Kweki lobi di no e kaba noiti
Kweki lobi di no e kaba noiti
’Lobi e horidoro awansi san e pasa. Lobi no e kaba noiti.’—1 KOR. 13:7, 8.
1. (a) Fa furu sma e denki fu lobi? (b) San sma lobi moro furu?
SMA skrifi furu buku di abi fu du nanga lobi. Sma e singi moi sani fu a fasi disi, èn den e meki singi fu sori fa lobi moi èn fa a e gi a libi prisiri. A tru taki ala sma abi lobi fanowdu. Ma furu buku nanga felem abi fu du nanga lobitori aladi den tori dati a no tru tori. Furu wenkri lai nanga den sortu sani dati. Toku a de krin fu si taki furu sma no abi trutru lobi gi Gado èn gi trawan. Na ini a ten disi, wi e si a kontru fu a sani di Bijbel e taki fu den lasti dei. Iya, libisma ’lobi densrefi nomo, den lobi moni, èn den lobi prisiri na presi taki den lobi Gado’.—2 Tim. 3:1-5.
2. Fa Bijbel e warskow wi fu no lobi sani di no bun?
2 Libisma man sori lobi, ma Gado Wortu e warskow wi fu no sori lobi gi sani di no bun. Èn Bijbel e sori san e pasa te a sortu lobi dati e teki rutu na ini wan sma en ati (1 Tim. 6:9, 10). Yu e memre san na apostel Paulus ben skrifi fu Demas? Aladi Demas ben e wroko makandra nanga Paulus, toku a bigin lobi den sani fu grontapu (2 Tim. 4:10). Na apostel Yohanes ben warskow Kresten fu luku bun nanga a sani disi. (Leisi 1 Yohanes 2:15, 16.) Wan sma di lobi Gado nanga den sani di e komoto fu En, no kan lobi grontapu nanga den sani fu grontapu di sa lasi gowe.
3. Nanga sortu sani wi musu luku bun, èn sortu aksi e opo kon?
3 Aladi wi e libi ete na ini a grontapu disi, toku wi no de wan pisi fu en. Dati meki wi musu luku bun taki wi no e kon abi a fowtu denki fu lobi, neleki fa grontapusma abi dati. A de prenspari taki wi no e kon abi lobi gi sani di no bun noso di no fiti, bika dati sa tyari takru bakapisi kon gi wi. Sobun, gi suma wi musu kon abi trutru lobi? Sortu sani e yepi wi fu kon abi lobi di e frudrage ala sani èn di no e kaba noiti? Fa a lobi dati e tyari wini kon gi wi now, èn na ini a ten di e kon? Wi musu kon sabi fa Gado e si den sani disi, so taki wi kan meki a denki fu en tiri wi.
Kon abi lobi gi Yehovah
4. Fa a lobi di wi abi gi Gado e gro?
4 Prakseri wan gronman di e wroko tranga fu sreka a gron èn fu prani den siri. A e fruwakti taki den siri o gro (Hebr. 6:7). Na so a de tu taki a lobi di wi abi gi Gado musu gro. Fa wi kan meki dati pasa? Neleki fa wan gronman e sreka a gron fu en so taki den siri kan gro, na so wi musu sreka wi ati, so taki den tru leri fu a Kownukondre kan teki rutu na ini. Fu man du disi, dan wi musu studeri Gado Wortu fayafaya so taki wi kan kon sabi en moro bun (Kol. 1:10). Te wi e go na den gemeente konmakandra doronomo èn te wi e teki prati doronomo tu na den, dan dati sa yepi wi tu fu kon sabi Gado moro bun. Wi e meki muiti doronomo fu kon sabi Gado moro bun?—Odo 2:1-7.
5. (a) Fa wi kan leri sabi den moro prenspari fasi fu Yehovah? (b) San yu kan taki fu Gado en retidu, fu a koni fu en, èn fu a makti fu en?
5 Nanga yepi fu a Wortu fu en, Yehovah e meki wi kon sabi sortu fasi a abi. Te wi e studeri den Buku fu Bijbel èn te wi e leri sabi Yehovah moro bun, dan wi sa kon abi moro warderi gi den fasi fu en. Dati na den fasi soleki en retidu, en makti, a koni fu en, èn san moro prenspari, a lobi fu en di bigi pasa marki. Yehovah e krutu ala sani na wan reti fasi, èn a wet fu en regtfardiki tu (Deut. 32:4; Ps. 19:7). Wi kan poti prakseri na ala den sani di Yehovah meki, èn a tumusi bigi koni fu en sa naki wi ati (Ps. 104:24). Ala den stari nanga den planeiti na hemel e sori tu taki Yehovah na a sma di abi bun bigi krakti èn bun furu makti.—Yes. 40:26.
6. Fa Gado sori lobi gi wi, èn fa a lobi dati abi krakti na yu tapu?
6 San wi kan taki fu a moro prenspari fasi fu Gado, namku a lobi fu en? A lobi dati bigi srefisrefi, èn a abi krakti tapu wi alamala. Fu di Gado abi a lobi dati, meki a sorgu gi wan lusu-paiman, so taki libisma kan kisi frulusu. (Leisi Romesma 5:8.) A seti disi de fu a bun fu ala libisma na grontapu, ma soso den wan di e sori lobi gi Gado èn di e poti bribi na ini en Manpikin, sa kisi wini fu a lusu-paiman (Yoh. 3:16, 36). Fu di Gado gi Yesus leki wan ofrandi fu tapu den sondu fu wi, meki wi musu sori lobi tu gi en.
7, 8. (a) San wi musu du fu man sori taki wi lobi Gado? (b) Sortu sani no e tapu a pipel fu Gado fu gi yesi na den komando fu en?
7 Fa wi kan sori taki wi lobi Gado fu di a du someni sani gi wi? Gado Wortu e piki na aksi dati na a moi fasi disi: „Disi na san a lobi fu Gado wani taki, dati wi e hori wisrefi na den komando fu en; ma toku den komando fu en no de wan hebi” (1 Yoh. 5:3). Iya, te wi lobi Yehovah Gado, dan wi sa gi yesi na den komando fu en. Dati na wán reide fu san ede wi e gi kotoigi fu en nen èn fu a Kownukondre, èn trawan e kisi wini fu a wroko dati di wi e du. Te wi e du dati nanga wi heri ati, dan dati e sori taki wi e gi yesi na den komando fu Gado, èn taki wi e du dati nanga wan krin ati.—Mat. 12:34.
8 Den Kresten brada nanga sisa fu wi na heri grontapu e tan hori densrefi na den komando fu Gado, aladi den e kisi fu du nanga sma di abi wan mi-no-ke fasi, èn nanga sma di e weigri krinkrin fu arki a Kownukondre boskopu. Den Kresten disi e tan du muiti fu du a diniwroko fu den dorodoro (2 Tim. 4:5). Wi e du muiti tu fu prati a sabi fu Gado nanga trawan, èn wi e hori wisrefi tu na ala den tra komando fu en.
Fu san ede wi lobi wi Masra Yesus Krestes?
9. Sortu sani Krestes ondrofeni, èn san meki taki a ben man horidoro?
9 Boiti taki wi lobi Gado, wi abi furu reide fu san ede wi lobi en Manpikin. Wi noiti no si Yesus, ma o moro wi e leri sabi en, o moro a lobi di wi abi gi en e gro (1 Petr. 1:8). San na wan tu fu den sani di Yesus ben ondrofeni? Aladi Yesus ben e du a wani fu en Tata, toku sma ben e teige en sondro reide, den ben e frufolgu en, den krutu en aladi a no ben du nowan ogri, èn den kosi en. Sma lagi en na tra fasi tu. (Leisi Yohanes 15:25). A lobi di Yesus abi gi en Papa na hemel ben gi en deki-ati fu horidoro na ondro den tesi dati. Èn fu di Yesus lobi wi, meki a gi ensrefi leki wan srakti-ofrandi fu frulusu furu sma.—Mat. 20:28.
10, 11. Te wi e luku den sani di Krestes du gi wi, dan san dati e gi wi deki-ati fu du?
10 A sani di Yesus du e gi wi deki-ati fu sori taki wi de nanga tangi. Te wi e prakseri den sani di Krestes du gi wi, dan wi e kon abi moro lobi gi en. Fu di wi na bakaman fu en, meki wi musu kweki a srefi lobi di Krestes ben e sori, èn wi musu du muiti tu fu tan sori a lobi dati doronomo. Na so wi sa man tan gi yesi na a komando di a gi wi fu gi kotoigi fu a Kownukondre, èn fu meki disipel.—Mat. 28:19, 20.
11 Fu di wi wani sori warderi gi a lobi di Krestes sori gi a heri libisma famiri, meki wi e du ala san wi man fu klari a wroko di a gi wi, fosi a kaba doro. (Leisi 2 Korentesma 5:14, 15.) Fu di Krestes sori lobi gi wi, meki a ben man du san Gado abi na prakseri gi libisma. Èn na eksempre di Krestes gi wi so taki wi kan waka soifri na en baka, e meki taki ibriwan fu wi kan kisi wini fu den sani di Gado o du. Ma wi musu kon lobi Gado nanga wi heri ati fu man kisi den blesi dati (Mat. 22:37). Te wi e du san Yesus leri wi, èn te wi e hori wisrefi na den komando fu en, dan neleki Yesus, wi e sori taki wi abi a fasti bosroiti fu horibaka gi Gado leki tiriman fu hemel nanga grontapu, awansi san e pasa.—Yoh. 14:23, 24; 15:10.
Waka a pasi fu lobi di bun moro ala trawan
12. San Paulus ben wani taki nanga den wortu „a pasi di bun moro ala trawan”?
12 Na apostel Paulus ben e teki na eksempre fu Krestes. Fu di Paulus ben e waka soifri baka Krestes, meki a ben man gi den brada nanga sisa fu en deki-ati fu teki na eksempre fu en (1 Kor. 11:1). Na ini a fosi yarihondro, son Kresten di ben kisi den presenti fu a yeye, ben e dresi sikisma, èn den ben e taki na ini tongo. Aladi Paulus ben gi den Korentesma a rai fu tan suku den sortu presenti dati, toku a sori den taki wan moro bun sani ben de di den ben musu suku. Na 1 Korentesma 12:31, a e taki: „Èn toku mi e sori unu wan pasi di bun moro ala trawan.” Den tra tekst di e kon baka a wan di kari, e sori taki a pasi dati na lobi di bun moro ala tra sani. Fu san ede a bun moro ala tra sani? Paulus e tyari kon na krin san a ben wani taki nanga den wortu dati. (Leisi 1 Korentesma 13:1-3.) Awansi a ben abi spesrutu koni, noso awansi a ben du wan tu bigi sani, ma a no ben abi lobi, dan sortu wini dati ben o tyari kon gi en? Nowan enkri wini! Nanga yepi fu a yeye fu Gado, a tyari a prenspari sani disi kon na krin. A e naki wi ati trutru fu di a meki wi kon sabi a sani disi!
13. (a) San na a yaritekst gi 2010? (b) Fu san ede lobi no e kaba noiti?
13 Baka dati, Paulus e tyari kon na krin gi wi san na trutru lobi, èn san a no trutru lobi. (Leisi 1 Korentesma 13:4-8.) Teki a ten now fu ondrosuku efu yu abi trutru lobi. Poti prakseri na a lasti pisi fu vers 7 èn na a fosi pisi fu vers 8: ’Lobi e frudrage ala sani. Lobi no e kaba noiti.’ Den wortu disi sa de wi yaritekst gi 2010. Luku taki na ini vers 8, Paulus e taki dati den presenti fu a yeye, soleki a taki di sma e taki profeititori èn a taki di den e taki na ini tongo, ben o kon na wan kaba. Sma ben e gebroiki den presenti disi di a Kresten gemeente ben seti nyunyun. Te fu kaba, sma no ben o abi den presenti disi moro. Ma lobi o tan fu ala ten. Yehovah srefi na lobi, èn a de fu têgo. Dati meki lobi no o kaba noiti. Fu ala ten a sa tan wan fu den fasi fu wi têgo Gado.—1 Yoh. 4:8.
Lobi e frudrage ala sani
14, 15. (a) Fa lobi kan yepi wi fu horidoro te wi e kisi tesi? (b) Fu san ede wan yongu brada weigri fu drai baka gi a bribi fu en?
14 Fa a du kon taki Kresten man horidoro awansi sortu tesi e miti den, awansi sortu muilek situwâsi den de na ini, èn awansi sortu problema den abi? We, den man horidoro fu di den abi trutru lobi. Wan sma di abi trutru lobi, no e libi en gudu wawan na baka, ma a de klariklari tu fu tan gi yesi na Gado èn fu dede srefi fu a bun fu a nen fu Krestes ede (Luk. 9:24, 25). Prakseri den Kotoigi di tan gi yesi na Gado aladi den ben e pina na ini strafuman-kampu èn na strafu-oso na a ten fu a Di Fu Tu Grontapufeti, èn baka a feti dati.
15 Luku na eksempre fu Wilhelm, wan yongu Doisri Kotoigi di ben horidoro na ondro tesi. Na presi taki a drai baka gi a bribi fu en, a tan gi yesi na Gado aladi den Nazi srudati ben o sutu en kiri. A ben skrifi wan lasti brifi gi en famiri fu taigi den adyosi. A brifi ben e taki: „A moro prenspari sani di wi musu du, na taki wi musu lobi Gado soleki fa wi Fesiman Yesus Krestes ben taigi wi fu du. Te wi e opo taki gi en, dan a sa blesi wi.” Bakaten, wan Waktitoren artikel kon na doro, èn na ini na artikel dati wan famiriman fu Wilhelm ben taki: „Na ini den muilek ten di pasa, wi leki famiri tan si en leki wan tumusi prenspari sani fu sori lobi gi Gado.” Dati na a denki fu furu brada nanga sisa di e koti strafu now na ini Armenia, Eritrea, Zuid Korea, nanga tra kondre. Den brada nanga sisa disi e tan sori lobi gi Yehovah, awansi san e pasa nanga den.
16. San den Kresten brada nanga sisa fu wi na ini Malawi ben ondrofeni?
16 Na furu presi, wi Kresten brada nanga sisa e kisi fu du nanga tra sortu tesi. Na ini Malawi, lanti ben e gens a wroko fu den Kotoigi fu Yehovah, den ben e kisi hebi frufolgu, èn sma ben e du furu ogri nanga den. A sani disi go doro 26 yari langa. Ma fu di den Kotoigi tan horidoro, meki Gado blesi den. Di den bigin kisi frufolgu, dan sowan 18.000 Kotoigi ben de na ini Malawi. Ma baka 30 yari, 38.393 Kotoigi ben de na ini a kondre, èn dati na moro leki tu tron so furu Kotoigi leki san ben de fosi. Wan srefi sortu sani pasa tu na ini tra kondre.
17. San e miti son Kotoigi di e tan nanga famiriman di no de na bribi? Fa a du kon taki den ben man horidoro aladi sma handri takru nanga den?
17 A no de fu taki, dati a no makriki srefisrefi gi a pipel fu Gado te sma e suku fu du ogri nanga den. Ma te Kresten e kisi fu du nanga famiriman di e gens den, dan dati na wan moro bigi tesi. Memre fu na osofamiri, noso tra famiriman kan meki a libi muilek gi wi. Yesus ben taki dati a sani disi ben o pasa, a no so? Iya, èn furu sma ondrofeni den sani di a taki (Mat. 10:35, 36). Yonguwan kisi gens fu papa nanga mama di no de na bribi. Son yonguwan no ben mag tan moro na oso, ma Kotoigi di abi switifasi kari den fu kon tan nanga den. Tra Kotoigi lasi a reti di den ben abi tapu den famirigudu fu den. San yepi den Kotoigi disi fu horidoro aladi sma handri so takru nanga den? Boiti taki den lobi den Kresten brada nanga sisa fu den, den abi trutru lobi gi Yehovah nanga en Manpikin, èn dati na a moro prenspari sani di yepi den fu horidoro.—1 Petr. 1:22; 1 Yoh. 4:21.
18. Te Kresten di trow abi lobi di e frudrage ala sani, dan fa dati de wan yepi gi den?
18 Furu tra situwâsi de pe wi musu sori lobi di e frudrage ala sani. Te trowpaar lobi makandra, dan dati e yepi den fu sori lespeki gi den wortu disi di Yesus ben taki: „Nowan sma musu prati san Gado poti na ondro wán tyatyari” (Mat. 19:6). Te Kresten di trow e kisi „banawtu na ini den libi”, dan den musu hori na prakseri taki Yehovah na wan prenspari sma di abi wan prati tu na ini a trowlibi fu den (1 Kor. 7:28). A Wortu fu Gado e taki dati ’lobi e frudrage ala sani’, èn masra nanga wefi di abi a fasi disi, sa man tan na makandra èn den sa meki a trowlibi fu den waka bun.—Kol. 3:14.
19. San a pipel fu Gado du baka di rampu pasa?
19 Te wi abi lobi, dan dati e yepi wi fu frudrage ala sani te rampu pasa. Na so a ben de tu di wan gronseki pasa na a zuidsei fu Peru, èn di a bigi winti Katrina pori kontren na ini a Golf fu Mexico na Amerkankondre. Furu fu den Kresten brada nanga sisa fu wi lasi den oso noso den gudu fu den na ini den rampu dati. Fu di den Kresten brada nanga sisa na heri grontapu ben abi lobi, meki den seni sani go fu yepi den Kotoigi dati. Boiti dati, Kotoigi ben de klariklari fu yepi bow den oso baka èn fu seti Kownukondre zaal kon bun baka. Den sani dati e sori taki wi Kresten brada nanga sisa lobi makandra èn taki den e yepi makandra ala ten, awansi san e pasa.—Yoh. 13:34, 35; 1 Petr. 2:17.
Lobi no e kaba noiti
20, 21. (a) Fu san ede lobi na a moro prenspari sani? (b) Fu san ede yu abi a fasti bosroiti fu waka a pasi fu lobi?
20 Na ini a ten disi, a pipel fu Yehovah e waka a pasi fu lobi di bun moro ala trawan, èn wi e si sortu wini dati e tyari kon gi den. Iya, a pasi dati na a moro bun pasi fu waka na ini ala situwâsi. Luku fa na apostel Paulus tyari a sani dati kon na krin. A ben sori fosi taki den presenti fu a yeye ben o kon na wan kaba, èn taki a Kresten gemeente ben o gro kon moro lepi. Baka dati a taki: „Ma now den dri sani disi e tan: bribi, howpu, nanga lobi; ma a moro prenspariwan fu den na lobi!”—1 Kor. 13:13.
21 Te fu kaba, den sani di wi e bribi sa kon tru, èn fu dati ede a no sa de fanowdu moro fu bribi na ini den sani dati. Wi no sa abi fu howpu moro tapu a kontru fu den sani di Gado pramisi wi, fu di ala sani sa kon nyun baka. Ma fa a de nanga lobi? Dati no o kaba noiti. A sa tan fu têgo. Fu di wi e fruwakti fu kisi têgo libi, meki wi kan abi a dyaranti taki wi sa kon si èn frustan a lobi fu Gado moro krin. Te yu e du a wani fu Gado, noso te yu e waka a pasi fu lobi di bun moro ala trawan, dan yu kan kisi têgo libi.—1 Yoh. 2:17.
San yu ben sa piki?
• Fu san ede wi musu luku bun taki wi no e kon abi lobi gi sani di no bun?
• Te wi abi lobi, dan na ondro sortu tesi wi o man horidoro?
• Fu san ede wi kan taki dati lobi no e kaba noiti?
[Aksi fu a tori disi]
[Prenspari pisi na tapu bladzijde 27]
A yaritekst fu 2010 sa de: ’Lobi e frudrage ala sani. Lobi no e kaba noiti.’—1 Kor. 13:7, 8.
[Prenki na tapu bladzijde 25]
A lobi di wi abi gi Gado e gi wi deki-ati fu gi kotoigi
[Prenki na tapu bladzijde 26]
Fu di den Kresten brada nanga sisa na ini Malawi ben e tan sori lobi gi Gado, meki den ben man horidoro na ondro tesi