Mi de na ini a bribi fu mi soso fu plisi mi papa nanga mama?

NA INI Polen, furu sma e taigi Yehovah Kotoigi a sani disi: „Mi gebore na ini a bribi fu mi, èn mi sa dede na ini a bribi fu mi.” Disi e sori taki den sma disi e bribi taki pikin e teki a bribi abra fu den papa nanga mama. A de so taki sma na ini a kontren fu yu abi a srefi denki disi? Te sma abi a denki disi, dan san e pasa nofo tron? We, nofo tron sma e teki prati na a anbegi fu den fu di den e si en leki wan plekti, èn leki wan famiri gwenti. A sani disi kan pasa nanga Yehovah Kotoigi di kweki na ini a tru anbegi?

Dati no ben pasa nanga Timoteyus. A yonkuman disi en mama nanga en granmama ben abi wan tranga bribi, èn den kweki en fu bribi na ini a tru Gado èn fu lobi a Gado disi. Timoteyus ben sabi den Santa Buku fu Bijbel ’sensi di a ben de wan beibi’. Bakaten, Timoteyus, makandra nanga en mama nanga en granmama, kisi na overtoigi taki a Kresten bribi na a tru bribi. A ben ’kon abi bribi’ na ini den sani di a ben yere taki Bijbel e fruteri fu Yesus Krestes, èn dati ben kon fu di ’sma ben overtoigi en’ (2 Tim. 1:5; 3:14, 15). Sobun, aladi Kresten papa nanga mama na ini a ten disi e meki muiti fu yepi den pikin fu den fu tron futuboi fu Yehovah, toku den pikin srefi musu kon kisi na angri fu tron wan futuboi fu Yehovah.​—Mark. 8:34.

Efu wan sma wani dini Yehovah fu di a lobi en, èn efu a wani tan gi yesi na Yehovah awinsi san e pasa, dan a musu kon abi na overtoigi taki na anbegi fu Yehovah na a tru anbegi. Te dati pasa, dan so wan sma o kon abi wan tranga bribi di e kruderi nanga den leri fu Bijbel.​—Ef. 3:17; Kol. 2:6, 7.

A frantwortu di pikin abi

Albert * di kweki na ini wan Kotoigi osofamiri e taki: „Ala ten mi ben sabi taki Yehovah Kotoigi abi a tru bribi, ma a ben muilek gi mi fu libi soleki fa den e leri sma fu libi.” Efu yu na wan yonguwan, dan kande yu abi a srefi denki dati. Fu san ede yu no e meki muiti fu kon sabi moro bun fa Gado wani taki wi musu libi? Disi sa yepi yu fu du a wani fu en nanga prisiri (Ps. 40:8). Albert e taki: „Mi bigin teki a gwenti fu begi Gado. Na ini a bigin, a ben muilek gi mi. Mi ben musu dwengi misrefi fu begi. Ma fosi yu denki, mi kon si taki efu mi e meki muiti fu du san bun, dan Gado o kon lobi mi moro. A sani disi gi mi a krakti fu tyari kenki kon.” Te yu e kon abi wan matifasi nanga Yehovah, dan dati kan meki taki yu e kisi na angri fu du san a e aksi fu yu.​—Ps. 25:14; Yak. 4:8.

 Kande yu lobi prei sport. Efu yu no sabi fa yu musu prei wan sport, dan yu no o man prei en bun, èn a no o switi fu prei en. Ma efu yu e leri fa fu prei a sport dati, èn fa fu prei en bun, dan yu o kon lobi en, a no so? Kande yu ben o suku okasi srefi fu prei a sport. Na so a de tu nanga a Kresten diniwroko. Sobun, teki ten fu sreka gi den Kresten konmakandra. Teki prati na den konmakandra. Awinsi omeni yari yu abi, toku na eksempre fu yu kan de wan deki-ati gi trawan!​—Hebr. 10:24, 25.

Na so a de tu te yu e fruteri trawan fu a bribi fu yu. Yu no musu du disi fu di trawan e fruwakti dati fu yu, ma yu musu du en fu di yu abi lobi gi trawan. Aksi yusrefi den sani disi: ’Fu san ede mi wani fruteri trawan fu Yehovah? Sortu reide mi abi fu lobi Yehovah?’ Yu musu kon sabi Yehovah leki wan Papa di lobi yu. Nanga yepi fu Yeremia, Yehovah ben taki: „Unu sa suku mi, èn unu sa feni mi, bika unu sa suku mi nanga un heri ati” (Yer. 29:13, 14). San yu sa musu du? Jakub e taki: „Mi ben musu kenki a fasi fa mi ben e denki. Sensi di mi ben pikin, mi gwenti go na den konmakandra èn mi e teki prati na a preikiwroko. Ma mi ben bigin du den sani disi sondro taki mi ati ben de na ini a tori. Na di mi kon sabi Yehovah moro bun èn mi kon abi wan bun matifasi nanga en, dan fosi mi bigin teki prati na a tru anbegi nanga mi heri ati.”

Te yu abi bun mati di e gi yu deki-ati, dan dati e yepi yu fu abi prisiri na ini a diniwroko. Wan odo na ini Bijbel e taki: „Te wan sma e waka nanga koni sma, dan ensrefi o kon koni” (Odo 13:20). Sobun, suku mati di e suku fu doro marki na ini a tru anbegi, èn di e dini Yehovah nanga prisiri. Jola e taki: „Di mi bigin abi demakandra nanga yonguwan di e dini Yehovah fayafaya, dan a sani dati gi mi deki-ati. Mi bigin teki prati na a diniwroko doronomo, èn mi e prisiri srefisrefi.”

A frantwortu fu papa nanga mama

„Mi de nanga tangi trutru taki mi papa nanga mama gi mi leri fu Yehovah”, na so Jola e taki. Iya, papa nanga mama kan du furu fu yepi den pikin fu den fu teki bun bosroiti. Na apostel Paulus ben skrifi: „Un papa, . . . tan kweki den [pikin fu unu] nanga a leri fu Yehovah èn frumane den” (Ef. 6:4). A Bijbel rai disi e sori krin taki papa nanga mama abi a frantwortu fu leri den pikin fu den fu kon abi a denki fu Yehovah. Den no musu leri den pikin den eigi denki. Na presi taki yu e gi den pikin fu yu deki-ati fu doro den marki di yu srefi ben wani doro, a ben o moro bun fu gi den deki-ati fu libi soleki fa Yehovah wani!

Yu kan poti den wortu fu Yehovah go dipi na ini na ati fu yu pikin, èn yu kan „taki fu den sani disi te unu e sidon na ini un oso, te unu e waka na strati, te unu e didon, èn te unu opo” (Deut. 6:6, 7). „Wi ben lobi taki fu den difrenti fasi fa tru Kresten kan du furuten diniwroko”, na so Ewa nanga Ryszard di abi dri manpikin, e taki. San ben de a bakapisi? „Yonguyongu kaba, den boi ben wani go tapu a Theokrasia Diniwroko-skoro, den tron preikiman, èn te fu kaba den srefi bosroiti taki den wani teki dopu. Bakaten, den go dini na Bethel, noso leki pionier.”

A de tumusi prenspari taki papa nanga mama e gi den pikin wan bun eksempre. Ryszard e taki: „Wi ben abi a fasti bosroiti fu no libi wan dobru  libi. A fasi fa wi ben de na oso, ben musu de a srefi leki te wi ben de na ini a gemeente.” Fu dati ede, aksi yusrefi a sani disi: ’San den pikin e si te den e luku fa mi e libi? Den e si taki mi lobi Yehovah trutru? Den e si dati te den e arki den begi fu mi? Den e si fa mi e studeri Bijbel? Fa a de nanga a fasi fa mi e denki fu a preikiwroko, fu prisiriten, èn fu gudu? Fa a de nanga den sani di mi e taki fu den tra brada nanga sisa na ini a gemeente?’ (Luk. 6:40) Den pikin fu yu e luku a fasi fa yu e tyari yusrefi na ini yu aladei libi, èn den e si te den sani di yu e taki, no e kruderi nanga den sani di yu e du.

A de prenspari taki papa nanga mama e gi den pikin fu den trangaleri. Ma a Wortu fu Gado e taigi wi fu „leri wan boi fu waka na tapu a yoisti pasi” (Odo 22:6). Ewa nanga Ryszard e taki: „Wi ben e teki ten fu studeri aparti nanga ibriwan fu den pikin fu wi.” A no de fu taki, dati na papa nanga mama musu bosroiti efu a de fanowdu fu studeri aparti nanga ibri pikin. Awinsi san den e bosroiti, papa nanga mama musu hori na prakseri taki ibri pikin abi en eigi fasi. Dati wani taki dati papa nanga mama musu man fiti densrefi makriki na ibri pikin, èn den no musu fruwakti tumusi furu fu den pikin. Fu eksempre, kande yu taigi den pikin fu yu taki a no bun fu arki son poku. Ma a no ben o moro bun fu sori den sortu Bijbel gronprakseri o yepi den fu teki koni bosroiti?

Kande den pikin fu yu sabi soifri san yu e fruwakti fu den, èn kande den e du san yu e aksi fu den. Ma toku yu musu suku fu doro den ati. Hori na prakseri taki, „rai na ini na ati fu wan man de leki dipi watra, ma a man di abi a koni fu si sani krin, na a wan di sa hari en kon na tapu” (Odo 20:5). Abi a koni fu man si sani krin, pruberi fu si efu yu pikin e tweifri fu wan sani di abi fu du nanga a tru anbegi, èn poti prakseri na a tori dati wantewante. No krutu a pikin, ma sori en taki yu e broko yu ede nanga en, èn poti aksi gi en di sa yepi yu fu kon frustan fa yu kan yepi en. Ma luku bun taki yu no e aksi en tumusi furu sani. Te yu e sori yu pikin taki yu e broko yu ede trutru nanga den, dan a o moro makriki gi yu fu yepi den.

A frantwortu fu a gemeente

Efu yonguwan de na ini a gemeente fu yu, dan san yu leki futuboi fu Gado kan du fu yepi den fu  kon abi warderi gi a tru anbegi di den kweki na ini? Aladi papa nanga mama abi a frantwortu fu gi den pikin fu den leri, toku tra memre fu a gemeente, spesrutu den owruman, kan de wan bigi yepi. A de prenspari trutru fu yepi spesrutu den osofamiri pe a papa noso a mama wawan e anbegi Yehovah.

San den owruman kan du fu yepi yonguwan fu kon lobi Yehovah, èn fu gi den a firi taki a gemeente lobi den? Mariusz, di e dini leki owruman na ini wan gemeente na ini Polen, e taki: „Owruman musu taki doronomo nanga den yonguwan. Den no musu taki nanga yonguwan soso te den abi problema, ma den musu taki nanga den na tra okasi tu, soleki na ini a preikiwroko, tapu den konmakandra, noso den kan go luku den na oso.” Owruman kan aksi yonguwan fa den e denki fu a gemeente. Te den e taki nanga den yonguwan fu den sortu sani dati, dan dati kan yepi den yonguwan disi fu kon abi wan moro bun matifasi nanga den brada nanga sisa na ini a gemeente. Boiti dati, den sa firi taki a gemeente lobi den.

Efu yu na wan owruman, dan yu e meki muiti fu kon sabi den yonguwan na ini yu gemeente? Albert, di kari na a bigin fu na artikel disi, e dini now leki owruman. Ma di a ben yongu, a ben kisi difrenti tesi. A e taki: „Di mi ben de wan yonkuman, a ben de fanowdu taki den owruman kon luku mi na oso.” Owruman kan sori tu taki den e broko den ede nanga den yonguwan. Den kan begi gi den taki den e tan dini Yehovah èn taki den e kon moro krosibei na en.​—2 Tim. 1:3.

Te yonguwan e teki prati na a Kresten diniwroko, dan dati e tyari wini kon gi den. Efu den no e du dati, dan kande den sa go feti baka grontapu sani. Fu san ede unu leki bigiwan no e wroko makandra nanga den na ini a preikiwroko? Yu kan tron wan mati fu den? Teki ten fu du spesrutu sani makandra nanga yonguwan, so taki yu kan leri sabi den. Na so den o si yu leki den mati, èn den o frutrow yu. Jola e memre: „Wan pionier sisa ben teki ten fu taki nanga mi. A fosi leisi di mi teki prati nanga mi heri ati na a preikiwroko, na di mi ben wroko nanga en.”

Teki yu eigi bosroiti

Yonguwan, aksi unsrefi a sani disi: ’San na den marki di mi poti na ini a libi? Efu mi no dopu ete, dan mi poti en leki marki fu teki dopu?’ Efu yu e bosroiti fu teki dopu, dan yu musu du dati fu di yu lobi Yehovah nanga yu heri ati. Yu no musu du dati soso fu di yu kweki na ini a bribi dati.

Iya, meki Yehovah tron wan trutru Mati gi yu, èn meki a tru anbegi de wan gudu gi yu. Luku san Yehovah ben taki nanga yepi fu a profeiti Yesaya: „No luku lontu, bika mi na yu Gado.” Yehovah sa de nanga yu, solanga yu na wan mati fu en. Iya, a sa gi yu krakti, èn a sa „hori yu steifi trutru nanga [en] reti-anu fu regtfardikifasi”.​—Yes. 41:10.

[Futuwortu]

[Prenki na tapu bladzijde 4]

Pruberi fu kon sabi san de na ini na ati fu yu pikin

[Prenki na tapu bladzijde 6]

Te yu bosroiti fu teki dopu, dan yu musu du dati fu di yu lobi Yehovah nanga yu heri ati