Mi feni wan marki na ini a libi

Soleki fa Gaspar Martínez fruteri

Fu taki en leti, mi kweki leki wan pôti boi na wan boitipresi, ma mi kon gudu di mi go libi na foto. Ma yu sa si taki den gudu di mi kon abi, no ben de den gudu di mi ben fruwakti fu feni.

MI KWEKI na wan boitipresi pe sani no e gro makriki. Dati ben de na a ten fu den yari baka 1930. A kontren pe mi ben e tan nen Rioja, èn a de na a noordsei fu Spanyorokondre. Di mi ben abi tin yari, mi ben musu gowe libi skoro, ma mi ben leri leisi èn skrifi kaba. Makandra nanga den siksi brada nanga sisa fu mi, mi ben e wroko na ini den gron. Drape mi ben e sorgu gi den skapu, noso mi ben e prani sani na ini den pikin pisi gron di wi ben abi.

Fu di wi ben pôti, meki wi ben e denki taki moni nanga gudu ben prenspari srefisrefi. Wi bigin dyarusu tapu den sma di ben abi moro sani leki wi. Ma toku a beskopu ben taki wan leisi taki den sma na ini a dorpu fu wi ben „lobi Gado moro ala den sma fu den tra dorpu na ini a kontren pe a ben e dini”. Ma a no ben sabi ete taki baka wan pisi ten, furu fu den sma drape ben o drai baka gi a Lomsu bribi.

Mi e suku wan moro bun marki na ini a libi

Mi trow nanga Mercedes, wan meisje fu a srefi dorpu pe mi ben e tan. Fosi yu denki wi ben abi wan boi fu sorgu. Na ini 1957, wi froisi go na a foto Logroño di no ben de fara fu a dorpu fu wi, èn te fu kaba, ala den famiriman fu mi froisi go drape tu. Heri esi, mi kon si taki mi no ben o man meki nofo moni fu sorgu mi osofamiri, fu di mi no ben abi spesrutu koni. Mi ben e broko mi ede pe mi ben kan feni rai. Mi go na wan presi pe sma ben kan leisi buku, èn mi bigin sukusuku, aladi mi no ben sabi san mi ben e suku.

Bakaten, mi yere fu wan radio programa di ben e gi sma okasi fu studeri Bijbel nanga yepi fu brifi. Syatu baka di mi klari a Bijbelstudie dati, dan wan tu sma fu a Protestant Kerki kon na mi. Mi go wan tu leisi na a kerki fu den, ma mi ben kan si kaba taki den fesiman fu a grupu ben e strei nanga makandra. Mi no go moro, èn mi ben e denki taki ala kerki ben de a srefi.

Mi bigin si sani krin

Na ini 1964, wan yonkuman di nen Eugenio kon na wi oso. A ben de wan Yehovah Kotoigi, èn noiti mi no ben yere fu a bribi dati. Ma mi ben breiti taki mi ben kan taki fu Bijbel. Mi ben denki taki mi ben sabi Bijbel bun. Di mi ben e taki nanga Eugenio, dan mi gebroiki wan tu fu den Bijbeltekst di mi kon sabi fu di mi ben e studeri Bijbel nanga yepi fu brifi. Mi pruberi fu strei gi wan tu fu den leri fu a Protestant Kerki, ma na ini mi ati mi no ben e bribi den leri dati.

 Tu leisi wi taki bun langa nanga makandra, ma te fu kaba, mi ben musu agri taki Eugenio ben sabi heri bun fa fu gebroiki a Wortu fu Gado. Mi ben fruwondru fu si fa a ben man feni den tekst èn fa a ben man fruklari den, aladi a no ben kisi so furu skoro leki mi. Eugenio sori mi nanga yepi fu Bijbel taki wi e libi na ini den lasti dei, èn taki heri esi, Gado Kownukondre sa seti grontapu kon tron wan paradijs. A sani disi ben e hari mi prakseri srefisrefi.​—Ps. 37:11, 29; Yes. 9:6, 7; Mat. 6:9, 10.

Mi teki wan Bijbelstudie wantewante. Pikinmoro ala sani di mi ben e leri ben de nyun sani, èn den ben naki mi ati. Den sani di mi leri meki taki mi kon abi nyun marki na ini a libi. Mi ben feni san mi ben suku. Now a no ben de prenspari moro gi mi fu pruberi fu kon abi wan moro gudu libi. Èn den problema di mi ben abi fu feni wan bun wroko, no ben gi mi furu broko-ede moro. Fu san ede mi ben musu broko mi ede nanga den problema dati, te siki nanga dede srefi o kon na wan kaba?​—Yes. 33:24; 35:5, 6; Openb. 21:4.

Heri esi mi bigin fruteri mi famiri den sani di mi ben e leri. Mi fruteri den fayafaya taki Gado e pramisi fu kenki grontapu kon tron wan paradijs pe reti-ati sma kan libi fu têgo.

Mi famiri e poti bribi na ini den tru tori fu Bijbel

Heri esi, pikinmoro 12 fu wi bosroiti fu kon makandra ibri sonde bakadina na mi omu en oso, fu taki fu den pramisi fu Bijbel. Wi ben e du dati sowan tu noso dri yuru langa, ibri wiki. Di Eugenio si taki so wan bigi grupu fu den famiriman fu mi ben wani kon sabi moro fu Bijbel, dan a seti sani fu poti prakseri na ibri osofamiri.

Mi ben abi tra famiriman na ini Durango, wan pikin foto sowan 120 kilometer moro fara, èn Kotoigi no ben e libi drape. Sobun, dri mun baka dati, mi teki wan tu dei fri fu go luku den èn fu fruteri den fu a nyun bribi di mi ben feni. Di mi ben de drape, dan pikinmoro tin fu wi ben e kon makandra ibri wiki, èn mi ben e taki nanga den te musudei mamanten. Den alamala ben lobi fu arki san mi ben abi fu fruteri den. Mi tan drape wan tu dei nomo, èn di a ten doro taki mi ben musu gowe, dan mi libi wan tu Bijbel nanga Bijbel publikâsi gi den. Sensi a ten dati, wi tan poti prakseri na makandra.

Di den Kotoigi doro na ini Durango, pe nowan sma ben preiki ete, dan den feni 18 sma drape di ben de fayafaya fu studeri Bijbel. Den Kotoigi ben de klariklari fu sorgu taki ibri osofamiri ben e kisi wan Bijbelstudie.

Na a ten dati, Mercedes no ben sori ete taki a ben wani kon sabi den tru tori fu Bijbel. Dati no ben kon fu di a no ben wani bribi den leri fu Bijbel, ma moro furu fu di a ben e frede sma. Lanti fu Spanyorokondre ben tapu a wroko fu Yehovah Kotoigi na a ten dati. Dati meki Mercedes ben prakseri taki lanti ben o puru den tu pikin fu wi na skoro, èn taki nowan sma ben o wani bumui nanga wi. Ma di a si taki a heri famiri ben e bribi den tru tori fu Bijbel, dan ensrefi ben wani studeri Bijbel tu.

Na ini wan pisi ten fu pikinmoro tu yari, 40 sma fu mi famiri tron Kotoigi, èn den teki dopu fu sori taki den ben gi densrefi abra na Gado fu dini en. Iya, mi famiri kon abi a srefi marki na ini a libi leki mi. Mi ben feni taki mi ben du wan tumusi prenspari sani. Gado ben gi wi bun furu blesi.

Mi e firi moro koloku aladi mi e kon moro owru

Na ini den 20 yari baka dati, mi gebroiki ala mi ten fu kweki den tu boi fu mi, èn fu yepi a gemeente na ini a kontren dati. Di mi nanga Mercedes froisi go tan na Logroño, sowan 20 Kotoigi nomo ben de na ini a foto drape pe pikinmoro 100.000 sma ben e tan. Fosi yu denki, mi kisi furu frantwortu na ini a gemeente.

Ma di mi ben abi 56 yari, dan a presi pe mi ben e wroko kon tapu, èn sondro taki mi ben fruwakti dati, mi kon de sondro wroko. Ala ten mi ben abi na angri fu teki prati na a furuten diniwroko, èn fu dati ede mi gebroiki a nyun situwâsi disi fu tron pionier. A pensyun di mi ben e kisi no ben furu, èn a no ben makriki fu libi fu a moni dati. Mercedes ben e yepi mi tu fu di a ben e krin presi gi sma. Wi ben man sorgu wi  osofamiri, èn noiti wi ben de sondro den moro prenspari sani. Mi e pionier ete, èn ten na ten Mercedes e dini leki yepi pionier. A lobi a preikiwroko srefisrefi.

Wan tu yari pasa, Mercedes ben gwenti fu libi den tijdschrift fu wi gi wan yongu uma di nen Merche. Na uma disi ben studeri Bijbel di a ben pikin. Merche ben lobi fu leisi den publikâsi fu wi, èn Mercedes kon si taki na ini en ati, Merche ben sabi ete taki den tru tori fu Bijbel na prenspari tori. Te fu kaba, Merche teki wan Bijbelstudie èn a bigin go na fesi. Ma Vicente, a masra fu en, ben lobi dringi sopi, èn noiti a ben e hori wan wroko langa. Dati meki a no ben e sorgu Merche. Fu di a ben de wan sopiman, meki sani no ben e waka bun srefisrefi nanga a trowlibi fu en.

Mi wefi taigi Merche fu taigi en masra meki a kon taki nanga mi, èn te fu kaba en masra du dati. Baka di mi go na Vicente wan tu leisi, dan a teki wan Bijbelstudie. Vicente bigin tyari kenki kon, èn a no ben e dringi sopi ibri dei moro, ma a ben man hori en wan tu dei langa. Baka dati, a ben man hori en wan heri wiki langa, noso moro langa leki dati. Te fu kaba, a tapu fu dringi sopi. En fesi kon moro krin, èn en osofamiri kon de na ini wánfasi baka. En nanga en osofamiri e libi now na den Kanari-èilanti, èn den alamala, sosrefi en wefi nanga en umapikin, e yepi a pikin gemeente drape na wan tumusi moi fasi.

Mi e prakseri a bun libi di mi abi

Wan tu fu den famiriman fu mi di ben leri den tru tori fu Bijbel furu yari pasa, dede now. Ma toku a bigi famiri fu wi tan gro, èn Gado blesi wi fu tru (Odo 10:22). A moi srefisrefi fu si taki pikinmoro alamala fu wi di bigin studeri Bijbel 40 yari pasa, sosrefi den pikin nanga den granpikin fu wi, e tan dini Yehovah nanga prisiri!

Now mi abi bun furu famiriman di de Kotoigi, èn furu fu den e dini leki owruman, leki dinari ini a diniwroko, èn leki pionier. A moro bigi boi fu mi nanga a wefi fu en e dini na a bijkantoro fu Yehovah Kotoigi na ini Madrid, na Spanyorokondre. Di mi tron wan Kotoigi, dan pikinmoro 3000 Kotoigi ben de na ini Spanyorokondre. Now, moro leki 100.000 Kotoigi de na ini a kondre disi. Mi e kisi trutru prisiri fu a furuten diniwroko, èn mi de nanga tangi taki Gado gi mi na okasi fu abi wan koloku libi leki wan futuboi fu en. Aladi mi no ben kisi furu skoro, toku mi man dini son leisi leki kring-opziener te tra kring-opziener no de fu du a wroko.

Wan tu yari pasa, mi kon si taki wan tu sma nomo ben e libi ete na ini a dorpu pe mi ben kweki. Fu di den sma drape ben pôti, meki den alamala gowe libi den gron nanga den oso fu den fu go suku wan moro bun libi. Koloku taki bun furu fu den sma dati, èn mi sosrefi, feni wan tra gudu, namku a grani fu dini Yehovah. Wi leri taki a libi abi wan marki, èn taki wan sma sa de moro koloku te a e dini Yehovah.

[Prenki na tapu bladzijde 32]

Pikinmoro ala den famiriman fu Brada Martínez di de na ini a tru anbegi