Yu abi warderi gi san Yehovah du fu frulusu yu?

„Prèise Yehovah a Gado fu Israel, bika a poti prakseri na en pipel èn a frulusu den.”​—LUK. 1:68.

1, 2. Nanga san wi kan agersi a seryusu situwâsi di wi de na ini? Na sortu aksi wi sa poti prakseri?

KON meki wi taki dati yu e didon na ati-oso. Yu e didon tapu wan afdeling pe ala sma abi a srefi siki, èn a siki dati kan kiri yu. Dresi no de gi a siki disi. Te yu e kon sabi taki wan datra e meki muiti fu feni wan dresi, dan dati e gi yu howpu. Yu de nomonomo fu kon sabi fa sani e waka nanga a tori dati. Wan dei yu e yere taki a datra feni wan dresi! A datra disi du bun furu muiti fu feni a dresi dati. Fa yu ben o firi? A no de fu taki dati yu ben o abi bun furu lespeki gi a man di frulusu yu nanga furu trawan, so taki unu no abi fu dede. Yu ben o abi furu warderi tu gi a muiti di a du.

² Kande a gersi leki a sani disi no kan. Ma awansi fa a no fa, wi alamala de na ini wan srefi sortu situwâsi. Ibriwan fu wi de na ini wan moro seryusu situwâsi leki a di fu den sikisma di kari na ini a fosi paragraaf. Wi abi wan frulusuman tranga fanowdu. (Leisi Romesma 7:24.) Yehovah du bun furu muiti fu frulusu wi. A Manpikin fu en du bun furu muiti tu. Sobun, wi sa poti prakseri na fo prenspari aksi. Fu san ede wi musu kisi frulusu? San Yesus ben musu du so taki wi ben kan kisi frulusu? San Yehovah ben musu du? Èn fa wi kan sori taki wi abi warderi gi den sani di Yehovah du so taki wi kan kisi frulusu?

Fu san ede wi musu kisi frulusu?

3. Fu san ede wi kan agersi sondu nanga wan siki di e kiri ipi-ipi sma na heri grontapu?

³ Soleki fa wan ondrosuku sori no so langa pasa, dan wan fu den moro ogri siki na ini a libisma historia, na a Spaanse Griep fu 1918, di kiri milyunmilyun sma na heri grontapu. Tra siki moro ogri srefi. Kande a nomru fu sma di e  kisi den siki dati, no bigi so, ma bun furu sma di e kisi den siki dati, e dede. * Ma yu sabi taki wi kan agersi sondu nanga wan fu den sortu siki disi? Memre den wortu fu Romesma 5:12, pe skrifi: „Neleki fa wán man meki sondu kon na grontapu èn sondu fu en sei tyari dede kon, èn na so fasi ala sma e dede, bika den alamala sondu.” Ala sma abi sondu, bika ala sondu libisma e du sondu. (Leisi Romesma 3:23.) Èn omeni sma e dede fu di den abi sondu? Paulus ben skrifi taki „ala sma e dede” fu di ala sma sondu.

4. Fa Yehovah e si a pisi ten di wi de na libi, èn fa a denki fu en e difrenti fu a di fu furu sma na ini a ten disi?

⁴ Furu sma na ini a ten disi, no e si sondu nanga dede leki wan siki di kan kiri sma. Den sma disi e frede fu dede fruku, ma den e fruwakti taki den sa dede te den kon owru. Libisma e frigiti makriki fa a Mekiman e denki fu a tori disi. Yehovah no ben wani taki wi libi so wan syatu pisi ten, ma a ben wani taki wi libi moro langa leki dati. Fu taki en leti, soleki fa Yehovah e si en, dan nowan libisma libi „wán dei” (2 Petr. 3:8). Fu dati ede, Gado Wortu e taki dati a libi fu wi syatu neleki grasi di e gro èn di e dede baka wan syatu pisi ten, noso leki wan blo di wi e hari (Ps. 39:5; 1 Petr. 1:24). Wi musu tan hori a sani dati na prakseri. Fu san ede? Efu wi e frustan sortu takru „siki” wi abi, dan a sa moro makriki gi wi fu sori warderi gi a „dresi”, noso a frulusu di wi sa kisi.

5. San wi no kisi noiti fu di wi na sondusma?

⁵ Fu man frustan san na sondu èn sortu takru bakapisi a e tyari kon gi wi, dan wi musu pruberi fu frustan san sondu du nanga wi. A kan muilek gi wi fu frustan dati, fu di sondu meki taki noiti wi kisi wan sani di wi fosi papa nanga mama ben abi. Na ini a bigin, Adam nanga Eva no ben abi sondu. Den ben abi wan volmaakti frustan èn wan volmaakti skin. Dati meki den ben kan bosroiti fu basi a denki fu den, èn sosrefi den firi fu den. Den ben kan bosroiti tu efu den ben o du bun, noso ogri. Sobun, den ben kan tan kweki moi fasi leki futuboi fu Yehovah Gado. Na presi fu dati, den no ben abi warderi gi a tumusi moi presenti dati. Fu di den bosroiti fu sondu teige Yehovah, meki den lasi a libi di Yehovah ben wani den fu abi, èn den bakapikin fu den no kisi na okasi tu fu kon abi a libi dati (Gen. 3:16-19). Na a srefi ten, a sani disi meki taki den kisi a takru „siki” noso sondu, èn wi kisi a siki dati tu. Yehovah ben abi leti fu strafu den. Ma a e gi wi a howpu taki wi kan kisi frulusu.​—Ps. 103:10.

San Yesus ben musu du fu frulusu wi?

6, 7. (a) Fa Yehovah sori taki a ben o abi fu du furu fu frulusu wi? (b) San wi kan leri fu den ofrandi di Abel nanga den famiri-edeman ben tyari?

⁶ Yehovah ben sabi taki a ben o abi fu du furu fu frulusu den bakapikin fu Adam nanga Eva. A profeititori di skrifi na Genesis 3:15, e sori wi pikinso san a ben musu du fu frulusu wi. Yehovah ben o sorgu gi wan „pikin”, noso wan frulusuman, di ben o kiri Satan wan dei. Ma a frulusuman dati ben o pina tu, fu di Satan ben o gi en mankeri na en bakafutu. Wi e frustan taki te wan sma kisi mankeri na en bakafutu, dan a kan abi furu pen, èn kande a no o man waka, noso a sa kon swaki. Ma san den wortu dati wani taki na ini a profeititori disi? San a Sma di Yehovah ben teki ben o abi fu ondrofeni?

⁷ Fu man frulusu libisma fu sondu, dan a frulusuman ben o abi fu feni wan fasi fu meki sani kon bun baka na mindri libisma nanga Gado. A ben o abi fu tyari wan kaba kon na den takru bakapisi fu sondu. San a ben o abi fu du? Soleki fa Bijbel e sori, dan wan ofrandi ben o de fanowdu. Di a fosi reti-ati libisma, Abel, ben tyari meti leki ofrandi gi Yehovah, dan Yehovah ben feni na ofrandi dati bun. Bakaten, den famiri-edeman di ben abi frede gi Gado, namku man soleki Noa, Abraham, Yakob, nanga  Yob, tyari den srefi sortu ofrandi dati, èn Gado ben feni den ofrandi dati bun (Gen. 4:4; 8:20, 21; 22:13; 31:54; Yob 1:5). Hondrohondro yari baka dati, a Wet di Gado ben gi Moses sori moro krin o prenspari a de fu tyari ofrandi gi Gado.

8. San a granpriester ben e du ibri yari, na a dei di den Dyu ben musu aksi Gado pardon gi den sondu fu den?

⁸ Soleki fa wi sabi, dan a Wet ben taki dati den Dyu ben musu tyari ofrandi gi Gado. Wan tu fu den moro prenspari ofrandi dati, na den wan di den ben musu tyari ibri yari, na a dei di den ben musu aksi pardon gi den sondu fu den. Na a dei dati, a granpriester ben e du difrenti sani di ben e prenki tra prenspari sani. A ben e tyari ofrandi gi Yehovah fu aksi pardon gi sondu. Na a fosi presi a ben e tyari wan ofrandi gi den priester, èn baka dati, a ben e tyari wan ofrandi gi den lo di no ben de priester. A granpriester ben e go na ini a Moro Santa Presi fu a tabernakel noso a tempel, pe en wawan ben kan go, soso na a dei dati. Te a ben de drape, dan a ben e gebroiki a brudu fu den ofrandi fu natinati a presi na fesi na ark fu a frubontu. Son leisi, wan brenki wolku di ben e skèin leti, ben de fu si na tapusei fu a santa kisi. A wolku disi ben e sori taki Yehovah Gado ben de drape.​—Ex. 25:22; Lef. 16:1-30.

9. (a) Suma a granpriester ben e prenki, èn san den ofrandi ben e prenki? (b) Te a granpriester ben e go na ini a Moro Santa Presi, dan san dati ben e prenki?

⁹ A santa yeye ben meki na apostel Paulus tyari kon na krin san den sani di sma ben e du na a dei dati, e prenki. Paulus sori taki a granpriester ben e prenki a Mesias, Yesus Krestes, èn den ofrandi di a ben e tyari, ben e prenki a dede di Krestes ben o dede leki srakti-ofrandi (Hebr. 9:11-14). Na ofrandi dati di ben de sondro sondu, ben o meki taki tu grupu sma ben o kisi trutru pardon gi den sondu fu den. Dati na a priester grupu fu Krestes en 144.000 salfu brada, èn den „tra skapu” (Yoh. 10:16). Te a granpriester ben e kon na ini a Moro Santa Presi, dan a ben e prenki fa Yesus ben o go na hemel fu gi Yehovah Gado a waarde fu en frulusu-ofrandi.​—Hebr. 9:24, 25.

10. San a Mesias ben o ondrofeni, soleki fa Bijbel profeititori e sori?

¹⁰ A de krin taki Gado ben o abi fu du furu fu frulusu den bakapikin fu Adam nanga Eva. A Mesias ben o abi fu gi en libi leki wan srakti-ofrandi! Den profeiti fu den Hebrew Buku fu Bijbel e taki moro fini fu a tru tori disi. Fu eksempre, a profeiti Danièl ben taki krin taki „a Mesias a Fesiman” ben o „koti puru”, noso den ben o kiri en fu „aksi pardon gi sondu” (Dan. 9:24-26). Yesaya ben taki dati sma no ben o bribi na ini a Mesias, den ben o frufolgu en, èn den ben o kiri en, noso dyuku en, fu tyari den sondu fu libisma.​—Yes. 53:4, 5, 7.

11. Na sortu fasi a Manpikin fu Yehovah sori taki a ben de klariklari fu dede leki wan srakti-ofrandi, so taki wi kan kisi frulusu?

¹¹ Fosi Gado en wan-enkri Manpikin ben kon na grontapu, dan a ben sabi san a ben o abi fu ondrofeni so taki wi kan kisi frulusu. A ben o abi fu pina hebi, èn baka dati, sma ben o kiri en. Di en Papa fruteri en taki den sani disi ben o miti en, dan a de so taki a bigin frede, noso taki a opo ensrefi teige en Papa? Nôno. Na presi fu dati, a ben de klariklari fu du san en  Papa ben taigi en fu du (Yes. 50:4-6). Di Yesus ben de na grontapu, dan a ben de klariklari tu fu du a wani fu en Papa. Fu san ede? Disi na wán fasi fa a piki na aksi dati: „Mi lobi a Tata.” Ete wan fasi fa a piki na aksi dati, na: „Nowan sma abi moro lobi leki a sma di gi en libi gi den mati fu en” (Yoh. 14:31; 15:13). Sobun, wan prenspari reide fu san ede wi e kisi frulusu, na fu di a Manpikin fu Yehovah lobi wi. Aladi a ben musu gi en libi leki wan volmaakti libisma, toku a ben de klariklari fu du dati so taki wi ben kan kisi frulusu.

San Yehovah ben musu du so taki wi kan kisi frulusu?

12. Suma ben wani taki a lusu-paiman ben musu pai? Fu san ede a sma dati sorgu taki wan lusu-paiman de?

¹² A no Yesus bosroiti taki wan lusu-paiman ben musu pai fu frulusu libisma. Na presi fu dati, na Yehovah teki a tumusi prenspari bosroiti disi fu frulusu wi na fasi disi. Na apostel Paulus ben taki dati na altari na ini a tempel, pe den ofrandi ben musu tyari na tapu, ben e prenki a wani fu Yehovah (Hebr. 10:10). Sobun, Yehovah na a moro prenspari sma di sorgu taki wi kan kisi frulusu nanga yepi fu Krestes (Luk. 1:68). A frulusu di wi sa kisi e sori san na a volmaakti wani fu Gado èn a e sori tu taki a lobi wi trutru.​—Leisi Yohanes 3:16.

13, 14. Fa na eksempre fu Abraham kan yepi wi fu de nanga tangi gi san Yehovah du gi wi?

¹³ San Yehovah ben musu du fu sori wi na a fasi disi taki a lobi wi? A muilek fu frustan a sani dati. Ma wan tori de na ini Bijbel di kan yepi wi fu kon frustan a sani dati moro krin. Yehovah ben aksi a reti-ati man Abraham fu du wan tumusi muilek sani. A ben musu tyari en manpikin Isak leki ofrandi. Abraham ben de wan lobi-ati papa. Di Yehovah ben taki nanga Abraham, dan a taki fu Isak: „A wan-enkri manpikin fu yu di yu lobi trutru” (Gen. 22:2). Ma toku Abraham ben si taki a wani fu Yehovah ben prenspari moro leki a lobi di a ben abi gi Isak. Fu dati ede, Abraham gi yesi na Yehovah. Ma Yehovah no gi pasi taki Abraham du san en srefi ben o du wan dei. Di Abraham ben de kaba fu kiri a manpikin fu en, dan Gado seni wan engel fu tapu en fu du a sani dati. Abraham ben abi a fasti bosroiti fu gi yesi na en Gado na ini a muilek situwâsi disi. Dati meki a ben de seiker taki a wan-enkri fasi fa a ben o si a yonkuman disi baka libilibi, na te a ben o kisi wan opobaka. Ma a ben abi ala frutrow taki Gado ben o gi a manpikin fu en wan opobaka. Iya, Paulus ben taki dati Abraham ben kisi Isak baka „na wan agersifasi”, nanga yepi fu wan opobaka.​—Hebr. 11:19.

¹⁴ Yu e frustan fa Abraham ben e sari di a ben e sreka sani fu gi a manpikin fu en leki ofrandi? Fu taki en leti, den sani di miti Abraham e yepi wi kon frustan san miti Yehovah di a tyari a sma di a kari „mi Manpikin, di mi lobi”, leki ofrandi (Mat. 3:17). Ma hori na prakseri taki Yehovah ben abi moro bigi sari. En nanga en Manpikin ben de makandra milyunmilyun yari, kande milyardmilyard yari srefi. A Manpikin ben e prisiri fu wroko makandra nanga en Papa leki en „tumusi bun wrokoman” èn leki en Takiman, noso „a Wortu” (Odo 8:22, 30, 31; Yoh. 1:1). Wi noiti no o  sabi soifri fa Yehovah ben e firi di sma pina en Manpikin, di den spotu en, èn kiri en bakaten. A sani disi no ben makriki gi Yehovah! Sobun, fa wi kan sori taki wi de nanga tangi taki wi kisi frulusu?

Fa yu kan sori taki yu de nanga tangi taki yu kan kisi frulusu?

15. Fa Yesus ben tyari a bigi frantwortu fu meki sani kon bun baka na mindri Gado nanga libisma? San ben de a bakapisi fu dati?

¹⁵ Baka di Yesus kisi wan opobaka èn a go na hemel, dan a meki sani kon bun baka na mindri Gado nanga libisma. Di a ben de baka na en lobi-ati Papa, dan a gi en a waarde fu na ofrandi fu en. A sani dati meki taki libisma kisi bigi blesi. Libisma ben kan kisi pardon dorodoro gi den sondu fu den. Na a fosi presi, den salfu brada fu Krestes ben kan kisi pardon gi den sondu fu den, èn baka dati „a heri grontapu” ben kan kisi pardon gi den sondu fu den. Na ofrandi dati meki taki na ini a ten disi, ala sma di abi trutru berow gi den sondu fu den èn di e tron trutru bakaman fu Krestes, kan kon abi wan bun matifasi baka nanga Yehovah Gado (1 Yoh. 2:2). Fa a de nanga yu?

16. Gi wan agersitori fu sori fu san ede wi musu de nanga tangi taki Yehovah e gi wi na okasi fu kisi frulusu?

¹⁶ Meki wi poti prakseri baka na a agersitori di gi na a bigin fu na artikel disi. Kon meki wi taki dati a datra di feni a dresi gi a siki e go na den sikisma di e didon makandra nanga yu na ati-oso, èn a e taki: Iniwan sikisma di wani teki a dresi disi èn di e du san de fanowdu fu kon betre, sa kon betre baka trutru. Fa a ben o de te furu fu den tra sikisma ben o weigri fu du san a datra taki? Kande den feni taki a muilek tumusi gi den fu gebroiki a dresi, noso fu du san de fanowdu fu kon betre baka. Yu ben o horibaka gi den sma disi aladi yu kisi krinkrin buweisi taki a dresi bun? Kwetikweti! A no de fu taki dati yu ben o de nanga tangi taki yu kisi a dresi, èn yu ben o du soifri san a datra taigi yu fu du. Kande yu ben o fruteri trawan srefi fu a bosroiti di yu teki. Na so ibriwan fu wi musu de klariklari fu sori Yehovah fa wi de nanga tangi taki a gi wi na okasi fu kisi frulusu nanga yepi fu a frulusu-ofrandi fu en Manpikin.​—Leisi Romesma 6:17, 18.

17. Na sortu fasi yu kan sori taki yu de nanga tangi gi san Yehovah du, so taki yu kan kisi frulusu?

¹⁷ Efu wi de nanga tangi gi san Yehovah nanga en Manpikin du fu frulusu wi fu sondu nanga dede, dan wi sa sori dati (1 Yoh. 5:3). Wi sa meki muiti fu basi den firi fu wi te wi e prakseri fu du sondu. Noiti wi sa bosroiti fu du sondu, èn noiti wi sa libi wan dobru libi leki bakapisi fu dati. Te wi ben o du dati, dan wi ben o sori taki wi no abi warderi srefisrefi gi a frulusu-ofrandi. Na presi fu dati, wi sa sori taki wi de nanga tangi, èn fu dati ede wi sa du ala san wi man fu tan abi wan bun matifasi nanga Gado (2 Petr. 3:14). Efu wi abi warderi, dan wi sa fruteri trawan fu a tumusi moi howpu di wi abi fu kisi frulusu. Na so den sma dati sosrefi sa kon abi wan bun matifasi nanga Yehovah, èn den sa abi a howpu tu fu libi fu têgo (1 Tim. 4:16). A no de fu taki dati a fiti te wi e gebroiki ala wi ten nanga krakti fu prèise Yehovah nanga en Manpikin! (Mark. 12:28-30) Denki a tori! Wi abi a howpu taki wan ten o kon pe wi no sa abi nowan enkri sondu moro. Wi o man libi soleki fa Gado ben wani wi fu libi, namku leki sma di no abi sondu, èn wi o man libi fu têgo. Wi o man du den sani dati fu di Yehovah gi wi na okasi fu kisi frulusu!​—Rom. 8:21.

[Futuwortu]

San yu ben sa piki?

• Fu san ede a de prenspari taki yu e kisi frulusu?

• Sortu krakti a gi di Yesus gi en libi leki wan srakti-ofrandi, abi na yu tapu?

• Fa yu feni a lusu-paiman di Yehovah pai gi wi?

• San yu o du fu di Yehovah seti sani so taki yu kan kisi frulusu?

[Aksi fu a tori disi]

[Prenki na tapu bladzijde 27]

Tapu a dei di den Dyu ben musu aksi pardon fu sondu fu den, a granpriester fu Israel ben e prenki a Mesias

[Prenki na tapu bladzijde 28]

Fu di Abraham ben de klariklari fu gi en manpikin leki ofrandi, meki wi e kon frustan moro krin sortu bigi ofrandi Yehovah tyari