San den begi fu yu e sori fu a matifasi di yu abi nanga Yehovah?

„O Yereman fu begi, iya, na yu ala sortu sma sa kon.”​—PS. 65:2.

1, 2. Fu san ede den futuboi fu Yehovah kan abi na overtoigi taki a e arki den begi fu den?

ALA ten Yehovah e arki den begi fu den reti-ati futuboi fu en. Wi kan abi na overtoigi taki a e arki den begi fu wi. Awinsi milyunmilyun Yehovah Kotoigi ben o begi Gado na a srefi ten, toku a ben o yere ala den begi dati.

² Fu di a psalm skrifiman David ben abi na overtoigi taki Gado e arki den begi fu en, meki a singi: „O Yereman fu begi, iya, na yu ala sortu sma sa kon” (Ps. 65:2). Yehovah ben piki den begi fu David fu di a ben e anbegi Yehovah nanga en heri ati. Wi musu aksi wisrefi den sani disi: ’Den begi fu mi e sori taki mi e frutrow tapu Yehovah èn taki mi poti a tru anbegi na a fosi presi na ini mi libi? San den begi fu mi e sori fu a matifasi di mi abi nanga Yehovah?’

Begi Yehovah nanga sakafasi

3, 4. (a) Fa wi musu begi Yehovah? (b) San wi musu du efu ’den prakseri fu wi e trobi wi’ fu di wi du wan seryusu sondu?

³ Efu wi wani taki Gado piki den begi fu wi, dan wi musu begi en nanga sakafasi (Ps. 138:6). Neleki David, wi musu aksi Yehovah fu ondrosuku wi. David ben taki: „Ondrosuku mi, o Gado, fu kon sabi mi ati. Ondrosuku mi, fu kon sabi sortu prakseri e trobi mi, èn luku efu wan sani de na ini mi di e meki mi waka tapu wan takru pasi, èn tyari mi na tapu a pasi fu têgo libi” (Ps. 139:23, 24). Wi no musu begi Gado wawan, ma wi musu gi pasi taki a ondrosuku wi, èn wi musu teki a rai di a e gi wi na ini en Wortu. Yehovah kan tiri wi na tapu „a pasi fu têgo libi”, iya, a kan yepi wi fu libi na so wan fasi, taki wi e kisi têgo libi.

⁴ Ma san wi musu du ’te den prakseri fu wi e trobi wi’ fu di wi du wan seryusu sondu? (Leisi Psalm 32:1-5.) Efu wi e pruberi fu no arki a konsensi fu wi, dan dati kan meki wi firi brokosaka. Wi o de leki wan bon di kon drei fu di a no kisi watra fu wan langa pisi ten. Fu di David ben sondu, meki a no ben de nanga prisiri, èn a kan taki a ben kon siki. Ma di a taigi Gado taki a sondu, dan a ben firi bun srefisrefi! Prakseri fa David ben prisiri di a firi taki Yehovah ’gi en pardon’. Te wan sma di sondu e fruteri Gado fu a sondu fu en, dan a kan firi moro bun. Èn den owruman kan yepi so wan sma fu kon abi wan bun matifasi baka nanga Yehovah.​—Odo 28:13; Yak. 5:13-16.

Begi Gado fayafaya, èn taki en tangi

5. San wi musu du te sani e gi wi broko-ede?

⁵ Awinsi san e gi wi broko-ede, wi musu fiti a rai disi di Paulus gi: „No broko un ede nanga nowan sani, ma begi Gado ala san unu wani, èn du dati fayafaya sosrefi, èn taki en tangi tu” (Fil. 4:6). Spesrutu te sma wani du ogri nanga wi, noso te den e frufolgu wi, dan wi musu ’begi Yehovah fayafaya’ fu yepi wi èn fu tiri wi.

6, 7. Fu san ede wi musu taki Gado tangi te wi e begi?

⁶ Ma efu wi e begi Gado soso te wi abi wan sani fanowdu, dan san dati e sori fu a matifasi di wi abi nanga Yehovah? Paulus ben taki dati wi musu ’taki Gado tangi tu’. A no de fu taki, dati wi abi furu reide fu de nanga tangi neleki David, di ben taki: „Yehovah, yu bigi, yu abi  makti, ala moi sani na fu yu, yu abi furu glori, èn yu e tyari yusrefi na wan warti fasi. Ala sani na hemel èn na grontapu na fu yu. A kownukondre na fu yu, Yehovah, a sma di e sori krin taki en na edeman fu ala sma. . . . Dati meki wi e taki yu tangi, wi Gado, èn wi e prèise yu moi nen.”​—1 Kron. 29:11-13.

⁷ Yesus ben taki Gado tangi gi nyanyan. A ben taki Gado tangi tu gi a brede nanga a win di den gebroiki na a neti-nyanyan fu Masra (Mat. 15:36; Mark. 14:22, 23). Wi musu du a srefi tu. Boiti dati, wi musu „taki Yehovah tangi” gi „den bigi sani di a du gi libisma”, gi ’a reti fasi fa a e koti krutu’, èn gi en wortu, noso a boskopu fu en di skrifi na ini Bijbel.​—Ps. 107:15; 119:62, 105.

Wi musu begi gi trawan

8, 9. Fu san ede wi musu begi gi wi Kresten brada nanga sisa?

⁸ A no de fu taki dati wi e begi gi wisrefi, ma wi musu begi gi trawan tu, srefi gi wi Kresten brada nanga sisa di wi no sabi. A kan taki na apostel Paulus no ben sabi ala den brada nanga sisa fu en na ini Kolose. Ma toku a ben skrifi: „Ala ten wi e taki Gado, a Tata fu wi Masra Yesus Krestes, tangi te wi e begi gi unu, bika wi yere fu a bribi di unu abi na ini Krestes Yesus èn fa unu lobi ala den santawan” (Kol. 1:3, 4). Paulus ben e begi tu gi den Kresten na ini Tesalonika (2 Tes. 1:11, 12). Te wi e begi gi wi Kresten brada nanga sisa, dan dati e sori fa wi de, èn fa wi e denki fu den.

⁹ Te wi e begi gi den salfu Kresten èn gi den „tra skapu” di e horibaka gi den, dan dati e sori taki wi e broko wi ede nanga na organisâsi fu Gado (Yoh. 10:16). Paulus ben aksi den brada nanga sisa fu en fu begi Gado gi en, so taki a ben kan abi a deki-ati fu meki a santa kibritori fu a bun nyunsu bekènti’ (Ef. 6:17-20). Wi e begi tu gi wi Kresten brada nanga sisa?

10. Sortu krakti a kan abi na wi tapu te wi e begi gi trawan?

¹⁰ Te wi e begi gi trawan, dan dati kan meki taki wi kon abi wan tra denki fu den. Efu wi e begi gi wan sma di wi no lobi, dan a ben o moro makriki gi wi fu sori switifasi gi a sma dati, a no so? (1 Yoh. 4:20, 21). Den sortu begi disi e yepi wi fu kon abi wan bun denki fu trawan. Den e yepi wi tu fu libi na ini wánfasi nanga wi Kresten brada nanga sisa. Boiti dati, den sortu begi disi e sori taki wi abi lobi neleki Krestes (Yoh. 13:34, 35). Lobi na wan froktu fu a yeye fu Gado. Wi e begi Yehovah fu gi wi en santa yeye, so taki wi kan sori lobi, prisiri, vrede, langa pasensi, bun-ati, bunfasi, bribi, safri-ati, èn so taki wi kan dwengi wisrefi? (Luk. 11:13; Gal. 5:22, 23) Efu wi e du dati, dan den wortu fu wi, èn den sani di wi e du sa sori taki wi e waka nanga a yeye. Wi sa sori tu taki wi e meki a yeye tiri wi libi.​—Leisi Galasiasma 5:16, 25.

11. Fu san ede a bun fu aksi trawan fu begi gi wi?

¹¹ Efu wi kon sabi taki den pikin fu wi e kisi a firi fu spiek te den e meki repetitie na skoro, dan wi musu begi gi den. Boiti dati, wi musu gi den Bijbel rai di sa yepi den fu no kori trawan  èn fu no du ogri. Paulus ben taigi den Kresten na ini Korente: „Wi e begi Gado taki unu no sa du nowan ogri” (2 Kor. 13:7). Te wi begi Yehovah den sortu sani disi nanga sakafasi, dan dati e plisi en, èn wi e sori taki wi abi a bun fu trawan na prakseri. (Leisi Odo 15:8.) Neleki na apostel Paulus, wi kan aksi trawan fu begi gi wi. Paulus ben skrifi: „Tan begi gi wi, bika wi sabi trutru taki wi abi wan krin konsensi, fu di wi wani du ala sani na wan opregti fasi.”​—Hebr. 13:18.

Tra sani di den begi fu wi e sori fu wi

12. San musu de den moro prenspari sani te wi e begi?

¹² Den begi fu wi e sori taki wi na Kotoigi fu Yehovah di de koloku, èn di de fayafaya? Wi e begi Gado fu yepi wi fu du a wani fu en, èn fu preiki a bun nyunsu fu a Kownukondre? Wi e begi taki sma kon sabi taki Yehovah abi a reti fu tiri hemel nanga grontapu? Wi e begi taki a nen fu en kon santa? Soleki fa Yesus sori nanga den fosi wortu fu a Wi Tata begi, dan den sani disi musu de den moro prenspari sani di wi e begi gi. Yesus ben taki: „Wi Tata na hemel, meki yu nen kon santa. Meki yu kownukondre kon. Meki yu wani pasa na grontapu soleki fa a e pasa na hemel.”​—Mat. 6:9, 10.

13, 14. San den begi fu wi e sori fu wi?

¹³ Den begi fu wi e sori fa wi e denki fu sani, san wi lobi, èn san wi wani trutru. Yehovah sabi sortu sma wi de trutru. Odo 17:3 e taki: „A patu pe sma gwenti fu smèlter sani, na fu meki solfru kon soifri èn na onfu na fu meki gowtu kon soifri, ma Yehovah na a sma di e ondrosuku ati.” Gado sabi san de na ini wi ati (1 Sam. 16:7). A sabi fa wi e denki fu den konmakandra, fu a diniwroko, èn fu wi Kresten brada nanga sisa. Yehovah sabi fa wi e denki fu den „brada” fu Krestes (Mat. 25:40). Te wi e begi gi wan sani, dan Yehovah sabi efu wi wani a sani dati trutru, noso efu wi e taki den srefi sani ibri tron baka sondro taki wi e denki fu san wi e taki. Fu di sma ben abi wan fowtu denki fu begi, meki Yesus ben taki: „Te yu e begi, no taki den srefi sani ibri leisi baka leki fa den grontapusma e du, bika den e prakseri taki Gado sa arki den efu den e taki furu sani.”​—Mat. 6:7.

¹⁴ Den sani di wi e taki na ini den begi fu wi, e sori tu o furu wi e frutrow tapu Gado. David ben taki: „Ala ten mi ben kan lon kon kibri na yu [Yehovah]. Yu ben de gi mi leki wan tranga toren pe mi ben kan go kibri gi den feanti fu mi. Fu ala ten mi o de wan fisiti na ini a tenti fu yu. Mi o kibri na ondro den frei fu yu” (Ps. 61:3, 4). Na wan agersi fasi, Gado e ’bradi en tenti abra wi’. Dati meki wi no e frede noti, fu di a e kibri wi gi ogri (Openb. 7:15). Te wi e kon krosibei na Yehovah na ini begi, dan wi kan abi na overtoigi taki a de ’na wi sei’ te wi e kisi tesi. A sani disi na wan trowstu gi wi trutru!​—Leisi Psalm 118:5-9.

15, 16. Fa begi kan yepi wi fu si fu san ede wi wani kisi wan spesrutu grani na ini a gemeente?

¹⁵ Te wi e taigi Yehovah krin fu san ede wi e begi en fu wan sani, dan dati kan yepi wi fu si sani na a yoisti fasi. Fu eksempre, kande wi wani dini leki owruman na ini a gemeente. Ma a de so taki wi abi sakafasi, èn wi wani du dati fu di wi wani yepi trawan? Wi wani a grani dati fu di wi wani du ala san wi man fu horibaka gi Kownukondre afersi? Noso wi wani teki „a fosi presi”? A de so taki wi wani „basi” trawan? A no so a musu de na mindri a pipel fu Yehovah. (Leisi 3 Yohanes 9, 10; Lukas 22:24-27.) Efu wi abi takru prakseri, dan wi musu taigi Yehovah Gado krin fa wi e denki. Dati kan yepi wi fu kenki a fasi fa wi e denki, bifo a  kon moro muilek fu puru den takru denki dati.

¹⁶ Kande Kresten wefi wani taki a masra fu den e dini leki dinari ini a diniwroko, noso leki owruman te fu kaba. A kan taki den sisa disi e taki nanga Yehovah fu a sani disi te den e begi. Ma den sisa disi musu pruberi fu tyari densrefi tu na wan fasi di e kruderi nanga den begi fu den. A sani disi de prenspari, fu di a fasi fa na osofamiri fu wan brada e taki, noso e tyari densrefi, abi krakti tapu a fasi fa a gemeente e si a brada disi.

Te wi e begi na publiki

17. Fu san ede a bun taki wi e suku okasi fu de wi wawan, so taki wi kan begi Gado?

¹⁷ Nofo tron, Yesus ben go na wan presi pe en wawan ben kan begi en Tata (Mat. 14:13; Luk. 5:16; 6:12). Ten na ten, wi wani du dati tu. Te wi de na wan tiri presi pe wi kan begi Yehovah, dan dati kan yepi wi fu teki bosroiti di e plisi Yehovah, èn di kan yepi wi fu tan dini en fayafaya. Ma Yesus ben e begi na publiki tu, èn a bun fu poti prakseri fa wi kan du dati na wan fasi di fiti.

18. San na wan tu sani di brada musu hori na prakseri te den e begi gi a gemeente?

¹⁸ Na den konmakandra fu wi, lepi brada e teki fesi fu begi gi a gemeente (1 Tim. 2:8). Na a kaba fu so wan begi, den brada nanga sisa musu man taki „amen”, san wani taki „na so a de”. Ma fu man du dati, dan den musu agri nanga den sani di a brada taki na ini a begi. Na ini a Wi Tata begi, Yesus no taki fu nowan sani di e meki sma skreki, noso di e meki sma naki futu (Luk. 11:2-4). Boiti dati, a no taki finifini fu ala den nowtu nanga den problema fu ibri sma di de drape. A no fiti fu taki fu wi eigi tori te wi e begi na publiki. Wi kan begi fu den sani dati te wi de wi wawan. Èn te wi e begi na publiki, dan wi no musu taki fu sani di trawan no mag sabi.

19. Fa wi musu tyari wisrefi te wan sma e begi na publiki?

¹⁹ Te wan brada e teki fesi fu begi gi a gemeente, dan wi musu sori taki wi abi lespeki nanga „frede gi Gado” (1 Petr. 2:17). Son leisi, a no fiti fu du son sani na ini a Kresten gemeente (Preik. 3:1). Fu eksempre, kande wan sma wani taki ala sma na ini a grupu musu hori anu makandra te wan brada e begi. A sani disi kan meki wan tu sma naki futu, noso a kan meki taki sma no e poti prakseri moro na a begi. Disi kan pasa tu nanga sma di kon na a konmakandra èn di no de na bribi. Son trowpaar kan hori anu, ma efu den ben o brasa makandra te wan brada e begi na publiki, dan den sma di e si dati kan naki futu. Kande den sma disi o denki taki a trowpaar e poti prakseri na a lobi di den abi gi makandra, na presi  taki den e sori lespeki gi Yehovah. Fu di wi abi dipi lespeki gi Yehovah, meki wi wani „du ala sani fu gi Gado glori”. Boiti dati, wi no wani du sani di kan puru sma prakseri, di kan meki sma skreki, noso di kan meki den naki futu.​—1 Kor. 10:31, 32; 2 Kor. 6:3.

Fu san wi kan begi?

20. Fa yu ben o fruklari Romesma 8:26, 27?

²⁰ Son leisi, wi no sabi san wi musu taki te wi e begi Gado. Paulus ben skrifi: „Wi no sabi fu sortu sani wi musu begi te a de fanowdu, ma a [santa] yeye srefi e taki gi wi te wi e geme, aladi dati no de fu yere. Ma [Gado] di e ondrosuku na ati fu sma, sabi san na a marki fu a yeye” (Rom. 8:26, 27). Yehovah meki den futuboi fu en skrifi furu begi na ini Bijbel. Yehovah e arki den begi disi, neleki den e kon fu wi, èn fu dati ede a e piki den begi dati. Gado sabi wi, èn a sabi san den sani wani taki di den skrifiman fu Bijbel skrifi nanga yepi fu a santa yeye fu en. Yehovah e piki den begi fu wi te a santa yeye e „taki gi wi”. Ma te wi e kon frustan Gado Wortu moro bun, dan a e kon moro makriki gi wi fu sabi san wi musu taki te wi e begi.

21. San wi sa luku na ini a tra artikel?

²¹ Soleki fa wi si kaba, dan den begi fu wi e sori wan sani fu wi. Fu eksempre, den begi fu wi kan sori efu wi abi wan bun matifasi nanga Yehovah, èn den kan sori tu o bun wi sabi a Wortu fu en (Yak. 4:8). Na ini a tra artikel, wi sa poti prakseri na wan tu begi di skrifi na ini Bijbel. Te wi sa poti prakseri na den Bijbeltekst dati, dan sortu krakti disi sa abi tapu a fasi fa wi e begi Gado?

San yu ben sa piki?

• Fa wi musu begi Yehovah?

• Fu san ede wi musu begi gi wi Kresten brada nanga sisa?

• San den begi fu wi kan sori fu wi, èn fu a fasi fa wi e denki fu sani?

• Fa wi musu tyari wisrefi te trawan e begi na publiki?

[Aksi fu a tori disi]

[Prenki na tapu bladzijde 4]

Yu abi a gwenti fu prèise Yehovah èn fu taki en tangi?

[Prenki na tapu bladzijde 6]

Te trawan e teki fesi fu begi gi a gemeente, dan ala ten wi musu tyari wisrefi na wan fasi di e gi glori na Yehovah