Warderi a grani di yu abi fu horibaka gi a gemeente
Warderi a grani di yu abi fu horibaka gi a gemeente
„Gado meki den pisi fu a skin, iya ibriwan fu den, soleki fa en wani.”—1 KOR. 12:18.
1, 2. (a) San e sori taki ibriwan fu wi kan horibaka gi a gemeente? (b) Na sortu aksi wi sa poti prakseri na ini na artikel disi?
SENSI a ten fu owruten Israel, Yehovah ben seti a gemeente fu gi a pipel fu en leri nanga rai. Fu eksempre, baka di den Israelsma ben pori a foto Ai, Yosua „ben leisi ala den wortu fu a wet nanga wan tranga sten, den blesi nanga den fluku, soleki fa ala sani skrifi na ini a buku fu a wet . . . na fesi a heri gemeente fu Israel”.—Yos. 8:34, 35.
2 Na ini a fosi yarihondro, na apostel Paulus ben taigi a Kresten owruman Timoteyus taki a Kresten gemeente ben de „na osofamiri fu Gado” èn „wan pilari èn wan stonfutu fu a waarheid” (1 Tim. 3:15). Na ini a ten disi, „na osofamiri” fu Gado na den tru Kresten di e libi na heri grontapu. Na ini kapitel 12 fu a brifi di Paulus ben skrifi gi den Korentesma, a e agersi a gemeente nanga wan libisma skin. A e taki dati, aladi ibri pisi fu a skin e du wan tra wroko, toku den alamala de prenspari. Paulus e skrifi: „Gado meki den pisi fu a skin, iya ibriwan fu den, soleki fa en wani.” Paulus e sori srefi taki „den pisi fu a skin di wi e si leki den wan di no de so prenspari, na den wan di wi e gi moro grani” (1 Kor. 12:18, 23). Sobun, a wroko di a wan reti-ati Kresten e du na ini na osofamiri fu Gado, no bun moro a di fu wan trawan. A wroko di den e du, e difrenti nomo. Ma fa ibriwan fu wi kan horibaka gi a gemeente fu Gado, èn fa wi kan sori taki wi e warderi a grani dati di wi abi? Sortu sani kan abi krakti tapu a fasi fa wi e horibaka gi a gemeente? Èn fa wi kan sorgu taki ’ala sma kan si taki wi e go na fesi’?—1 Tim. 4:15.
Fa wi kan horibaka gi a Kresten gemeente?
3. Fa wi kan sori warderi gi a grani di wi abi fu horibaka gi a gemeente?
3 Wan fasi fa wi kan sori warderi gi a grani di wi abi fu horibaka gi a gemeente, na fu wroko makandra nanga „a getrow èn koni srafu” èn nanga a Tiri Skin. (Leisi Mateyus 24:45-47.) Wi musu luku efu wi e gi yesi trutru na a rai di wi e kisi fu a srafu-grupu. Fu eksempre, na ini den yari di pasa, wi kisi rai di abi fu du nanga den krosi di wi e weri èn a fasi fa wi e moi wisrefi. Wi kisi rai tu di abi fu du nanga prisiriten, èn nanga Internet. Wi e gi yesi na den bun rai dati di e yepi wi fu tan abi wan tranga bribi? Fa a de nanga a rai di wi kisi fu hori na Osofamiri Anbegi doronomo? Wi abi wan spesrutu neti fu du dati? Efu wi no trow, wi e meki ten fu studeri Bijbel? Yehovah sa blesi wi nanga wi osofamiri te wi e teki a tiri fu a srafu-grupu.
4. San wi musu hori na prakseri te wi e teki bosroiti?
4 A kan taki son sma feni taki ibri Kresten kan bosroiti gi ensrefi fa a wani abi prisiriten, sortu krosi a wani weri, èn fa a wani moi ensrefi. Ma te wan Kresten di gi ensrefi abra na Gado wani horibaka gi a gemeente, dan a no sa denki ensrefi nomo te a musu teki bosroiti. A prenspari srefisrefi fu studeri Bijbel, a Wortu fu Yehovah, fu kon sabi fa a e denki fu sani. A boskopu na ini Bijbel musu de leki ’wan lampu gi wi futu, èn leki wan leti na tapu wi pasi’ (Ps. 119:105). A de wan koni sani tu fu luku sortu krakti den bosroiti fu wi abi tapu a diniwroko fu wi, èn tapu sma na ini a gemeente, noso tapu sma di no de memre fu a gemeente.—Leisi 2 Korentesma 6:3, 4.
5. Fu san ede wi musu luku bun taki wi no e tron sma di no wani teki a tiri fu trawan?
5 „A yeye di e wroko now na ini den sma di e trangayesi Gado”, de na ala sei, èn a de neleki a loktu di wi e bro (Ef. 2:2). A yeye dati kan meki taki wi e bigin denki taki wi no abi a tiri fu na organisâsi fu Yehovah fanowdu. A no de fu taki, dati wi no wani de leki Diotrefes, di no ben wani ’teki noti fu na apostel Yohanes nanga lespeki’ (3 Yoh. 9, 10). Wi musu luku bun taki wi no e tron sma di no wani teki a tiri fu trawan. Noiti wi musu taki, noso du sani di e sori taki wi no wani gi yesi na den brada di Yehovah poti fu tiri wi na ini a ten disi (Num. 16:1-3). Na presi fu dati, wi musu warderi a grani di wi abi fu wroko makandra nanga a srafu-grupu. Wi musu du muiti tu fu gi yesi èn fu saka wisrefi na ondro den wan di e teki fesi na ini a gemeente fu wi, a no so?—Leisi Hebrewsma 13:7, 17.
6. Fu san ede ibriwan fu wi musu luku san wi kan du fu horibaka fayafaya gi a gemeente?
6 Wan tra fasi fa wi kan horibaka gi a gemeente, na te ibriwan fu wi e luku san wi kan du fu ’gi glori na a diniwroko fu wi’ èn na Yehovah (Rom. 11:13). Son preikiman e dini leki gewoon pionier. Trawan e dini leki zendeling, kring-opziener, noso distrikt-opziener. Sonwan e dini na Bethel. Furu brada nanga sisa e yepi bow Kownukondre zaal. Furu fu den anbegiman fu Yehovah e du ala san den man fu yepi na osofamiri fu den fu dini Yehovah, èn fu teki prati fayafaya na a preikiwroko ibri wiki. (Leisi Kolosesma 3:23, 24.) Wi kan abi a dyaranti taki te wi e dini Gado fayafaya èn nanga wi heri ati, dan wi e sori taki wi e horibaka gi a gemeente.
Sani di kan abi krakti tapu a fasi fa wi e horibaka gi a gemeente
7. Sori fa a situwâsi fu wi kan abi krakti tapu a fasi fa wi e horibaka gi a gemeente.
7 A de prenspari taki wi e ondrosuku a situwâsi fu wi, fu di dati kan abi krakti tapu a fasi fa wi e horibaka gi a gemeente. Fu eksempre, a fasi fa wan brada e horibaka gi a gemeente e difrenti fu a fasi fa wan sisa e du dati. Owrusma no man du so furu na ini a diniwroko leki yonguwan. Èn te wi gosontu no bun, dan wi no man du furu tu gi Yehovah. Odo 20:29 e taki: „Na a krakti fu yongusma e meki taki den e kisi glori èn na a weti wiwiri fu owrusma e gi den grani.” Den yonguwan na ini a gemeente man du moro, fu di den abi moro krakti. Ma a gemeente e kisi furu wini fu den owruwan fu di den abi koni nanga ondrofeni. Wi musu hori na prakseri tu taki, awinsi san wi e du na ini na organisâsi fu Yehovah, wi man du dati fu di Gado e sori wi no-frudini bun-ati.—Tori. 14:26; Rom. 12:6-8.
8. Sortu tra sani kan abi krakti tapu a fasi fa wi e horibaka gi a gemeente?
8 Wan eksempre fu tu sisa di abi a srefi papa nanga mama, e sori sortu tra sani kan abi krakti tapu a fasi fa wi e horibaka gi a gemeente. Ala tu sisa klari a srefi skoro. Den de na ini a srefi situwâsi. A papa nanga mama fu den du ala san den man fu gi den tu pikin deki-ati fu du a gewoon pionierwroko, baka te den klari skoro. Baka di den klari a skoro, dan wan fu den sisa go pionier, ma a trawan go du grontapuwroko. Fu san ede den teki difrenti bosroiti? Fu di ibriwan fu den ben du san a ben wani. A no so a de nanga furu fu wi? Wi musu denki bun san wi wani du na ini a diniwroko fu Gado. Wi kan du moro na ini a diniwroko? Wi kan tyari kenki kon na ini a fasi fa wi e libi, so taki wi kan du moro na ini a diniwroko?—2 Kor. 9:7.
9, 10. San wi musu du efu wi no abi a firi fu du moro na ini a diniwroko fu Yehovah?
9 Ma fa a de te wi no abi a firi fu du moro leki san wi gwenti fu du na ini a diniwroko fu Yehovah? Na ini a brifi di Paulus ben skrifi gi den Filipisma, a e taki: „Gado na a sma di e wroko na ini unu, fu di disi e plisi en; a e du disi so taki unu no sa wani fu handri wawan, ma taki unu sa handri trutru tu.” Iya, Yehovah kan meki taki wi wani du moro gi en.—Fil. 2:13; 4:13.
10 Fu dati ede, wi musu aksi Yehovah fu gi wi na angri fu du a wani fu en. Na dati Kownu David fu owruten Israel ben du. A ben begi: „Ke Yehovah, sori mi a pasi di mi musu waka. Leri mi fa fu waka den pasi fu yu. Meki mi waka na wan reti fasi èn gi mi leri, bika yu na a Gado di e frulusu mi. Heri dei mi howpu na yu tapu” (Ps. 25:4, 5). Wi kan begi Yehovah tu fu gi wi na angri fu du san a feni bun. Te wi e prakseri fa Yehovah Gado nanga en Manpikin e denki fu a fasi fa wi e horibaka gi den, dan wi sa kon abi warderi gi den sani di den e du gi wi (Mat. 26:6-10; Luk. 21:1-4). Dati sa gi wi deki-ati fu begi Yehovah fu gi wi na angri fu du moro na ini a diniwroko. Na eksempre fu a profeiti Yesaya e sori wi sortu denki wi musu kon abi. Di a yere Yehovah e aksi: „Suma mi sa seni, èn suma sa go gi wi?”, dan a profeiti ben piki: „Dya mi de! Seni mi.”—Yes. 6:8.
Fa wi kan go na fesi?
11. (a) San e sori taki brada de fanowdu fu tyari frantwortu na ini na organisâsi? (b) Fa wan brada kan meki muiti fu kisi frantwortu na ini a gemeente?
11 Na heri grontapu, 289.678 sma teki dopu na ini a dienstyari fu 2008. Disi e sori krin taki brada de fanowdu fu teki fesi. Fu dati ede, san wan brada kan du? Fu taki en leti, a kan meki muiti fu doro den markitiki di wan brada musu doro fu man dini leki dinari ini a diniwroko, èn leki owruman. Den markitiki disi skrifi na ini Bijbel (1 Tim. 3:1-10, 12, 13; Tit. 1:5-9). Fa wan brada kan meki muiti fu doro den markitiki dati? A musu teki prati fayafaya na a preikiwroko, a musu tyari den frantwortu di a abi na ini a gemeente na wan bun fasi, a musu meki muiti fu gi moro bun piki na den Kresten konmakandra, èn a musu sori taki a e broko en ede nanga den Kresten brada nanga sisa. Disi e sori taki a e warderi a grani di a abi fu horibaka gi a gemeente.
12. Fa yonguwan kan sori taki den de fayafaya na ini a tru anbegi?
12 San yongu brada, spesrutu den wan di de na ini den tini yari, kan du fu go na fesi na ini a gemeente? Den kan studeri Bijbel so taki den kan kon abi moro ’koni èn so taki den kan kon frustan sani moro bun nanga yepi fu a yeye fu Gado’ (Kol. 1:9). Te yonguwan e studeri Gado Wortu, èn te den e teki prati fayafaya na den gemeente konmakandra, dan dati sa yepi den fu go na fesi. Yongu brada kan meki muiti tu fu ’pasa a bigi doro di opo fu go wroko’ leki furuten preikiman (1 Kor. 16:9). Te yonguwan e du furuten diniwroko gi Yehovah, dan dati sa meki den de koloku trutru, èn den sa kisi furu blesi.—Leisi Preikiman 12:1.
13, 14. Fa sisa kan sori taki den e warderi a grani di den abi fu horibaka gi a gemeente?
13 Sisa kan sori tu taki den e warderi a grani di den abi fu meki Psalm 68:11 kon tru. Drape skrifi: „Na Yehovah srefi taigi den san fu du. Den umasma di e fruteri a bun nyunsu, de leki wan bigi legre.” Wán fu den moro moi fasi fa sisa kan sori taki den e warderi a grani di den abi fu horibaka gi a gemeente, na te den e yepi meki disipel (Mat. 28:19, 20). Te sisa e teki prati fayafaya na a diniwroko èn te den e poti a wroko dati na a fosi presi na ini den libi, dan den e sori taki den e warderi a grani di den abi fu horibaka gi a gemeente.
14 Na ini a brifi di Paulus skrifi gi Titus, a e taki: „Den uma di owru kaba musu tyari densrefi na wan fasi di fiti santa sma, . . . den musu de sma di e leri trawan bun sani; na so fasi den kan leri den yongu uma fu lobi den masra, fu lobi den pikin fu den, fu de nanga krin frustan, fu libi wan krin libi, fu wroko bun na oso, fu de bun sma èn fu saka densrefi na ondro den eigi masra, so taki sma no kan taki takru fu a wortu fu Gado” (Tit. 2:3-5). A no de fu taki dati lepi sisa de wan bigi yepi na ini a gemeente! Te den e sori lespeki gi den brada di e teki fesi, te den e teki koni bosroiti di abi fu du nanga den krosi di den e weri, a fasi fa den e moi densrefi, èn a prisiriten di den abi, dan den sa de wan bun eksempre gi trawan. Boiti dati, den e sori taki den e si en leki wan bigi grani fu horibaka gi a gemeente.
15. San wan sisa di no trow kan du te a e firi leki a de en wawan?
15 Son leisi, a kan muilek gi wan sisa di no trow fu horibaka gi a gemeente. Wan sisa di ben ondrofeni disi, ben taki: „Fu di mi no trow, meki son leisi mi e firi leki mi de mi wawan.” Di sma ben aksi en san e yepi en, dan a ben taki: „Mi e begi Gado èn mi e studeri Bijbel. Disi e gi mi krakti baka. Mi e studeri artikel di e sori mi fa Yehovah e denki fu mi. Dan mi e meki muiti fu yepi trawan na ini a gemeente. Disi e yepi mi fu no poti prakseri na misrefi nomo.” Soleki fa Psalm 32:8 e sori, dan Yehovah ben taigi David: „Mi sa gi yu rai aladi mi ai sa de na yu tapu.” Iya, Yehovah e broko en ede nanga ibriwan fu den futuboi fu en. A e broko en ede tu nanga sisa di no trow, èn a sa yepi den alamala fu si fa den kan horibaka gi a gemeente.
Tan horibaka gi a gemeente!
16, 17. (a) Wi teki a kari fu tron memre fu na organisâsi fu Yehovah. Fu san ede dati na a moro bun bosroiti di wi kan teki? (b) San o yepi wi fu no lasi a grani di wi abi fu horibaka gi na organisâsi fu Yehovah?
16 Na wan lobi-ati fasi, Yehovah gi ibriwan fu den futuboi fu en na okasi fu de en mati. Yesus ben taki: „Nowan sma kan kon na mi, efu a Tata di seni mi kon no e hari en kon” (Yoh. 6:44). Fu ala den milyardmilyard sma di e libi na grontapu, Yehovah gi ibriwan fu wi a kari fu tron memre fu a gemeente fu en. Wi teki a kari dati, èn dati ben de a moro bun bosroiti di wi ben kan teki. Wi kon abi wan marki na ini a libi. Èn fu di wi abi a grani fu horibaka gi a gemeente, meki wi de koloku trutru!
17 A psalm skrifiman ben taki: „Yehovah, mi lobi fu de na ini na oso fu yu.” A ben singi moro fara: „Mi eigi futu sa tanapu na tapu wan plata presi; na mindri den ipi sma di kon makandra, mi sa blesi Yehovah” (Ps. 26:8, 12). A tru Gado e gi ibriwan fu wi na okasi fu horibaka gi na organisâsi fu en. Te wi e tan teki a tiri di Gado e gi wi, èn te wi e tan du a diniwroko fayafaya, dan wi no sa lasi a tumusi moi grani di wi abi fu horibaka gi a gemeente fu Yehovah.
Yu e memre disi ete?
• Fu san ede wi kan taki dati ala Kresten kan horibaka gi a gemeente?
• Fa wi e sori taki wi e warderi a grani di wi abi fu horibaka gi na organisâsi fu Gado?
• Sortu sani kan abi krakti tapu a fasi fa wi e horibaka gi a gemeente?
• Fa Kresten yonguwan nanga bigisma kan sori taki den e warderi a grani di den abi fu horibaka gi a gemeente fu Gado?
[Aksi fu a tori disi]
[Prenki na tapu bladzijde 16]
San brada kan du fu kisi frantwortu na ini a gemeente?
[Prenki na tapu bladzijde 17]
Fa sisa kan sori taki den e warderi a grani di den abi fu horibaka gi a gemeente?