Tan abi prisiri na ini muilek ten

„Ala den sma di e kon suku yepi na [Yehovah], o breiti. Fu ala ten den o bari fu prisiri.”​—PS. 5:11.

1, 2. (a) San na wan tu fu den sani di e gi libisma furu broko-ede na ini a ten disi? (b) Boiti den rampu di e miti libisma, sortu tra sani e miti tru Kresten?

NELEKI ala tra libisma, Yehovah Kotoigi e kisi fu du tu nanga rampu. Furu fu den futuboi fu Gado e kisi fu du nanga den takru bakapisi fu ogridu, orloku, nanga tra sortu kruktudu. Rampu, pôtifasi, siki, nanga dede e gi sma furu broko-ede. Dati meki na apostel Paulus ben abi leti di a skrifi: „Wi sabi taki ala den sani di Gado meki, e tan geme èn te now ete den alamala abi pen” (Rom. 8:22). Boiti dati, wi na sondu libisma. Neleki Kownu David fu owruten, wi e taki kande: „Den fowtu fu mi kon furu so te, taki a gersi leki den sungu mi. Den de leki wan hebi na mi tapu, iya, neleki wan lai di hebi tumusi gi mi fu tyari.”​—Ps. 38:4.

² Boiti den rampu di e miti libisma, tru Kresten e tyari na agersi pina-postu (Luk. 14:27). Iya, neleki fa sma ben abi bita-ati gi Yesus èn ben e frufolgu en, na so den e du tu nanga den  disipel fu en (Mat. 10:22, 23; Yoh. 15:20; 16:2). Dati meki wi leki bakaman fu Krestes, musu du tranga muiti, èn wi musu horidoro aladi wi e wakti den blesi di wi sa kisi na ini a nyun grontapu.​—Mat. 7:13, 14; Luk. 13:24.

3. Fa wi du sabi taki Kresten no abi fu sari den heri libi langa fu man plisi Gado?

³ A sani disi wani taki dati a libi fu tru Kresten no e gi prisiri èn taki den no de koloku? A de so taki wi libi musu lai nanga sari èn nanga pina teleki a kaba doro? A de krin taki Yehovah wani taki wi musu de koloku, aladi wi e wakti teleki den pramisi fu en kon tru. Ibri leisi baka, Bijbel e sori taki tru anbegiman na koloku sma. (Leisi Yesaya 65:13, 14.) Psalm 5:11 e taki: „Ala den sma di e kon suku yepi na [Yehovah], o breiti. Fu ala ten den o bari fu prisiri.” Iya, awansi rampu e miti wi, toku wi man de nanga prisiri, wi man abi wan korostu firi, èn wi man de koloku. Meki wi go luku baka fa Bijbel kan yepi wi fu de nanga prisiri aladi tesi e miti wi.

Yehovah, „a koloku Gado”

4. Fa Gado e firi te sma e weigri fu saka densrefi na ondro a tiri fu en?

⁴ Meki wi luku na eksempre fu Yehovah, na Almakti Gado. A Gado disi e tiri hemel nanga grontapu. A no abi noti fanowdu, èn a no abi nowan sma fanowdu tu. Ma aladi a makti pasa marki, toku a musu ben firi sari di wan fu den yeye manpikin fu en opo ensrefi teige En èn a tron Satan. A ben musu de so, taki a ben hati Gado di tra engel go horibaka gi Satan bakaten. Prakseri tu fa Gado ben sari di Adam nanga Eva, den moro prenspari sani di a ben meki na grontapu, drai baka gi en. Sensi a ten dati, milyardmilyard fu den bakapikin fu Adam nanga Eva weigri fu saka densrefi na ondro a tiri fu Yehovah.​—Rom. 3:23.

5. Sortu sani meki Yehovah firi sari srefisrefi?

⁵ Te nanga now, sma e tan opo densrefi teige Gado, soleki fa Satan e gi den deki-ati fu du. Sowan 6000 yari langa, Yehovah si fa sma e anbegi falsi gado, fa den e du ogridu, fa den e kiri trawan, èn fa den abi seks na ala sortu morsu fasi (Gen. 6:5, 6, 11, 12). Boiti dati, a yere fa sma fruteri ogri-ati lei fu en, èn fa den e taki ogri fu en. Srefi den tru anbegiman fu Gado hati den firi fu en ten na ten. Luku san Bijbel e taki fu wan fu den situwâsi dati: „Someni leisi den ben e opo densrefi teige en na ini a gran sabana, den ben e meki a firi sari na ini a sabana! Èn ibri tron baka, den ben e tesi Gado, èn den ben e meki a Santawan fu Israel firi sari” (Ps. 78:40, 41). Yehovah e sari srefisrefi te a pipel fu en e weigri fu gi yesi na en (Yer. 3:1-10). A no  de fu taki, dati takru sani e pasa na ini a libi, èn den sani dati e meki Yehovah firi sari srefisrefi.​—Leisi Yesaya 63:9, 10.

6. San Gado e du te sani e pasa di e meki a firi sari?

⁶ Ma toku Yehovah no e sari so te, taki a no man du noti moro. Te problema opo kon, dan wantewante a e handri fu sorgu taki a problema no e kon moro bigi. A du sani tu fu sorgu taki te fu kaba a wani fu en e kon tru. Fu di Yehovah du den bun sani disi, meki a e wakti nanga prisiri teleki a sa kon na krin taki na en abi a reti fu tiri hemel nanga grontapu. A e wakti nanga prisiri tu fu blesi den reti-ati anbegiman fu en (Ps. 104:31). Iya, aladi sma taki takru sani fu Yehovah, toku a e tan „a koloku Gado”.​—1 Tim. 1:11; Ps. 16:11.

7, 8. Fa wi kan teki na eksempre fu Yehovah te sani no e waka bun?

⁷ A no de fu taki, dati wi no man lusu problema neleki fa Yehovah man du dati. Ma toku wi kan teki na eksempre fu Yehovah te wi e kisi fu du nanga problema. A tru taki ala sma e firi brokosaka pikinso te sani no e waka bun, ma wi no abi fu firi brokosaka dorodoro. Fu di Yehovah meki wi leki wan prenki fu en, meki wi kan leri fu gebroiki wi frustan bun èn fu handri nanga koni. Na so wi kan kon sabi san wi kan du te problema e miti wi.

⁸ Ma wan prenspari sani de di kan yepi wi te wi e kisi fu du nanga problema. Wi musu hori na prakseri, taki son leisi wi no man du noti fu kenki a situwâsi fu wi. Te wi e broko wi ede tumusi nanga den sortu tori dati, dan dati kan meki wi firi moro sari, èn a tru anbegi no sa gi wi prisiri moro. Baka te wi du ala san wi man fu lusu wan problema, dan a bun fu libi a sani èn fu poti prakseri na moro prenspari sani. Den Bijbel tori di e kon now sa tyari dati kon na krin.

Son leisi wi musu teki sani soleki fa den de

9. Fa Hana sori taki a ben e teki sani soleki fa den de?

⁹ Luku na eksempre fu Hana, di te fu kaba tron a mama fu a profeiti Samuel. Hana ben e sari fu di a no ben man kisi pikin, èn fu di sma ben e spotu en. Son leisi, a ben e krei, èn a no ben e nyan (1 Sam. 1:2-7). Wan leisi di Hana ben de na ini a santa presi fu Yehovah, dan a „ben e sari srefisrefi, èn a bigin begi Yehovah èn a krei langalanga watra-ai” (1 Sam. 1:10). Baka di Hana taigi Yehovah san ben de tapu en ati, dan Eli, a granpriester waka kon na en, èn a taigi en: „Meki sani waka bun nanga yu, èn meki a Gado fu Israel gi yu san yu aksi en” (1 Sam. 1:17). A no de fu taki dati na a pisi ten dati, Hana ben frustan taki a ben du ala san a ben man du. A no ben man yepi taki a no ben man kisi pikin. Hana teki sani soleki fa den ben de. Baka dati a „gowe go nyan, èn a no ben de nanga wan sari fesi moro”.​—1 Sam. 1:18.

10. Sortu bun denki Paulus ben abi di a kisi wan problema di a no ben man lusu?

¹⁰ Na apostel Paulus ben abi a srefi denki disi di a kisi fu du nanga problema. A ben abi wan problema di ben e gi en furu broko-ede. A ben taki dati a problema dati ben de leki ’wan maka na ini en skin’ (2 Kor. 12:7). Aladi wi no sabi sortu problema Paulus ben abi, toku a ben du san a ben man fu feni wan lusu gi a problema dati, èn a begi Yehovah fu yepi en. Omeni leisi Paulus begi Yehovah fu a sani dati ede? Dri leisi. Baka a di fu dri leisi, Gado taigi Paulus taki a no ben o du wan wondru fu puru a ’maka na ini en skin’. Paulus teki sani soleki fa den ben de èn a gebroiki ala en ten nanga en krakti fu dini Yehovah dorodoro.​—Leisi 2 Korentesma 12:8-10.

11. Te wi e kisi fu du nanga problema, dan fa den begi fu wi kan yepi wi?

¹¹ Den eksempre disi no wani taki dati wi musu tapu fu begi Yehovah fu yepi wi te wi de na nowtu (Ps. 86:7). Tra fasi leki dati, Gado e gi wi a rai disi: „No broko un ede nanga nowan sani, ma begi Gado ala san unu wani, èn du dati fayafaya sosrefi, èn taki en tangi tu.” Fa Yehovah sa piki den begi dati? Bijbel e taki moro fara: „Èn a vrede fu Gado di bigi moro leki san libisma man frustan, sa kibri un ati èn un  frustan nanga yepi fu Krestes Yesus” (Fil. 4:6, 7). Iya, kande Yehovah no sa lusu a problema fu wi, ma a kan kibri wi frustan. Baka te wi begi Yehovah fu a tori, dan wi sa kon abi wan korostu firi, èn wi o man si moro krin sortu takru bakapisi a ben o tyari kon te wi ben o tan broko wi ede nanga a problema.

Dini Gado nanga prisiri

12. Fu san ede a no bun te sma e tan firi brokosaka?

¹² Odo 24:10 e taki nanga leti: „Yu ben e firi brokosaka a dei di yu ben de na ini banawtu? Yu no sa abi furu krakti.” Wan tra odo e taki: „Te na ati e sari, dan dati e meki wan sma firi brokosaka” (Odo 15:13). Son Kresten lasi-ati so te, taki den tapu fu leisi Bijbel èn fu denki dipi fu Gado Wortu. Te den e begi Gado, dan den no e du dati nanga den heri ati. Kande den no abi demakandra moro tu nanga den Kresten brada nanga sisa fu den. A de krin taki te wi e tan firi brokosaka, dan dati kan tyari takru bakapisi kon gi wi.​—Odo 18:1, 14.

13. Sortu sani wi kan du fu no firi brokosaka moro èn fu kon de nanga prisiri?

¹³ Ma te wi abi wan bun denki fu sani, dan dati sa yepi wi fu tan poti prakseri na sani di e gi wi prisiri na ini a libi. David ben skrifi: „Gado, mi lobi fu du a wani fu yu, èn a wet fu yu de na ini mi ati” (Ps. 40:8). Te sani no e waka bun na ini wi libi, dan noiti wi no musu tapu nanga a bun gwenti di wi abi fu anbegi Gado. Fu taki en leti, wan sani di e yepi wi fu no firi sari moro, na te wi e du sani di e meki wi firi koloku. Yehovah e taigi wi taki te wi e leisi a Wortu fu en doronomo, dan dati sa gi wi prisiri, èn wi sa de koloku (Ps. 1:1, 2; Yak. 1:25). Den „switi wortu” di skrifi na ini den Santa Buku fu Bijbel, èn di wi e yere na den Kresten konmakandra, kan gi wi deki-ati, èn den kan meki wi ati prisiri.​—Odo 12:25; 16:24.

14. Sortu sani di Yehovah pramisi wi e gi wi prisiri now?

¹⁴ Gado e gi wi furu reide fu de nanga prisiri. Wi e firi koloku trutru fu di a pramisi wi taki a sa frulusu wi (Ps. 13:5). Wi sabi taki awansi san e miti wi now, te fu kaba, Gado sa blesi den wan di e suku en nanga den heri ati. (Leisi Preikiman 8:12.) A profeiti Habakuk ben bribi dati, èn a tyari dati kon na krin nanga den moi  wortu disi: „Kande den figabon no o gi figa èn den droifibon no o abi froktu. Kande den olèifbon no o gi bun froktu èn den gron no o gi nyanyan. Kande skapu no o de na ini den skapu-pen moro èn kaw no o de na ini den kaw-pen moro. Toku mi o de nanga bigi prisiri fu Yehovah ede. Mi o prisiri nanga a Gado di o frulusu mi.”​—Hab. 3:17, 18.

„Koloku fu den sma di abi Yehovah leki Gado!”

15, 16. Kari wan tu fu den moi sani di Gado gi wi èn di kan gi wi prisiri, aladi wi e wakti den blesi di a pramisi wi.

¹⁵ Aladi wi e wakti a moi ten di de na wi fesi, Yehovah wani taki wi musu prisiri nanga den bun sani di a e gi wi. Bijbel e taki: „Mi kon sabi taki nowan sani moro bun gi libisma leki fu prisiri èn fu du bun na ini a libi fu den. Mi kon sabi tu taki ibri sma musu nyan, dringi èn prisiri nanga ala a tranga wroko di a e du. Na wan presenti fu Gado” (Preik. 3:12, 13). Den wortu „du bun”, wani taki dati wan sma e du bun sani gi trawan. Yesus ben taki dati wan sma sa de moro koloku te a e gi sani leki te a e kisi sani. Te wi e sori switifasi gi wi trowpatna, gi wi pikin, wi papa nanga mama, èn gi tra famiriman, dan wi sa de koloku trutru (Odo 3:27). Te wi abi safri-ati, te wi e sori switifasi gi trawan, èn te wi de klariklari fu gi den Kresten brada nanga sisa fu wi pardon, dan dati e gi wi furu prisiri tu. Boiti dati, Yehovah sa feni wi bun (Gal. 6:10; Kol. 3:12-14; 1 Petr. 4:8, 9). Èn te wi de klariklari fu gi wisrefi na ini a diniwroko, dan dati e gi wi prisiri trutru.

¹⁶ Den wortu di kari na Preikiman 3:12, 13, e taki fu aladei sani di e gi wi prisiri, soleki nyan nanga dringi. Iya, awansi wi e kisi tesi, toku den moi sani di Yehovah gi wi kan gi wi prisiri. Boiti dati, wan moi sondongo, wan moi kontren, a fasi fa yongu meti e prei so moi nanga makandra, èn sosrefi tra moi sani di Yehovah meki, na sani di wi kan luku sondro taki wi abi fu pai gi dati. Ma toku den sani disi kan naki wi ati, èn den kan gi wi prisiri. Te wi e poti prakseri na den sortu sani dati, dan wi e kisi moro lobi gi Yehovah, fu di en na a Sma di e gi wi ala bun sani.

17. Fa wi sa kon fri dorodoro fu den problema fu a libi, èn san e gi wi trowstu now?

¹⁷ Te wi lobi Gado, te wi e gi yesi na den komando fu en, èn te wi e poti bribi na ini a frulusu-ofrandi, dan te fu kaba wi sa kon fri dorodoro fu den problema di a sondu libi fu wi e tyari kon. Boiti dati, wi sa prisiri fu têgo (1 Yoh. 5:3). Na a srefi ten, wi e kisi trowstu fu di wi sabi taki Yehovah e frustan heri bun sortu sani e miti wi. David ben skrifi: „Mi o breiti èn mi o prisiri, fu a bun di yu o du gi mi, fu di yu si a banawtu fu mi. Yu sabi heri bun fa mi e pina” (Ps. 31:7). Fu di Yehovah lobi wi, meki a sa frulusu wi te rampu e miti wi.​—Ps. 34:19.

18. Fu san ede a pipel fu Gado musu de nanga prisiri?

¹⁸ Aladi wi e wakti a kontru fu den pramisi fu a koloku Gado, Yehovah, a ben o bun te wi e teki na eksempre fu en. Meki wi no gi pasi taki den broko-ede fu wi e tapu wi fu dini Yehovah. Te wi e kisi fu du nanga problema, dan wi musu gebroiki wi frustan, èn wi musu handri nanga koni. Yehovah sa yepi wi fu basi den firi fu wi èn fu du iniwan sani di de fanowdu fu no ondrofeni tumusi furu takru bakapisi fu den rampu di e pasa. Meki wi kisi prisiri fu ala den bun sani di Gado e gi wi, awansi sortu sani na dati. Te wi e tan krosibei na Gado, dan wi sa de koloku, fu di ’den sma di abi Yehovah leki Gado, na koloku sma!’​—Ps. 144:15.

San yu ben leri?

• Fa wi kan teki na eksempre fu Yehovah te problema e miti wi?

• Fu san ede wi musu teki sani soleki fa den de son leisi, te wi e kisi fu du nanga problema?

• Te wi e du a wani fu Gado, dan fa dati kan gi wi prisiri te wi abi broko-de?

[Aksi fu a tori disi]

[Prenki na tapu bladzijde 16]

Den takru sani di e pasa e meki Yehovah firi sari

[Sma di abi a reti fu a prenki]

© G.M.B. Akash/​Panos Pictures

[Prenki na tapu bladzijde 18]

Yehovah gi wi reide fu tan abi prisiri