„Libi na ini vrede nanga ala sma”
„Libi na ini vrede nanga ala sma”
„Efu a kan, efu a e didon na unu, dan libi na ini vrede nanga ala sma.”—ROM. 12:18.
1, 2. (a) Sortu warskow Yesus gi den bakaman fu en? (b) Pe wi kan feni rai di e sori wi fa wi musu handri nanga sma di e gens wi?
YESUS ben warskow den bakaman fu en taki grontapusma ben o gens den, èn a neti fosi a dede, a taigi den fu san ede dati ben o pasa. A taigi den apostel fu en: „Efu unu ben de wan pisi fu grontapu, dan grontapu ben o lobi unu, bika unu ben o de fu grontapu. Ma fu di unu no de wan pisi fu grontapu èn mi teki unu puru na grontapu, dati meki grontapu e teige unu.”—Yoh. 15:19.
2 Na apostel Paulus ondrofeni taki den wortu fu Yesus tru. Na ini a di fu tu brifi di a ben skrifi gi en yongu mati Timoteyus, a ben taki: „Yu sabi heri bun san mi ben leri yu, fa mi ben libi èn san na a marki di mi ben abi na ini a libi; yu sabi sosrefi a bribi fu mi, fa mi ben abi langa pasensi, fa mi ben lobi trawan, fa mi ben horidoro, fa sma ben frufolgu mi èn fa mi ben pina.” Baka dati, Paulus taki: „Iya, a de so taki ala den wan di wani dini Gado na wan getrow fasi èn di de wán nanga Krestes Yesus, sa kisi frufolgu tu” (2 Tim. 3:10-12). Na ini kapitel 12 fu a brifi di Paulus ben skrifi gi den Kresten na ini Rome, a ben gi den koni rai fu sori den fa den ben musu handri nanga sma di ben e gens den. Wi kan teki leri fu den wortu fu en na ini a ten disi fu a kaba.
’Du bun sani gi sma’
3, 4. Fa wi kan fiti a rai di skrifi na Romesma 12:17 (a) na ini wan osofamiri pe son sma no e anbegi Yehovah? (b) te wi e handri nanga den birtisma fu wi?
3 Leisi Romesma 12:17. Paulus ben sori taki te sma e du ogri nanga wi, dan wi no musu du ogri baka nanga den. Spesrutu den Kresten di e tan na ini osofamiri pe son sma no e anbegi Yehovah, musu gi yesi na a rai disi. Te a patna di no de na bribi e taki noso e du wan hati sani, dan a Kresten patna no musu du a srefi nanga a patna dati. Te wi ben o ’du ogri baka nanga wan sma di du wi wan ogri’, dan dati no e tyari nowan enkri wini kon. Na presi fu dati, wi e meki a situwâsi kon moro ogri.
4 Paulus e sori san na wan moro bun sani di wi kan du. A e taki: „Du sani di ala sma feni bun.” Te wan wefi e sori trutru switifasi gi en masra, baka te a masra taki wan fruferi sani fu a bribi fu en, dan dati kan meki taki trobi no e kon (Odo 31:12). Carlos, di de wan memre now fu wan Bethelfamiri, e fruteri san yepi en mama di a ben e kisi hebi gens fu en papa. Carlos e taki dati en mama ben e tan sori switifasi gi en papa, èn a ben e hori na oso krin. A ben taki moro fara: „Mi mama ben e gi den pikin fu en deki-ati fu sori lespeki gi mi papa ala ten. A ben de nomonomo taki mi ben e prei wan spesrutu prei nanga mi papa, aladi mi no ben lobi a prei dati. Ma a prei dati ben e meki mi papa firi bun.” Te fu kaba, a bigin studeri Bijbel èn a teki dopu. Yehovah Kotoigi e yepi den birtisma te rampu miti den, èn na so den e fiti a rai tu di Paulus gi fu „du sani di ala sma feni bun”. Nofo tron a sani disi meki taki sma no e denki takru moro fu den.
Poti „faya krofaya” na tapu den ede fu gensman
5, 6. (a) Na sortu fasi wi musu poti „faya krofaya” na tapu na ede fu wan feanti? (b) Fruteri wan ondrofenitori fu a kondre fu yu, di e sori sortu wini a e tyari kon te wi e fiti a rai di skrifi na Romesma 12:20.
5 Leisi Romesma 12:20. Di Paulus skrifi den wortu fu a tekst dati, dan a no de fu taki dati a ben abi na prakseri san skrifi na Odo 25:21, 22. Den tekst dati e taki: „Efu angri e kiri a sma di no lobi yu kwetikweti, gi en brede meki a nyan. Efu watra e kiri en, gi en watra fu dringi, bika te yu e du den sani disi, dan dati o safu en ati. A o de neleki te yu poti wan ipi krofaya di e bron, na tapu en ede. Yehovah o blesi yu fu dati.” Te wi e luku a rai di Paulus gi na ini Romesma kapitel 12, dan a no kan de so kwetikweti taki den agersi krofaya na fu strafu wan gensman, noso fu gi en syen. Na presi fu dati, na odo, èn den srefi sortu wortu di Paulus ben skrifi gi den Romesma, abi fu du nanga wan fasi fa sma ben e smèlter isri na ini owruten. Charles Bridges, wan Ingrisi sabiman fu a di fu 19 yarihondro, ben taki: „Poti krofaya lontu na isri, na ondrosei, èn na tapusei fu en; No hori na isri na tapusei fu a faya, ma poti ipi faya krofaya na en tapu. Te wan sma e tan du ala muiti fu sori lobi gi wan tra sma di no lobi en, dan a no o pasa makriki taki na ati fu a sma dati no sa kon safu.”
6 Te sma e gens wi, dan wi musu poti „faya krofaya” na tapu den ede. Dati wani taki, dati wi musu sori switifasi gi den. Kande dati sa meki taki den no e gens wi moro. Te wi e sori switifasi gi sma, dan dati kan meki taki den no sa denki takru moro fu a pipel fu Yehovah èn fu a boskopu di den e preiki. Na apostel Petrus ben skrifi: „Tan tyari unsrefi na wan bun fasi na mindri den grontapusma, so taki a srefi sani di e meki den taki ogri fu unu neleki unu na ogri sma, sa meki den gi Gado glori na a dei te a sa kon krutu sma, fu di densrefi e si den bun wroko fu unu.”—1 Petr. 2:12.
„Libi na ini vrede nanga ala sma”
7. San na a vrede di Krestes gi den disipel fu en, èn san a vrede dati musu gi wi deki-ati fu du?
7 Leisi Romesma 12:18. A lasti neti di Yesus ben de nanga den apostel fu en, a taigi den: „Te mi o gowe, dan mi o meki unu abi vrede, mi o gi unu a vrede fu mi” (Yoh. 14:27). A vrede di Yesus gi den disipel fu en, na a korostu firi di den abi te den e firi taki Yehovah Gado nanga en Manpikin lobi den èn taki den feni den bun. A korostu firi disi musu gi wi deki-ati fu libi na ini vrede nanga trawan. Tru Kresten na sma di lobi vrede èn den lobi fu meki vrede.—Mat. 5:9.
8. Fa wi kan de sma di lobi fu meki vrede te wi de na oso, èn te wi de na ini a gemeente?
8 Wán fasi fa wi kan de sma di lobi fu meki vrede na ini na osofamiri, na te wi e lusu kesekese wantewante, na presi taki wi e meki wan situwâsi kon moro ogri (Odo 15:18; Ef. 4:26). Na so a musu de tu na ini a Kresten gemeente. Na apostel Petrus e sori taki wan sma di lobi fu meki vrede e basi a tongo fu en (1 Petr. 3:10, 11). Yakobus ben gi den Kresten krakti rai tu. A ben sori den taki den ben musu basi den tongo, taki den no ben musu dyarusu tapu trawan, èn taki den no ben musu strei nanga trawan. Baka dati, a skrifi: „A koni fu Gado e meki taki wan sma de krin, èn a e meki sosrefi taki a lobi vrede, a de klariklari fu fiti ensrefi, a de klariklari fu gi yesi, a de klariklari fu sori sari-ati èn fu du bun, a no lobi a wan sma moro a trawan, èn a no e hoigri. Boiti dati, den siri fu a froktu fu regtfardikifasi e sai te vrede de, èn dati de fu a bun fu den sma di e meki vrede nanga trawan.”—Yak. 3:17, 18.
9. San wi musu hori na prakseri, aladi wi e pruberi fu „libi na ini vrede nanga ala sma”?
9 Na ini Romesma 12:18, Paulus e sori taki wi no musu libi na ini vrede soso nanga wi famiriman èn nanga den memre fu a gemeente. A e taki dati wi musu „libi na ini vrede nanga ala sma”. Dati wani taki dati wi musu libi na ini vrede nanga birtisma, nanga sma na wi wrokope, nanga pikin na skoro, èn nanga sma di wi e miti na ini a preikiwroko. Ma na apostel ben taki tu: „Efu a kan, efu a e didon na unu.” Dati wani taki dati wi musu du ala san wi man fu „libi na ini vrede nanga ala sma”, sondro taki wi e pasa den regtfardiki markitiki fu Gado.
Na Yehovah o teki refensi
10, 11. Fa wi e sori taki wi e „libi sani gi na atibron fu Yehovah?” Fu san ede a fiti fu du dati?
10 Leisi Romesma 12:19. Awansi sma „no wani arki” a boskopu fu wi, awansi den no lobi a wroko fu wi, noso awansi den e gens wi krinkrin, toku wi musu tan ’hori wisrefi te ogri e miti wi’ èn wi musu handri „nanga safri-ati” (2 Tim. 2:23-25). Paulus e gi Kresten a rai fu no teki refensi, ma fu ’libi sani gi na atibron fu Gado’. Wi leki Kresten sabi taki a no de na wi fu teki refensi. A psalm skrifiman ben skrifi: „No ati bron moro èn no rigeri moro. No ati bron so te, taki yu go du ogri” (Ps. 37:8). Èn Salomo ben gi a rai disi: „No taki: ’Mi o pai ogri fu ogri!’ Wakti Yehovah èn a o frulusu yu.”—Odo 20:22.
11 Te gensman e du ogri nanga wi, dan a moro bun fu libi en gi Yehovah fu strafu den sma disi na en eigi ten. Paulus ben sori taki a ben abi Yehovah na prakseri di a taki moro fara: „Gado Buku taki: ’Na mi o teki refensi; mi o pai den baka gi den ogri di den du, na so Yehovah taki.’” (Luku Deuteronomium 32:35.) Efu wi ben o pruberi fu teki refensi, dan wi no ben o sori sakafasi fu di wisrefi ben o du wan sani di Yehovah e si leki en frantwortu. Boiti dati, wi ben o sori taki wi no e frutrow Yehovah te a e pramisi: „Mi o pai den baka.”
12. O ten Yehovah sa sori na atibron fu en, èn fa a o du dati?
12 Na ini a brifi di Paulus ben skrifi gi den Romesma, a ben taki kaba: „Gado di de na hemel, e sori wi taki a e atibron trutru nanga ala den ogridu nanga kruktudu fu den sma di e gens a waarheid na wan onregtfardiki fasi” (Rom. 1:18). Na a ten fu „a bigi banawtu”, Yehovah sa gebroiki en Manpikin fu sori na atibron fu en komoto na hemel (Openb. 7:14). Dati sa de „wan buweisi fu a regtfardiki fasi fa Gado e krutu sma”. Paulus ben tyari dati kon na krin na ini wan fu den tra brifi fu en di a ben skrifi nanga yepi fu santa yeye. A ben taki: „Disi wani taki tu dati a de wan regtfardiki sani taki Gado sa pina den sma di e pina unu, ma taki a sa meki unu di e pina, kisi frulekti makandra nanga wi, te Masra Yesus o komoto fu hemel fu sori ensrefi makandra nanga den tranga engel fu en na ini wan bigi faya; na a ten dati, a o puru atibron na tapu den sma di no sabi Gado èn na tapu den sma di no e gi yesi na a bun nyunsu fu wi Masra Yesus.”—2 Tes. 1:5-8.
Du bun fu kan wini na ogri
13, 14. (a) Fu san ede a no e fruwondru wi taki sma e gens wi? (b) Fa wi kan blesi den sma di e frufolgu wi?
13 Leisi Romesma 12:14, 21. Te wi abi ala frutrow taki Yehovah sa du san a abi na prakseri, dan wi kan poti ala wi prakseri na a wroko di a gi wi fu du. Dati na a wroko di wi abi fu preiki a ’bun nyunsu fu a Kownukondre gi sma na heri grontapu’ (Mat. 24:14). Wi sabi taki a Kresten diniwroko disi sa meki den feanti fu wi atibron, bika Yesus ben warskow wi: „Na ini ala kondre den sma o teige unu fu mi nen ede” (Mat. 24:9). Dati meki te sma e gens wi, dan dati no e fruwondru wi, èn wi no e lasi-ati. Na apostel Petrus ben skrifi: „Un lobiwan, no fruwondru fu a tesi di e kon na un tapu leki wan faya, neleki na wan freimde sani e pasa nanga unu. Na presi fu dati, un musu tan prisiri, fu di unu e pina tu neleki fa Krestes ben pina.”—1 Petr. 4:12, 13.
14 Na presi taki wi e atibron nanga den sma di e frufolgu wi, wi musu pruberi fu gi den leri, fu di wi sabi taki sonwan fu den no sabi san den e du (2 Kor. 4:4). Wi e pruberi fu gi yesi na a rai di Paulus ben gi: „Tan blesi den sma di e frufolgu unu; blesi den, no fluku den” (Rom. 12:14). Wán fasi fa wi kan blesi sma di e gens wi, na fu begi gi den. Yesus ben taki na ini a Bergitaki fu en: „Tan lobi un feanti, tan du bun gi den sma di no lobi unu kwetikweti, tan blesi den sma di e fluku unu, tan begi gi den sma di e taigi unu hati sani” (Luk. 6:27, 28). Na apostel Paulus srefi ben de wan sma di ben e frufolgu tru Kresten. Ma bakaten, a tron wan reti-ati disipel fu Krestes èn sosrefi wan fayafaya futuboi fu Yehovah (Gal. 1:13-16, 23). Na ini wan tra brifi fu en, Paulus ben skrifi: „Te sma e kosi wi, wi e blesi den; te sma e frufolgu wi, wi e hori deki-ati; te sma e gi wi porinen, wi e begi den fu du wi wan bun.”—1 Kor. 4:12, 13.
15. San na a moro bun fasi fa wi kan du bun fu wini na ogri?
15 Fu dati ede, wan tru Kresten e gi yesi na a rai di skrifi na ini a lasti vers fu Romesma kapitel 12. A tekst dati e taki: „No meki ogri wini yu, ma tan du bun fu kan wini na ogri.” Satan Didibri na a sma fu pe ala ogri e komoto (Yoh. 8:44; 1 Yoh. 5:19). Na ini na openbaring di na apostel Yohanes kisi, Yesus tyari kon na krin taki ’a brudu fu a Pikin Skapu èn a boskopu di den salfuwan e fruteri sma, meki taki den wini Satan’ (Openb. 12:11). A sani disi e sori taki a moro bun fasi fa wi kan wini Satan èn fa wi kan kakafutu gi a takru krakti di a abi tapu a sistema disi, na fu du bun. Wi e du bun te wi e preiki a bun nyunsu fu a Kownukondre.
Prisiri nanga a howpu di yu abi
16, 17. San wi leri fu Romesma kapitel 12 te a abi fu du nanga (a) a fasi fa wi musu libi? (b) a fasi fa wi musu handri nanga sma na ini a gemeente? (c) a fasi fa wi musu handri nanga sma di e gens a bribi fu wi?
16 Na ini na artikel disi, wi leri furu sani fu kapitel 12 fu a brifi di Paulus skrifi gi den Kresten na ini Rome. Wi leri taki wi leki futuboi fu Yehovah musu de klariklari fu tyari ofrandi. A yeye fu Gado e gi wi deki-ati fu tyari ofrandi, fu di wi sabi taki dati na a wani fu Gado. Wi de fayafaya nanga yepi fu a santa yeye, èn wi e gebroiki den difrenti presenti fu wi fayafaya tu. Wi e dini nanga sakafasi, èn wi e du ala san wi man fu sorgu taki wi e tan na ini wánfasi nanga den Kresten brada nanga sisa fu wi. Wi lobi fu gi sma wan switikon, èn wi e sori taki wi e firi trutru gi den.
17 Romesma kapitel 12 e gi wi furu rai tu fa wi musu handri te sma e gens wi. Te den sma disi e du ogri nanga wi, dan wi no musu du ogri baka nanga den. Wi musu sori switifasi gi den sma disi. Wi musu du ala san wi man fu libi na ini vrede nanga ala sma sondro fu pasa den gronprakseri fu Bijbel. Dati wani taki dati wi musu libi na ini vrede nanga wi famiriman, nanga den Kresten brada nanga sisa fu wi, nanga den birtisma fu wi, nanga den sma na wi wrokope, nanga sma na skoro, èn nanga sma di wi e miti na ini a preikiwroko. Srefi te sma e sori taki den no lobi wi, wi musu du ala san wi man fu du bun fu kan wini ogri, aladi wi e hori na prakseri taki Yehovah sa teki refensi.
18. Sortu dri rai wi e kisi na ini Romesma 12:12?
18 Leisi Romesma 12:12. Boiti ala den bun rai dati, Paulus e gi wi dri rai. Fu di noiti wi no ben o man du ala den sani disi sondro a yepi fu Yehovah, meki na apostel e gi wi a rai fu „tan begi”. Dati sa yepi wi fu gi yesi na a rai di a e gi wi moro fara fu ’horidoro te wi de na ini banawtu’. Te fu kaba, wi musu tan fruwakti a ten di Yehovah abi na prakseri gi wi, èn wi musu ’prisiri nanga a howpu di wi abi’ taki wi sa kisi têgo libi, awansi na hemel noso na grontapu.
Luku baka san wi leri
• Fa wi musu handri nanga sma di e gens wi?
• O ten wi musu pruberi fu de sma di lobi fu meki vrede, èn fa wi kan du dati?
• Fu san ede wi no musu du ogri baka nanga sma di du ogri nanga wi?
[Aksi fu a tori disi]
[Prenki na tapu bladzijde 8]
Te wi e yepi den birtisma fu wi, dan kande den no sa denki takru moro fu wi
[Prenki na tapu bladzijde 9]
Yu e pruberi fu de wan sma di lobi fu meki vrede na ini a gemeente?