka te mi ben doro a marki dati, dan mi ben kan poti prakseri na a anbegi fu mi. Ma te trawan e dwengi wan sma fu doro den sortu marki dati, dan dati no sa yepi a sma fu kon abi wan moro bun matifasi nanga Yehovah. Na presi fu dati, a bribi fu a sma sa kon swaki.” Un yongu brada nanga sisa, a ben o bun fu luku efu neleki Hannah, unu kan gebroiki den sani di unu leri na skoro, fu du moro na ini a diniwroko. Kande unu kan teki na eksempre fu Rachel di ben suku fu doro marki di trutru sa gi grani na Gado. Teki na eksempre fu Luke, di ben wai pasi gi den problema di e meki furu yonguwan naki futu.

Poti seryusu prakseri na warskow

14. Fa Yehovah wani taki wi musu anbegi en? Fu san ede a muilek fu du dati na ini a ten disi?

¹⁴ A pipel fu Yehovah musu de krin efu den wani taki A feni na anbegi fu den bun. Yesaya ben gi a warskow disi: „Gowe fu drape, gowe fu drape, komoto drape [na ini Babilon], no fasi nowan sani di no krin; komoto na mindri fu en, un tan krin, unu di e tyari den wrokosani fu Yehovah” (Yes. 52:11). Furu yari bifo Yesaya ben skrifi den wortu disi, a bun kownu Asa ben e meki tranga muiti fu tyari wan kaba kon na hurudu na ini Yuda. (Leisi 1 Kownu 15:11-13.) Èn hondrohondro yari baka dati, na apostel Paulus ben taigi Titus taki Yesus ben gi ensrefi fu krin den bakaman fu en, so taki den ben kan tron „wan pipel di ben o de spesrutu fu en èn [wan pipel] di de fayafaya fu du bun wroko” (Tit. 2:14). Na ini a grontapu disi pe furu sma no e tyari densrefi na wan fasi di fiti, a muilek spesrutu gi yonguwan fu tan krin. Fu eksempre, ala den futuboi fu Gado, yonguwan nanga owruwan, musu meki tranga muiti fu no poti prakseri na porno, èn na prenki di e wiki den seks firi fu sma, fu di dati kan pori a denki fu den. Den sortu sani disi de fu si na tapu den bigi prenki di sma e poti na strati, den de fu si tapu telefisi, na ini felem, èn spesrutu tapu Internet.

15. San kan meki en moro makriki gi wi fu tegu gi san ogri?

¹⁵ Te wi e poti seryusu prakseri na den warskow di Gado e gi wi, dan dati sa yepi wi fu tegu gi san ogri (Ps. 97:10; Rom. 12:9). Wan Kresten brada ben taki dati wi musu tegu gi porno, so  taki „a no e hari wi kon na ini a trapu fu en”. Fu eksempre, efu yu no wani taki wan draiwatra hari yu tyari gowe, dan yu musu swen tranga fu komoto na ini. Na so a de tu taki wi musu meki tranga muiti fu no fadon na ini a trapu fu porno. Ma te wi e frustan sortu takru bakapisi porno kan tyari kon gi wi, dan dati sa meki en moro makriki gi wi fu tegu gi en. Wan brada ben du furu muiti fu tapu nanga a gwenti di a ben abi fu luku porno tapu Internet. A froisi a computer fu en poti na wan presi pe den tra memre fu na osofamiri fu en ben kan si en te a ben e wroko na a computer. Boiti dati, a kon abi wan moro fasti bosroiti tu fu tapu nanga a takru gwenti fu en, èn fu de fayafaya fu du bun wroko. A du ete wan sani. Fu di a ben musu go tapu Internet gi a wroko fu en, meki a bosroiti fu du dati soso te en wefi ben e sidon na en sei.

Wi sa abi bun bakapisi te wi e tyari wisrefi na wan fasi di fiti

16, 17. Sortu krakti a kan abi tapu trawan te wi e tyari wisrefi na wan fasi di fiti? Fruteri wan ondrofenitori.

¹⁶ Den yonkuman nanga yongu-uma di e dini Yehovah, trutru e tyari densrefi na wan heri moi fasi. A no de fu taki dati a sani disi abi krakti tapu sma di e si dati. (Leisi 1 Petrus 2:12.) Luku na ondrofenitori fu wan man di ben go na Bethel na ini Londen, fu di a ben musu meki wan masyin di e druk buku. Baka di a man wroko wan heri dei drape, dan a heri fasi fa a ben e denki fu Yehovah Kotoigi kon kenki. A wefi fu a man disi ben e studeri Bijbel nanga Yehovah Kotoigi. A si fa den fasi fu en masra kon kenki. Fosi, en masra no ben wani taki Kotoigi kon na den oso. Ma di a doro na oso a dei di a ben du wan wroko na Bethel, dan a taki fa a ben lobi a switifasi fa den ben handri nanga en. A taki dati nowan sma drape ben e taki dotitaki. Ala sma ben abi pasensi, èn den ben abi switifasi. A ben naki en ati trutru fu si fa den yongu brada nanga sisa ben e wroko fayafaya sondro fu kisi pai. Den yonguwan disi de klariklari fu gebroiki den ten nanga den krakti fu yepi prati a bun nyunsu.

¹⁷ Brada nanga sisa di e du grontapuwroko fu man sorgu gi na osofamiri fu den, e du a wroko fu den nanga den heri ati tu (Kol. 3:23, 24). Fu di a wrokobasi fu den lobi a fasi fa den e du a wroko fu den, meki a no wani lasi den bun wrokoman disi. Dati meki den Kotoigi disi no abi fu frede so furu taki den o lasi den wroko.

18. Fa wi kan sori taki wi de „fayafaya fu du bun wroko”?

¹⁸ Te wi e frutrow tapu Yehovah, te wi e gi yesi na den rai fu en, èn te wi e sorgu bun gi den konmakandra presi fu wi, dan wi e sori taki wi de nanga faya gi na oso fu Yehovah. Boiti dati, wi wani du so furu leki wi man na ini a wroko di wi abi fu preiki a bun nyunsu fu a Kownukondre èn fu meki disipel. Awansi wi yongu noso owru, te wi e meki tranga muiti fu hori wisrefi na den regtfardiki markitiki fu Yehovah, dan wi sa kisi furu wini. Èn sma sa tan sabi wi leki wan pipel di de „fayafaya fu du bun wroko”.​—Tit. 2:14.

[Futuwortu]

Te yu e luku na eksempre fu sma na ini Bijbel ten èn fu sma na ini a ten disi, dan

• fa dati kan yepi yu fu de fayafaya na ini a wroko di wi abi fu preiki a bun nyunsu èn fu meki disipel?

• fa dati kan yepi Kresten yonguwan fu de „fayafaya fu du bun wroko”?

• fa dati kan yepi yu fu tapu nanga takru gwenti?

[Aksi fu a tori disi]

[Prenki na tapu bladzijde 13]

Yu abi a gwenti fu gebroiki Bijbel na ini a diniwroko fu yu?

[Prenki na tapu bladzijde 15]

Te yu e leri wan tra tongo na skoro, dan dati kan yepi yu fu du moro na ini a diniwroko fu yu