Fa fu tan abi bun mati na ini wan grontapu pe lobi no de

„Disi na san mi e taigi unu fu du, namku taki un musu lobi makandra.”​—YOH. 15:17.

1. Fu san ede den fosi Kresten ben musu tan bun mati fu makandra?

A LASTI neti di Yesus ben de na grontapu, a gi den reti-ati disipel fu en a rai fu tan mati fu makandra. Moro fruku a neti dati, a ben taigi den taki a lobi di den ben e sori gi makandra ben o meki sma kon sabi den leki den bakaman fu en (Yoh. 13:35). Den apostel ben musu tan bun mati fu makandra fu man pasa den tesi di den ben o kisi, èn fu man du a wroko di Yesus ben o gi den heri esi. A no de fu taki, dati wi kon sabi den fosi Kresten leki sma di ben e tan horibaka gi Gado èn gi makandra.

2. (a) Sortu fasti bosroiti wi abi, èn fu san ede? (b) Na sortu aksi wi sa poti prakseri?

² Na ini a ten disi, a e gi prisiri trutru fu de wan memre fu wan organisâsi di de na heri grontapu, èn di abi memre di e teki na eksempre fu den fosi Kresten! Wi abi a fasti bosroiti fu gi yesi na a komando di Yesus ben gi wi fu sori trutru lobi gi makandra. Ma na ini den lasti dei disi, furu sma no de fu frutrow, èn den no e sori lobi gi trawan (2 Tim. 3:1-3). Te den sma disi e tron mati nanga trawan, dan nofo tron den no e broko den ede trutru nanga den sma dati, èn den e suku den eigi bun nomo. Efu wi wani taki sma tan si wi leki tru Kresten,  dan wi no musu suku wi eigi bun nomo. Dati meki wi sa poti prakseri na den aksi disi: San de fanowdu fu man abi bun mati? Fa wi kan meki bun mati? O ten a de fanowdu fu no de mati moro nanga wan sma? Èn san wi kan du fu tan abi bun mati?

San de fanowdu fu man abi bun mati?

3, 4. San de fanowdu fu man de trutru mati fu trawan? Fu san ede dati de so?

³ Sma man de trutru mati fu makandra te den abi lobi gi Yehovah. Kownu Salomo ben skrifi: „Kande wan sma ben kan basi wan trawan di de en wawan. Ma te tu sma ben o de, dan den ben man feti nanga en. Dri titei di frekti kon na wán, no man hari koti na tu makriki” (Preik. 4:12). Te Yehovah na a di fu dri titei di e hori tu mati na wán, dan den sma dati sa tan bun mati fu makandra.

⁴ A no de fu taki, dati sma di no lobi Yehovah kan kon tron bun mati tu fu trawan. Ma te sma na mati fu makandra fu di den ala tu lobi Gado, dan noti no o man pori a matifasi fu den. Te tru mati e kisi kesekese nanga makandra, dan den sa handri na wan fasi di Yehovah feni bun. Te sma di e gens Gado e pruberi fu tyari prati kon na mindri tru Kresten, dan den feanti disi e kon si taki den no man pori a matifasi di tru Kresten abi nanga makandra. Na ini den hondrohondro yari di pasa, futuboi fu Yehovah ben de klariklari fu dede, na presi taki den tori den Kresten brada nanga sisa fu den.​—Leisi 1 Yohanes 3:16.

5. Fa a du kon taki Rut nanga Naomi tan bun mati fu makandra?

⁵ A no de fu taki, dati den moro bun mati di wi kan abi, na sma di lobi Yehovah. Luku na eksempre fu Rut nanga Naomi. Den uma disi ben de mati fu makandra, èn a matifasi fu den na wan fu den moro moiwan di skrifi na ini Bijbel. Fa a du kon taki den uma disi tan bun mati fu makandra? Te wi e luku san Rut ben taigi Naomi, dan wi e kisi piki tapu na aksi dati. Rut ben taki: „Yu pipel o de mi pipel, èn yu Gado o de mi Gado. . . . Ma efu iniwan sani boiti dede prati mi nanga yu, dan Yehovah kan strafu mi èn a musu du moro leki dati srefi” (Rut 1:16, 17). Soleki fa a sori, dan Rut nanga Naomi ben abi bigi lobi gi Yehovah, èn yu ben kan si dati na a fasi fa den ben e handri nanga makandra. A sani disi meki taki Yehovah blesi ala den tu uma disi.

Fa wi kan meki bun mati?

6-8. (a) Fa a du kon taki sma e tan bun mati fu makandra? (b) San yu kan du fu meki mati?

⁶ Na eksempre fu Rut nanga Naomi e sori taki te sma e tron bun mati fu makandra, dan a sani dati no e kon fu ensrefi. Den sma dati musu lobi Yehovah. Ma fu tan bun mati fu makandra, dan sma musu meki tranga muiti fu kon abi a matifasi dati, èn fu no suku den eigi bun nomo. Srefi brada nanga sisa na ini wan Kresten osofamiri musu du muiti fu de bun mati fu makandra. We dan, fa yu kan meki bun mati?

⁷ Du muiti fu meki mati. Na apostel Paulus ben taigi den mati fu en na ini a gemeente na ini Rome, fu „abi a gwenti fu gi sma wan switikon” (Rom. 12:13). Sobun, efu wi wani meki  bun mati, dan wi musu teki ibri okasi fu gi trawan wan switikon. Nowan sma kan du dati gi yu. (Leisi Odo 3:27.) Wán fasi fa yu kan meki mati, na te yu e kari difrenti sma fu a gemeente fu kon nyan na yu oso. Fu san ede yu no e teki en leki wan gwenti fu gi sma na ini yu gemeente wan switikon?

⁸ Wan tra fasi fa yu kan du muiti fu meki mati, na te yu e aksi difrenti sma fu wroko makandra nanga yu na ini a preikiwroko. Te yu e tanapu na a mofodoro fu wan sma di yu no sabi, èn yu e yere fa yu Kresten brada noso sisa e fruteri fayafaya fa a lobi Yehovah, dan a no de fu taki dati yu sa kon abi moro lobi gi a sma dati.

9, 10. Fu san ede Paulus ben de wan bun eksempre? Fa wi kan teki na eksempre fu en?

⁹ Opo un ati fu sori lobi gi trawan. (Leisi 2 Korentesma 6:12, 13.) Yu feni taki yu no e si sma na ini a gemeente di kan tron yu mati? Efu dati de so, dan kande yu e suku spesrutu sma nomo fu de yu mati. Na apostel Paulus ben de wan bun eksempre gi wi, fu di a ben opo en ati fu sori lobi gi trawan. Wan ten ben de di a no ben o prakseri srefisrefi fu tron mati nanga sma di no ben de Dyu. Ma a tron „wan apostel gi den trakondre sma”.​—Rom. 11:13.

¹⁰ Boiti dati, a no ben de so taki ala den mati fu Paulus ben de sma di ben owru neleki en. Fu eksempre, en nanga Timoteyus ben tron bun mati fu makandra, aladi den no ben owru a srefi, èn aladi den ben kweki na difrenti fasi. Na ini a ten disi, furu yonguwan breiti taki den abi mati na ini a gemeente di owru moro den. Vanessa, di pasa 20 yari, e taki: „Mi abi wan bun mati di pasa 50 yari. Mi kan taigi en iniwan sani di mi ben o taigi den mati fu mi di owru neleki mi. Èn a lobi mi so te.” Fa a du kon taki den sortu sma disi e tron mati fu makandra? Vanessa e taki: „Mi ben musu du muiti fu kon abi a mati disi.” Yu de klariklari fu meki mati nanga sma di owru moro yu, noso di yongu moro yu? A no de fu taki, dati Yehovah sa blesi a muiti di yu e du.

11. San wi kan leri fu na eksempre fu Yonatan nanga David?

¹¹ Tan horibaka gi yu mati. Salomo ben skrifi: „Wan trutru mati abi lobi ala ten, èn a de wan brada di en mama meki fu te banawtu de” (Odo 17:17). Di Salomo ben skrifi den wortu dati, dan a kan taki a ben abi a matifasi na prakseri di en papa David ben abi nanga Yonatan (1 Sam. 18:1). Kownu Saul ben wani taki Yonatan, a manpikin fu en, ben musu tron kownu fu Israel. Ma Yonatan ben sabi taki Yehovah ben teki David leki kownu, èn a ben abi lespeki gi a tori dati. Tra fasi leki Saul, Yonatan no kon dyarusu tapu David. Di sma ben e prèise David, dan a no ben e atibron, èn  a no ben e bribi den takru sani di Saul ben e fruteri fu David (1 Sam. 20:24-34). Wi de leki Yonatan? Te den mati fu wi e kisi frantwortu na ini a gemeente, dan wi breiti gi den? Te den e kisi fu du nanga problema, dan wi e trowstu den èn wi e yepi den? Te sma e fruteri takru sani fu wan mati fu wi, dan wi de gaw fu bribi den sani dati? Noso wi e opo taki gi a mati fu wi neleki fa Yonatan ben e du dati gi a mati fu en?

Te wi no musu de mati moro nanga wan sma

12-14. Sortu problema e miti son Bijbelstudenti? Fa wi kan yepi den?

¹² Te wan Bijbelstudenti e bigin tyari kenki kon na ini en libi, dan kande a sa kisi problema nanga den mati fu en. Kande a lobi fu abi demakandra nanga den mati disi, ma den mati no e libi na wan fasi di e kruderi nanga Bijbel. A kan taki fosi, a ben gwenti fu abi demakandra nanga den mati dati. Ma now a e kon si taki den mati fu en e du sani di no bun gi en, èn a feni taki a no kan bemui so furu moro nanga den (1 Kor. 15:33). Ma a ben kan feni tu taki te a no abi demakandra moro nanga den, dan a no de wan bun mati.

¹³ Efu yu na wan Bijbelstudenti èn a sani disi e pasa nanga yu, dan yu musu hori na prakseri taki wan trutru mati sa breiti taki yu e pruberi fu kenki yu libi. Kande a mati dati sa wani leri moro tu fu Yehovah, neleki fa yu e du dati. Ma falsi mati, sa ’taki ogri fu yu’ fu di yu no e waka moro nanga den „go na a srefi doti gotro fu yayolibi” (1 Petr. 4:3, 4). Fu taki en leti, a no yu na wan takru mati, ma na den.

¹⁴ Te Bijbelstudenti e ondrofeni taki mati fu den di no lobi Yehovah e drai baka gi den, dan memre fu a gemeente kan tron den mati fu gi den deki-ati (Gal. 6:10). Yu sabi den Bijbelstudenti di e kon na a gemeente? Yu e du muiti son leisi fu abi demakandra nanga den so taki yu kan gi den deki-ati?

15, 16. (a) San wi musu du te wan mati e tapu fu dini Yehovah? (b) Fa wi kan sori taki wi lobi Gado?

¹⁵ Ma fa a de te wan mati na ini a gemeente e bosroiti fu drai baka gi Yehovah? Kande a de fanowdu srefi taki den puru en fu a gemeente. A sani dati kan meki yu firi sari trutru. Wan sisa e taki fa a ben firi di wan bun mati fu en tapu fu dini Yehovah. A e taki: „Mi ben e firi brokosaka trutru. Mi ben denki taki mi mati ben abi wan tranga bribi, ma dati no ben de so. Mi ben e aksi misrefi efu a ben e dini Yehovah soso fu plisi en famiri. A sani dati meki taki mi bigin luku fu san ede mi ben e anbegi Yehovah. Mi ben e dini En nanga a yoisti denki?” San yepi a sisa disi? A e taki: „Mi trowe mi hebi na tapu Yehovah. Mi abi a fasti bosroiti fu sori Yehovah taki mi lobi en nanga mi heri ati, èn a no soso fu di a e gi mi mati na ini na organisâsi fu en.”

¹⁶ Wi no kan fruwakti taki wi sa tan mati fu Gado te wi abi demakandra nanga sma di de mati fu grontapu. A disipel Yakobus ben skrifi: „Unu no sabi taki te wan sma de wan mati fu grontapu, dan a de wan feanti fu Gado? Fu dati ede, iniwan sma di wani de wan mati fu grontapu, e tron wan feanti fu Gado” (Yak. 4:4). Wi kan sori taki wi lobi Gado te wi abi a frutrow taki A sa yepi wi fu horidoro te wi lasi wan mati. Ma wi musu tan gi yesi na en nanga wi heri ati. (Leisi Psalm 18:26, Da Bijbel na ini Sranantongo.) A sisa di kari na ini den paragraaf na fesi ben taki en so: „Mi leri taki wi no kan meki wan sma lobi Yehovah, èn wi no kan meki wan sma lobi wi. Te fu kaba, wan sma srefi e bosroiti suma a sa lobi.” Ma san wi kan du fu tan bun mati nanga den sma di e tan memre fu a gemeente?

 Fa fu tan abi bun mati

17. Fa bun mati e taki nanga makandra?

¹⁷ Te mati man taki bun nanga makandra, dan dati e yepi den fu kon moro krosibei na makandra. Efu yu leisi den Bijbel tori fu Rut nanga Naomi, a di fu David nanga Yonatan, èn a di fu Paulus nanga Timoteyus, dan yu o si taki bun mati e taki fri nanga makandra, ma den e du dati na wan lespeki fasi tu. Luku san Paulus ben skrifi fu sori wi fa wi musu taki nanga trawan. A ben taki: „Un musu taki na wan switi fasi ala ten, iya, den wortu fu unu musu abi sowtu.” Paulus ben e taki spesrutu fu a fasi fa wi musu taki nanga den wan „di de na dorosei”, noso den wan di no de wi Kresten brada nanga sisa (Kol. 4:5, 6). A no de fu taki, dati efu wi musu taki na wan lespeki fasi nanga sma di no e dini Yehovah, dan wi abi moro reide fu taki na wan lespeki fasi nanga wi mati na ini a gemeente!

18, 19. Fa wi musu si iniwan rai di wi e kisi fu wan Kresten mati? San wi kan leri fu den owruman na ini Efeise?

¹⁸ Efu wan sma abi wan bun mati, dan a wani kon sabi fa a mati dati e denki fu wan tori. Dati meki den musu taki krin nanga makandra, èn na wan switi fasi. A koni Kownu Salomo ben skrifi: „Oli nanga switismeri e prisiri na ati. Na so a de tu nanga a switifasi fu wan mati di e gi bun rai” (Odo 27:9). Na so yu e denki tu fu rai di yu e kisi fu wan mati? (Leisi Psalm 141:5.) Efu wan mati e taigi yu taki wan sani di yu e du e gi en broko-ede, dan san yu o du? Yu e si taki na fu di a lobi yu, meki a taigi yu a sani dati? Noso yu e atibron na en tapu?

¹⁹ Na apostel Paulus ben de bun mati nanga den owruman na ini a gemeente fu Efeise. A kan taki a ben sabi wan tu fu den man dati sensi a bigin di den tron Kresten. Ma a lasti leisi di a ben kon makandra nanga den, a gi den krin rai. Fa den ben feni dati? Den mati fu Paulus no ben atibron. Na presi fu dati, den ben breiti taki a ben e broko en ede nanga den, èn den krei srefi di den yere taki den no ben o si en moro.​—Tori. 20:17, 29, 30, 36-38.

20. San wan lobi-ati mati sa du?

²⁰ Boiti taki bun mati e teki bun rai fu den mati fu den, den e gi bun rai tu. A no de fu taki, dati wi musu sabi o ten wi musu ’bumui nanga wi eigi tori’ (1 Tes. 4:11). Èn wi musu sabi tu taki ibriwan fu wi „o abi fu gi Gado frantwortu” (Rom. 14:12). Ma te a de fanowdu, dan wan lobi-ati Kresten sa memre en mati na wan switi fasi, san Yehovah e fruwakti fu en (1 Kor. 7:39). Fu eksempre, san yu ben o du te yu e si taki wan mati di no trow e kon kisi lobifiri gi wan sma di no e anbegi Yehovah? Yu ben o bosroiti fu no taigi a mati fu yu taki yu e broko yu ede nanga en, soso fu di yu no wani taki a matifasi di yu nanga en abi kon pori. Noso, kande yu e taki nanga a mati fu yu fu a tori dati, ma a mati no e gi yesi na a rai di yu gi en. San yu ben o du? Efu yu na wan bun mati, dan yu ben o aksi den lobi-ati skapuman fu yepi a mati fu yu di e du wan sani di no fiti. Ma yu sa musu abi deki-ati fu du dati. Awansi fa a no fa, te mati lobi Yehovah, dan awansi den e atibron nanga makandra son leisi, toku dati no sa de fu langa.

21. San wi alamala sa du son leisi, ma fu san ede a de tumusi prenspari taki wi e tan abi bun mati na ini a gemeente?

²¹ Leisi Kolosesma 3:13, 14. Son leisi, den mati fu wi sa ’feni taki wi du den wan ogri’, èn den sa taki noso du sani tu di wi no lobi. Yakobus ben skrifi: „Wi alamala e sondu furu tron” (Yak. 3:2). Ma a no fu di sma na mati, meki den musu denki taki den kan sondu ibri leisi teige makandra. San e meki taki sma na trutru mati fu makandra, na te den de klariklari fu gi makandra pardon. A de tumusi prenspari taki wi e taki krin nanga makandra èn taki wi e gi makandra pardon nanga wi heri ati! Na so wi sa meki bun mati. Te wi e sori den mati fu wi na a fasi dati taki wi lobi den, dan a lobi fu wi sa de „wan volmaakti banti di e meki sma kon de wán”.

San yu ben sa piki?

• Fa wi kan meki bun mati?

• O ten a sa de fanowdu fu no de mati moro nanga wan sma?

• San wi musu du fu tan abi bun mati?

[Aksi fu a tori disi]

[Prenki na tapu bladzijde 18]

Fa a du kon taki Rut nanga Naomi ben tan bun mati fu makandra?

[Prenki na tapu bladzijde 19]

Yu abi a gwenti fu kari sma kon na yu oso?