’Yehovah e prisiri nanga den’

WAN libisma en fesi abi moro leki 30 titei. Fu eksempre, te wan sma e lafu, dan 14 fu den titei disi e wroko makandra! Efu yu no ben abi den titei disi, dan fa yu ben o taki nanga trawan? Sma ben o lobi fu taki nanga yu? Kwetikweti. Ma te dofusma e taki nanga trawan, dan den no e gebroiki den titei fu den fesi soso fu meki sma arki den nanga moro prisiri. Te dofusma e taki tori, dan den e gebroiki den titei fu den fesi, èn den e meki sani tu nanga den anu. Na so den man meki trawan kon sabi heri bun fa den e denki fu sani. Furu sma fruwondru fu si fa Dofusma-tongo e yepi dofusma fu tyari soifri kon na krin fa den e firi èn san den e denki.

Na ini den yari di pasa, dofusma na heri grontapu kon si wan fesi fu wan sma. Tra fasi leki iniwan sma en fesi, a fesi fu a sma dati e sori krin fa a sma e firi èn fa a e denki. Na agersi fasi, dofusma kon si a „fesi fu Yehovah” (Krag. 2:19). A no now fosi a sani disi e pasa. Langa ten kaba, Yehovah sori bigi lobi gi dofusma. A du dati srefi na ini a ten fu owruten Israel (Lef. 19:14). Na ini a ten disi, a de krin fu si tu taki Yehovah lobi dofusma. Bijbel e taki: „[Gado] wani taki ala sortu sma musu kisi frulusu èn taki den musu kon sabi a waarheid soifri” (1 Tim. 2:4). Te yu e luku en bun, dan furu fu den dofusma di e kon sabi den tru tori fu Gado, e kon si a fesi fu En. Fa dofusma man du disi, aladi den no man yere? Fosi wi sa piki na aksi dati, dan meki wi go luku fu san ede Dofusma-tongo prenspari so gi dofusma.

Dofusma e leri nanga yepi fu den sani di den e si

Sma abi wan lo fowtu denki fu dofusma èn fu Dofusma-tongo. Wi sa yepi yu fu kon frustan wan tu sani moro bun. Dofusma man rèi oto. A muilek srefisrefi gi den fu kon frustan san wan sma e taki, te den musu luku nomo fa a sma en mofo e buweigi te a e taki. Dofusma-tongo no abi noti fu du nanga Braille, noso den letter di brenisma e leisi nanga den finga. Te sma e taki Dofusma-tongo dan a no de so nomo taki den e meki ala sortu sani nanga den anu nanga den fesi fu meki trawan kon frustan san den wani taki. A no de so taki dofusma na heri grontapu e taki Dofusma-tongo na a srefi fasi. Boiti dati, dofusma na ini wan spesrutu kontren fu wan kondre, e taki Dofusma-tongo tra fasi leki dofusma na ini wan tra kontren fu a srefi kondre dati.

Dofusma man leisi? Son dofusma man leisi bun, ma gi furu dofusma a muilek fu leisi. Fu san ede? Fu di den sani di skrifi na tapu papira, na sani di sma skrifi fu di den man taki. Prakseri fa a de te wan pikin di man yere e leri wan tongo. Sensi a pikin gebore, a de na mindri sma di man taki a tongo fu a kondre dati. Fosi yu denki, a pikin man gebroiki difrenti wortu fu taigi wan sma wan sani. A sani disi e kon fu ensrefi, fu di a pikin e yere fa tra sma e taki. Sobun, te pikin di man yere e bigin leisi, dan den abi fu leri nomo taki den sani di skrifi na tapu papira na den sani di den e yere èn di den sabi kaba.

Prakseri now taki yu de na ini wan tra kondre, èn yu e tanapu na ini wan grasi kamra pe yu no man yere srefisrefi san e pasa na dorosei. Noiti yu no yere fa den sma fu a kondre dati e taki. Ibri dei, den sma fu a kondre dati e kon tanapu na fesi a grasi kamra, èn den e pruberi fu taki nanga yu. Yu no man yere san den e taki. Yu e si nomo fa den  mofo e buweigi. Fu di den e si taki yu no man frustan den, meki den e skrifi den sani di den wani taigi yu na tapu wan pisi papira, èn den e hori a papira na fesi a grasi so taki yu kan leisi en. Den e denki taki yu o man frustan san den skrifi. Yu denki taki yu ben o man frustan den sani dati? A no de fu taki, dati yu ben o feni en muilek fu frustan den sma dati. Fu san ede? Fu di den skrifi sani na ini wan tongo di noiti ete yu ben yere. Na so a de nanga furu dofusma.

Dofusma-tongo e yepi dofusma heri bun fu taki nanga trawan. Te wan dofusma e meki sani nanga en anu fu meki trawan frustan san a wani taigi den, dan a de neleki a e meki wan prenki nanga en anu. Den sani di a e meki nanga en anu èn nanga en fesi, a no lawlaw sani, ma na so sma e taki Dofusma-tongo. Na so a sma disi e taki wan tongo di e yepi trawan fu si nanga den ai san a wani taigi den.

Fu taki en leti, te wan dofusma e taki nanga trawan, dan pikinmoro ibri sani di a e meki nanga en anu, en skin, nanga en fesi, wani taki wan sani. Wan dofusma no e meki sani nanga en fesi fu soso. Den sani di a e meki nanga en fesi prenspari srefisrefi gi tra dofusma fu kon sabi san a wani taigi den. Luku na eksempre disi: Te wan dofusma e poti wan aksi gi wan trawan, dan a fasi fa a e poti en fesi e sori efu a wani taki a tra sma musu prakseri fu wan tori, noso efu a sma musu piki iya, noso no. Te wan dofusma e poti aksi soleki suma, san, pe, o ten, fu san ede, noso fa, dan a e poti en fesi na wan tra fasi. A fasi fa wan dofusma e buweigi en mofo e sori o bigi noso o pikin wan sani de, noso nanga omeni krakti wan sma du wan sani. A fasi fa wan dofusma e buweigi en ede, a fasi fa a e opo en skowru, èn den sani di a e meki nanga en fesi èn nanga en ai, na fu meki tra sma kon frustan krin san a wani taigi den.

Den sani di a dofusma e meki nanga en anu, en fesi, nanga en ai, e gi tra dofusma prisiri fu luku san den abi fu taki. Dofusma di man taki Dofusma-tongo bun, kan taki fu ala sortu sani. Den man singi, ma den man taki tu fu tori di abi fu du nanga masyin. Den man fruteri lobitori, ma den man fruteri lafutori tu. Den man taki fu sani di sma man si èn man fasi, ma den man taki tu fu sani di sma no man si èn no man fasi.

Publikâsi na ini Dofusma-tongo e yepi sma

Te sma e taki Dofusma-tongo fu yepi wan dofusma fu kon sabi Yehovah, dan na wan agersi fasi, a dofusma dati man yere a boskopu, èn a man poti „bribi” na ini a Sma fu pe a boskopu e komoto. Fu dati ede, Yehovah Kotoigi du ala muiti fu preiki gi dofusma na heri grontapu, èn fu gi den publikâsi di kan yepi den (Rom. 10:14). Na heri grontapu, 58 grupu de now di e vertaal publikâsi na ini Dofusma-tongo. Boiti dati, publikâsi na ini Dofusma-tongo de fu kisi tapu DVD na ini 40 difrenti Dofusma-tongo. Ala den sani disi tyari bun bakapisi kon?

Luku na eksempre fu Jeremy. A yonkuman disi en papa nanga mama dofu. A e taki: „Mi sabi ete fa mi papa ben e tan na ini en sribikamra omeni yuru langa, fu pruberi fu studeri wan tu paragraaf nomo fu wan artikel na ini A Waktitoren. A ben wani kon frustan san ben skrifi na ini den  paragraaf dati. Wantronso mi papa lon komoto na ini a kamra, èn a bigin meki sani nanga en anu. Na ini Dofusma-tongo, dati ben wani taki: ’Mi e frustan en! Mi e frustan en!’ Yu ben kan si taki a ben breiti srefisrefi. Baka dati a bigin fruteri mi san ben skrifi na ini den paragraaf. Mi ben abi twarfu yari nomo na a ten dati. Mi leisi den paragraaf esi-esi, èn baka dati, mi taki na ini Dofusma-tongo: ’Papa, mi no denki taki na dati skrifi dyaso. Na artikel e taki . . . ’ Ne a meki sani baka nanga en anu fu sori mi taki mi no ben musu taigi en san ben skrifi na ini na artikel, èn a drai go baka na ini en kamra fu go luku gi ensrefi san na artikel ben e taki. Noiti mi no sa frigiti fa a ben e sari di a waka go baka na ini a sribikamra. Ma mi no sa frigiti tu fa mi ben breiti fu si taki a ben e du so furu muiti. Ma fu di Dofusma-tongo publikâsi de fu kisi now tapu DVD, meki mi papa man frustan moro bun san skrifi na ini den Waktitoren. Te mi e si fa a e prisiri fu taki fu a lobi di a abi gi Yehovah, dan dati e naki mi ati trutru.”

Luku sosrefi na ondrofenitori fu wan Kotoigi trowpaar di ben taki nanga Jessenia, wan yongu dofu uma na ini Chili. A trowpaar disi kisi primisi fu Jessenia en mama fu sori Jessenia a DVD Mijn boek met Bijbelverhalen. A DVD disi ben meki na ini a Dofusma-tongo fu Chili. A trowpaar disi ben skrifi: „Di Jessenia bigin luku a DVD, dan a bigin lafu, èn baka dati a bigin krei. Di en mama aksi en fu san ede a ben e krei, dan a taki dati a ben e krei fu di a ben lobi den sani di a ben e si tapu a DVD. Na so en mama kon si taki a meisje fu en ben man frustan ala sani tapu a DVD.”

Wan dofu uma di e libi na wan boitipresi fu Venezuela, ben abi wan pikin kaba, èn a ben de nanga bere fu wan trawan. En nanga en masra ben feni taki den no ben kan meki ete wan pikin, fu di den no ben o abi moni fu sorgu a pikin dati. Dati meki den ben e prakseri fu puru a bere disi. Sondro taki Yehovah Kotoigi ben sabi fu a tori disi, den go na a oso fu den sma, èn den sori den kapitel 12 fu a video Wat verlangt God van ons? (San Gado e aksi foe wi?) na ini Dofusma-tongo fu Venezuela. A les disi e sori fa Gado feni en te sma e purubere èn te den e kiri trawan. Bakaten, na uma taigi den Kotoigi taki a ben breiti srefisrefi taki a ben studeri a les dati. A taigi den taki en nanga en masra bosroiti fu no puru a bere. Den Kotoigi ben man kibri wan libi nanga yepi fu a Dofusma-tongo publikâsi tapu DVD!

Lorraine, wan dofu Kotoigi, e taki: „Di mi bigin studeri Bijbel, dan a ben de neleki mi ben e meki wan bigi puzzel. A ben de neleki wan tu pisi fu a puzzel ben misi, fu di mi no ben man frustan ala sani. Di mi ben man leri moro tru tori fu Bijbel na ini Dofusma-tongo, dan mi kon frustan moro nanga moro sani.” George na wan dofu man, èn a de wan Kotoigi 38 yari langa kaba. A e taki: „A no de fu taki, dati a e gi yu wan bun firi te yu man frustan wan sani. Mi e firi taki den DVD na ini Dofusma-tongo yepi mi trutru fu kon moro krosibei na Gado.”

„Wan konmakandra na ini wan tongo di mi man frustan!”

Boiti taki Yehovah Kotoigi tyari publikâsi kon na doro na ini Dofusma-tongo, den seti gemeente  tu pe konmakandra e hori soso na ini Dofusma-tongo. Nownowde, moro leki 1100 Dofusma-tongo gemeente de na heri grontapu. Na den konmakandra, den dofusma e kisi Bijbel leri na ini den eigi tongo, èn na a fasi fa dofusma e denki. Den konmakandra e hori na wan fasi di e sori lespeki gi a kulturu èn a libi fu dofusma.

Den dofusma e kisi wini fu den sani di den e leri na ini Dofusma-tongo gemeente? Luku na ondrofenitori fu Cyril, di ben tron wan Kotoigi fu Yehovah na ini 1955. Furu yari langa a ben e studeri den publikâsi so bun leki a ben man, èn a ben e go na den Kresten konmakandra doronomo. Son leisi, sma ben de fu vertaal a programa gi en na ini Dofusma-tongo, ma tra leisi baka, sma no ben de fu du dati. Te sma no ben de fu vertaal gi en, dan lobi-ati Kotoigi ben e yepi en. Den brada nanga sisa dati ben e skrifi syatu na tapu papira gi en san den brada na tapu a podium ben e taki. Ma na ini 1989, di a ben de wan Kotoigi sowan 34 yari kaba, dan fosi wan Dofusma-tongo gemeente seti na ini Amerkankondre. A gemeente dati di ben seti na ini New York, ben de a fosiwan na ini a kondre. Fa Cyril ben e firi fu de wan memre fu a gemeente dati? A e taki: „A ben de neleki mi ben e komoto na ini wan bigi dungru busi, kon na ini a leti. Mi no ben man bribi taki wan konmakandra ben o hori na ini mi eigi tongo!”

Den Dofusma-tongo gemeente fu Yehovah Kotoigi, na presi pe dofusma kan kon makandra doronomo fu kisi leri fu Gado èn fu anbegi en. Na ini den gemeente disi, a pipel fu Gado kan meki mati èn den e kisi deki-ati. Dofusma na ini a ten disi e libi na mindri sma di man taki èn di man yere, èn a sani disi ben kan meki en muilek gi den fu leri sabi sma èn fu meki mati. Ma na ini den gemeente fu Yehovah Kotoigi, a makriki srefisrefi gi den fu du den sortu sani dati. Drape dofusma kan teki leri, den kan kon moro krosibei na Gado, èn den kan go na fesi na ini na anbegi. Furu dofu Kotoigi e dini leki furuten preikiman. Sonwan fu den froisi go na tra kondre fu yepi dofusma fu kon leri sabi Yehovah. Kresten brada di dofu e leri fa fu tron bun leriman, den e leri fa fu orga sani bun, èn den e leri tu fa fu tron bun skapuman. Te den dofusma kisi den sortu leri dati, dan furu fu den kan kisi a grani fu kisi frantwortu na ini a gemeente.

Na ini Amerkankondre, moro leki 100 Dofusma-tongo gemeente de èn pikinmoro 80 grupu. Na ini Brasyonkondre, sowan 300 Dofusma-tongo gemeente de, èn moro leki 400 grupu. Pikinmoro 300 Dofusma-tongo gemeente de na ini Meksikow. Rosiakondre abi moro leki 30 fu den gemeente disi, èn 113 grupu. Disi na wan tu eksempre nomo di e sori fa a wroko e go na fesi na heri grontapu.

Yehovah Kotoigi e hori bigi konmakandra nanga kongres tu na ini Dofusma-tongo. A yari di pasa, moro leki 120 kongres hori na heri grontapu na ini difrenti Dofusma-tongo. Den kongres disi e gi dofu Kotoigi okasi fu kon si taki den na memre fu wan Kresten organisâsi di de na heri grontapu, èn di e kisi yeye nyanyan na a reti ten.

Leonard na wan dofu brada, èn a de wan Yehovah Kotoigi moro leki 25 yari kaba. A e fruteri: „Ala ten mi ben sabi taki Yehovah na a tru Gado. Ma noiti mi no ben man frustan krin fu san ede a e gi pasi taki libisma e pina. Son leisi mi ben e atibron nanga en fu a sani dati. Ma wan leisi, wan spesrutu lezing ben hori na wan Dofusma-tongo distrikt kongres, èn te fu kaba mi kon frustan fu san ede Yehovah e gi pasi taki libisma e pina. Na a kaba fu a taki, mi wefi pusu mi na mi seibere, èn a aksi mi: ’Yu ati sidon now?’ Mi ben kan taki ’iya’ nanga mi heri ati! Baka 25 yari, mi de nanga tangi taki noiti mi drai baka gi Yehovah. Ala ten mi ben lobi en, ma mi no ben man frustan en dorodoro. Ma tide a sani dati kon kenki!”

Den de nanga tangi trutru

San dofusma e „si” na Yehovah fesi te den e kon leri sabi en? Den e si taki a lobi den, taki a abi sari-ati gi den, taki a lobi retidu, taki a no sa drai baka gi den, èn taki a e du bun gi den. Den e si tu taki a abi furu tra bun fasi.

Den dofu Kotoigi na heri grontapu e si a fesi fu Yehovah, èn safrisafri den sa si en moro krin. Fu di Yehovah lobi den dofuwan, meki a e ’prisiri srefisrefi nanga den’ (Num. 6:25). Den dofusma dati breiti srefisrefi taki den kon leri sabi Yehovah!

[Prenki na tapu bladzijde 24, 25]

Moro leki 1100 Dofusma-tongo gemeente de na heri grontapu

[Prenki na tapu bladzijde 26]

Yehovah e prisiri srefisrefi nanga den dofusma di wani leri sabi en