Abi warderi gi yu dofu brada nanga sisa!

SENSI na ini owruten, yu ben abi sma soleki Samuel, David, Simson, Rakab, Moses, Abraham, Sara, Noa, nanga Abel di ben e anbegi Gado. Na ini a ten disi, den anbegiman fu Gado kon tron leki wan bigi famiri fu brada nanga sisa. Furu dofusma abi a grani tu fu de memre fu na bigi famiri disi. Fu eksempre, den fosi tu sma di tron Yehovah Kotoigi na ini Mongolia, ben de wan trowpaar di ben de dofusma. Èn fu di den dofu brada nanga sisa fu wi na ini Rosiakondre tan gi yesi na Gado, meki wi ben man wini wan krutu-afersi na a Hei Krutubangi fu Europa di e feti gi den reti fu libisma.

Na ini a ten disi, „a getrow èn koni srafu” meki publikâsi na ini dofusma-tongo, èn den seti gemeente gi dofusma. Boiti dati, den hori kongres nanga tra bigi konmakandra na ini dofusma-tongo (Mat. 24:45). Den seti disi tyari furu wini kon gi den dofusma. * Ma oiti yu aksi yusrefi fa a ben de gi wan dofusma fu kon leri sabi a tru Gado, èn fu go na fesi na ini a tru anbegi sondro den seti disi? Yu prakseri fa yu kan yepi den dofusma di e libi na ini a kontren fu yu?

A fasi fa sani ben waka fosi

Efu yu ben o aksi wan tu owru dofu brada nanga sisa fa den kon leri sabi Gado, dan san den ben o piki yu? Kande den o fruteri yu fa den ben firi di den kon sabi a nen fu Gado fu a fosi leisi. Kande den o fruteri yu fa a wan-enkri sani dati kenki a libi fu den, èn fa a yepi den fu tan na ini a tru anbegi. Den ben man du ala den sani disi, aladi na organisâsi fu Yehovah no ben meki video nanga DVD ete fu yepi dofusma kon sabi den tru tori fu Bijbel. A kan taki den o fruteri yu fa a ben de di Kresten konmakandra no ben hori na ini dofusma-tongo, noso fa a ben de di sma no ben e vertaal gi den. Na presi fu dati, wan sma ben sidon na den sei, èn a ben e skrifi wan tu sani gi den na tapu wan pisi papira fu yepi den fu frustan san a takiman e taki. Seibi yari langa, wan dofu brada ben leri den tru tori fu Bijbel na a fasi disi, bifo den feni wan sma fu vertaal den konmakandra gi en.

Den owru dofu Kotoigi e memre fa a ben de fu preiki gi tra sma di man yere. Na ini wan anu, den ben hori wan karta di ben taki syatu fu a boskopu di den ben e preiki. Na ini a tra anu, den ben hori A Waktitoren nanga na Ontwaakt! A no ben makriki gi den fu studeri Bijbel nanga wan tra dofusma, fu di den ben abi soso buku nanga tijdschrift, èn nowan fu den tu ben e frustan bun san skrifi na ini den publikâsi dati. A no de fu taki, dati den owru dofu preikiman man memre ete fa den ben e fuga te trawan no ben man frustan den. Fu dati ede, den no ben man taki moro fara fu a tru anbegi. Den dofu brada nanga sisa abi furu lobi gi Yehovah, ma den no ben sabi fa fu sori a lobi dati. Fu san ede? Fu di den no ben de seiker efu den ben e frustan son sani bun.

Aladi den dofu brada nanga sisa fu wi ben kisi fu du nanga den problema disi, toku den tan dini Yehovah (Yob 2:3). Den tan wakti Yehovah nanga den heri ati (Ps. 37:7). Èn now a e blesi den bogobogo, iya, moro leki san furu fu den ben fruwakti.

Luku sortu muiti wan dofu brada ben e meki. A brada disi trow, èn a abi pikin. Fosi den brada ben e meki video na ini dofusma-tongo, a brada disi ben abi a gwenti fu studeri  Bijbel nanga en osofamiri. En manpikin e taki fu a ten dati: „A no ben makriki gi mi papa fu studeri Bijbel nanga wi, fu di a ben abi soso buku nanga tijdschrift fu gi wi leri. Nofo tron, a no ben e frustan den sani di ben skrifi na ini den publikâsi dati. Wi leki yonguwan no ben meki en makriki gi en. Te a no ben fruklari wan sani bun, dan wi ben gaw fu taigi en taki a meki wan fowtu. Ma toku, a ben studeri nanga wi ala ten. Fu di mi papa no ben frustan Ingrisitongo, meki son leisi a ben e kisi syen. Ma a no ben e broko en ede nanga a sani dati, fu di a ben feni taki a ben moro prenspari fu leri wi wan sani fu Yehovah.”

Luku na eksempre tu fu Richard, di pasa 70 yari kaba, èn di e libi na ini Brooklyn, New York, na Amerkankondre. Richard dofu, èn a breni. Ala sma sabi taki a e go doronomo na den konmakandra. Fu doro den konmakandra, dan en wawan e waka go teki loko. A e teri na omeni halte a loko e stop, so taki a kan sabi o ten a musu saka. Wan dei, hebi snew ben fadon, èn dati meki den bosroiti fu no hori a konmakandra. Ala sma fu a gemeente ben yere a nyunsu, ma wan sani pasa taki Richard no ben kon yere a tori. Den brada kon yere san pasa nanga Richard. Den go suku en, èn den kon miti en e tanapu na dorosei fu a Kownukondre zaal. A ben e wakti nanga pasensi, teleki sma ben o opo den doro. Di den brada aksi en fu san ede a go na dorosei aladi hebi snew ben e fadon, dan a piki „Mi lobi Yehovah”.

San yu kan du?

Dofusma e libi na ini a kontren fu yu? Yu kan leri taki dofusma-tongo so taki yu man taki nanga den? Furu dofusma abi switifasi, èn den abi pasensi te den e leri wan sma fu taki a tongo fu den. Kande yu sa miti wan dofusma na ini a preikiwroko. San yu kan du? Pruberi fu taki nanga en. Gebroiki yu anu fu taki nanga den, skrifi wan tu sani gi den na tapu papira, èn sori den prenki. Awinsi a dofusma e sori taki a no wani kon sabi sani fu Bijbel, toku yu kan fruteri wan Kotoigi di dofu, noso di man taki dofusma-tongo taki yu miti wan dofusma. A boskopu o moro moi gi a sma te a yere en na ini dofusma-tongo.

Kande yu e leri taki dofusma-tongo èn yu e go na dofusma-tongo gemeente. San kan yepi yu fu leri taki a tongo moro bun, èn fu frustan en moro bun tu? Efu tra brada nanga sisa di man yere de na ini a gemeente, dan pruberi fu taki nanga den na ini dofusma-tongo. Disi sa yepi yu fu denki leki fa dofusma e denki. Te wan dofusma e denki, dan a no e si wortu, ma a e si prenki. Kande son leisi yu o wani opo yu mofo taki, fu di dati moro makriki gi yu. Te yu e leri taki wan tra tongo, dan yu musu horidoro fu man taki en grati. Na so a de tu te yu e leri taki dofusma-tongo.

Te wi e meki muiti fu leri taki dofusma-tongo, dan wi e sori taki wi lobi wi dofu brada nanga sisa, èn taki wi e lespeki den. Prakseri fa den dofusma e fuga ibri dei fu di den no man frustan den sma na wrokope, noso den pikin na skoro. Wan dofu brada ben taki: „Ala dei  mi de na mindri sma di e taki nanga den mofo. Nofo tron, mi e firi leki mi de mi wawan, èn a gersi leki nowan sma no e broko en ede nanga mi. A sani disi e meki mi e fuga, èn son leisi mi e atibron srefi. Mi no man fruteri fa mi e firi son leisi.” A gemeente musu de wan presi pe den dofu brada nanga sisa fu wi e kisi bun leri fu Yehovah, èn pe den kan abi switi demakandra nanga trawan.​—Yoh. 13:34, 35.

Wi no musu frigiti den someni pikin grupu fu dofusma di e kon makandra nanga wan gemeente fu brada nanga sisa di man yere. Na den gemeente dati, yu abi sma di e vertaal gi den. Fu man frustan bun san a takiman e taki, dan den dofusma fu a gemeente e sidon te na fesisei fu a Kownukondre zaal. Na so fasi a moro makriki gi den fu si a takiman èn a sma di e vertaal gi den, sondro taki trawan e puru den prakseri. Ondrofeni sori taki a gemeente e kon gwenti a sani disi esi-esi, èn a no e puru a prakseri fu den tra brada nanga sisa. Na so sani seti tu na den kongres èn na den tra bigi konmakandra pe sma e vertaal gi dofusma. Wi e prèise den brada nanga sisa di e meki tranga muiti fu vertaal a programa na so wan fasi, taki den dofusma man frustan den bun.

Kande yu de na ini wan gemeente di e horibaka gi wan dofusma grupu, noso kande wan tu dofusma de na ini a gemeente fu yu, èn wan sma e vertaal gi den. Fa yu kan sori switifasi gi den dofu brada nanga sisa? Gi den wan kari fu kon na yu oso. Efu a kan, dan pruberi fu leri taki wan tu sani na ini dofusma-tongo. No frede taki yu no sa man taki nanga den. Yu o feni wan fasi fu taki nanga den, èn te yu e sori lobi na so wan fasi, dan unu sa abi wan prisiri ten (1 Yoh. 4:8). Wi kan leri furu fu wi dofu brada nanga sisa. A switi fu taki tori nanga den, den kan frustan sani krin, èn yu kan lafu nanga den. Wan brada di abi wan papa nanga wan mama di dofu, e taki: „Mi heri libi mi de na mindri dofusma, èn den leri mi bun furu sani. Wi kan leri furu fu wi dofu brada nanga sisa.”

Yehovah lobi den anbegiman di e dini en nanga den heri ati, èn a lobi den dofu brada nanga sisa tu. Den brada nanga sisa disi di abi bribi èn di e horidoro, e moi na organisâsi fu Yehovah. Fu dati ede, meki wi abi warderi gi wi dofu brada nanga sisa!

[Futuwortu]

[Prenki na tapu bladzijde 31]

Kande wan dofusma o wani kon sabi moro fu a Kownukondre boskopu te trawan e preiki gi en na ini dofusma-tongo

[Prenki na tapu bladzijde 32]

A gemeente musu de wan presi pe den dofu brada nanga sisa fu wi kan firi bun, èn kisi deki-ati