A leri di wi e kisi fu Gado bun moro ala trawan

’Mi e si ala sani trutru leki soso sani, fu di a sabi fu Krestes Yesus warti moro ala sani.’​—FIL. 3:8.

1, 2. Sortu bosroiti son Kresten teki, èn fu san ede den du dati?

YONGUYONGU kaba, Robert ben e du en heri bun na skoro. Di a ben abi aiti yari nomo, wan fu den skoromisi fu en go na en oso, èn a taigi en taki a ben kan doro iniwan marki na ini en libi. A skoromisi taigi en taki a ben howpu taki wan dei a ben o tron wan datra. Fu di Robert ben e du en heri bun na skoro, meki a ben kan go na iniwan fu den moro bun universiteit na ini a kondre fu en. Ma aladi furu sma e si a sani dati leki wan okasi di yu e kisi wán leisi nomo na ini yu libi, toku Robert bosroiti fu no go na a universiteit. A bosroiti fu go dini leki gewoon pionier.

² Neleki Robert, furu Kresten, namku yonguwan nanga owruwan, abi okasi fu go na fesi na ini a grontapu disi. Sonwan fu den Kresten dati e bosroiti fu no teki ala den okasi di den e kisi, fu di den wani suku fu doro marki na ini na anbegi fu den (1 Kor. 7:29-31). Fu san ede Kresten soleki Robert e wroko tranga na ini a preikiwroko? A moro prenspari reide fu san ede den e du dati, na fu di den lobi Yehovah. Boiti dati, den e frustan tu o prenspari a leri de di den e kisi fu Gado. Yu e prakseri son leisi fa yu libi ben o waka efu yu no ben kon sabi den tru tori fu Bijbel? Te wi e prakseri den tumusi moi blesi di wi e kisi fu di wi e kisi leri fu Yehovah, dan dati sa yepi wi fu tan hori na prakseri o prenspari a bun nyunsu de. A sa yepi wi tu fu preiki a bun nyunsu disi fayafaya gi trawan.

A de wan bigi grani fu kisi leri fu Gado

3. Fu san ede wi kan de seiker taki Yehovah de klariklari fu gi sondu libisma leri?

³ Fu di Yehovah na wan bun Gado, meki a de klariklari fu gi sondu libisma leri. Luku san a profeititori na Yesaya 54:13 e taki fu salfu Kresten: „Ala den pikin fu yu o de sma di kisi leri fu Yehovah èn ala sani o waka bun gi den.” Fu taki en leti, den wortu disi abi fu du tu nanga den „tra skapu” fu Krestes (Yoh. 10:16). Wan profeititori di e kon tru na ini a ten disi, e sori taki a sani dati tru. Yesaya ben kisi wan fisyun pe a ben si fa sma fu ala kondre ben e go na a tru anbegi. Soleki fa Yesaya e sori, dan den sma disi e taigi makandra: „Kon meki wi go na a bergi fu Yehovah èn na a oso fu a Gado fu Yakob. A o leri wi san na den pasi fu en, èn wi o waka den pasi dati” (Yes. 2:1-3). Iya, a de wan bigi grani fu kisi leri fu Gado!

4. San Yehovah e fruwakti fu den wan di e kisi leri fu en?

⁴ San wi musu du fu kisi leri fu Gado? Wan prenspari sani di wi musu du, na taki wi musu de sma di abi sakafasi èn di de klariklari fu teki leri. A psalm skrifiman David ben skrifi: „Yehovah na wan bun Gado. . . . A o leri den safri-ati sma fa fu waka den pasi fu en” (Ps. 25:8, 9). Èn Yesus ben taki: „Mi e prèise yu na fesi ala sma, mi Tata, Masra fu hemel nanga grontapu, bika yu kibri den sani disi bun gi den koniman nanga den sabiman, ma yu meki den nyofiwan kon sabi disi” (Luk. 10:21). Fu di wi sabi taki Gado „e sori no-frudini bun-ati na den sma di abi sakafasi”, meki wi e kisi moro lobi gi en, a no so?​—1 Petr. 5:5.

5. Fa wi kon sabi den tru tori fu Gado?

⁵ A de so taki wi leki futuboi fu Yehovah kon sabi den tru tori fu Bijbel fu wisrefi? Nôno. Fu taki en leti, noiti wi ben o man kon sabi Gado fu wisrefi. Yesus ben taki: „Nowan sma kan  kon na mi, efu a Tata di seni mi kon no e hari en kon” (Yoh. 6:44). Nanga yepi fu a preikiwroko èn nanga yepi fu en santa yeye, Yehovah e hari safri-ati sma kon na en. Den sma disi na den ’gudu na mindri ala den pipel fu grontapu’ (Hag. 2:7). Yu no breiti taki yu na wan fu den sma di Yehovah hari kon na en Manpikin?​—Leisi Yeremia 9:23, 24.

A leri fu Gado e kenki sma libi

6. Te sma e kon kisi „a sabi fu Yehovah”, dan sortu bigi krakti dati kan abi na den tapu?

⁶ Na wan heri moi fasi, a profeititori fu Yesaya e tyari kon na krin fa libisma e kenki den fasi fu den na ini a ten disi. Sma di ben lobi du ogri fosi, kon tron sma di lobi vrede. (Leisi Yesaya 11:6-9.) Den wan di ben de feanti fu makandra fu di den de fu wan tra ras, fu wan tra kondre, fu wan tra lo, noso fu di den kweki na wan tra fasi, leri fu libi na ini wánfasi nanga makandra. Na wan agersi fasi den ’naki den feti-owru fu den kon tron plugu’ (Yes. 2:4). Fa a du kon taki sma e tyari den bigi kenki disi kon na ini den libi? Den sma disi kon kisi „a sabi fu Yehovah”, èn den du san den leri. Aladi den futuboi fu Gado abi sondu, toku den de na ini wánfasi na heri grontapu. A bun nyunsu abi krakti tapu sma na heri grontapu, èn a yepi sma fu tyari kenki kon na ini den libi. Disi e sori o prenspari a leri de di wi e kisi fu Gado.​—Mat. 11:19.

7, 8. (a) San na wan tu fu den ’sani di tanapu steifi’ èn di sma man broko puru nanga yepi fu a leri di den e kisi fu Gado? (b) San e sori taki a leri di Yehovah e gi sma, e meki taki a e kisi glori?

⁷ Na apostel Paulus ben agersi a preikiwroko di den futuboi fu Gado e du, nanga wan orloku. A ben skrifi: „Den fetisani fu wi no komoto fu libisma, ma Gado meki den krakti nofo fu broko sani puru di tanapu steifi. Bika, den sani di wi e broko puru na den fowtu denki, èn sosrefi ibri hei sani di sma e meki fu gens a sabi fu Gado” (2 Kor. 10:4, 5). San na wan tu fu den ’sani di tanapu steifi’ èn di sma man broko puru nanga yepi fu a leri fu Gado? Wan tu fu den sani dati, na den falsi leri di de leki wan hebi gi sma, den kruktubribi, èn den denki fu libisma (Kol. 2:8). A leri di Gado e gi sma e yepi den fu tapu nanga takru gwenti, èn fu kon abi den fasi fu Gado (1 Kor. 6:9-11). A e yepi sma fu kon abi wan moro bun osofamiri-libi. Èn a e meki taki den wan di no abi howpu, e kon abi wan trutru marki na ini a libi. Na a leri dati sma na ini a ten disi abi fanowdu.

⁸ Wán fu den fasi di Yehovah e yepi sma fu kon abi, na opregtifasi (Hebr. 13:18). Luku na ondrofenitori disi fu wan uma di e libi na ini India. Na uma disi ben bigin studeri Bijbel, èn te fu kaba a tron wan preikiman di no dopu ete. Wan dei, a ben go yepi bow wan Kownukondre zaal. Di a ben e go na oso, dan a feni wan gowtu keti na tapu a gron na wan presi pe bus e stop fu teki sma. A keti ben warti aiti hondro Amerkan dala. Aladi na uma disi ben pôti, toku a tyari a keti go na wan skowtu-oso. A skowtu di ben e wroko drape, no ben man bribi taki na uma ben du so wan sani. Bakaten, wan tra skowtu aksi na uma: „San meki taki yu tyari a keti kon gi wi?” Na uma piki en: „Den sani di mi leri na ini Bijbel, meki taki mi kon kenki. Sobun, mi na wan opregti sma now.” A sani disi naki na ati fu a skowtu, èn a taigi na owruman di ben go nanga na uma na a skowtu-oso: „Moro leki 38 milyun sma e libi na ini a kontren disi. Efu yu kan yepi tin sma fu kon de leki na uma disi, dan dati ben o bun srefisrefi.” Te wi e luku den milyunmilyun sma di kenki den libi fu di den kisi leri fu Gado, dan dati e gi wi furu reide fu prèise Yehovah, a no so?

9. Fa a du kon taki sma man tyari bigi kenki kon na ini den libi?

⁹ Soleki fa wi si, dan sma man tyari bigi kenki kon na ini den libi nanga yepi fu den sani di den e leri na ini Gado Wortu, èn nanga yepi fu a santa yeye di Yehovah e gi den (Rom. 12:2; Gal. 5:22, 23). Kolosesma 3:10 e taki: „Kon tron nyun sma di e kisi nyun fasi nanga yepi  fu soifri sabi, so taki unu e kon gersi a Sma di ben meki unu kisi den fasi disi.” A boskopu di de fu feni na ini Gado Wortu, Bijbel, abi a krakti fu tyari kon na krin fa wan sma de trutru. Èn a kan kenki a fasi fa wan sma e denki fu sani, èn srefi a fasi fa a e firi (Leisi Hebrewsma 4:12). Te wan sma e kon kisi soifri sabi fu Bijbel, èn te a e bigin hori ensrefi na den regtfardiki markitiki fu Yehovah, dan a sma dati kan tron wan mati fu en, èn a e kon abi a howpu fu libi fu têgo.

Yehovah e sreka wi gi a tamara

10. (a) Fu san ede Yehovah na a wan-enkri sma di kan sreka wi gi a tamara? (b) Sortu bigi kenki o pasa heri esi na heri grontapu?

¹⁰ Yehovah na a wan-enkri sma di kan yepi wi fu de srekasreka gi a tamara, fu di a sabi san o pasa na ini a ten di e kon. Yehovah e bosroiti san o pasa nanga libisma na ini a ten di e kon (Yes. 46:9, 10). Bijbel profeititori e sori taki „a bigi dei fu Yehovah de krosibei” (Sef. 1:14). Den sani di Odo 11:4 e taki fu a dei dati, sa kon tru. A tekst dati e taki: „Gudu no o tyari wini kon na a dei fu atibron, ma retidu o kibri sma fu den no dede.” Te a ten doro taki Yehovah o krutu a grontapu fu Satan, dan a wan-enkri sani di o teri, na a bun nen di wi abi na Gado. Moni no o warti notinoti. Fu taki en leti, Esekièl 7:19 e taki: „Na tapu den strati srefi den sa trowe a solfru fu den, èn den eigi gowtu sa tron wan tegu sani.” Fu di wi sabi taki den sani disi o pasa, meki dati kan yepi wi fu teki koni bosroiti.

11. San na wán fasi fa a leri di wi e kisi fu Gado e sreka wi gi a tamara?

¹¹ Wan aparti fasi fa a leri fu Gado e sreka wi gi a dei fu Yehovah, na taki a e yepi wi fu poti den moro prenspari sani na a fosi presi. Luku san na apostel Paulus ben skrifi gi Timoteyus: „Taigi den sma di gudu na ini a grontapu disi taki den no musu abi bigifasi èn taki den no musu frutrow tapu gudu di kan lasi gowe, ma den musu frutrow tapu Gado.” Awinsi wi no abi furu moni, toku wi kan kisi wini fu a rai disi di komoto fu Gado. San wi kan leri fu a rai disi? Wi e leri taki wi no musu kibri gudu, ma na presi fu dati, wi musu meki muiti fu „du bun” èn fu „du furu bun wroko”. Te wi e poti na anbegi fu wi na a fosi presi na ini wi libi, dan wi e „poti wan bun fondamenti gi a tamara, neleki wan gudu di kibri bun” (1 Tim. 6:17-19). Te wi de klariklari fu du den sani disi, dan wi e sori taki wi e frustan sani bun, bika Yesus ben taki: „Sortu bun a sa du wan sma efu a abi heri grontapu, ma a e lasi en libi?” (Mat. 16:26, 27) Fu di a dei fu Yehovah de so krosibei, meki ibriwan fu wi musu aksi ensrefi: ’Pe mi e kibri mi gudu? Mi e dini Gudu, noso mi e dini Gado?’​—Mat. 6:19, 20, 24.

12. Fu san ede wi no musu lasi-ati te son sma no e sori lespeki gi a diniwroko fu wi?

¹² A moro prenspari „bun wroko” di Gado Wortu e taki dati Kresten musu du, na taki den musu preiki a bun nyunsu fu a Kownukondre, èn den musu meki disipel  fu man kibri sma den libi (Mat. 24:14; 28:19, 20). Neleki fa a ben de na ini a fosi yarihondro, na so a de tu taki son sma na ini a ten disi no abi lespeki gi a diniwroko fu wi. (Leisi 1 Korentesma 1:18-21.) Ma dati no wani taki dati a boskopu fu wi no de prenspari, èn taki a no de fanowdu fu gi ibri sma na okasi fu kon abi bribi na ini a boskopu dati, now di ten de ete (Rom. 10:13, 14). Te wi e yepi trawan fu kisi wini fu a leri di Gado e gi sma, dan wi sa kisi furu blesi.

Den kisi blesi fu di den poti a wani fu Gado na a fosi presi

13. Sortu sani na apostel Paulus ben libi na baka fu a bun nyunsu ede?

¹³ Fosi na apostel Paulus ben tron wan Kresten, a ben e kisi leri fu tron wan prenspari sma na ini a Dyu sistema. Di a ben abi sowan 13 yari, a froisi gowe libi a foto Tarsus pe a ben kweki, èn a go tan na Yerusalem. A go drape fu kisi leri fu Gamalièl, wan lespeki leriman fu Wet (Tori. 22:3). Bakaten, furu sma kon sabi Paulus, èn efu a ben tan go doro na a fasi dati, dan kande a ben o tron wan fu den moro prenspari sma na ini a Dyu bribi (Gal. 1:13, 14). Di a teki a bun nyunsu èn di a bigin du a preikiwroko, a libi ala den sani dati na baka. A de so taki Paulus ben e sari fu a bosroiti di a ben teki? Nôno. Fu taki en leti, a ben skrifi: „Mi kan taki dati mi e si ala sani trutru leki soso sani, fu di a sabi fu Krestes Yesus, mi Masra, warti moro ala sani. Mi lasi ala sani, ma fu en ede mi teki a lasi dati, èn mi e si den leki wan ipi doti.”​—Fil. 3:8.

14, 15. Sortu blesi wi e kisi te wi e „wroko makandra nanga Gado”?

¹⁴ Neleki Paulus, Kresten na ini a ten disi de klariklari fu libi wan tu sani na baka fu man preiki a bun nyunsu (Mark. 10:29, 30). Wi e lasi te wi e du dati? Robert, di kari na a bigin fu na artikel, e taki wan sani di e kruderi nanga a denki di furu sma abi. A e taki: „Mi no e sari srefisrefi taki mi teki so wan bosroiti. A furuten diniwroko e gi mi prisiri, èn mi de koloku. Boiti dati, a meki tu taki mi ’kon sabi Yehovah, èn mi kon si taki a bun’. Ibri leisi te mi e libi son sani na baka fu man doro marki na ini a diniwroko fu mi, dan ala ten Yehovah e blesi mi, èn a e gi mi moro leki san mi libi na baka. A de neleki mi no lasi noti. Na presi fu dati, na soso blesi mi e kisi!”​—Ps. 34:8; Odo 10:22.

¹⁵ Kande yu e teki prati wan langa pisi ten kaba na a wroko di wi abi fu preiki èn fu gi sma leri. A no de fu taki dati yu srefi kisi okasi fu kon sabi Yehovah èn fu si taki a bun. Oiti yu ondrofeni fa a santa yeye fu en yepi yu di yu  ben e preiki a bun nyunsu? Yu si fa trawan prisiri di Yehovah opo den ati gi a boskopu? (Tori. 16:14) A de so taki Yehovah yepi yu di a ben muilek gi yu fu teki prati doronomo na a preikiwroko? A opo a pasi gi yu fu du moro na ini a diniwroko? A yepi yu di yu ben de na ini muilek ten? A gi yu a krakti fu tan dini en di yu ben e firi leki yu kon swaki? (Fil. 4:13) Te wi srefi e ondrofeni fa Yehovah e yepi wi na ini a diniwroko fu wi, dan moro nanga moro wi si Yehovah leki wan trutru sma, èn wi o kon moro krosibei na en (Yes. 41:10). A de wan grani fu „wroko makandra nanga Gado” fu gi trawan leri, a no so?​—1 Kor. 3:9.

16. Fa yu e denki fu a muiti di yu e meki fu yepi trawan fu kon sabi Yehovah? Fa yu e denki fu den sani di yu libi na baka?

¹⁶ Furu sma wani du wan sani di sa tyari wini kon gi den, den heri libi langa. Wi si taki, awinsi sortu kefalek sani sma e du na ini a grontapu disi, toku sma e frigiti den sani dati esi-esi. Ma a no de fu taki, dati den sani di Yehovah e du na ini a ten disi fu santa a nen fu en, na sani di a pipel fu en noiti no sa frigiti (Odo 10:7; Hebr. 6:10). Meki wi tan warderi a grani di wi abi fu yepi trawan fu kon sabi Yehovah, fu di dati na wan wroko di wi noiti no sa frigiti.

San yu ben sa piki?

• San Yehovah e fruwakti fu den wan di e kisi leri fu en?

• Fa a leri di Yehovah e gi sma e yepi den fu kon abi wan moro bun libi?

• Sortu blesi wi e kisi te wi e yepi trawan fu kon sabi Yehovah?

[Aksi fu a tori disi]

[Prenki na tapu bladzijde 23]

Den wan di e kisi leri fu Yehovah de na ini trutru wánfasi na heri grontapu

[Prenki na tapu bladzijde 24]

A de wan grani fu „wroko makandra nanga Gado”, a no so?