Libisma kon sabi baka taki den kan libi fu têgo na grontapu

„O Danièl, kibri den wortu . . . teleki a ten fu a kaba. Furu sma sa go-kon, èn a tru sabi o lai srefisrefi.”​—DAN. 12:4.

1, 2. Na sortu aksi wi sa poti prakseri na ini na artikel disi?

MILYUNMILYUN sma na ini a ten disi e frustan krin san na a howpu di Bijbel e gi sma taki den kan libi fu têgo na ini wan paradijs na grontapu (Openb. 7:9, 17). Di Gado meki den fosi tu libisma, dan a sori den taki a no ben meki den fu libi wan tu yari nomo, ma fu têgo.​—Gen. 1:26-28.

² A pipel fu Israel ben abi a howpu tu taki Gado ben o meki den kon de volmaakti baka, neleki fa a ben de nanga Adam na ini a bigin. Den Kresten Griki Buku fu Bijbel e sori san Gado o du fu meki libisma kisi têgo libi na ini a Paradijs na grontapu. Sobun, fu san ede a ben musu kon na krin baka taki libisma kan abi a howpu disi? Fa a howpu disi kon na krin, èn fa milyunmilyun sma kon sabi fu en?

Sma no ben sabi moro san na a trutru howpu

3. Fu san ede a no e fruwondru wi taki sma no ben man kon sabi taki den kan abi a howpu fu libi fu têgo na grontapu?

³ Yesus ben taki dati falsi profeiti ben o drai den leri fu en, èn den ben o kori furu sma (Mat. 24:11). Na apostel Petrus ben warskow den Kresten: „Falsi leriman o de tu na un mindri” (2 Petr. 2:1). Na apostel Paulus ben taki dati ’wan ten ben o kon taki sma no ben o frudrage a bun leri, ma na fu di densrefi ben o wani, meki den ben o suku leriman gi densrefi fu switi den yesi nanga sani di densrefi ben o wani yere’ (2 Tim. 4:3, 4). Satan e kori sma nanga yepi fu falsi Kresten leri, so taki den no e kon sabi den moi tru tori di e tyari kon na krin san Gado o du gi libisma èn gi grontapu.​—Leisi 2 Korentesma 4:3, 4.

4. Na ini sortu howpu den falsi kerki fesiman no ben wani bribi?

⁴ Den Buku fu Bijbel e sori taki a Kownukondre fu Gado na wan tirimakti na hemel di sa broko ala libisma tirimakti na pisipisi, èn a sa tyari wan kaba kon na den (Dan. 2:44). Na a ten fu a Dusun Yari Tiri fu Krestes, wan engel sa sroto Satan na ini wan dipi peti di no abi gron. Boiti dati, den dedewan sa kisi wan opobaka, èn libisma na grontapu sa kon de volmaakti baka (Openb. 20:1-3, 6, 12; 21:1-4). Ma den falsi kerki fesiman fu Krestenhèit teki tra leri abra, èn den e leri sma den sani dati. Fu eksempre, a Kerki Tata Origenes fu Aleksandria, ben e krutu sma di ben e bribi taki a Dusun Yari Tiri ben o tyari blesi kon gi libisma na grontapu. Wan buku e taki dati a sabiman fu a Lomsu Bribi, namku Augustinus fu Hippo (fu den yari 354-430), „no ben e bribi taki wan Dusun Yari Tiri o de” (The Catholic Encyclopedia). *

5, 6. Fu san ede Origenes nanga Augustinus no ben e horibaka gi a leri di e taki dati a Dusun Yari Tiri o tyari blesi kon gi libisma na grontapu?

⁵ Fu san ede Origenes nanga Augustinus no ben wani bribi na ini a Dusun Yari Tiri? Origenes ben e bribi a Griki leri di e taki dati a sili no man dede. Kerki leriman Werner Jaeger e taki dati, na fu di Origenes ben e bribi tranga na ini den sani di Plato ben leri sma fu a sili, meki a „moksi a Kresten bribi nanga a falsi leri fu Plato di ben e taki dati a sili no man dede”. Na so Origenes meki sma kon bribi taki den blesi fu a Dusun Yari Tiri, no ben abi fu du nanga grontapu, ma nanga hemel.

 ⁶ Augustinus ben abi 33 yari di a tron wan memre fu Krestenhèit. Ma fosi a ben teki a bribi disi, a ben e horibaka gi den leri fu Plotinus, di ben kon nanga den leri fu en na ini a di fu dri yarihondro. Den leri fu Plotinus ben komoto fu den leri fu Plato. Aladi Augustinus ben tron wan memre fu Krestenhèit, toku a tan hori ensrefi na den leri fu Plotinus. Wan buku e taki: „Augustinus ben de a moro prenspari sma di moksi den leri fu a Nyun Testamenti nanga den leri fu Plato” (The New Encyclopædia Britannica). Wan tra buku e sori taki Augustinus fruklari taki a Dusun Yari Tiri di Openbaring kapitel 20 e taki fu en, „na wan tori nomo di e prenki wan tra sani”. A buku e taki moro fara: „Bakaten, kerki leriman di ben e horibaka gi a Kresten bribi di ben moksi nanga Griki leri, kon bribi a sani dati di Augustinus ben taki. Te fu kaba, den no ben e horibaka moro gi a leri di e taki dati a Dusun Yari Tiri o tyari blesi kon gi libisma na grontapu” (The Catholic Encyclopedia).

7. Sortu falsi leri meki taki libisma kon lasi a howpu di den ben abi fu libi fu têgo na grontapu? Fa dati pasa?

⁷ A howpu di libisma abi taki den kan libi fu têgo na grontapu, lasi gowe fu di sma bigin bribi wan leri di ben komoto fu Babilon, èn di panya na heri grontapu. Dati na a leri di e taki dati libisma abi wan sili di no man dede, èn taki a sili dati e tan fu wan pisi ten nomo na ini wan libisma skin. Di Krestenhèit teki a leri dati abra, dan kerki leriman drai son tekst na ini Bijbel fu meki a gersi leki ala bun sma kan abi a howpu fu go na hemel. Soleki fa a leri disi e sori, dan wan sma en libi na grontapu na fu wan pisi ten nomo. Iya, a libi dati na wan tesi di musu tyari kon na krin efu a sma dati warti nofo fu kisi libi na hemel. Wan srefi sortu sani pasa nanga a howpu di den Dyu ben abi fosi, taki den ben kan libi fu têgo na grontapu. Safrisafri den Dyu bigin bribi a Griki leri di e taki dati a sili no man dede, èn te fu kaba a sani disi meki taki den kon lasi a howpu di den ben abi fosi fu libi fu têgo na grontapu. Ma te a abi fu du nanga a sili, dan Bijbel e leri wan heri tra sani! Bijbel e taki dati libisma a no yeye, ma den na skin nanga brudu. Yehovah ben taigi a fosi man: „Na fu doti yu meki” (Gen. 3:19). A presi pe libisma o tan fu têgo, a no hemel, ma na grontapu.​—Leisi Psalm 104:5; 115:16.

Sma e kon sabi a tru bribi baka

8. San son sabiman fu a di fu 16 yarihondro ben taki fu a howpu di libisma kan abi?

⁸ Furu Kerki di e taki dati den e horibaka gi den Kresten leri, no e leri sma taki den kan abi a howpu fu libi fu têgo na grontapu. Ma aladi dati de so, toku Satan no ben man kibri a tru leri gi ala sma. Na ini den hondrohondro yari di pasa, wan tu Bijbel ondrosukuman di ben e ondrosuku sani finifini, kon sabi wan tu fu den tru leri fu Bijbel. Den man disi ben kon frustan pikinso fa Gado o meki libisma kon de volmaakti baka (Ps. 97:11; Mat. 7:13, 14; 13:37-39). Na a ten fu a di fu 16 yarihondro, difrenti sma ben e vertaal a Bijbel, èn den ben e meki moro Bijbel tu. Na so moro nanga moro sma ben kon abi den Santa Buku fu Bijbel. Na ini 1651, wan sabiman ben skrifi dati sensi di Adam sondu, libisma „lasi a grani fu libi na ini a Paradijs, èn fu libi fu têgo na grontapu”. Sobun, nanga yepi fu a Krestes, „ala sma o man libi na grontapu”. (Leisi 1 Korentesma 15:21, 22.) Wán fu den moro pôpi puwema  skrifiman di e taki Ingrisitongo, na John Milton (1608-1674). A man disi ben skrifi a puwema di nen Paradise Lost (A paradijs di lasi gowe). A ben skrifi ete wan puwema di ben taki moro fara fu a tori dati, èn a puwema dati nen Paradise Regained (A paradijs di seti kon bun baka). Na ini den puwema fu en, Milton skrifi fu a blesi di reti-ati sma sa kisi na ini wan paradijs na grontapu. Aladi Milton ben e studeri Bijbel furu yari langa, toku a kon si taki sma noiti no ben o man frustan den tru tori fu Bijbel finifini, solanga a denoya fu Krestes no ben doro.

9, 10. (a) San Isaac Newton ben skrifi fu a howpu di libisma kan abi? (b) Fu san ede Newton ben e denki taki a denoya fu Krestes ben de farawe ete?

⁹ A pôpi sabiman, Sir Isaac Newton (1642-1727), trutru ben wani sabi moro tu fu Bijbel. A ben e frustan taki den santawan o kisi wan opobaka fu go libi na hemel, èn taki den sa tiri makandra nanga Krestes, sondro taki sma o man si den (Openb. 5:9, 10). Ma luku san a ben skrifi fu den sma di ben o de na ondro a tiri fu a Kownukondre: „Baka te Gado krutu libisma, dan sma o tan libi na grontapu, èn a no sa de gi 1000 yari nomo, ma fu ala ten.”

¹⁰ Newton ben e bribi taki a denoya fu Krestes ben o doro baka wan tu hondro yari. A historia skrifiman Stephen Snobelen ben taki: „Wan reide fu san ede Newton ben e bribi taki a Kownukondre fu Gado ben de farawe ete, na fu di a ben e si taki furu sma ben e bribi na ini a falsi leri fu a Dri-wánfasi. Newton no ben e agri nanga a leri dati kwetikweti.” A bun nyunsu ben kibri ete, èn Newton no ben e si nowan enkri Kresten grupu di ben kan preiki a nyunsu dati. A ben skrifi: „Sma sa kon frustan den profeititori fu Danièl èn den di fu Yohanes [den di fu Yohanes skrifi na ini a buku Openbaring], na ini a ten fu a kaba.” Newton ben taki: „Soleki fa Danièl e sori, dan na a ten dati, furu sma sa go-kon, èn a tru sabi o lai srefisrefi. Bika na Evangelie musu preiki na ala kondre, fosi a bigi banawtu èn a kaba fu grontapu doro. Ipi-ipi sma sa hori palmtaki na ini den anu èn den o pasa a bigi banawtu disi libilibi. Ma dati no o pasa efu sma no e preiki na Evangelie fosi a bigi banawtu disi doro.”​—Dan. 12:4; Mat. 24:14; Openb. 7:9, 10.

11. Fu san ede furu sma na ini den dei fu Milton nanga Newton, no kon sabi fu a trutru howpu di libisma kan abi?

¹¹ Na ini den dei fu Milton nanga Newton, sma ben kan kisi bigi problema te den ben e kon nanga leri di no ben e kruderi nanga den leri fu a kerki. Fu dati ede, furu fu den sani di den tu man disi ben skrifi fu Bijbel, no kon na doro teleki baka di den dede. Na ini a di fu 16 yarihondro, son sma drai baka gi a Lomsu Kerki fu di den no ben e agri nanga wan tu fu den leri fu a kerki dati. Wi kon sabi den sma disi leki Protestantsma. Ma toku, den tan horibaka gi a leri di e taki dati a sili no man dede. Boiti dati, furu fu den prenspari Protestant kerki tan leri sma a sani di Augustinus ben e bribi, namku taki a Dusun Yari Tiri no ben de gi a ten di e kon, ma taki a ben pasa kaba. Sma kisi moro sabi na ini a ten fu a kaba?

„A tru sabi o lai srefisrefi”

12. O ten a tru sabi ben o lai srefisrefi?

¹² Danièl ben taki dati wan moi sani ben o pasa „na ini a ten fu a kaba”. (Leisi Danièl 12:3, 4, 9, 10.) Yesus ben taki: „Na a ten dati den regtfardikiwan sa brenki leki a son” (Mat. 13:43). Fa a du kon taki a tru sabi kon lai na ini a ten fu a kaba? Meki wi poti prakseri na wan tu sani di pasa na ini a pisi ten fosi a yari 1914, a yari di a ten fu a kaba bigin.

13. San Charles Taze Russell ben skrifi baka di a ondrosuku a tori di e taki dati libisma sa kon de sondro sondu?

¹³ Na a kaba fu a di fu 18 yarihondro, wan tu reti-ati sma ben e suku fu kon frustan ’na eksempre di e sori sma den bun sani di Yesus leri den’ (2 Tim. 1:13). Wan fu den sma dati ben de Charles Taze Russell. Na ini 1870, en nanga wan tu sma di ben e suku a tru bribi tu, seti wan grupu fu studeri Bijbel nanga makandra. Na ini 1872, den ondrosuku a tori di e taki dati libisma sa kon de sondro sondu. Bakaten, Russell skrifi: „Teleki a ten dati, wi no ben man si krin taki a gemeente fu salfu Kresten di ben e kisi tesi now, ben o kisi wan heri tra blesi leki a wan di tra reti-ati libisma ben o kisi.” Den reti-ati libisma dati sa „kon volmaakti baka neleki fa a ben de nanga Adam, a tata èn na edeman fu den, di a ben de na ini Eden”. Russell ben agri taki tra sma ben yepi en  fu kon frustan Bijbel moro bun. Suma ben de den sma disi?

14. (a) Fa Henry Dunn ben e frustan den sani di skrifi na Tori fu den Apostel 3:21? (b) Soleki fa Dunn ben taki, dan suma o kisi têgo libi na grontapu?

¹⁴ Henry Dunn ben de wan fu den sma dati. A ben skrifi fu a ten te ’ala sani o meki kon bun baka, soleki fa Gado ben taki nanga yepi fu den santa profeiti fu en fu owruten’ (Tori. 3:21). Dunn ben sabi taki te ala sani o meki kon bun baka na a ten fu a Dusun Yari Tiri, dan libisma na grontapu o kon de sondro sondu baka. Dunn ben ondrosuku wan tra tori tu di ben e dangra furu sma. Iya, furu sma ben e aksi densrefi a sani disi: „Suma o kisi têgo libi na grontapu?” Dunn ben tyari kon na krin taki milyunmilyun sma sa kisi wan opobaka, den sa kon sabi den tru tori fu Bijbel, èn den sa kisi na okasi fu sori bribi na ini Krestes.

15. San George Storrs ben kon sabi fu na opobaka?

¹⁵ Na ini 1870, George Storrs ben kon frustan tu taki den wan di no ben leri sabi Gado ete, sa kisi wan opobaka, èn den sa kisi na okasi tu fu libi fu têgo. Nanga yepi fu Bijbel, Storrs kon si tu taki te wan sma di kisi wan opobaka no e teki na okasi disi, dan a sma disi „sa dede, awansi a ’sondari dati abi wan hondro yari’” (Yes. 65:20). Storrs ben e libi na ini Brooklyn, New York, èn a ben tyari wan tijdschrift kon na doro di ben nen Bible Examiner.

16. Fu san ede a grupu fu Bijbel Ondrosukuman ben de heri tra fasi leki den kerki fu Krestenhèit?

¹⁶ Russell ben leri fu Bijbel taki a ten ben doro fu meki a bun nyunsu bekènti na heri grontapu. Sobun, na ini 1879, a bigin tyari a tijdschrift kon na doro di nen Zion’s Watch Tower and Herald of Christ’s Presence. Na ini a ten disi, a tijdschrift dati nen The Watchtower Announcing Jehovah’s Kingdom (A Waktitoren—A e taki fu Yehovah Kownukondre). Fosi, wan tu sma nomo ben e frustan krin san na a trutru howpu di libisma kan abi. Ma now, grupu Bijbel Ondrosukuman na ini furu kondre ben e kisi a tijdschrift The Watchtower, èn den ben e studeri en tu. Den Bijbel Ondrosukuman disi ben e bribi taki wan pikin grupu nomo ben o go na hemel, ma taki milyunmilyun sma ben o kisi volmaakti libi na grontapu. Fu di a grupu disi ben e bribi a sani disi, meki a ben de heri tra fasi leki furu fu den kerki fu Krestenhèit.

17. Fa tru sabi kon lai na grontapu?

¹⁷ A pisi ten di Bijbel e kari „a ten fu a kaba”, bigin na ini 1914. A de so taki a tru sabi di ben abi fu du nanga a howpu di libisma kan abi, ben  kon lai na a ten dati? (Dan. 12:4) Na a ten fu 1913, den lezing di Russell ben e hori, ben kon na doro na ini 2000 difrenti koranti, èn ala nanga ala 15.000.000 sma ben e leisi den. Na a kaba fu 1914, moro leki 9.000.000 sma na dri kontren fu grontapu ben si a „Photo-Drama der Schepping”. Dati ben de wan programa di ben e sori felem nanga prenki di ben abi fu du nanga a Dusun Yari Tiri fu Krestes. Fu 1918 te go miti 1925, den futuboi fu Yehovah hori a lezing di nen „Milyunmilyun sma di e libi now no sa dede noiti”, na ini moro leki 30 tongo na heri grontapu. A lezing disi ben e taki fu a howpu di Gado gi wi fu libi fu têgo na grontapu. Na a ten fu 1934, den Kotoigi fu Yehovah kon si taki den wan di abi a howpu fu libi fu têgo na grontapu, musu teki dopu. A sani disi gi den moro deki-ati fu preiki a bun nyunsu fu a Kownukondre. Na ini a ten disi, milyunmilyun sma de nanga tangi taki Yehovah gi den a howpu fu libi fu têgo na grontapu.

„Tumusi moi fri” e wakti libisma!

18, 19. Soleki fa Yesaya 65:21-25 e sori, dan fa a libi sa de na ini a ten di e kon?

¹⁸ Nanga yepi fu santa yeye, a profeiti Yesaya skrifi fu a libi di Gado wani taki a pipel fu en musu abi na grontapu. (Leisi Yesaya 65:21-25.) Yesaya ben skrifi den wortu dati sowan 2700 yari pasa. Soleki fa a sori, dan wan tu bon fu a ten dati, de na libi ete na ini a ten disi. Fa yu ben o feni en fu libi so langa, sondro fu kon swaki èn sondro fu kon siki?

¹⁹ Son sma e taki dati a libi de leki wan syatu waka fu wan beibi en bedi go na a grebi. Ma a libi no sa de so syatu moro. Na presi fu dati, a libi sa tan gi sma okasi fu bow sani, fu prani sani, èn fu leri sani. Prakseri o furu mati yu o man abi. A matifasi di yu sa abi nanga den sma dati sa kon moro bun doronomo. Fu tru, na a ten dati, den „pikin fu Gado” sa abi „kefalek bigi fri” na grontapu!​—Rom. 8:21.

[Futuwortu]

Yu kan tyari disi kon na krin?

• Fa a du kon taki furu sma no ben sabi moro fu a howpu di Gado gi libisma?

• San son sma di ben e leisi Bijbel, kon frustan na ini a di fu 16 yarihondro?

• Fa a tru howpu di Gado gi libisma kon moro krin di a yari 1914 ben e doro?

• Fa a sabi di abi fu du nanga a howpu di libisma kan abi, kon lai?

[Aksi fu a tori disi]

[Prenki na tapu bladzijde 13]

A puwema skrifiman John Milton (na a kruktu-anusei) nanga a sabiman Isaac Newton (na a reti-anusei) ben sabi taki Gado gi libisma a howpu fu libi fu têgo na grontapu

[Prenki na tapu bladzijde 15]

Den Bijbel Ondrosukuman fu fosi ben kon si nanga yepi fu Bijbel, taki a ten ben doro fu meki a heri grontapu kon sabi fu a trutru howpu di libisma kan abi