Dri kongres meki taki mi libi kon de soleki fa a de tide

Soleki fa George Warienchuck fruteri

OITI yu ben de na wan fu den kongres fu wi, dan yu yere wan sani di naki yu ati so te taki yu tyari bigi kenki kon na ini yu libi? Na dati pasa nanga mi. Te mi e luku fa mi libi waka, dan mi e si taki dri kongres meki taki mi libi kon de soleki fa a de tide. A fosi kongres yepi mi fu no syensyen so furu moro, a di fu tu kongres yepi mi fu de tevrede nanga san mi abi, èn a di fu dri kongres yepi mi fu tron wan sma di lobi fu gi trawan sani. Ma fosi mi fruteri yu fa mi tyari den kenki dati kon, mi sa fruteri yu fu wan tu fu den sani di pasa, fosi den kongres disi ben hori. Den sani dati ben pasa di mi ben pikin ete.

Mi gebore na ini 1928 leki a moro yonguwan fu dri pikin. Mi nanga den sisa fu mi, namku, Margie nanga Olga, ben kweki na ini a foto South Bound Brook, na New Jersey, Amerkankondre. Na a ten dati, pikinmoro 2000 sma ben e tan na ini a foto dati. Aladi wi ben pôti, toku mi mama ben lobi fu gi tra sma sani. Te a ben abi moni fu bori wan switi nyanyan, dan a ben e gi den birtisma pikinso fu a nyanyan dati. Di mi ben abi neigi yari, dan wan Kotoigi kon na mi mama. A Kotoigi dati ben e taki Hongariatongo, a tongo di mi mama ben e taki. A sani dati meki taki mi mama arki a Bijbel boskopu. Bakaten, Berta, wan sisa di ben abi sowan 25 yari, go doro fu studeri Bijbel nanga mi mama, èn a yepi mi mama fu tron wan futuboi fu Yehovah.

Ma mi no ben de leki mi mama. Mi ben e syensyen. Èn san ben meki en moro muilek gi mi, na taki mi mama ben lobi krutu mi. Wan leisi mi krei fu a sani dati, èn mi aksi en: „Fu san ede yu lobi krutu mi?” A taigi mi taki a lobi mi, ma taki a no ben wani pori mi. Mi mama ben abi wan bun ati, ma fu di a no ben gwenti prèise mi, meki mi ben e firi leki mi no warti noti.

Wan dei, wan birtisma di ben gwenti fu taki switi nanga mi, aksi mi efu mi ben wani go nanga den boi fu en na a sondeskoro fu a kerki fu den. Mi ben sabi taki Yehovah no ben o feni en bun taki mi go. Ma a birtisma ben abi switifasi, èn mi no ben wani taki a firi wan fasi. Dati meki, wan tu mun langa mi go na kerki aladi mi ben e syen fu a sani dati. Mi ben e frede sma, èn fu dati ede mi ben e du sani na skoro di ben e trobi a konsensi fu mi. A driktoro fu a skoro, ben de wan man di ben lobi prei basi gi sma. A ben wani taki den leriman ben musu meki ala pikin taki a fraga odi. Mi ben e taki a fraga odi tu. Mi ben e du a sani disi pikinmoro wán yari langa, èn baka dati wan kenki kon.

Mi leri fu sori deki-ati

Na ini 1939, wan bukustudie grupu bigin hori konmakandra na wi oso. Ben Mieszkalski, wan yongu pionier brada, ben hori a bukustudie dati. Wi ben e kari en Bigi Ben, èn wi ben abi bun reide fu du dati. Fa mi ben pikin, dan a ben gersi leki a brada disi ben langa èn bradi leki a fesisei doro fu wi. Ma aladi en skin ben bigi so, toku en ati ben pikin, èn fu di a ben e lafu so switi nanga mi, meki mi ben e firi bun te mi ben de makandra nanga en. Dati meki di Ben aksi mi fu wroko makandra nanga en na ini a preikiwroko, dan mi ben de klariklari fu du dati. Te fu kaba, wi tron mati. Te  mi ben e firi brokosaka, dan a ben e taki nanga mi neleki fa wan bigi brada ben o taki nanga en pikin brada fu di a e broko en ede nanga en. A sani disi ben gi mi furu deki-ati, èn mi kon lobi Ben srefisrefi.

Na ini 1941, Ben aksi mi osofamiri fu go nanga en na wan kongres di ben o hori na ini St. Louis, Missouri. Wi ben o go nanga na oto fu en. A no de fu taki, dati mi ben breiti srefisrefi! Noiti ete mi ben go moro fara leki 80 kilometer fu pe mi ben e tan, èn now mi e go na wan presi di ben de sowan 1500 kilometer fu pe mi e tan! Ma problema ben de na ini St. Louis. Son kerkisma ben o gi Kotoigi okasi fu kon tan na den oso na a ten fu a kongres. Ma den kerki fesiman ben taigi den sma disi fu no gi den Kotoigi okasi moro fu kon tan nanga den. Furu sma gi yesi na den. Den kerki fesiman ben tapu skreki tu gi a famiri pe wi ben o go tan. Ma toku a famiri dati meki wi kon tan na den oso. A masra fu na oso taki dati den no ben o meki sma tapu den fu du san den ben pramisi, ma den ben o meki wi kon tan na den. A ben naki mi ati fu si taki den ben abi so furu deki-ati.

Den sisa fu mi teki dopu na a kongres. A srefi dei dati, Brada Rutherford fu Brooklyn Bethel, hori wan tumusi moi lezing. Na ini a lezing dati, a aksi ala pikin di ben wani du a wani fu Gado, fu opo tanapu. Sowan 15.000 pikin opo tanapu. Mi opo tanapu tu. Baka dati, a aksi efu wi ben o wani du tranga muiti na ini a preikiwroko. Den pikin di ben wani dati ben musu taki „Iya”. Makandra nanga den tra pikin, mi bari „Iya”! Den sma drape naki anu bun tranga. A sani disi gi mi deki-ati trutru.

Baka a kongres, wi go luku wan brada na ini West Virginia. A brada disi fruteri wi taki wan leisi di a ben de na ini a preikiwroko, dan wan grupu sma no ben lobi a boskopu di a ben e tyari. Fu dati ede, den fon en, den lobi tara na en skin, èn den fringi fowrufrei na en tapu. Mi no ben man bribi san a brada ben e fruteri mi. A taki: „Ma mi o tan preiki go doro.” Di wi komoto na a brada dati, dan mi ben e firi neleki David. Mi ben de klariklari fu feti nanga Goliat, namku a driktoro fu mi skoro.

Di mi go baka na skoro, dan mi go na a driktoro fu a skoro. A luku mi nanga atibron. Mi begi Yehovah safri fu yepi mi. Ne mi taigi en wantronso: „Mi go na wan kongres fu Yehovah Kotoigi. Mi no o taki a fraga odi moro!” A driktoro fu a skoro di ben e sidon na a tafra fu en, no taki noti wan heri pisi ten. Ne a opo tanapu safrisafri, èn a waka kon miti mi. A ben e atibron so te, taki en fesi kon redi. A bari: „Yu musu taki a fraga odi, noso mi o puru yu na skoro!” Disi leisi mi no du san a taigi mi fu du, èn noiti ete mi ben e firi so prisiri na ini mi ati.

Mi no ben man wakti srefi fu taigi Ben san ben pasa. Di mi si en na ini a Kownukondre zaal, dan mi bari gi en: „Den puru mi na skoro! Mi no taki a fraga odi!” Ben poti en anu na tapu mi skowru èn a taki na wan switi fasi: „Yehovah lobi yu fu tru” (Deut. 31:6). Den wortu dati gi mi deki-ati srefisrefi! Tapu 15 yuni 1942, mi teki dopu.

Mi leri fu de tevrede

Baka a Di Fu Tu Grontapufeti, na ekonomia fu a kondre go na fesi srefisrefi, èn sma ben kan bai wan lo nyun sani. A wroko di mi ben abi ben pai bun, èn mi ben man bai sani di mi noiti no ben denki taki mi ben o man bai. Sonwan fu den mati fu mi bai motro; trawan fu den seti den oso moro moi. Mi bai wan nyun oto. Mi ben de nomonomo fu abi moro sani, èn fosi yu denki, mi no ben e poti so furu prakseri moro na Kownukondre afersi. Mi ben sabi taki sani no ben e waka bun nanga mi. Koloku taki na ini 1950, wan kongres ben hori na ini New York City, èn a kongres dati yepi mi fu kisi wan yoisti denki baka fu sani, èn fu du san bun.

Na a kongres dati, a wán takiman baka a trawan ben e gi den arkiman deki-ati fu tan go doro nanga a preikiwroko. Wan takiman gi den arkiman a deki-ati disi: „Puru  ala hebi na yu tapu èn lon a streilon.” A ben gersi leki a ben taki soso nanga mi. Mi ben si den studenti tu di ben klari wan fu den klas fu a Gileadskoro. A sani dati poti mi na prakseri. Mi aksi misrefi: „Efu den Kotoigi disi di owru neleki mi, kan libi ala den sani di den abi fu go dini na ini wan tra kondre, dan mi musu man dini tu na ini a kondre pe mi e tan.” Na a kaba fu a kongres mi ben teki a bosroiti kaba taki mi ben o tron wan pionier.

Na a srefi ten dati, mi bigin hori nanga Evelyn Mondak, di ben de wan fayafaya sisa na ini a gemeente pe mi ben e go. Evelyn en mama, ben kweki siksi pikin, èn na uma disi no ben e frede noti. A ben lobi fu du stratiwroko na fesi wan bigi Lomsu Kerki. A priester no ben lobi a sani dati srefisrefi, èn awansi fa a ben e taigi Evelyn en mama fu gowe fu drape, toku a tan du stratiwroko drape. Neleki en mama, Evelyn no ben frede libisma.​—Odo 29:25.

Na ini 1951, mi nanga Evelyn trow, wi libi a wroko fu wi, èn wi bigin pionier. Wan kring-opziener gi wi deki-ati fu froisi go tan na Amagansett, wan dorpu na a syoro fu na Atlantis Se. A dorpu disi ben de sowan 160 kilometer moro fara fu New York City. Di a gemeente taigi wi taki den no ben man yepi wi nanga tanpresi, dan wi suku wan wagi pe wi ben kan tan na ini. Ma wi no ben man feni wan di wi ben o man bai. Ne wi si wan wagi di no ben de so bun moro. A sma di ben abi en, taigi wi taki wi ben kan bai en gi 900 dala. Dati na soifri a moni di wi ben kisi leki trowkado. Wi bai a wagi, wi seti en kon bun baka, èn wi hari en go na a kontren pe wi ben o preiki. Ma wi no ben abi nowan enkri moni di wi doro drape, èn wi ben e aksi wisrefi fa wi ben o man horidoro leki pionier.

Evelyn ben e krin oso gi sma, èn mi feni wan wroko fu krin wan nyanyan-oso latilati na neti. A sma di ben abi a nyanyan-oso ben taki: „Efu nyanyan tan abra, dan yu kan tyari en go na oso gi yu wefi.” Sobun, te mi ben e doro oso na tu yuru mamanten, dan a wagi fu wi ben e smeri soso den nyanyan di mi ben tyari kon na oso. Wi ben e waran den nyanyan dati baka, èn den ben switi srefisrefi, spesrutu na ini a kowru ten fu a yari te kowru ben e naki wi na ini a wagi. Ten na ten, den brada fu a gemeente ben e libi wan bigi fisi tu gi wi na tapu a trapu na fesi a wagi. Na ini den yari di wi ben e dini makandra nanga den lobi-ati brada nanga sisa na ini Amagansett, wi leri taki te wi de tevrede nanga den moro prenspari sani, dan wi sa de koloku. A ten dati ben switi srefisrefi.

Wi e kisi deki-ati fu du moro

Na ini yuli 1953, hondrohondro zendeling komoto fu difrenti kondre fu kon na a internationaal kongres na ini New York City. Den fruteri wi moi ondrofenitori. Mi kon abi a srefi faya leki den. Boiti dati, di wan takiman na a kongres sori krin taki a Kownukondre boskopu no ben preiki na ini furu kondre ete, dan wi ben sabi san wi ben musu du. Wi ben musu du moro na ini a preikiwroko. Na a srefi kongres dati wi poti wi nen fu go na a Gileadskoro. A srefi yari dati, wi kisi kari fu go na a di fu 23 klas fu a Gileadskoro di bigin na ini februari fu a yari 1954. Dati ben de wan bigi grani trutru!

Wi ben breiti di wi yere taki wi ben musu go dini na Brasyonkondre. Wi ben o go drape nanga sipi, èn a ben o teki 14 dei fu doro drape. Ma fosi wi gowe, wan lepi brada fu Bethel taigi mi: „Neigi zendeling sisa di no abi masra, o go tu na Brasyonkondre makandra nanga yu nanga yu wefi. Luku den bun!” Di den botoman si taki mi kon na ini a sipi nanga 10 yongu uma na mi baka, dan den ben lobi a tori dati. Ma den sisa ben sabi heri bun san fu du na ini a situwâsi disi. Toku mi ben breiti di wi doro na Brasyonkondre sondro taki wan sani ben pasa nanga wi.

 Baka di mi leri taki Potogisitongo, mi kisi a grani fu go dini leki kring-opziener na ini Rio Grande do Sul, wan distrikt na a zuidsei fu Brasyonkondre. Mi ben musu go dini na ini a presi fu wan tra kring-opziener. A brada dati di no ben trow, taigi mi nanga mi wefi: „A e fruwondru mi taki den seni wan trowpaar kon dyaso. A no makriki fu wroko na ini a kontren disi.” Den gemeente ben panya na ini wan bigi kontren di ben de na wan boiti presi, èn yu ben man doro sonwan fu den gemeente soso nanga truck. Te yu ben e bai wan nyanyan gi a man di ben e rèi a truck, dan a ben e gi yu primisi fu kren go na tapu en truck. A ben de neleki wi ben e sidon na tapu wan asi, fu di wi ben e sidon bradi-futu na tapusei fu den sani di ben tai na tapu a truck. Nanga ala tu anu wi ben e grabu den titei hori di ben tai den sani na tapu a truck. Te a truck ben e meki wan srapu boktu, dan den sani na tapu a truck ben e anga go na wan sei, èn wi ben kan si den dipi lagipresi na wi ondro. Na den momenti dati, wi ben e hori den titei bun steifi, fu no fadon komoto fu a truck. Ma te wi ben e si fa den Kresten brada nanga sisa di ben e wakti wi, ben prisiri taki wi ben doro, dan wi ben breiti taki wi ben go drape, aladi a ben teki wan heri dei.

Wi ben e tan na den oso fu den Kresten brada nanga sisa. Den ben pôti srefisrefi, ma toku den ben de klariklari fu gi sani. Na ini wan farawe kontren, ala den brada nanga sisa ben e wroko na wan presi pe sma ben e poti meti na ini paki. Fu di den ben e meki pikinso moni nomo, meki den ben kan nyan wán leisi nomo wan dei. Efu den no ben e wroko wan dei, dan den no ben e kisi moni. Ma toku den ben e teki tu dei fri te wi ben de drape, so taki den ben kan teki prati na a diniwroko makandra nanga a gemeente. Den ben e frutrow tapu Yehovah. Den brada nanga sisa dati di ben abi sakafasi, leri wi fu du muiti fu a bun fu Gado en Kownukondre, èn noiti wi no sa frigiti dati. Di wi ben e libi na den mindri, dan wi leri sani di wi no ben o man leri na nowan skoro. Te mi e prakseri den brada nanga sisa dati baka, dan mi ai e furu nanga watra fa mi breiti taki mi leri sabi den.

Na ini 1976, wi drai go baka na Amerkankondre fu sorgu gi mi mama di ben e siki. A ben muilek gi wi fu gowe libi Brasyonkondre, ma wi de nanga tangi taki wi si fa a Kownukondre wroko go na fesi srefisrefi na ini a kondre dati. Ibri leisi te wi e kisi brifi fu Brasyonkondre, dan mi e firi bun te mi e prakseri a moi ten dati.

Wi e miti wan tu bun mati baka

Aladi wi ben e sorgu gi mi mama, wi ben e pionier, èn wi ben e krin oso gi sma. Na ini 1980, mi mama dede. A ben tan dini Yehovah nanga en heri ati te na a kaba fu en libi. Baka dati, mi kisi a kari fu go dini leki kring-opziener na ini Amerkankondre. Na ini 1990, mi nanga mi wefi go na wan gemeente na ini Connecticut, èn drape wi miti wan sma di mi ben lobi srefisrefi. Wan fu den gemeente owruman drape ben nen Ben. Iya, a srefi Ben di yepi mi sowan 50 yari pasa fu opo taki gi Yehovah. Yu kan frustan fa wi ben breiti di wi brasa makandra.

Sensi 1996, mi nanga Evelyn e dini na ini a Potogisi gemeente na ini Elizabeth, na New Jersey. Aladi wi swaki, toku wi e dini leki spesrutu pionier. Mi abi problema nanga a gosontu fu mi, ma nanga yepi fu mi lobi wefi, mi e teki prati na a diniwroko so furu leki mi man. Evelyn e yepi wan birtisma tu di owru èn di no de so gosontu moro. Yu sabi fa a nen? A nen Bertha, iya, a srefi Bertha di ben yepi mi nanga mi mama fu tron futuboi fu Yehovah, moro leki 70 yari pasa! Wi breiti taki wi kisi na okasi fu taigi en tangi gi ala den sani di a du fu yepi mi nanga mi famiri fu kon leri sabi a tru anbegi.

Mi breiti taki den fosi kongres dati gi mi deki-ati fu opo taki gi a tru anbegi, fu de tevrede nanga den sani di mi abi, èn fu du moro na ini a diniwroko. Iya, den kongres dati meki taki mi libi kon de soleki fa a de tide.

[Prenki na tapu bladzijde 23]

Evelyn en mama (na a kruktu-anusei) makandra nanga mi mama

[Prenki na tapu bladzijde 23]

Mi mati Ben

[Prenki na tapu bladzijde 24]

Na ini Brasyonkondre

[Prenki na tapu bladzijde 25]

Mi nanga Evelyn now