Hori na Osofamiri Anbegi fu man pasa a kaba libilibi!

PRAKSERI fa „a feti na tapu a bigi dei fu Gado na Almaktiwan” o meki sma frede! (Openb. 16:14) A profeiti Mika ben skrifi krin: „Den bergi o smèlter . . . , èn den lagipresi o priti opo. A o de neleki te faya e bron kandrafatu, èn neleki te wan sma di de na wan hei presi e kanti watra go na ondro” (Mika 1:4). San o pasa nanga den sma di no e dini Yehovah? Gado Wortu e taki: „Den dedeskin fu den sma di Yehovah kiri na a dei dati o panya fu a wan sei fu grontapu te na a tra sei.”—Yer. 25:33.

Fu di Bijbel e gi wi den warskow disi, meki osofamiri-edeman musu aksi densrefi a sani disi fu den pikin fu den di owru nofo fu man frustan sani: ’Den pikin fu mi o pasa a bigi dei dati libilibi?’ A no de fu taki dati furu osofamiri, abi soso wan papa noso wan mama di e sorgu en pikin. Bijbel e gi papa nanga mama a dyaranti taki den pikin fu den o pasa Armagedon libilibi te den abi wan bun matifasi nanga Gado.—Mat. 24:21.

A de prenspari fu poti wan fasti ten fu hori na Osofamiri Anbegi

Yu leki papa noso mama musu du ala san yu man fu kweki den pikin fu yu ’nanga a leri fu Yehovah èn yu musu frumane den, so taki den kan kisi a denki fu en’ (Ef. 6:4). A de tumusi prenspari taki yu e studeri Bijbel nanga den pikin fu yu. Wi wani taki den yonguwan fu wi musu de leki den Kresten na ini Filipi. Paulus ben prèise den Kresten dati fu di den ben e gi yesi na Yehovah nanga den heri ati. Paulus ben skrifi: „Mi lobiwan, unu ben gi yesi ala ten di mi ben de nanga unu, ma now di mi no de nanga unu, unu de klariklari fu gi yesi moro srefi. Fu dati ede, nanga frede èn nanga beifi un musu tan wroko na a srefi fasi tu so taki unsrefi kan kisi frulusu.”—Fil. 2:12.

Den pikin fu yu e hori densrefi na den wet fu Yehovah te yu no de nanga den? Fa a de te den de na skoro? Fa yu kan yepi yu pikin fu kisi na overtoigi taki den wet fu Yehovah e tyari wini kon, so taki den e gi yesi na den wet disi srefi te yu no de nanga den?

Wan prenspari sani di sa yepi yu fu tranga a bribi fu yu pikin, na te yu e studeri nanga den leki osofamiri. Dati meki wi sa poti prakseri na dri prenspari sani di sa yepi yu fu abi bun bakapisi te yu e studeri Bijbel nanga na osofamiri fu yu.

Studeri doronomo nanga yu osofamiri

Bijbel e sori taki den engel manpikin fu Gado e kisi a kari fu kon na en fesi na spesrutu ten (Yob 1:6). Du a srefi nanga den pikin fu yu. Poti wan fasti dei nanga wan fasti ten tapu a neti te yu o studeri leki osofamiri èn hori yusrefi na a ten dati. Boiti dati, poti wan tra fasti ten fu hori a studie dati, efu wan sani meki taki yu no ben man hori en.

Baka wan pisi ten, yu musu luku bun taki sani no e tapu yu fu studeri doronomo leki osofamiri. Hori na prakseri taki den pikin fu yu na den moro prenspari Bijbelstudenti fu yu. Ma Satan e suku nomonomo fu swari den (1 Petr. 5:8). Efu yu e bosroiti fu luku telefisi noso fu du wan tra sani di no de so prenspari, na presi taki yu e studeri leki osofamiri, dan yu meki Satan kori yu.—Ef. 5:15, 16; 6:12; Fil. 1:10.

Poti prakseri na sani di den pikin kan gebroiki na ini den aladei libi

Na Osofamiri Anbegi no de fu meki den pikin kon sabi sani nomo. Pruberi fu sori den fa den kan gebroiki den sani di den e leri. San yu kan du? Son leisi, yu kan poti prakseri na  artikel di e taki fu situwâsi di sa miti yu pikin na ini den dei noso den wiki di de na den fesi. Fu eksempre, fu san ede yu no e oefen fa den kan hori wan takimakandra na ini a preikiwroko? Te yonguwan man du wan sani bun, dan den lobi du a sani dati. A bun fu oefen wan takimakandra nanga den pikin, èn fu poti prakseri na san den kan taki te wan sma no wani arki. Dati sa gi den moro deki-ati fu teki prati na den difrenti fasi fa wi e preiki a bun nyunsu fu a Kownukondre.—2 Tim. 2:15.

Yu kan oefen sani tu nanga den pikin fu yu, di sa yepi den fu kakafutu gi speri di e dwengi den fu du sani di no fiti. Pruberi fu taki fu sani di e gi yu pikin na okasi fu taki san a no lobi, noso san a no feni bun. Kande yu kan aksi yu pikin sortu tesi e miti en, pe den tesi dati e miti en, san o pasa te den e brokokindi gi den tesi dati, èn san o pasa te den e kakafutu gi den. Ten na ten, a ben o bun tu fu oefen fa den o handri te den e kisi den tesi dati.

Na Osofamiri Anbegi e gi papa nanga mama na okasi fu sori den pikin krin sortu wini a e tyari kon te den e suku fu doro marki na ini a tru anbegi. Dati meki den ondrofenitori na ini den tijdschrift fu wi bun srefisrefi fu yepi yu pikin fu kon frustan taki a moro bun fasi fu libi, na fu dini Yehovah. Yepi a pikin fu yu fu kon kisi na angri fu tron wan pionier, fu dini na Bethel, fu go na a Dinariskoro, noso fu du wan tra sortu furuten diniwroko.

Ma luku bun nanga a sani disi: Son papa nanga mama abi a bun fu den pikin fu den na prakseri, ma den e poti so furu prakseri na san den wani taki a pikin musu tron, taki den no e si san a pikin e du kaba. A no de fu taki, dati a bun fu gi yu pikin deki-ati fu poti en leki marki fu dini na Bethel, noso fu dini leki zendeling. Ma te yu e du dati, dan yu musu luku bun taki yu no e fruferi a pikin, fu di yu e fruteri en doronomo san yu e fruwakti fu en. A sani dati kan meki taki a pikin e lasi-ati (Kol. 3:21). Ala ten hori na prakseri taki yu manpikin noso yu umapikin musu kon lobi Yehovah nanga en eigi ati, a no nanga a di fu yu (Mat. 22:37). Sobun, suku okasi fu prèise yu pikin gi den sani di a e du bun, èn dwengi yusrefi fu no poti tumusi furu prakseri na den sani di a no e du. Meki a kisi warderi gi ala den sani di Yehovah du. Baka dati, gi a pikin na okasi fu sori warderi gi a bun-ati fu Yehovah.

Meki na Osofamiri Anbegi gi prisiri

A di fu dri sani di sa yepi fu meki na Osofamiri Anbegi waka bun, na te a e gi prisiri. Fa yu kan du dati? Kande yu kan arki wan drama son leisi, kande yu kan luku wan fu den video di Yehovah Kotoigi meki, èn kande yu kan taki fu en baka dati. Noso kande yu kan meki ibri sma na ini na osofamiri leisi wan pisi fu Bijbel.

A Waktitoren nanga na Ontwaakt! abi artikel na ini di osofamiri kan gebroiki bun fu hori takimakandra. Fu eksempre, kande yu kan gebroiki na artikel tapu bladzijde 31 fu ibri Ontwaakt! Na artikel dati nen: „Test uw kennis” (Fa yu ben sa piki?) Na ini ibri tra Waktitoren di kon na doro, wan artikel skrifi di nen „Gi den yonguwan”, di yu kan gebroiki fu studeri nanga den pikin fu yu. Ten na ten, wan artikel de  tu gi boi nanga meisje di moro pikin, èn a nen „Leri den pikin fu yu”.

A no de fu taki, dati den artikel na ini na Ontwaakt!, di nen „Jonge mensen vragen” (Aksi fu yonguwan), èn a buku Jonge mensen vragen, Deel 2 (Yongu sma e aksi, Pisi 2), de wan bigi yepi gi papa nanga mama di abi moro bigi pikin. Boiti dati, no frigiti a faki „Wat denk jij?” (San yu e denki?), na a kaba fu ibri artikel. Den sani di skrifi na ini a faki dati no de fu sori nomo san na den moro prenspari penti na ini na artikel. Yu kan gebroiki den aksi na ini a faki dati tu fu hori takimakandra nanga yu osofamiri.

Ma luku bun taki yu no e gebroiki na osofamiri studie fu poti wan lo aksi gi den pikin fu yu. Fu eksempre, papa nanga mama kisi a rai fu gi den pikin fu den deki-ati fu skrifi na ini den buku fa den e denki èn fa den e firi fu den sani di den e studeri leki osofamiri, èn fa den kan fiti den sani dati. Ma no pruberi fu dwengi yu pikin fu leisi gi yu san a skrifi. A sani dati kan meki taki a pikin no sa skrifi finifini moro fa a e denki. Gi yu pikin na okasi fu hori wan tu sani gi ensrefi. Kande den sa wani fruteri yu bakaten san den skrifi.

Efu yu e hori yu osofamiri anbegi doronomo, efu yu e du en na wan fasi di sa yepi den pikin fu frustan sani moro bun, èn efu yu e hori en na wan fasi di e gi prisiri, dan Yehovah sa blesi a muiti fu yu bogobogo. A spesrutu ten disi di yu e gebroiki fu studeri nanga yu osofamiri di yu lobi, sa yepi den fu tan abi wan bun matifasi nanga Gado.

[Faki na tapu bladzijde 31]

Pruberi fu du difrenti sani

„Te wi ben e studeri nanga den umapikin fu wi di den ben pikin, dan mi nanga mi masra ben e luku den sani di wi ben musu sreka gi wan gemeente konmakandra. Baka dati, wi ben e meki den umapikin fu wi teken san den ben leri. Son leisi, wi ben e prei Bijbel tori, noso wi ben e oefen fa wi ben o pristeri wan sani na ini a preikiwroko. Te wi ben e studeri nanga den, dan wi ben e poti prakseri na sani di ben e fiti gi ibriwan fu den. Wi ben e sorgu tu taki den sani di wi ben e studeri ben e hari den prakseri, taki den ben e kisi wini fu den, èn taki den sani dati ben e gi den prisiri.”—J.M., di e libi na ini Amerkankondre.

„Wi ben wani yepi a boi fu wan Bijbelstudenti fu mi kon frustan fa a ben de fu gebroiki wan bukulolo na ini Bijbel ten. Fu dati ede wi meki kopi fu den bladzijde fu a buku Yesaya. Wi figi ala den nomru fu den kapitel nanga den vers puru. Wi fasi ala den bladzijde kon na wán, èn na ala tu sei fu a papira wi ben fasi wan peipi. Baka dati, a boi pruberi fu du san Yesus ben du na ini a snoga na Nasaret. A tori na Lukas 4:16-21 e fruteri taki Yesus ’opo a bukulolo [fu Yesaya] èn a feni’ a pisi di a ben e suku (Yes. 61:1, 2). Ma di a boi pruberi fu du a srefi, dan a ben muilek gi en fu feni Yesaya kapitel 61, fu di den kapitel nanga den vers na ini a langa bukulolo dati no ben abi wan nomru. A ben naki a boi en ati taki Yesus ben man gebroiki den bukulolo na so wan koni fasi, taki a bari: ’Yesus ben koni trutru!’”—Y.T., di e libi na ini Yapan.

[Prenki na tapu bladzijde 30]

Te yu e oefen nanga den pikin fu yu, dan dati sa yepi den fu kakafutu gi speri di e dwengi den fu du sani di no fiti

[Prenki na tapu bladzijde 31]

Du muiti fu meki taki na Osofamiri Anbegi e gi prisiri