Gado gi wi a howpu fu libi fu têgo na grontapu

„Den sani di Gado meki, e du sani fu soso . . . ma toku howpu de.”​—ROM. 8:20.

1, 2. (a) Fu san ede a howpu di wi abi fu libi fu têgo na grontapu de so prenspari gi wi? (b) Fu san ede furu sma no e bribi taki den kan libi fu têgo na grontapu?

KANDE yu sabi ete fa yu ben breiti di yu kon frustan taki heri esi, libisma no sa kon owru moro èn dede, ma taki den sa libi fu têgo na grontapu (Yoh. 17:3; Openb. 21:3, 4). Kande yu lobi fu fruteri trawan fu a howpu dati di e komoto fu Bijbel. Fu taki en leti, a howpu di wi abi fu libi fu têgo, na wan fu den prenspari sani di wi e fruteri sma te wi e preiki a bun nyunsu gi den. A howpu disi e meki wi kisi wan heri tra denki fu a libi.

² Furu fu den kerki fu Krestenhèit no fruteri sma fu a howpu di libisma abi fu libi fu têgo na grontapu. Aladi Bijbel e leri taki a sili e dede, toku bun furu kerki e leri sma taki libisma abi wan sili di no man dede èn di e tan libi leki wan yeye, baka te wan sma dede. Ma a leri disi no e kruderi nanga Bijbel (Esek. 18:20). Fu dati ede, furu sma no e bribi taki den kan libi fu têgo na grontapu. Sobun, wi ben kan aksi wisrefi a sani disi: A de so trutru taki a howpu disi e kruderi nanga san skrifi na ini Bijbel? Efu dati de so, dan san ben de a fosi leisi di Gado meki libisma kon sabi fu a howpu disi?

’Den e du sani fu soso, ma toku howpu de’

3. Fa a ben de fu si frukufruku kaba san Gado ben wani gi libisma?

³ Frukufruku kaba di Yehovah meki libisma, a ben tyari kon na krin san a ben abi na prakseri gi den. Gado sori krin taki Adam ben o libi fu têgo efu a ben e tan gi yesi na en (Gen. 2:9, 17; 3:22). A no de fu taki, dati den fosi bakapikin fu Adam ben kon sabi taki libisma ben kisi sondu, fu di buweisi ben de di ben e sori dati. Libisma no ben man go moro na ini a dyari fu Eden, èn sma ben e kon owru èn den ben e dede (Gen. 3:23, 24). Ma baka wan pisi ten, libisma no ben e libi so langa moro leki fosi. Adam libi 930 yari. Sem di ben pasa a Frudu libilibi, ben libi 600 yari nomo, èn Arpaksad, a manpikin fu en, ben libi 438 yari. Tera, Abraham en papa, ben libi 205 yari. Abraham ben libi 175 yari, en manpikin Isak ben libi 180 yari, èn Yakob ben libi 147 yari (Gen. 5:5; 11:10-13, 32; 25:7; 35:28; 47:28). A no de fu taki dati furu sma ben sabi san a sani disi ben wani taki. Den ben sabi taki libisma ben lasi a howpu di den ben abi fu libi fu têgo! Den ben abi reide fu bribi taki den ben kan kisi têgo libi baka?

4. Sortu reide den reti-ati man fu owruten ben abi fu bribi taki Gado ben o meki libisma kisi den blesi di Adam ben lasi?

⁴ Gado Wortu e taki: „Den [libisma] di Gado meki, e du sani fu soso . . . ma toku howpu de” (Rom. 8:20). Sortu howpu na dati? A fosi profeititori fu Bijbel e taki fu wan „pikin” di ben o ’masi na ede fu a sneki’. (Leisi Genesis 3:1-5, 15.) A pramisi fu a Pikin dati ben e gi reti-ati libisma a howpu taki Gado ben o du ete san a ben abi na prakseri gi libisma. A sani disi gi man soleki Abel nanga Noa reide fu bribi taki Gado ben o meki libisma kisi den blesi di Adam ben lasi. Kande den man disi ben e frustan taki te a ’pikin fu na uma ben o kisi mankeri na en bakafutu’, dan brudu ben o lon.​—Gen. 4:4; 8:20; Hebr. 11:4.

5. Sortu buweisi de taki Abraham ben e bribi na ini na opobaka?

⁵ Luku na eksempre fu Abraham. Di Gado  ben wani si efu Abraham ben abi trutru bribi, dan Abraham ben de klariklari fu ’gi Isak en wan-enkri manpikin, leki ofrandi’ (Hebr. 11:17). Fu san ede Abraham ben de klariklari fu du dati? (Leisi Hebrewsma 11:19.) Fu di a ben e bribi na ini na opobaka! Abraham ben abi reide fu bribi na ini na opobaka. Fu taki en leti, Yehovah ben gi Abraham a krakti baka fu meki pikin, so taki en nanga en wefi Sara ben kan kisi wan manpikin tapu den owrudei (Gen. 18:10-14; 21:1-3; Rom. 4:19-21). Boiti dati, Abraham ben bribi a sani disi di Gado ben taigi en: „Den bakapikin di mi pramisi yu, o komoto fu Isak” (Gen. 21:12). Fu dati ede, Abraham ben abi ala reide fu fruwakti taki Gado ben o gi Isak wan opobaka.

6, 7. (a) Sortu frubontu Yehovah ben meki nanga Abraham? (b) Fa a sani di Yehovah ben pramisi Abraham, gi libisma howpu?

⁶ Fu di Abraham ben abi so wan tranga bribi, meki Yehovah meki wan frubontu nanga en, èn a frubontu dati ben abi fu du nanga den bakapikin fu en. (Leisi Genesis 22:18). A moro prenspari „pikin” fu en ben de Yesus Krestes (Gal. 3:16). Yehovah ben taigi Abraham taki den „bakapikin” fu en ben o kon furu „leki den stari na hemel èn leki den ai-santi na sesyoro”. Abraham no ben sabi omeni bakapikin dati ben o de (Gen. 22:17). Ma bakaten, a kon na krin omeni bakapikin dati ben o de. Yesus Krestes nanga den 144.000 salfuwan di sa tiri makandra nanga en na ini a Kownukondre fu en, na den „bakapikin” disi (Gal. 3:29; Openb. 7:4; 14:1). Nanga yepi fu a Mesias Kownukondre, „ala den pipel fu grontapu o man kisi blesi gi densrefi”.

⁷ A no de fu taki, dati Abraham no ben frustan finifini san a frubontu ben wani taki di Yehovah ben meki nanga en. Ma toku „a ben e fruwakti a foto di abi trutru fondamenti”, na so Bijbel e taki (Hebr. 11:10). A foto dati na Gado en Kownukondre. Abraham sa musu libi baka fu man kisi wini fu den blesi di a Kownukondre dati sa tyari kon. Fu di a sa kisi wan opobaka, meki a sa man libi fu têgo na grontapu. Den wan di e pasa Armagedon libilibi, èn den wan di sa kisi wan opobaka, sa man libi fu têgo tu.​—Openb. 7:9, 14; 20:12-14.

„Mi e firi taki mi abi fu taki”

8, 9. Fu san ede a buku Yob no de wan tori nomo di e taki fu den tesi di wan man ben kisi?

⁸ Wi sa poti prakseri now na a tori fu Yob. A man disi ben e libi na ini a pisi ten baka di Yosef, a bakapikin fu Abraham, dede, èn a pisi ten bifo a profeiti Moses gebore. A Bijbel buku Yob, di Moses ben skrifi, e sori fu san ede Yehovah gi pasi taki Yob ben e pina, èn a e sori tu fa sani waka nanga en. Ma a buku Yob no de wan tori nomo di e taki fu den tesi di wan man ben kisi. A buku disi e taki fu tori di prenspari gi ala libisma èn gi ala engel di Gado meki. A buku e sori taki Yehovah e tiri na wan reti fasi. A e sori tu taki na afersi di opo kon na ini Eden e gi ala futuboi fu Gado na grontapu na okasi fu sori efu den sa tan gi yesi na Gado, so taki den kan kisi têgo libi. Aladi Yob no ben e frustan na afersi disi, toku a no meki den dri mati fu en gi en a denki taki a no ben tan gi yesi na Gado (Yob 27:5). A sani disi musu tranga a bribi fu wi èn a musu yepi wi fu kon frustan taki wi man tan gi yesi na Yehovah, èn taki wi man horibaka gi en leki a Moro Hei Tiriman.

⁹ Baka di den dri falsi trowstuman fu Yob ben kaba taki, dan „Elihu, a manpikin fu a Bus-sma Barakel, taki”. Fu san ede a bosroiti fu du dati? A ben taki: „Mi abi furu fu taki. Te na ini mi inibere mi e firi taki mi abi fu taki” (Yob 32:5, 6, 18). Den sani di Elihu ben taki nanga yepi fu santa yeye, kon tru di Yob kaba kisi tesi. Ma toku den sani di a ben taki prenspari tu gi tra sma. Den sani dati de wan howpu gi ala sma di e tan du san reti.

10. San e sori taki wan boskopu di Yehovah e gi wan spesrutu sma, son leisi kan abi fu du tu nanga a heri libisma famiri?

¹⁰ Son leisi, Yehovah e gi wan spesrutu sma wan boskopu, aladi a boskopu dati abi fu du tu nanga a heri libisma famiri. Wan buweisi fu dati, na a profeititori fu Danièl di ben abi fu du nanga a dren di Kownu Nebukadnesar fu Babilon  ben kisi taki sma ben koti wan bun bigi bon puru (Dan. 4:10-27). Aladi a kontru fu a dren dati ben abi fu du nanga Nebukadnesar, toku a ben abi fu du nanga wan moro bigi sani tu. A dren dati ben e sori taki na ini a yari 607 bifo Krestes, wan kaba ben o kon na a tiri fu Gado na grontapu. Na a pisi ten dati, a Kownukondre fu a famirilin fu David ben e prenki a tiri dati. Ma baka wan pisi ten fu 2520 yari, Gado ben o tiri grontapu baka. * Na ini 1914, di Yesus Krestes tron Kownu fu a hemel Kownukondre, a kon na krin taki Gado ben e bigin tiri grontapu baka. Prakseri fa heri esi, a Kownukondre sa meki a howpu fu reti-ati libisma kon tru!

„Frulusu en fu a grebi!”

11. San den wortu fu Elihu ben e sori fu Gado?

¹¹ Di Elihu piki Yob, dan a taki fu ’wan boskopuman, noso wan sma di ben komoto na mindri dusun sma fu kon taki nanga libisma èn fu fruteri den san na retidu’. Fa a ben o de te a boskopuman disi ben o „begi Gado fu a feni en bun”? Elihu e taki: „Dan Gado o feni en bun èn a o taki: ’Frulusu en fu a grebi! Mi feni wan lusu-paiman! Meki en skin kon moro moi leki di a ben yongu. Meki a kon abi krakti baka neleki di a ben yongu’”(Yob 33:23-26). Den wortu dati ben e sori taki Gado ben de klariklari fu teki „wan lusu-paiman”, noso wan sani di ben o tapu den sondu fu libisma di e sori berow.​—Yob 33:24.

12. Soleki fa den wortu fu Elihu e sori, dan sortu howpu libisma abi?

¹² Neleki fa den profeiti no ben e frustan ala den sani di den ben e skrifi, na so a kan tu taki Elihu no ben e frustan finifini san a lusu-paiman ben wani taki (Dan. 12:8; 1 Petr. 1:10-12). Ma toku den wortu fu Elihu ben e sori libisma taki den ben kan abi a howpu taki Gado ben o teki wan lusu-paiman wan dei. Nanga yepi fu a lusu-paiman dati, a ben o sorgu taki libisma no e kon owru moro èn taki den no e dede moro. Den wortu fu Elihu ben gi libisma a moi howpu fu libi fu têgo. A buku Yob e sori tu taki libisma sa kisi wan opobaka.​—Yob 14:14, 15.

13. San den wortu fu Elihu wani taki gi Kresten?

¹³ Na ini a ten disi, den wortu fu Elihu prenspari ete gi milyunmilyun Kresten di abi a howpu fu pasa a kaba fu a sistema disi libilibi. Den owruwan di sa pasa libilibi, sa kon yongu èn  krakti baka neleki fosi (Openb. 7:9, 10, 14-17). Boiti dati, reti-ati sma na ini a ten disi e prisiri tu te den e prakseri taki den sa si fa den wan di kisi wan opobaka e kon yongu baka. Den salfu Kresten sa libi na hemel sondro taki den man dede, èn den „tra skapu” fu Yesus sa kisi têgo libi na grontapu. Ma den sa kisi den blesi disi soso te den e sori bribi na ini a frulusu-ofrandi fu Krestes.​—Yoh. 10:16; Rom. 6:23.

A o swari dede fu têgo

14. San e sori taki a Wet wawan no ben o gi den Israelsma a dyaranti taki den ben o kisi têgo libi?

¹⁴ Gado ben meki wan frubontu nanga den bakapikin fu Abraham, èn na so den kon tron wan pipel di ben abi den eigi tirimakti. Di Yehovah gi den a Wet, dan a taigi den: „Un musu hori unsrefi na den wet nanga den komando fu mi. Efu unu e du dati, dan unu sa tan na libi” (Lef. 18:5). Ma fu di den Israelsma no ben man hori densrefi na den tumusi bun markitiki fu a Wet, meki den kon de na ondro a fluku fu a Wet. Fu dati ede, wan sma ben musu puru den na ondro a fluku dati.​—Gal. 3:13.

15. Fu sortu blesi di libisma sa kisi, David ben skrifi?

¹⁵ Baka di Moses dede, dan Yehovah meki tra Bijbel skrifiman taki fu a howpu di a gi libisma fu libi fu têgo (Ps. 21:4; 37:29). Fu eksempre, a psalm skrifiman David ben skrifi wan psalm di ben e taki fu a wánfasi di ben de na mindri den tru anbegiman na Sion. Na a kaba fu a Psalm dati a taki: „ Yehovah ben gi a komando taki na drape sma ben o kisi blesi, iya, têgo libi srefi.”​—Ps. 133:3.

16. San Yehovah pramisi libisma te a abi fu du nanga den sani di o pasa na „heri grontapu”?

¹⁶ Yehovah ben meki Yesaya taki wan profeititori di abi fu du nanga têgo libi na grontapu. (Leisi Yesaya 25:7, 8.) Sondu nanga dede de leki wan hebi tapu libisma. Fu taki en leti, den de leki „wan duku” di e domru wi, so taki wi no man buweigi bun. Yehovah e gi a pipel fu en a dyaranti taki a sa swari sondu nanga dede, noso taki a sa puru den sani dati „na heri grontapu”.

17. Sortu sani di a Mesias ben o du o gi libisma na okasi fu kisi têgo libi?

¹⁷ Prakseri sosrefi san a Wet di Gado ben gi Moses ben taki fu a bokoboko fu Asasel. Wán leisi wan yari, tapu a dei pe sma ben kan kisi pardon fu sondu, a granpriester ben musu ’poti en anu na tapu na ede fu a bokoboko di ben de na libi. Dan a ben musu taki fu ala den  fowtu di den Israelsma ben meki. A ben musu poti ala den ogri disi na tapu na ede fu a bokoboko, èn a bokoboko ben e tyari ala den sondu go na ini a sabana’ (Lef. 16:7-10, 21, 22). Yesaya ben taki dati te a Mesias ben o kon, dan a ben o du wan srefi sortu sani. A ben o tyari „siki”, „pina” nanga „den sondu fu furu sma” gowe, èn na so a ben o opo a pasi gi libisma fu kisi têgo libi.​—Leisi Yesaya 53:4-6, 12.

18, 19. Fu sortu howpu Yesaya 26:19 nanga Danièl 12:13 e taki?

¹⁸ Nanga yepi fu Yesaya, Yehovah ben taigi a pipel Israel: ’Den dedewan fu unu o libi. Den dedewan fu mi o opo. Wiki èn bari fu prisiri, un sma di e tan na ini a doti! Bika a dow fu yu de leki a dow fu maluw-bon. Grontapu o meki den dedewan di no man du noti, komoto na ini en, neleki fa wan pikin e komoto na ini en mama bere’ (Yes. 26:19). Den Hebrew Buku fu Bijbel e sori krin taki libisma kan abi a howpu fu kisi wan opobaka èn fu libi fu têgo na grontapu. Fu eksempre, di Danièl ben abi pikinmoro 100 yari, dan Yehovah gi en a dyaranti disi: „Yu sa rostu, ma yu sa opo tanapu go na a presi fu yu na a kaba fu den dei.”​—Dan. 12:13.

¹⁹ Fu di Marta ben abi a howpu taki den dedewan ben o kisi wan opobaka, meki a taigi Yesus a sani disi fu en dede brada: „Mi sabi taki a o kon na libi baka te na opobaka o de na tapu a lasti dei” (Yoh. 11:24). A de so taki den leri fu Yesus nanga den sani di den disipel ben skrifi nanga yepi fu santa yeye, ben e sori taki a howpu disi no ben o kon tru moro? A de so taki Yehovah e gi libisma na okasi ete fu libi fu têgo na grontapu? Na ini a tra artikel, wi sa poti prakseri na den piki tapu den aksi disi.

[Futuwortu]

Yu kan tyari disi kon na krin?

• Sortu howpu libisma abi, aladi ’den tron soso sani’?

• Sortu buweisi de taki Abraham ben e bribi na ini na opobaka?

• Te yu e luku den sani di Elihu ben taigi Yob, dan sortu howpu dati e gi libisma?

• Fa den Hebrew Buku fu Bijbel e tyari kon na krin taki libisma kan kisi wan opobaka èn taki den kan libi fu têgo na grontapu?

[Aksi fu a tori disi]

[Prenki na tapu bladzijde 5]

Den sani di Elihu ben taigi Yob e gi libisma a howpu taki te fu kaba den no sa kon owru moro èn den no sa dede moro

[Prenki na tapu bladzijde 6]

Danièl ben abi a dyaranti taki a ’ben o opo tanapu go na a presi fu en na a kaba fu den dei’