Yu de leki ’rutu di beri dipi, èn yu e tanapu steifi na tapu a fondamenti’?

OITI yu si fa tranga winti e wai wan bigi bon? A winti e wai a bon bun tranga, ma toku a bon e tan tanapu. Fa dati du kon? Fu di a bon abi tranga rutu di beri dipi na ini a gron. Wi kan de neleki a bon dati. Te wi e kisi hebi tesi di de leki tranga winti, dan wi kan horidoro efu wi de leki „rutu di beri dipi èn leki sma di e tanapu steifi na tapu a fondamenti” (Ef. 3:14-17). San na a fondamenti dati?

Gado Wortu e taki dati „Krestes Yesus srefi na a moro prenspari ukuston fu a fondamenti” fu a Kresten gemeente (Ef. 2:20; 1 Kor. 3:11). Wi leki Kresten e kisi deki-ati fu ’tan waka soleki fa a wani, aladi wi e tan meki rutu na ini en, e tan bow na tapu en, èn e tan meki wi bribi kon tranga’. Te wi e du dati, dan wi o man horidoro te wi e kisi tesi tapu a bribi fu wi. Boiti dati, wi o man kakafutu tu gi sma di e taki „soso sani” fu di den wani ’drai wi ede’.​—Kol. 2:4-8.

„A bradi nanga a langa nanga a hei nanga a dipi”

Ma fa wi kan „tan meki rutu”, èn fa wi kan ’tan meki a bribi fu wi kon tranga’? Wan prenspari fasi fa wi kan meki den rutu fu wi beri go dipi na ini a gron, na te wi e studeri Gado Wortu fayafaya. Yehovah wani taki wi musu kon „frustan krin san na a bradi nanga a langa nanga a hei nanga a dipi” fu den tru tori na ini Bijbel (Ef. 3:18). Fu dati ede, te wan Kresten sabi soso den „fosi santa sani” fu Gado Wortu, dan a no musu denki taki dati nofo kaba (Hebr. 5:12; 6:1). Na presi fu dati, ibriwan fu wi musu de fayafaya fu kon sabi den tru tori fu Bijbel moro fini.​—Odo 2:1-5.

Ma te wi abi furu sabi, dan dati no wani taki ete dati wi „de leki rutu di beri dipi èn leki sma di e tanapu steifi” na ini a tru anbegi. Fu taki en leti, Satan srefi sabi san skrifi na ini Bijbel. Dati meki wi musu du moro. Wi musu „kon sabi a lobi fu Krestes di bigi moro sabi” (Ef. 3:19). Ma toku a de so taki, te wi e studeri Bijbel fu di wi lobi Yehovah èn fu di wi lobi den tru tori na ini Bijbel, dan wi o kon frustan den tru tori fu Gado Wortu moro fini. Na so a bribi fu wi o kon moro tranga.​—Kol. 2:2.

Luku efu yu e frustan sani bun

Fu san ede yu no e teki na okasi fu luku efu yu e frustan wan  tu fu den tumusi prenspari tru tori na ini Bijbel? Dati kan yepi yu fu studeri Bijbel nanga moro faya. Fu eksempre, leisi den fosi vers fu a brifi di na apostel Paulus skrifi gi den Efeisesma. (Luku a faki di nen  „Gi den Efeisesma”.) Te yu leisi den vers disi, dan aksi yusrefi a sani disi: ’Mi e frustan den wortu di skrifi nanga skoinsi letter?’ Meki wi go luku den wan-fru-wan.

Gado ben teki wan bosroiti „bifo grontapu seti”

Paulus ben skrifi gi den Kresten brada nanga sisa fu en: „Gado ben bosroiti na fesi fu teki wi leki manpikin fu en nanga yepi fu Yesus Krestes.” Iya, Yehovah ben bosroiti taki a ben o teki wan tu libisma, fu tron memre fu en eigi volmaakti osofamiri na hemel. Den sma disi di Gado ben o teki leki manpikin, ben o tiri leki kownu èn leki priester makandra nanga Krestes (Rom. 8:19-23; Openb. 5:9, 10). Di Satan tyalensi Yehovah na ini a bigin, dan a ben wani sori taki Yehovah no ben meki libisma bun. Dati meki a fiti srefisrefi taki Yehovah bosroiti fu gebroiki memre fu a srefi libisma famiri dati, fu tyari wan kaba kon na ala ogri. Te fu kaba, a sa tyari wan kaba kon tu na a sma fu pe ogri komoto, namku Satan Didibri! Ma Yehovah no ben taki na fesi, suma nanga suma a ben o teki leki en manpikin. Na presi fu dati, Gado ben bosroiti taki wan grupu sma ben o tiri makandra nanga Krestes na ini hemel.​—Openb. 14:3, 4.

Di Paulus ben taigi den Kresten brada nanga sisa fu en taki Gado ben teki den leki wan grupu „bifo grontapu seti”, dan fu sortu „grontapu” a ben e taki? Paulus no ben e taki  fu wan ten bifo Gado ben meki grontapu, noso bifo a ben meki libisma. Dati no ben o kruderi nanga a retidu fu Gado. Efu Gado ben bosroiti na fesi taki Adam nanga Eva ben o sondu teige en, dan A no ben o man aksi den frantwortu fu a sondu di den du, a no so? Sobun, o ten Gado bosroiti fa a ben o tyari wan kenki kon na ini a situwâsi di kon de, fu di sma opo densrefi teige En? Yehovah du dati baka di Adam nanga Eva opo densrefi teige en. Ma na a ten dati, den no ben meki pikin ete, di ben o kisi frulusu bakaten.

„Gado sori wi no-frudini bun-ati pasa marki”

Paulus ben taki dati den seti di kari na ini den fosi vers fu Efeisesma kon de, „fu di Gado sori wi no-frudini bun-ati pasa marki”. Fu san ede a taki dati? Paulus ben taki dati, fu di a ben wani sori wi krin taki Yehovah no ben de fruplekti fu frulusu sondu libisma.

Fu taki en leti, nowan fu wi abi a reti fu kisi frulusu. Ma fu di Yehovah lobi libisma srefisrefi, meki a du wan sani, so taki wi kan kisi frulusu. Te wi e hori na prakseri taki wi na sondusma, dan a no de fu taki dati wi kan kisi frulusu soso fu di Gado e sori no-frudini bun-ati gi wi, soleki fa Paulus ben taki dati.

A santa kibritori di abi fu du nanga a wani fu Gado

Na ini a bigin, Gado no ben tyari kon na krin fa a ben o tyari wan kaba kon na den takru bakapisi di Satan tyari kon. A tori dati ben de wan „santa kibritori” (Ef. 3:4, 5). Bakaten, di a Kresten gemeente seti, dan Yehovah tyari kon na krin moro fini fa a o du san a ben abi na prakseri biginbigin gi libisma nanga grontapu. Paulus ben taki dati Gado ben o seti „wan tiri na a kaba fu a reti ten”. A tiri disi na a fasi fa Yehovah seti sani, so taki den engel na ini hemel èn den libisma na grontapu kan dini en na ini wánfasi.

A fosi sani di Yehovah du fu tyari a wánfasi dati kon, na taki a bigin tyari den sma kon na wán di ben o tiri makandra nanga Yesus na ini hemel. A sani dati bigin na a Paskafesa fu a yari 33 (Tori. 1:13-15; 2:1-4). A di fu tu sani di Yehovah ben o du, na taki a ben o tyari den sma kon na wán di o libi na ini a paradijs na grontapu, na ondro a tiri fu Krestes en Mesias Kownukondre (Openb. 7:14-17; 21:1-5). A wortu „tiri”, no abi fu du nanga a Mesias Kownukondre, fu di a Kownukondre dati ben seti na ini 1914. Na presi fu dati, a wortu „tiri” abi fu du nanga den sani di Gado ben o du, fu kan tyari wánfasi kon na mindri den anbegiman fu en na hemel èn na grontapu.

„Denki leki bigisma”

A no de fu taki, dati te yu abi a gwenti fu studeri Bijbel bun, dan dati sa yepi yu fu kon frustan „a bradi nanga a langa nanga a hei nanga a dipi” fu a tru anbegi. Ma wi abi so furu fu du na ini a ten disi, èn a no de fu taki dati a sani disi e meki en makriki gi Satan fu sorgu taki wi no e studeri Bijbel doronomo moro. A wani taki wi e tapu srefi nanga a gwenti dati. No gi en na okasi fu du dati nanga yu. Gebroiki a „frustan” di Gado gi yu, so taki yu kan kon ’denki leki wan bigisma’ (1 Yoh. 5:20; 1 Kor. 14:20). Sorgu taki yu e frustan fu san ede yu e bribi den sani di yu leri, èn sorgu tu taki ala ten yu man taki fu san ede yu abi „a howpu di de na ini yu”.​—1 Petr. 3:15.

Fa a ben o de te yu ben de na ini Efeise di sma ben e leisi a brifi fu Paulus? A no de fu taki dati den wortu fu en ben o gi yu deki-ati fu kon ’sabi a Manpikin fu Gado moro soifri’ (Ef. 4:13, 14). Fu dati ede, meki den wortu fu Paulus gi yu deki-ati fu du a srefi na ini a ten disi. Te yu lobi Yehovah nanga yu heri ati, èn te yu sabi en Wortu soifri, dan dati sa yepi yu fu tan ’leki rutu di beri dipi èn fu tan tanapu steifi na tapu a fondamenti’ fu Krestes. Te dati de so, dan yu o man horidoro awinsi sortu tesi Satan e tyari kon na yu tapu, bifo na ogri grontapu disi kon na wan kaba.​—Ps. 1:1-3; Yer. 17:7, 8.

[Faki/​Prenki na tapu bladzijde 27]

 „Gi den Efeisesma”

„Prèise a Gado èn Tata fu wi Masra Yesus Krestes, bika na ini hemel a blesi wi na ala sortu fasi nanga en santa yeye fu di wi de wán nanga Krestes, neleki fa a ben kari wi fu de wán nanga Krestes bifo grontapu seti, so taki wi ben kan de santa gi en èn sondro fowtu, fu di wi lobi Gado. Bika Gado ben bosroiti na fesi fu teki wi leki manpikin fu en nanga yepi fu Yesus Krestes, fu di na dati e plisi Gado èn na dati a wani. Na so fasi sma ben kan prèise en fu di a sori wi a no-frudini bun-ati fu en na wan switi fasi nanga yepi fu a lobiwan fu en. Na Yesus meki wi kon fri nanga wan lusu-paiman nanga yepi fu a brudu fu en; iya, wi kisi pardon fu wi sondu fu di Gado sori wi no-frudini bun-ati pasa marki. A gi wi a no-frudini bun-ati disi bogobogo, nanga ala koni èn frustan, fu di a meki wi kon sabi san na a santa kibritori di abi fu du nanga a wani fu en. A santa kibritori disi e plisi Gado èn a feni en bun; a teki a bosroiti fu du disi, fu di a wani seti wan tiri na a kaba fu a reti ten èn a tiri disi musu tyari ala sani kon makandra baka na ondro Krestes, namku den sani di de na ini hemel nanga den sani di de na grontapu.”​—Ef. 1:3-10.