A Mesias! A sma di Gado sa gebroiki fu frulusu wi
A Mesias! A sma di Gado sa gebroiki fu frulusu wi
„Neleki fa ala sma dede na ini Adam, na so ala sma sa kon na libi baka tu na ini Krestes.”—1 KOR. 15:22.
1, 2. (a) San Andreas nanga Filipus taki di den miti Yesus? (b) Fu san ede wi kan taki dati wi na ini a ten disi abi moro buweisi di e sori taki Yesus na a Mesias?
„WI FENI a Mesias.” Na dati Andreas ben taigi en brada Petrus, fu di a ben de seiker taki Yesus fu Nasaret ben de a Salfuwan fu Gado. Filipus ben bribi tu na ini Yesus, èn a go na en mati Natanael fu taigi en: „Wi feni a sma di Moses skrifi fu en na ini a Wet èn na ini den buku fu den Profeiti; en na Yesus, a manpikin fu Yosef fu Nasaret.”—Yoh. 1:40, 41, 45.
2 Yu abi na overtoigi taki Yesus na a Mesias di Gado pramisi libisma? Yu e bribi taki a de a „Moro Prenspari Fesiman” di Yehovah sa gebroiki ’fu frulusu wi’? (Hebr. 2:10) Tra fasi leki den fosi Kresten, wi na ini a ten disi abi moro buweisi di e sori taki Yesus na a Mesias. Soleki fa a Wortu fu Gado e sori, dan den sani di pasa fu sensi di Yesus gebore, teleki a kisi wan opobaka, e sori krin taki Yesus ben de a Krestes. (Leisi Yohanes 20:30, 31.) Bijbel e sori tu, taki te Yesus ben o de na hemel, dan a ben o tan du a wroko di a ben kisi fu du leki Mesias. (Yoh. 6:40; Leisi 1 Korentesma 15:22.) Te yu e luku den sani di yu leri na ini Bijbel, dan yu kan taki tu dati yu „feni a Mesias”. Ma meki wi go luku fosi fu san ede den disipel fu a fosi yarihondro ben abi leti fu bribi taki den ben feni a Mesias.
A „santa kibritori” fu a Mesias kon na krin safrisafri
3, 4. (a) Fa a du kon taki den disipel fu a fosi yarihondro ’ben man feni a Mesias’? (b) Fu san ede yu ben o taki dati Yesus wawan ben kan de a kontru fu ala den profeititori di abi fu du nanga a Mesias?
3 Fu san ede den fosi Kresten ben kan taki nanga leti dati Yesus ben de a Mesias? Nanga yepi fu den profeiti, Yehovah meki sma kon sabi safrisafri suma ben o de a Mesias. Wan Bijbel sabiman e agersi a tori dati nanga a fasi fa sma e tyari den pisi kon na wan fu wan marmer stonpopki di koti pisipisi. A de neleki te difrenti man di noiti no ben taki nanga makandra, e tyari wan pisi marmer ston kon na ini wan kamra. Efu den pisi dati e fiti moi na makandra, dan dati ben o sori krin taki na wan sma koti den pisi èn a seni den gi den man. Neleki fa ibri pisi de fanowdu fu seti a stonpopki baka, na so ibri profeititori di abi fu du nanga a Mesias, e yepi wi fu kon sabi suma na a Mesias.
4 Ma a tru taki iniwan sma ben kan de a kontru fu ala den profeititori di abi fu du nanga a Mesias? Wan ondrosukuman ben taki dati a no kan de so noiti taki iniwan sma ben kan de a kontru fu ala den profeititori di abi fu du nanga a Mesias. Sobun, a sabiman disi ben abi leti fu taki dati „Yesus ben de a wan-enkri sma na grontapu di ben man du dati”.
5, 6. (a) Fa Gado o strafu Satan? (b) Fa Gado tyari kon na krin safrisafri fu sortu famirilin a pramisi „pikin” ben o komoto?
5 Den profeititori di abi fu du nanga a Mesias, na wan „santa kibritori” di prenspari gi den engel na hemel èn gi libisma na grontapu (Kol. 1:26, 27; Gen. 3:15). A santa kibritori dati e sori tu taki Gado o strafu Satan Didibri „a fosi sneki”, di meki taki libisma kisi sondu èn e dede te fu kaba (Openb. 12:9). Fa Gado o strafu Satan? Yehovah ben taki dati wan „uma” ben o kisi wan „pikin”, èn a pikin dati ben o masi Satan en ede. A „pikin” disi ben o masi na ede fu a sneki, èn na so wan kaba ben o kon na a sma di meki taki sma e opo densrefi teige Gado, taki den e kon siki, èn taki den e dede. Ma fosi dati ben o pasa, Gado ben o gi pasi taki Satan gi a „pikin” fu na uma mankeri na en bakafutu.
6 Safrisafri Yehovah tyari kon na krin suma ben o de a pramisi „pikin”. Gado ben pramisi Abraham: „Na yu bakapikin o meki taki ala den pipel fu grontapu o man kisi blesi gi densrefi trutru” (Gen. 22:18). Moses ben taki dati a Sma dati ben o de „wan profeiti” di ben o bigi moro en (Deut. 18:18, 19). David ben e bribi taki a Mesias ben o de wan bakapikin fu en, èn taki a ben o tron a têgo kownu fu a kownu-oso fu David. Bakaten, den profeiti sori tu taki den sani disi ben o pasa trutru.—2 Sam. 7:12, 16; Yer. 23:5, 6.
Den buweisi di e sori taki Yesus na a Mesias
7. Fa Yesus gebore leki wan pikin fu Gado en „uma”?
7 Gado seni en Manpikin, a fosiwan fu ala den sani di a meki, kon na grontapu fu tron a pramisi „pikin”. A „pikin” disi ben komoto fu Yehovah en agersi uma, noso En hemel organisâsi fu engel. Fu man du a sani di Gado ben aksi en fu du, dan a wan-enkri Manpikin ben musu „gowe libi ala san a ben abi” na hemel, èn a ben musu gebore leki wan volmaakti libisma (Fil. 2:5-7; Yoh. 1:14). Fu di santa yeye ben o „tapu” Maria, meki sma ben o kari a pikin di ben o gebore „a santawan èn a Manpikin fu Gado”.—Luk. 1:35.
8. Di Yesus go fu teki dopu, dan fa dati ben de wan kontru fu den profeititori di abi fu du nanga a Mesias?
8 Den profeititori di abi fu du nanga a Mesias ben e tyari kon na krin o ten Yesus ben o sori ensrefi, èn pe a ben o du dati. Soleki fa wan profeiti ben taki, Yesus gebore na ini Betlehem (Mika 5:2). Na ini a fosi yarihondro, den Dyu ben e fruwakti a Mesias fayafaya. Dati meki sonwan fu den ben aksi densrefi efu Yohanes a Dopuman na Krestes: „A kan taki en na Krestes?” Ma Yohanes piki den: „A sma o kon di tranga moro mi” (Luk. 3:15, 16). Di Yesus ben abi 30 yari, dan a go na Yohanes fu teki dopu. Dati ben de na a kabapisi fu a yari 29. Na so Yesus ben sori ensrefi leki a Mesias, èn a ben du dati na a reti ten (Dan. 9:25). Baka dati, a bigin du a preikiwroko fu en fayafaya èn a taki: „A reti ten doro kaba, èn a kownukondre fu Gado kon krosibei kaba.”—Mark. 1:14, 15.
9. Sortu fasti overtoigi den disipel fu Yesus ben abi, aladi den no ben sabi ala sani finifini?
9 Ma sma ben musu kon abi a yoisti denki te a ben abi fu du nanga a Mesias. Aladi a ben fiti taki den sma ben e gi glori na Yesus, a Kownu, toku den no ben e frustan finifini ete taki a no ben o tiri leki kownu wantewante, èn taki a ben o tiri komoto fu hemel (Yoh. 12:12-16; 16:12, 13; Tori. 2:32-36). Ma Yesus ben wani sabi suma den disipel ben e denki taki a de. Dati meki a aksi den: „San unu e taki?” Petrus piki en nanga wan fasti overtoigi: „Yu na a Krestes, a Manpikin fu a libi Gado” (Mat. 16:13-16). Petrus ben piki Yesus na wan srefi sortu fasi, di furu sma ben drai baka gi En fu di den no ben e agri nanga wan tu fu den leri fu en.—Leisi Yohanes 6:68, 69.
Gi yesi na a Mesias
10. Fu san ede Yehovah sori krin o prenspari a de fu arki en Manpikin?
10 Di Gado en wan-enkri Manpikin ben de na hemel, dan a ben de wan makti engel. Na grontapu, Yesus ben de ’a boskopuman fu a Tata’ (Yoh. 16:27, 28). A ben taki: „Den sani di mi e leri sma, a no fu misrefi, ma den de fu a sma di seni mi kon” (Yoh. 7:16). Di den disipel kisi a transfigurâsi, dan Yehovah sori den taki Yesus ben de a Mesias, fu di a gi den a komando disi: „Arki en” (Luk. 9:35). Iya, den disipel ben musu arki a Wan di Gado teki, noso den ben musu gi yesi na en. Fu man du dati, dan den ben o abi fu sori bribi, èn den ben o abi fu du bun. A de tumusi prenspari taki wi du dati efu wi wani plisi Gado èn efu wi wani kisi têgo libi.—Yoh. 3:16, 35, 36.
11, 12. (a) Fu san ede den Dyu fu a fosi yarihondro no ben wani si Yesus leki a Mesias? (b) Suma ben poti bribi na ini Yesus?
11 Aladi Yesus ben sori na ala sortu fasi taki a ben de a Mesias trutru, toku furu fu den Dyu fu a fosi yarihondro no ben wani poti bribi na ini en. Fu san ede? Fu di den ben abi den eigi denki te a ben abi fu du nanga a Mesias. Den ben e bribi taki a Mesias ben o de wan tiriman di ben o frulusu den fu a tirimakti fu Rome di ben e kwinsi den. (Leisi Yohanes 12:34.) Ma soleki fa profeititori ben taki, sma ben e wisiwasi a Mesias, den ben e wai pasi gi en, a kon sabi san na pina nanga siki, èn te fu kaba sma kiri en. Na fu den sani disi ede, meki den Dyu no ben man poti bribi na ini a Mesias dati. (Yes. 53:3, 5). Srefi wan tu fu den reti-ati disipel fu Yesus ben e sari taki a no ben frulusu den fu a tirimakti di ben e kwinsi den. Ma toku den tan horibaka gi Yesus, èn te fu kaba, den kon frustan sani krin.—Luk. 24:21.
12 Wan tra reide fu san ede sma no ben wani bribi taki Yesus ben de a Mesias, na fu di den no ben e agri nanga den leri fu en. Fu man go na ini a Kownukondre, dan den ’no ben musu teri densrefi moro’, den ben abi fu „nyan” Yesus en skin nanga en brudu, den ben musu „gebore baka”, èn den no ben musu de „wan pisi fu grontapu” (Mark. 8:34; Yoh. 3:3; 6:53; 17:14, 16). Den sma di ben abi heimemre, den gudusma, nanga den hoigriman, ben feni taki den no ben o man du den sani dati. Ma den Dyu di ben abi sakafasi ben e si Yesus leki a Mesias. Son Samariasma ben du dati tu, èn den sma disi ben taki: „Wi sabi taki a man disi na a frulusuman fu grontapu trutru.”—Yoh. 4:25, 26, 41, 42; 7:31.
13. San pasa nanga Yesus di Satan gi en mankeri na wan agersi fasi na en bakafutu?
13 Yesus ben taki dati den granpriester ben o krutu en, èn taki den sma di no ben de Dyu ben o spikri en na wan pina postu. Ma tapu a di fu dri dei, a ben o kisi wan opobaka (Mat. 20:17-19). Di a ben de na fesi a Sanhedrin, dan a taigi den sma drape taki en na „a Krestes, a Manpikin fu Gado”. A sani dati meki taki sma krutu en taki a ben e taki ogri fu Gado (Mat. 26:63-66). Pilatus ben feni taki Yesus no ben du ’nowan ogri di ben e meki taki a musu dede’. Ma fu di den Dyu ben taki tu dati a ben e opo ensrefi teige den tiriman, meki Pilatus gi den okasi fu „du nanga Yesus san den ben wani” (Luk. 23:13-15, 25). Na so den sori taki den no ben e bribi na ini Yesus, èn na wan triki fasi den meki mofo fu kiri „a Moro Prenspari Fesiman di sa meki wi kisi libi”. Den du dati aladi den ben abi nofo buweisi taki na Gado ben seni en kon (Tori. 3:13-15). Den ben „kiri” a Mesias soleki fa Bijbel ben taki na fesi. Iya den spikri en na wan pina postu tapu a Paskadei fu a yari 33 (Dan. 9:26, 27; Tori. 2:22, 23). Yesus dede na wan ogri-ati fasi, èn na so Satan gi en mankeri na en „bakafutu”, soleki fa Genesis 3:15 ben taki.
Fu san ede a Mesias ben musu dede?
14, 15. (a) San na den tu reide fu san ede Yehovah gi pasi taki sma kiri Yesus? (b) San Yesus du baka di a kisi wan opobaka?
14 Tu prenspari reide de fu san ede Yehovah gi pasi taki sma kiri Yesus. A fosiwan, na taki a gi di Yesus tan gi yesi na Gado te na dede, ben de wan prenspari sani di abi fu du nanga a „santa kibritori”. Yesus sori na ala fasi taki wan volmaakti man kan tan „dini Gado na wan getrow fasi”, èn taki a man tan horibaka gi a reti di Gado abi fu tiri hemel nanga grontapu, awansi sortu tesi Satan e tyari kon na en tapu (1 Tim. 3:16). A di fu tu reide, na soleki fa Yesus ben taki: „A Manpikin fu libisma . . . kon fu dini sma èn fu gi en sili leki wan lusu-paiman fu frulusu furu sma” (Mat. 20:28). Yesus dede leki wan „lusu-paiman” so taki wi ben kan kon fri fu a sondu di wi kisi fu Adam. Boiti dati, nanga yepi fu a lusu-paiman disi, ala sma di e si Yesus leki a sma di Gado sa gebroiki fu frulusu libisma, sa kisi têgo libi.—1 Tim. 2:5, 6.
15 Baka di Krestes tan dri dei na ini a grebi, dan a kisi wan opobaka, èn 40 dei langa a sori ensrefi na den disipel fu en. Na so a sori taki a ben de na libi, èn a gi den moro rai (Tori. 1:3-5). Baka dati, a opo go na hemel fu gi Yehovah a waarde fu a warti ofrandi fu en, èn fu wakti teleki a reti ten doro fu tiri leki Mesias Kownu. A ben abi furu fu du, aladi a ben e wakti a ten dati.
Yesus e klari a wroko di a ben musu du leki Mesias
16, 17. Fruteri sortu wroko Yesus du leki Mesias, baka di a opo go na hemel.
16 Na ini den hondrohondro yari sensi Yesus kisi wan opobaka, a de wan Kownu di e tiri a Kresten gemeente (Kol. 1:13). A ben o bigin tiri leki Kownu fu Gado Kownukondre na a reti ten. Bijbel profeititori, èn den sani di e pasa na grontapu, e sori taki Yesus bigin tiri leki Kownu na ini 1914, èn dati ben o de sosrefi a bigin fu „a kaba fu a grontapu sistema disi” (Mat. 24:3; Openb. 11:15). Syatu baka dati, Yesus nanga den engel fu en fringi Satan nanga den ogri yeye fu en komoto na hemel.—Openb. 12:7-10.
17 A preikiwroko nanga a leri-wroko di Yesus bigin du na ini a yari 29, e doro en heimarki. Heri esi, a sa krutu ala libisma. Na a ten dati, a sa taigi ala den wan di de leki skapu èn di e si en leki a sma di Yehovah sa gebroiki fu frulusu libisma, taki den kan „teki a kownukondre di sreka gi [den] sensi a ten di grontapu seti” (Mat. 25:31-34, 41). Den sma di e weigri fu teki Yesus leki Kownu, sa kisi pori te a sa kon nanga den legre fu hemel fu tyari wan kaba kon na ala ogri. Na a ten dati, Yesus sa tai Satan, èn a sa fringi en nanga den ogri yeye fu en go na ini „a dipi peti di no abi gron”.—Openb. 19:11-14; 20:1-3.
18, 19. San Yesus du leki Mesias, èn sortu blesi dati o tyari kon gi libisma di e gi yesi na en?
18 Na ini a Dusun Yari Tiri, Yesus sa sori taki en na trutru „Gran Raiman, Tranga Gado, Têgo Papa, èn Granman fu vrede” (Yes. 9:6, 7). A Kownukondre tiri fu en sa gi ala sma okasi fu kon de volmaakti, sosrefi den wan di sa kisi wan opobaka (Yoh. 5:26-29). A Mesias sa tyari safri-ati libisma go na „peti di abi watra di e gi libi”. Na so libisma di e gi yesi na en sa man kon abi wan bun matifasi nanga Yehovah. (Leisi Openbaring 7:16, 17.) Baka a lasti tesi, ala den wan di e opo densrefi teige Gado, sosrefi Satan nanga den ogri yeye fu en, sa ’fringi go na ini a se di e bron nanga faya’. Na a fasi dati a o masi a „sneki” na en ede.—Openb. 20:10.
19 A no de fu taki, dati Yesus e tyari a frantwortu di a abi leki Mesias na wan tumusi moi fasi! A paradijs grontapu sa lai nanga sma di kisi frulusu, èn den sa libi fu têgo leki sma di gosontu dorodoro èn di de koloku trutru. A santa nen fu Yehovah sa kon krin dorodoro, èn a sa kon na krin tu taki na en abi a reti trutru fu tiri hemel nanga grontapu. Den wan di e gi yesi na a Salfuwan fu Gado, sa kisi wan tumusi moi gudu trutru!
Yu feni a Mesias?
20, 21. Sortu reide yu abi fu fruteri trawan fu a Mesias?
20 Sensi 1914, wi e libi na ini a pisi ten fu Krestes en pa·rou·siʹa, noso en denoya. Aladi sma no man si nanga den eigi ai taki a e tiri leki Kownu fu Gado Kownukondre, toku den profeititori di kon tru e sori taki a e tiri trutru (Openb. 6:2-8). Ma neleki fa a ben de nanga den Dyu na ini a fosi yarihondro, na so furu sma na ini a ten disi no wani bribi taki a Mesias e tiri now leki Kownu. Den sma disi wani wan fesiman, noso wan sma di sa tiri nanga yepi fu grontapu tirimakti. Ma yu kon sabi taki Yesus e tiri now leki Kownu fu Gado en Kownukondre. Yu no ben breiti di yu kon sabi dati? Neleki fa a ben de nanga den disipel fu a fosi yarihondro, na so a sani dati ben meki yu bari kari: „Wi feni a Mesias.”
21 Te yu e taki fu a tru bribi na ini a ten disi, dan yu e sori sma krin taki Yesus na a Mesias? Te yu e du dati, dan yu sa sori taki yu e warderi san a du gi yu kaba, san a e du now, èn san a sa du ete. A no de fu taki dati neleki Andreas nanga Filipus, yu fruteri yu famiriman nanga yu mati fu a Mesias. Fu san ede yu no e teki deki-ati fu go na den èn fu sori den taki Yesus Krestes trutru na a Mesias di Gado pramisi libisma. Iya, fruteri den taki Gado sa gebroiki en fu frulusu libisma.
Yu kan tyari disi kon na krin?
• Fa a du kon taki den disipel fu a fosi yarihondro feni a Mesias?
• San na den tu prenspari reide fu san ede Yesus dede?
• San Yesus sa du ete leki Mesias?
[Aksi fu a tori disi]
[Prenki na tapu bladzijde 21]
Fu san ede sma na ini a fosi yarihondro ben kan taki dati Yesus ben de a Mesias di Gado ben pramisi libisma?
[Prenki na tapu bladzijde 23]
Te yu e taki nanga sma, dan yu e sori den krin taki Yesus na a Mesias?