Kresten osofamiri, un teki na eksempre fu Yesus!

„Krestes . . . libi wan eksempre gi unu, so taki unu kan waka soifri na en baka.”​—1 PETR. 2:21.

1. (a) San a Manpikin fu Gado ben e du di Gado ben e meki hemel nanga grontapu? (b) Fa Yesus e firi gi libisma?

DI GADO meki hemel nanga grontapu, dan a fosi gebore Manpikin fu en ben de na en sei e wroko leki wan „tumusi bun wrokoman”. Di Yehovah ben e meki den someni difrenti meti nanga bon dyaso na grontapu, dan a Manpikin fu en ben e wroko makandra tu nanga en Papa. A Manpikin ben e du dati tu di Yehovah meki a Paradijs di ben o tron wan tanpresi gi den libisma di a meki leki wan prenki fu Ensrefi. Gado en Manpikin, di wi kon sabi leki Yesus bakaten, ben abi bigi lobi gi libisma. Bijbel e taki: „Den sani di [a] ben lobi trutru, ben de den manpikin fu libisma.”​—Odo 8:27-31; Gen. 1:26, 27.

2. (a) San Yehovah gi sondu libisma fu yepi den? (b) Gi sortu afersi fu a libi Bijbel e gi wi rai?

² Baka di den fosi tu libisma sondu, dan Yehovah ben feni en prenspari taki sondu libisma kisi frulusu. Yehovah gi Krestes leki wan frulusu-ofrandi, so taki libisma ben kan kisi a frulusu dati (Rom. 5:8). Boiti dati, Yehovah gi libisma Bijbel, a Wortu fu en, di e sori den fa den kan abi bun bakapisi na ini a libi, aladi den abi sondu (Ps. 119:105). Na ini a Wortu fu en, Yehovah e gi sma rai fa fu tan abi wan koloku osofamiri di de na ini wánfasi. Te a abi fu du nanga a trowlibi, dan a buku Genesis e taki dati wan man musu „tai hori na en wefi èn den musu tron wán skin”.​—Gen. 2:24.

3. (a) San Yesus ben leri sma te a abi fu du nanga a trowlibi? (b) Na sortu sani wi sa poti prakseri na ini na artikel disi?

³ Di Yesus ben e du a diniwroko fu en na grontapu, dan a sori krin taki te tu sma trow, den musu tan makandra fu ala ten. A leri sma gronprakseri di ben o yepi memre fu na osofamiri fu no kisi denki di ben o pori a trowlibi fu  den, èn fu no tyari densrefi na wan fasi di ben o meki taki na osofamiri no de koloku (Mat. 5:27-37; 7:12). Na ini na artikel disi, wi sa luku fa den leri fu Yesus èn na eksempre fu en kan yepi masra, wefi, papa, mama, nanga pikin fu abi wan koloku libi.

A fasi fa wan Kresten masra e gi en wefi grani

4. Fa a frantwortu di Kresten masra abi e kruderi nanga a frantwortu di Yesus abi?

⁴ Gado poti a masra leki edeman fu na osofamiri, neleki fa Yesus na Edeman fu a gemeente. Na apostel Paulus ben taki: „Wan masra na a ede fu en wefi neleki fa Krestes na a ede tu fu a gemeente, èn en na wan frulusuman fu a skin disi. Un masra, tan lobi un wefi, neleki fa Krestes lobi a gemeente èn neleki fa a ben gi ensrefi gi a gemeente” (Ef. 5:23, 25). Iya, a fasi fa Yesus handri nanga den bakaman fu en, e sori fa Kresten masra musu handri nanga a wefi fu den. Meki wi poti prakseri na wan tu fu den fasi fa Yesus tyari a frantwortu di Gado ben gi en.

5. Fa Yesus handri nanga den disipel fu en?

⁵ Yesus ben „abi safri-ati nanga sakafasi” (Mat. 11:29). Te a ben musu handri, dan a ben e du dati tu. Noiti a ben e draidrai fu tyari den frantwortu fu en (Mark. 6:34; Yoh. 2:14-17). A ben e gi den disipel fu en rai na wan switifasi, èn a ben e du dati ibri tron baka te dati ben de fanowdu (Mat. 20:21-28; Mark. 9:33-37; Luk. 22:24-27). Ma toku Yesus no ben e bari den èn a no ben e meki den firi syen. A no ben e gi den a firi tu taki a no ben lobi den, noso taki den no ben o man du den sani di a ben e leri den. Na presi fu dati, a ben e prèise den disipel fu en, èn a ben e gi den deki-ati (Luk. 10:17-21). Fu di Yesus ben e sori switifasi nanga sari-ati gi den disipel fu en, meki a no e fruwondru wi taki den ben abi lespeki gi en!

6. (a) San wan masra kan leri fu a fasi fa Yesus ben e handri nanga den disipel fu en? (b) Sortu rai Petrus e gi masra?

⁶ Na eksempre fu Yesus e leri wan masra taki a frantwortu di a abi leki Kresten edeman, no wani taki dati a musu tiri en wefi na wan ogri-ati fasi. Na presi fu dati, a musu sori lespeki gi a wefi fu en, èn a musu sori lobi gi a wefi fu en, sondro fu suku en eigi bun. Na apostel Petrus ben gi masra a rai fu ’tan libi nanga’ a wefi fu den èn fu „gi grani” na den. Na so den ben o teki na eksempre fu Yesus di ben e handri na wan lobi-ati fasi nanga trawan. (Leisi 1 Petrus 3:7.) We dan, fa wan masra kan tyari a frantwortu di Gado gi en, aladi a e gi grani na a wefi fu en?

7. Fa wan masra kan gi grani na a wefi fu en? Gi wan eksempre fu dati.

⁷ Wan fasi fa wan masra kan gi grani na a wefi fu en, na te a e poti bun prakseri na a fasi fa a wefi fu en e denki èn e firi fu wan tori, fosi a e teki bosroiti di sa abi krakti tapu na osofamiri. Kande a musu bosroiti efu den o froisi, noso efu a musu suku wan tra wroko. Noso kande a musu teki bosroiti di abi fu du nanga aladei afersi, soleki pe den o go nanga fakansi, èn fa den o gebroiki a moni fu den nanga koni, now di sani e kon moro diri. Fu di den bosroiti disi sa abi krakti tapu na osofamiri, meki a ben o  bun te a masra e luku fa en wefi e denki fu den tori dati, èn na so wan fasi a e sori lespeki tu gi a wefi fu en. A sani disi sa yepi en fu teki wan moro bun bosroiti di sa sori taki a hori den firi fu en wefi na prakseri. Boiti dati, a sa moro makriki gi en wefi fu horibaka gi en (Odo 15:22). Te Kresten masra e gi grani na a wefi fu den, dan a wefi fu den sa sori lobi nanga lespeki gi den. Ma san moro prenspari, na taki Yehovah sa feni den masra disi bun.​—Ef. 5:28, 29.

A fasi fa wan wefi e sori bigi lespeki gi en masra

8. Fu san ede wefi no musu teki na eksempre fu Eva?

⁸ Kresten wefi kan leri furu fu a fasi fa Yesus ben saka ensrefi na ondro en Papa. A no de fu taki dati a denki di a fosi wefi ben abi fu a saka di a ben musu saka ensrefi, e difrenti srefisrefi fu a denki di Yesus ben abi fu a tori dati! Eva no ben de wan bun eksempre gi wefi. A ben abi wan edeman di Gado ben poti, èn nanga yepi fu na edeman disi Yehovah ben e gi en rai. Ma toku Eva no sori lespeki gi a frantwortu di en masra ben abi. A no teki a rai di Adam ben gi en (Gen. 2:16, 17; 3:3; 1 Kor. 11:3). A tru taki Satan ben kori Eva, ma Eva ben musu taki nanga en masra, fosi a ben bribi a sten di ben kori en taki a ben sabi san „Gado sabi”. Na presi fu dati, Eva prefuru fu taigi en masra san a ben musu du.​—Gen. 3:5, 6; 1 Tim. 2:14.

9. Fu san ede Yesus de wan eksempre gi wi, te wi e luku a fasi fa a saka ensrefi na ondro en Papa?

⁹ Tra fasi leki Eva, Yesus ben de wan heri bun eksempre gi wi, fu di a saka ensrefi na ondro en Edeman. A fasi fa a tyari ensrefi, èn a libi fu en, e sori taki a „no prakseri fu teki sani abra nanga tranga, namku fu kan de a srefi leki Gado”. Na presi fu dati, „a gowe libi ala san a ben abi, [èn] a tron leki wan srafu” (Fil. 2:5-7). Na ini a ten disi, Yesus di e tiri leki Kownu, abi a srefi denki dati. A de klariklari fu saka ensrefi na ondro en Papa na ini ala sani, èn a e horibaka gi en leki Edeman.​—Mat. 20:23; Yoh. 5:30; 1 Kor. 15:28.

10. Fa wan wefi kan horibaka gi a frantwortu di en masra abi leki edeman?

¹⁰ Wan Kresten wefi di e teki na eksempre fu Yesus, e horibaka gi en masra di abi a frantwortu leki edeman. (Leisi 1 Petrus 2:21; 3:1, 2.) Meki wi poti prakseri na wan situwâsi di e gi en okasi fu du dati. A manpikin fu en e aksi primisi fu du wan spesrutu sani. Fu di a boi no ben taki ete fu a tori disi nanga en papa nanga mama, meki a ben o fiti te a mama e aksi en: „Yu aksi yu papa?” Efu a boi no aksi en papa, dan a mama ben kan taki nanga en masra, fosi ensrefi teki wan bosroiti. Boiti dati, wan Kresten wefi no musu krutu nanga en masra na fesi den pikin fu den. Efu a no e agri nanga en masra fu wan tori, dan a musu taki nanga en fu a tori dati, te den wawan de.​—Ef. 6:4.

Papa nanga mama kan leri fu na eksempre fu Yesus

11. Fa Yesus ben de wan eksempre gi papa nanga mama?

¹¹ Aladi Yesus no ben trow èn a no ben abi pikin, toku a de wan heri bun eksempre gi papa  nanga mama. Fa so? A ben e gi den disipel fu en leri na wan switifasi èn nanga pasensi, èn a ben e du tu san a ben e leri den. A sori den fa den musu du a wroko di a ben gi den (Luk. 8:1). A fasi fa Yesus ben e denki fu den disipel fu en, èn a fasi fa a ben e handri nanga den, ben sori den fa den ben musu handri nanga makandra.​—Leisi Yohanes 13:14-17.

12, 13. San papa nanga mama musu du efu den wani taki den pikin fu den gro kon tron sma di abi frede gi Gado?

¹² Nofo tron, pikin e teki na eksempre fu den papa nanga mama abra, awansi na bun eksempre noso takru eksempre. Sobun, papa nanga mama, aksi unsrefi a sani disi: ’San wi e leri den pikin fu wi te a abi fu du nanga a ten di wi e gebroiki fu luku telefisi èn fu abi prisiriten? Wi e gebroiki moro ten gi den sani dati, leki san wi e gebroiki fu studeri Bijbel èn fu teki prati na a preikiwroko? San na den moro prenspari sani gi na osofamiri fu wi? Wi de wan bun eksempre gi den pikin, fu di wi e poti a tru anbegi na a fosi presi na ini wi libi?’ A wèt fu Gado musu de na ini na ati fu papa nanga mama fosi, efu den wani taki den pikin fu den gro kon tron sma di abi frede gi Gado.​—Deut. 6:6.

¹³ Te papa nanga mama e du muiti fu hori densrefi na Bijbel gronprakseri na ini den aladei libi, dan den pikin fu den sa si dati. Den sani di papa nanga mama e taigi den pikin fu den, èn a leri di den e gi den pikin, sa abi krakti na den pikin tapu. Ma efu pikin e si taki papa nanga mama srefi no e du den sani di den e leri den, dan den kan kisi a denki taki Bijbel gronprakseri no prenspari trutru, èn taki den no e tyari wini kon gi sma. A sani disi sa meki taki den pikin no sa man kakafutu gi a grontapu disi di e dwengi den fu du sani di Gado no feni bun.

14, 15. Sortu sani papa nanga mama musu leri den pikin fu den? San na wan fasi fa den kan du dati?

¹⁴ Kresten papa nanga mama sabi taki a kweki di den e kweki wan pikin no wani taki nomo dati den musu gi a pikin nyanyan, krosi, nanga wan tanpresi. Fu dati ede, a no ben o de wan koni sani kwetikweti te papa nanga mama ben o leri wan pikin fu feti baka gudu fu kan abi wan moro bun libi (Preik. 7:12). Yesus ben leri den disipel fu en fu suku a Kownukondre nanga Gado en regtfardikifasi fosi (Mat. 6:33). Fu dati ede, neleki Yesus, Kresten papa nanga mama musu pruberi fu meki den pikin fu den kon kisi na angri fu du moro gi Gado.

¹⁵ Wán fasi fa papa nanga mama kan du dati, na te den e suku okasi fu meki den pikin fu den kan abi demakandra nanga den wan di e du furuten diniwroko. Prakseri fa tini e kisi deki-ati te den e leri sabi brada nanga sisa di e pionier, èn sosrefi a kring-opziener nanga a wefi fu en. Te yu e kari zendeling kon na yu oso, noso sma fu Bethel, nanga den wan di e du bow-wroko na tra kondre, dan den kan fruteri fayafaya fa den e kisi prisiri fu di den e dini Yehovah. A no de fu taki dati den sortu sma disi abi moi ondrofenitori fu fruteri. Fu di den de klariklari fu dini Gado, meki den kan de wan bigi yepi gi den pikin fu yu. Den pikin o man teki koni bosroiti, den o poti marki na ini na anbegi fu den, èn  den sa suku fu kisi a yoisti skoroleri fu man sorgu gi densrefi, aladi den e du furuten diniwroko.

San o yepi pikin fu teki na eksempre fu Yesus?

16. Fa Yesus gi grani na en papa nanga mama na grontapu, èn na en Papa na hemel?

¹⁶ Un pikin, Yesus de wan heri bun eksempre gi unu tu. Gado gi Yosef nanga Maria a frantwortu fu sorgu gi Yesus, èn Yesus ben e gi yesi na den. (Leisi Lukas 2:51.) Yesus ben sabi taki aladi den tu sma disi ben abi fowtu, toku den ben kisi a frantwortu fu Gado fu sorgu gi en. Dati meki a ben musu gi grani na den (Deut. 5:16; Mat. 15:4). Di Yesus ben bigi kaba, dan ala ten a ben e du den sani di en Papa na hemel ben feni bun. Dati wani taki dati a ben e kakafutu tu gi tesi (Mat. 4:1-10). Son leisi, unu leki yonguwan kan kisi tesi tu fu trangayesi un papa nanga mama. Sobun, san kan yepi yu fu teki na eksempre fu Yesus?

17, 18. (a) Sortu tesi yonguwan e kisi na skoro? (b) San yonguwan musu hori na prakseri fu man horidoro te den e kisi tesi?

¹⁷ A no de fu taki, dati furu fu den pikin na yu skoro no abi furu lespeki gi Bijbel gronprakseri. Kande den sa pruberi fu meki yu teki prati na sani di no fiti, èn kande den sa spotu yu te yu e weigri fu teki prati na den sani dati. A de so taki den skoromati fu yu e dreigi yu fu di yu e weigri fu teki prati na spesrutu sani makandra nanga den? Efu dati de so, dan san yu e du? Yu sabi taki efu yu e teki prati na den sani dati soso fu di yu e frede trawan, dan yu papa, yu mama, nanga Yehovah o sari. San ben o pasa nanga yu te yu ben o teki na eksempre fu den pikin na yu skoro? Kande yu poti spesrutu marki gi yusrefi, iya, kande yu wani tron wan pionier, wan dinari ini a diniwroko, kande yu wani go dini na ini wan kontren pe moro Kownukondre preikiman de fanowdu, noso kande yu wani go dini na Bethel. Efu yu e tan abi demakandra nanga den pikin na yu skoro, dan yu o man doro den marki di yu poti?

¹⁸ Un yonguwan na ini a Kresten gemeente, oiti unu e feni unsrefi na ini situwâsi di de leki wan tesi gi unu? San yu e du te yu e kisi den sortu tesi dati? Prakseri Yesus, na eksempre fu yu. A ben weigri fu gi abra di a ben e kisi tesi, èn a opo taki gi san reti. Te yu e hori a sani disi na prakseri, dan dati sa gi yu deki-ati fu taigi den pikin na yu skoro krin taki yu no wani teki prati na wan sani di yu sabi taki a no bun. Neleki Yesus, yu musu tan poti prakseri na a howpu di yu abi fu dini Yehovah fu ala ten èn fu gi yesi na en.​—Hebr. 12:2.

Fa yu kan abi wan koloku osofamiri libi?

19. Sortu fasi fu libi sa meki wi de koloku trutru?

¹⁹ Yehovah Gado nanga Yesus Krestes abi a bun fu libisma na prakseri. Aladi wi abi sondu, toku wi kan de koloku (Yes. 48:17, 18; Mat. 5:3). Yesus ben e leri sma tru tori fu Gado, èn den tru tori disi e yepi sma fu de koloku. Ma dati a no den wan-enkri sani di a ben leri den disipel fu en. Yesus ben leri den tu fu abi a moro bun fasi fu libi. Boiti dati, ensrefi sori wi san na a moro bun fasi fu libi, èn a ben abi moi fasi tu. Awansi wi na papa, mama, noso pikin, wi alamala kan kisi wini te wi e teki na eksempre fu Yesus. Sobun, masra, wefi, papa, mama, nanga pikin, teki na eksempre fu Yesus! Te wi e du san Yesus leri wi èn te wi e teki na eksempre fu en, dan dati na a moro prenspari fasi fa wi kan abi wan koloku osofamiri libi di e gi wi prisiri.

San yu ben sa piki?

• Fa masra musu tyari a frantwortu di Gado gi den?

• Fa wan wefi kan teki na eksempre fu Yesus?

• San papa nanga mama kan leri fu a fasi fa Yesus ben handri nanga den disipel fu en?

• San yonguwan kan leri fu na eksempre fu Yesus?

[Aksi fu a tori disi]

[Prenki na tapu bladzijde 8]

San wan masra di lobi en wefi sa du fosi a e teki wan bosroiti di sa abi krakti tapu na osofamiri?

[Prenki na tapu bladzijde 9]

Sortu situwâsi e gi wan wefi na okasi fu horibaka gi en masra di abi a frantwortu leki edeman?

[Prenki na tapu bladzijde 10]

Pikin e teki den bun gwenti fu den papa nanga mama abra