A bun nyunsu e doro farawe kontren

A REPUBLIEK Tuva fu Rosiakondre de te na a zuidsei fu Siberia. Èn Mongolia de na a zuidsei èn na a owstusei fu a republiek dati. Furu sma na ini Tuva e libi na farawe kontren èn preikiman no man doro drape makriki fu preiki a Kownukondre boskopu. Ma no so langa pasa, wan grupu sma fu wan tu fu den farawe kontren na ini Tuva, go na a mamafoto Kyzyl. Den ben wani de na wan spesrutu konmakandra. Maria, wan pionier na ini Kyzyl, ben yere taki den sma dati ben doro na ini a foto. A si a sani disi leki wan moi okasi fu prati a bun nyunsu nanga den.

Maria e fruteri san ben pasa: „A skoro pe mi e wroko leki skoromisi, ben o hori wan spesrutu konmakandra fu taki fu den fasi fa wi kan yepi sma di e dringi tumusi furu sopi, noso sma di e gebroiki drugs. Sowan 50 sma fu den moro farawe presi fu Tuva ben o de na a konmakandra disi. Na ini a grupu disi yu ben abi leriman, datra di e ondrosuku fu san ede sma e handri na wan spesrutu fasi, sma di abi a wroko fu luku efu pikin e kisi bun sorgu, èn tra sma sosrefi.” Maria ben si a konmakandra disi leki wan okasi fu gi kotoigi, ma a no ben o makriki gi en fu du dati. A e fruteri fu san ede: „Mi na wan sma di e syensyen, èn mi feni en muilek fu gi kotoigi na den sortu okasi disi. Ma mi begi Yehovah fu gi mi deki-ati, so taki mi kan teki na okasi disi fu gi kotoigi.” A ben abi bun bakapisi?

Maria e taki moro fara: „Mi ben feni wan Ontwaakt! di ben e taki fu sma di e frede srefisrefi gi spesrutu sani. ’Kande a tijdschrift disi ben o hari a prakseri fu wan datra di e ondrosuku fu san ede sma e handri na wan spesrutu fasi’, na so mi ben denki. Dati meki mi tyari a tijdschrift disi go na skoro. A dei dati, wan fu den skoromisi di ben kon na a konmakandra, kon na ini mi kantoro, èn mi gi en a tijdschrift. A ben breiti taki mi gi en a tijdschrift. Fu taki en leti, a skoromisi disi taigi mi taki en srefi frede gi wan spesrutu sani. A tra dei, mi gi en a buku Wat jonge mensen vragen — Praktische antwoorden, deel 1 (Sani di yongu sma e aksi—Piki di kan yepi den, pisi 1). A ben breiti tu taki mi gi en a buku disi. Fu di na uma disi ben breiti nanga a buku disi, meki mi prakseri taki tra skoromeester nanga skoromisi ben o wani a buku disi tu. Dati meki mi tyari wan heri dosu fu a buku disi èn fu tra publikâsi go na skoro.” Fosi yu denki, a dosu ben leigi. Maria e fruteri san pasa: „Wan tu tra sma di e wroko makandra nanga a skoromisi di mi ben gi a Jonge mensen vragen-buku, ben kon na ini mi kantoro, èn den aksi: ’Suma e prati den buku?’” Den ben kon na a yoisti sma!

A lasti dei fu a konmakandra ben de wan satra. A dei dati, Maria no ben abi fu go na wroko. Dati meki a poti wan tu publikâsi na tapu wan tu tafra na ini en kantoro. A skrifi na tapu wan bord: „Lespeki skoromeester nanga skoromisi! Unu kan teki publikâsi gi unsrefi èn gi den famiriman noso mati fu unu. Den moi publikâsi disi sa yepi unu fu abi bun bakapisi nanga a wroko fu unu, èn den sa yepi unu tu fu abi wan moro koloku osofamiri libi.” San ben de a bakapisi? „Mi go na mi kantoro a dei dati, èn mi si taki furu fu den publikâsi no ben de moro. Esi-esi mi go teki moro buku nanga tijdschrift.” Na a kaba fu a konmakandra, Maria ben prati 380 tijdschrift, 173 buku, nanga 34 brochure. Di den sma di ben kon na a konmakandra, drai go baka na den farawe kontren pe den e libi èn e wroko, dan den tyari den publikâsi go nanga den. Maria e taki: „Mi breiti so te taki now a bun nyunsu doro den moro farawe kontren fu Tuva!”—Preik. 11:6.

[Karta na tapu bladzijde 32]

(Efu yu wani si pe den sani disi skrifi, luku a tijdschrift)

ROSIAKONDRE

REPUBLIEK TUVA