Dini Gado nanga prisiri, aladi yu abi furu fu du

YEHOVAH wani taki yu musu de nanga prisiri (Ps. 100:2). Efu yu na wan futuboi fu en, dan a kan taki yu abi furu fu du tu. Kande yu no ben abi so furu fu du di yu ben gi yusrefi abra na Gado. Ma a kan taki now a wroko fu yu nanga den frantwortu di yu abi leki futuboi fu Yehovah, kon de leki wan hebi gi yu. Kande yu e firi syen tu taki yu no man du ala den sani di yu wani du. Fa yu kan tyari den frantwortu fu yu na wan yoisti fasi, so taki yu e tan abi „a prisiri di Yehovah e gi”?​—Neh. 8:10.

Yu e libi na ini muilek ten, èn yu e kisi fu du nanga furu broko-ede. Dati meki yu musu orga yu libi bun. Te a abi fu du nanga a tori disi, dan wan tu fu den rai di na apostel Paulus ben skrifi nanga yepi fu santa yeye, kan de wan yepi gi yu. Paulus ben taki: „Luku bun taki unu no e waka leki don sma, ma taki unu e waka leki koni sma; fu man du disi, un musu gebroiki ibri okasi bun, bika den dei ogri.”​—Ef. 5:15, 16.

Fa a koni rai disi kan yepi yu fu poti marki di yu man doro? Fa a kan yepi yu fu tyari ala den frantwortu di yu abi, namku fu studeri Bijbel, fu sorgu gi yu osofamiri, fu go na ini a preikiwroko, fu du a grontapuwroko fu yu, èn fu du tra prenspari sani?

Yu e memre ete fa yu ben prisiri di yu gi yusrefi abra na Gado èn teki dopu? Yu ben e prisiri fu di yu kon leri sabi Yehovah, èn fu di yu kon sabi sortu sani a o du. Kande yu studeri fayafaya omeni mun langa fu kon frustan den sani dati, èn fu kon de nanga prisiri. Ma a no de fu taki, dati a muiti di yu meki no ben de fu soso. Fu di yu studeri Bijbel na a fasi dati, meki yu kon abi wan moro bun libi.

Fu man tan dini Yehovah nanga prisiri, dan yu musu tan studeri Gado Wortu. Efu a muilek gi yu fu feni ten fu leisi èn studeri Bijbel, dan luku sortu kenki yu kan tyari kon. Srefi te yu ben o gebroiki wan tu miniti nomo wan dei fu studeri Bijbel èn fu denki dipi fu den sani di yu leri, dan dati ben o yepi yu kaba fu kon moro krosibei na Yehovah. A no de fu taki, dati yu ben o dini Yehovah nanga moro prisiri.

Furu futuboi fu Gado man meki ten gi prenspari sani, fu di den e bosroiti fu no gebroiki so furu ten moro gi sani di no de so prenspari. Aksi yusrefi a sani disi: ’Omeni ten mi e gebroiki fu leisi grontapu buku noso koranti, fu luku telefisi, fu arki poku, noso fu du tra sani di mi lobi du?’ Kande a e gi prisiri fu du den sani disi, ma wi musu luku bun taki den no e teki tumusi furu fu wi ten (1 Tim. 4:8). Efu yu kon si taki a muilek gi yu fu  gebroiki yu ten bun, dan du muiti fu tyari kenki kon.

Adam abi wan wefi nanga dri pikin, èn a e dini leki owruman. A e fruteri san e yepi en: „Mi no wani teki tumusi furu sani na mi tapu. Mi e sorgu taki den sani di mi lobi du no e teki tumusi furu fu mi ten, èn mi no wani abi sani di e aksi tumusi furu fu mi. A no taki mi no wani abi prisiri na ini a libi, ma a de so nomo taki mi no wani abi prisiriten di e teki tumusi furu fu mi ten.”

Te yu e denki dipi fu den bun bakapisi di yu kisi fu di yu teki koni bosroiti, dan dati kan yepi yu tu fu kon abi prisiri baka na ini a diniwroko èn fu tan abi wan bun denki fu sani. Fu eksempre, Mariusz, wan owruman di abi dri pikin, e taki: „Di mi bigin studeri Bijbel, mi kon abi wan howpu na ini a libi. Ten na ten, problema e miti mi ete, èn fu wan lo fu den problema dati mi taki nanga Yehovah. Ma fu di a e yepi mi, meki mi abi wan howpu di e gi mi prisiri.”

Na eksempre fu Mariusz e sori taki aladi wi abi wan moi howpu gi a ten di e kon, toku dati no wani taki dati wi no sa abi nowan enkri broko-ede. Ma a howpu di yu abi, kan meki yu firi moro bun, èn yu o sabi moro bun san fu du te yu e kisi fu du nanga den problema fu a libi. Bijbel e taki: „Ala den dei fu den mofinawan takru; ma a sma di e firi prisiri na ini en ati, abi wan fesa ala ten” (Odo 15:15). Prakseri sosrefi a lobi di Gado sori gi yu kaba. Te yu e denki dipi fu den sani disi, dan dati kan yepi yu fu kon abi moro lobi gi en, èn fu dini en nanga moro prisiri.​—Mat. 22:37.

Te wi e poti Yehovah èn a wani fu en na a fosi presi na ini wi libi, dan wi sa kon abi wan moro koloku osofamiri-libi. Te den sma na ini yu osofamiri e sori den fasi fu Krestes, dan den no sa kisi kesekese makriki nanga makandra, èn den sa libi moro bun tu nanga makandra. Na so na osofamiri fu yu o libi na ini vrede èn na ini wánfasi nanga makandra.​—Ps. 133:1.

Te wi e teki prati na a Kresten diniwroko leki osofamiri, dan wi sa de koloku trutru. Mariusz e taki: „Mi lobi du sani makandra nanga mi osofamiri. Mi wefi de wan bigi yepi gi mi. Solanga a man, a e wroko makandra nanga mi, awansi na te mi e du a preikiwroko, noso te mi e krin a stadion gi a kongres. Boiti dati, a e go makandra nanga mi te mi musu go hori wan lezing na ini wan tra gemeente. A sani disi e gi mi furu deki-ati.”

Bijbel e gi Kresten a komando fu sorgu gi na osofamiri fu den (1 Tim. 5:8). Ma efu a grontapuwroko fu wi e teki tumusi furu fu wi ten nanga wi krakti, dan dati kan meki wi lasi prisiri na ini a diniwroko di wi e du gi Gado. Taki nanga Yehovah fu a tori disi (Ps. 55:22). Son sma di wani poti a Kownukondre fu Gado na a fosi presi na ini den libi, kon si taki den musu suku wan tra wroko. Kande wan Kresten abi wan wroko di e pai bun. Ma efu a wroko dati e teki tumusi furu fu en ten, dan a no musu gi pasi taki a wroko e tapu en fu poti prakseri na a anbegi fu en di prenspari moro ala tra sani.​—Odo 22:3.

Efu yu e suku wan wroko, noso efu yu abi wan wroko kaba, dan a kan de wan yepi gi yu fu skrifi na tapu papira sortu wini èn sortu problema a wroko dati kan tyari kon gi yu. Ala sma wani du wan wroko di den lobi èn di e pai bun. Ma a wroko di yu e du now e gi yu okasi fu tranga a bribi fu yu osofamiri? Prakseri a tori bun, èn teki bosroiti di e sori taki a matifasi di yu abi nanga Yehovah, na a moro prenspari sani gi yu.

Efu a wroko fu yu no e gi yu okasi fu go na fesi na ini na anbegi, dan yu musu tyari kenki kon na ini a situwâsi fu yu. Furu Kresten tyari bigi kenki kon fu man abi moro ten gi na anbegi fu den. Wan brada na ini Polen e taki: „A wroko fu mi ben e meki taki mi ben musu go na tra kondre doronomo fu du bisnis. Sobun, wan leisi, mi ben abi fu bosroiti fu gowe libi a wroko fu mi. Mi no ben abi nofo ten gi na anbegi fu mi, noso gi mi osofamiri.” Now a brada disi e du wan wroko di no e teki so furu fu en ten nanga en krakti.

Yu sa de nanga prisiri te yu e yepi trawan

Yesus ben taki dati „wan sma sa de moro koloku te a e gi sani, leki te a e kisi sani” (Tori. 20:35). Kresten abi furu okasi fu gi trawan sani. Wi kan lafu nanga wan sma, wi kan seki den anu, noso wi kan taigi den tangi gi a tranga wroko di den e du na ini a gemeente. Te wi e du den sani disi, dan son leisi dati nofo kaba fu meki a sma firi bun, èn wi sa firi bun tu.

Na apostel Paulus ben gi en Kresten brada nanga sisa deki-ati fu ’taki na wan fasi di e trowstu  den sma di lasi-ati, èn fu yepi den swakiwan’ (1 Tes. 5:14). Sma di lasi-ati kan denki taki den wawan no man lusu den problema di den abi. Yu ben o man yepi den sma disi? Te yu e si taki wan brada noso wan sisa fu yu e lasi prisiri na ini a diniwroko fu Yehovah, dan pruberi fu gi en deki-ati. Yu srefi sa kisi deki-ati te yu e du dati. Wi leki libisma no man lusu son problema. Ma yu kan sori yu Kresten brada noso sisa taki yu e firi gi en trutru, èn yu kan gi en deki-ati fu frutrow tapu Yehovah nanga en heri ati. Den wan di e du dati, kan abi a dyaranti taki Yehovah sa yepi den.​—Ps. 27:10; Yes. 59:1.

Wan tra sani di yu kan du, na fu wroko makandra nanga wan sma di lasi prisiri na ini a diniwroko. Di Yesus seni den 70 disipel fu en go na ini a preikiwroko, dan a seni den „tu na tu” (Luk. 10:1). A no de fu taki, dati a sani disi gi den disipel okasi fu gi makandra deki-ati, a no so? Fu san ede yu no e teki na eksempre dati? Na so yu o man yepi son brada nanga sisa fu kisi prisiri baka na ini a diniwroko.

A tru taki a libi lai nanga broko-ede. Ma toku Paulus e gi wi a rai disi: „Ala ten un musu prisiri na ini a diniwroko fu Masra. Ete wan tron mi o taki: Un musu prisiri!” (Fil. 4:4) Fu di yu lobi Gado, fu di yu e gi yesi na en, èn fu di yu e tan du a wroko fu en fayafaya, meki yu abi wan marki na ini a libi. A sani dati e gi yu prisiri. San moro prenspari, na taki Yehovah e yepi yu fu horidoro, awinsi yu abi broko-ede nanga problema.​—Rom. 2:6, 7.

Wi abi a frutrow taki heri esi Yehovah o seti a nyun grontapu di a pramisi wi. Te a ten dati doro, dan a no de fu taki dati wi sa kisi furu blesi, èn wi o abi furu reide fu de nanga prisiri! (Ps. 37:34) Sobun, wi no abi fu firi brokosaka, èn wi no musu frigiti omeni blesi Yehovah e gi wi nownow kaba. Na so wi kan „dini Yehovah nanga prisiri”.​—Ps. 100:2.

[Schema na tapu bladzijde 8]

(Efu yu wani si pe den sani disi skrifi, luku a tijdschrift)

Efu yu wani tan dini Yehovah nanga prisiri, dan yu musu tyari wan tu kenki kon na ini a fasi fa yu e gebroiki yu ten

PRISIRITEN

WI OSO nanga WI OSOFAMIRI

A WROKO FU WI

DEN KRESTEN KONMAKANDRA

STUDERI

A PREIKIWROKO

[Prenki na tapu bladzijde 10]

Yu man yepi trawan fu kisi prisiri baka na ini a diniwroko fu den?