Meki sma si taki yu e go na fesi
Meki sma si taki yu e go na fesi
„Prakseri bun fu den sani disi; denki soso dati wawan, so taki ala sma kan si taki yu e go na fesi.”—1 TIM. 4:15.
1, 2. San wi e leri fu Timoteyus en libi di a ben yongu ete, èn sortu kenki kon na ini en libi di a ben abi sowan 20 yari?
A YONGU boi Timoteyus ben e libi na ini a distrikt Galasia di ben de na ondro a tiri fu Rome. Na ini a ten disi, wi sabi a distrikt dati leki Torkukondre. Baka di Krestes dede, dan difrenti Kresten gemeente seti drape. Te fu kaba, a yongu boi Timoteyus, en mama, nanga en granmama tron Kresten, èn den bigin dini na ini wan fu den gemeente (2 Tim. 1:5; 3:14, 15). A no de fu taki dati di Timoteyus ben de wan yongu Kresten, dan a ben e libi na mindri den famiri nanga mati fu en. Na a ten dati, a no ben abi tumusi furu broko-ede. Ma wantronso, sani bigin kenki.
2 Dati pasa di na apostel Paulus go luku den gemeente drape fu a di fu tu leisi. A kan taki Timoteyus ben abi sowan 20 yari na a ten dati. Kande a ben de so taki di Paulus ben de na Listra, dan a si taki ’den brada fu den gemeente drape ben e taki soso bun sani’ fu Timoteyus (Tori. 16:2). A ben musu de so taki Timoteyus ben lepi srefisrefi, aladi a ben yongu. Sobun, nanga yepi fu santa yeye, Paulus nanga den owruman fu a gemeente poti den anu na tapu Timoteyus, èn den gi en a grani fu tyari spesrutu frantwortu na ini a gemeente.—1 Tim. 4:14; 2 Tim. 1:6.
3. Sortu bigi grani Timoteyus ben kisi?
3 Timoteyus ben kisi wan tumusi aparti kari. A ben kisi a kari fu go dini leki zendeling makandra nanga Paulus! (Tori. 16:3) A no de fu taki dati Timoteyus no ben man bribi taki a kisi a kari dati, èn a ben breiti srefisrefi! Wan tu yari langa Timoteyus ben o teki waka makandra nanga Paulus, èn son leisi a ben o go makandra nanga tra brada. A ben o du difrenti wroko gi den apostel nanga den owruman. Paulus nanga Timoteyus ben e go na difrenti gemeente, èn a sani dati tranga a bribi fu den Kresten brada nanga sisa. (Leisi Tori fu den Apostel 16:4, 5.) Na so furu Kresten kon sabi Timoteyus leki wan man di ben go na fesi trutru na ini a tru anbegi. Baka di Paulus ben wroko sowan tin yari makandra nanga Timoteyus, dan Paulus skrifi gi den Filipisma: „Mi no abi nowan tra sma di e denki leki fa [Timoteyus] e denki èn di sa sorgu trutru gi den sani di abi fu du nanga unu. . . . Ma unu sabi taki a ben buweisi taki a bun nofo, bika neleki fa wan pikin de nanga en papa, na so a ben wroko tranga nanga mi, so taki a bun nyunsu ben kan go na fesi.”—Fil. 2:20-22.
4. (a) Sortu bigi frantwortu Timoteyus ben kisi? (b) Sortu aksi e opo kon te wi e luku san Paulus e taki na 1 Timoteyus 4:15?
4 Na a pisi ten di Paulus ben skrifi a brifi gi den Filipisma, a gi Timoteyus wan bigi frantwortu. Timoteyus ben musu poti brada leki owruman èn leki dinari ini a diniwroko (1 Tim. 3:1; 5:22). A no de fu taki, dati Timoteyus ben tron wan Kresten owruman di sma ben kan frutrow na tapu. Ma na ini a srefi brifi dati, Paulus gi Timoteyus a rai fu ’meki ala sma si taki a e go na fesi’ (1 Tim. 4:15). Timoteyus ben sori krin kaba taki a ben go na fesi? Sobun, san Paulus ben wani taki nanga den wortu dati? San wi kan leri fu a rai fu en?
Sma musu man si taki wi e go na fesi
5, 6. Fa sma ben e suku fu tyari prati kon na ini a gemeente? San Timoteyus ben musu du fu tapu pasi gi a sani dati?
5 Meki wi poti prakseri na den tekst lontu 1 Timoteyus 4:15. (Leisi 1 Timoteyus 4:11-16.) Fosi Paulus ben skrifi den wortu dati, a ben go na Masedonia, ma a ben aksi Timoteyus fu tan na ini Efeise. Fu san ede? Son sma na ini a foto dati ben e kon nanga falsi leri, èn a sani dati ben kan tyari prati kon na ini a gemeente. Timoteyus ben musu sorgu taki a gemeente ben e tan krin. Fa a ben musu du dati? Wan sani di a ben musu du, na taki a ben musu de wan bun eksempre gi trawan.
6 Paulus ben skrifi Timoteyus: „Yu musu tron wan eksempre gi den getrow sma nanga a fasi fa yu e taki, nanga a fasi fa yu e tyari yusrefi, nanga a lobi fu yu, nanga a bribi fu yu, èn nanga a krin libi fu yu.” Paulus ben taki moro fara: „Prakseri bun fu den sani disi; denki soso dati wawan, so taki ala sma kan si taki yu e go na fesi” (1 Tim. 4:12, 15). Di Paulus ben gi Timoteyus a rai fu go na fesi, dan a no ben e taigi en fu pruberi fu kisi moro frantwortu na ini a gemeente. Fu taki en leti, Paulus ben taigi en fu kweki den fasi di Kresten musu abi. Na so ibri Kresten musu sori taki a e go na fesi.
7. San ala sma na ini a gemeente musu du?
7 Na ini a ten disi, Kresten brada e tyari difrenti frantwortu tu na ini a gemeente, neleki fa a ben de na ini a ten fu Timoteyus. Son brada e dini leki owruman noso leki dinari ini a diniwroko. Tra brada e dini leki pionier. Ma trawan baka e dini leki opziener di e go na difrenti gemeente, den e dini na Bethel, noso leki zendeling. Owruman e teki prati na difrenti programa fu gi sma leri. Wan tu fu den programa dati na den bigi konmakandra nanga den kongres. Ma ala Kresten, namku mansma, umasma, nanga yonguwan, man sori taki den e go na fesi na ini a tru anbegi (Mat. 5:16). Fu taki en leti, srefi Kresten di abi spesrutu frantwortu na ini a gemeente musu meki sma si taki den e go na fesi na ini a tru anbegi.
De wan eksempre te a abi fu du nanga a fasi fa yu e taki
8. Sortu krakti den sani di wi e taki kan abi tapu na anbegi fu wi?
8 Wán fasi fa Timoteyus ben musu de wan eksempre, na taki a ben musu taki na wan fasi di fiti. Fa wi kan sori taki wi e go na fesi te abi fu du nanga a tori dati? Den sani di wi e taki e sori krin sortu sma wi de. Yesus abi leti di a ben taki: „San furu na ati, na dati mofo e taki” (Mat. 12:34). Yakobus, Yesus en afu-brada, ben kon si sortu krakti den sani di wi e taki kan abi tapu na anbegi fu wi. A ben skrifi: „Efu wan sma feni taki a e anbegi Gado na a yoisti fasi, ma a no e basi en tongo, èn a e tan kori en eigi ati, dan a sma disi e anbegi Gado fu soso.”—Yak. 1:26.
9. Fa wi kan de wan eksempre te a abi fu du nanga a fasi fa wi e taki?
9 Den sani di wi e taki kan sori sma na ini a gemeente efu wi e go na fesi. Dati meki lepi Kresten no e taki sani di no fiti, den no e taki sani di no e gi trawan deki-ati, den no e krutu trawan, èn den no e hati den firi fu trawan. Na presi fu dati, den e gi trawan deki-ati, den e trowstu den, èn den e tranga a bribi fu den (Odo 12:18; Ef. 4:29; 1 Tim. 6:3-5, 20). Te wi de klariklari fu taki fu a bribi fu wi èn fu opo taki gi den hei markitiki fu Gado, dan dati sa meki sma si taki wi lobi Gado nanga wi heri ati (Rom. 1:15, 16). A no de fu taki dati reti-ati sma sa si fa wi e taki, èn den sa teki na eksempre fu wi.—Fil. 4:8, 9.
Tyari yusrefi na wan fasi di fiti èn libi wan krin libi
10. Fu san ede wi no musu hoigri efu wi wani go na fesi leki Kresten?
10 Wan Kresten di wani de wan bun eksempre gi trawan, musu du moro leki fu taki sani nomo di e gi trawan deki-ati. Te wan sma e taki bun sani aladi a no e du san a e taki, dan a sma dati na wan hoigriman. Paulus ben sabi heri bun fa den Fariseiman ben e hoigri, èn a ben sabi tu sortu takru bakapisi a sani dati ben tyari kon. A warskow Timoteyus moro leki wán leisi fu no abi a bedrigifasi dati èn fu no hoigri (1 Tim. 1:5; 4:1, 2). Ma Timoteyus no ben de wan hoigriman. Na ini a di fu tu brifi di Paulus ben skrifi gi Timoteyus, a ben skrifi: „Mi e memre yu leki wan sma di abi trutru bribi sondro fu hoigri” (2 Tim. 1:5). Ma Timoteyus ben musu meki sma si taki a ben de wan trutru Kresten. A ben musu tyari ensrefi na wan fasi di fiti, so taki a ben kan de wan eksempre gi trawan.
11. Sortu rai Paulus ben gi Timoteyus te a abi fu du nanga gudu?
11 Na ini den tu brifi di Paulus ben skrifi gi Timoteyus, a gi en difrenti rai fu sori en fa a ben musu tyari ensrefi. Fu eksempre, Timoteyus no ben musu suku fu kon gudu. Paulus ben skrifi: „Te wan sma lobi moni, dan dati na wan rutu fu ala sortu ogri sani; fu di son sma kweki lobi gi moni, meki den gowe libi a bribi èn den gi densrefi furu sari nanga pen” (1 Tim. 6:10). Te wan sma lobi gudu, dan dati e sori taki a bribi fu en no tranga nofo. Ma Kresten di de tevrede te den „abi nyanyan, krosi nanga wan presi fu tan”, e sori taki den na lepi Kresten.—1 Tim. 6:6-8; Fil. 4:11-13.
12. Fa wi kan meki sma si taki wi e go na fesi leki Kresten na ini wi aladei libi?
12 Paulus ben taigi Timoteyus o prenspari a de taki Kresten uma e ’moi densrefi nanga krosi di fiti, èn taki den e du dati na wan lespeki fasi èn nanga krin frustan’ (1 Tim. 2:9). Te umasma e weri krosi di fiti, te den e moi densrefi na wan lespeki fasi èn nanga krin frustan, èn te den e libi tu na wan fasi di fiti, dan den de bun eksempre gi trawan (1 Tim. 3:11). Kresten brada musu hori densrefi tu na a gronprakseri disi. Paulus ben gi owruman a rai fu ’no du sani pasa marki, fu de nanga krin frustan, èn fu orga den libi bun’ (1 Tim. 3:2). Te wi e sori den fasi disi na ini wi aladei libi, dan ala sma sa si taki wi e go na fesi leki Kresten.
13. Fa wi kan sori taki wi e libi wan krin libi, neleki fa Timoteyus ben e du dati?
13 Timoteyus ben musu libi wan krin libi, so taki a ben kan de wan eksempre gi trawan. Di Paulus taki den wortu dati, dan a ben e taki fu wan spesrutu sani, namku taki Timoteyus ben musu tyari ensrefi na wan krin fasi. Timoteyus ben musu luku bun spesrutu taki sma no ben abi nowan enkri takru sani fu taki fu a fasi fa a ben e handri nanga umasma. A ben musu handri nanga ’den owru uma neleki den ben de en eigi mama, nanga den yongu uma neleki den ben de en eigi sisa, èn a ben musu du dati nanga wan krin ati’ (1 Tim. 4:12; 5:2). Srefi te sma e du hurudu kibrikibri, toku Gado sa sabi dati, èn te fu kaba tra sma sa kon sabi fu a tori. Ma te wan Kresten e du bun, dan te fu kaba sma sa si dati tu (1 Tim. 5:24, 25). Ala sma na ini a gemeente abi na okasi fu sori taki den e tyari densrefi na wan fasi di fiti èn taki den e libi wan krin libi. Na so sma sa si taki den e go na fesi.
Sori lobi gi trawan èn sori taki yu abi bribi
14. Fa Bijbel e sori krin taki wi musu sori lobi gi makandra?
14 Wan prenspari fasi di tru Kresten musu abi, na lobi. Yesus ben taigi den disipel fu en: „Na a fasi disi ala sma o sabi taki unu na mi disipel, te unu lobi makandra” (Yoh. 13:35). Fa wi kan sori taki wi abi a lobi dati? Gado Wortu e gi wi deki-ati fu „frudrage makandra nanga lobi”. Wi e kisi deki-ati tu fu ’tron sma di e du bun gi makandra, di e sori sari-ati na wan lobi fasi, èn di e gi makandra pardon’. Boiti dati, wi musu sori switifasi tu gi trawan (Ef. 4:2, 32; Hebr. 13:1, 2). Na apostel Paulus ben skrifi: „Neleki fa brada lobi makandra, na so un musu abi dipi firi gi makandra.”—Rom. 12:10.
15. Fu san ede wi alamala, èn spesrutu Kresten owruman musu sori lobi gi trawan?
15 Efu Timoteyus no ben e sori switifasi gi den Kresten brada nanga sisa fu en, dan a no ben o abi bun bakapisi leki leriman nanga owruman. (Leisi 1 Korentesma 13:1-3.) Ma fu di Timoteyus ben e sori trutru lobi gi den brada nanga sisa fu en, fu di a ben e sori switifasi gi den, èn fu di a ben e du bun gi den, meki a ben de krin fu si taki a ben e go na fesi. Dati meki wi kan frustan fu san ede Paulus ben taigi Timoteyus krin fu sori lobi gi den Kresten brada nanga sisa, so taki a ben kan de wan eksempre gi den.
16. Fu san ede Timoteyus ben musu sori taki a abi wan tranga bribi?
16 Di Timoteyus ben e tan na ini Efeise, dan a bribi fu en kisi tesi. Wan tu sma ben e leri trawan sani di no ben e kruderi nanga a tru Kresten bribi. Tra sma ben e panya „leitori”, noso den ben e poti prakseri na tori di no ben e yepi fu tranga a gemeente. (Leisi 1 Timoteyus 1:3, 4.) Paulus ben taki dati den sortu sma disi ben ’abi bigimemre; den no ben sabi noti, ma den ben lobi poti aksi di e tyari trobi kon èn den ben lobi haritaki fu wortu ede’ (1 Tim. 6:3, 4). Yu denki taki a ben o bun te Timoteyus ben o poti prakseri na den falsi leri disi di sma ben e tyari kon na ini a gemeente? Nôno, bika Paulus taigi Timoteyus fu „feti a bun feti di abi fu du nanga a bribi”. Paulus ben taigi en tu fu no poti prakseri na ’soso sani di e pori santa sani, èn fu no arki te sma e taki fu tori di no e agri nanga makandra, bika na den tori disi sma e kari „sabi”, ma den na soso lei’ (1 Tim. 6:12, 20, 21). Wi kan de seiker taki Timoteyus ben gi yesi na a koni rai fu Paulus.—1 Kor. 10:12.
17. Fa a bribi fu wi kan kisi tesi na ini a ten disi?
17 A moi fu sabi taki Paulus ben taigi Timoteyus taki „bakaten son sma [ben] o gowe libi a bribi fu di den o poti prakseri na sani di ogri yeye taki fu bedrigi sma èn den o poti prakseri sosrefi na den leri fu den ogri yeye” (1 Tim. 4:1). Ala sma na ini a gemeente, sosrefi den wan di abi frantwortu, musu sori taki den abi wan tranga bribi, neleki fa Timoteyus ben abi dati. Te wi e sori krin taki wi no wani abi noti fu du nanga sma di e panya falsi leri, dan sma sa si taki wi e go na fesi, èn taki wi abi wan tranga bribi. Na so wi sa de wan eksempre gi den.
Du muiti fu go na fesi
18, 19. (a) Fa yu kan sori taki yu e go na fesi? (b) Na sortu tori wi sa poti prakseri na ini a tra artikel?
18 A de krin taki a no den krosi di wan Kresten e weri, noso a fasi fa a e moi ensrefi, e sori taki a e go na fesi. Den koni fu wan Kresten, noso den grani di a abi, no e sori dati tu. Awansi a sma dati e dini furu yari langa na ini a gemeente, toku dati no wani taki tu dati a de wan lepi Kresten. Ma a sani di e sori taki wi e go na fesi trutru leki Kresten, na taki wi e gi yesi na Yehovah te a abi fu du nanga den sani di wi e prakseri, a fasi fa wi e taki, èn a fasi fa wi e tyari wisrefi (Rom. 16:19). Wi musu gi yesi na a komando di wi kisi fu lobi makandra èn fu kweki wan tranga bribi. Iya, meki wi denki dipi fu den rai di Paulus ben gi Timoteyus, èn meki wi tan hori den sani dati na prakseri, so taki ala sma kan si taki wi e go na fesi.
19 Te wi e go na fesi, èn te wi e tron lepi Kresten, dan sma sa man si tu taki wi abi prisiri. Dati na wan pisi fu a froktu fu Gado en santa yeye (Gal. 5:22, 23). Na ini a tra artikel, wi sa luku san wi musu du fu kon abi prisiri èn fu tan abi prisiri na ini muilek ten.
San yu ben sa piki?
• San trawan kan leri fu den sani di wi e taki?
• Fa a fasi fa wi e tyari wisrefi èn a fasi fa wi e libi e sori taki wi e go na fesi?
• Fu san ede Kresten musu sori lobi gi trawan, èn fu san ede den musu abi wan tranga bribi?
[Aksi fu a tori disi]
[Prenki na tapu bladzijde 11]
Timoteyus ben sori taki a ben lepi srefisrefi aladi a ben yongu
[Prenki na tapu bladzijde 13]
Sma man si taki yu e go na fesi?